Uꞌyowun wa̱ Yesu a̱tsuma̱ o ukwa̱
16
Ana urana wa Ashibi u ka̱ra̱i,
a̱vu Meri Magadaliya na̱ Meri mma va Yakubu na̱ Solomi a tsula itana i ma̱guru,
adama a̱ ta̱wa̱ a sukuma lipu va̱ Yesu.
2 A̱vu a̱ ta̱wa̱ na̱ wasasa o urana wa Aladi,
cina usana u tawa ɗaɗa a̱ ta̱wa̱i a aasoꞌon.
3 A̱vu a dammulai,
“Zane ɗa ee keɓe tsu aatali o ndolo o una̱ wa aasoꞌon?”
4 Ana a̱ ꞌya̱sa̱in esu e le,
a̱vu a cina e keɓe ɗe aataliꞌi agba aatali a gbain a ɗa a̱ da̱na̱i.
5 Ana a uwai a aasoꞌon,
reve e ene ulobo u ro nden o ukere usaꞌani,
ni itana i uꞌuri.
Reve a uwa asalama.
6 A̱vu u damma le,
“She i uwa asalama wan.
N reve ta̱ i te izami ya̱ Yesu za va Nazara,
za na a varai a akpata.
Wu pa shi.
U ꞌyon ta̱.
Ka̱lyuwa̱i uba̱ta̱ u na u da̱na̱i.
7 ꞌYa̱wa̱i i damma ojoro a̱ yi na̱ Bituru u ta̱ ɗe elime a̱ ɗu a̱ ꞌya̱wa̱ Ga̱lili.
I te ene yi ununa u damma nɗu.”
8 Ana o uta̱i,
a̱vu a suma ni ilaɗi.
Reve e reme asalama na̱ mejeꞌen ma̱ lipu.
A damma za shi,
adama a na wovon u reme nle.
Yesu ꞌya̱wa̱ ta̱ uba̱ta̱ wa̱ Meri Magadaliya
9 [Nu usana u na Yesu ꞌyoyin o urana wa Aladi,
Meri Magadaliya ɗa fara ene niyi,
za na wu uta̱yi otoni a̱ lima̱ e cindere a̱tsuma̱ a̱ yi.
10 U ꞌya̱wa̱ ta̱ damma otoni a̱ yi,
aza a na a̱ da̱na̱i a saali na̱ a̱tsumola̱ngu.
11 Ana a uwwai u ta̱ wuma,
hali we ene yi,
reve a ꞌyuwan a̱ usu.
Yesu roco ta̱ aciya̱yi uba̱ta̱ wo ojoro e re
12 Ana addama o ndolo o kotoi,
a̱vu Yesu ta̱wa̱ uba̱ta̱ wa ama e re a̱tsuma̱ e le no oroci o ro,
ele a mmalu o ure a̱ tyo a̱ ma̱lyuci.
13 A̱vu a̱ ꞌya̱wa̱ a damma akapiꞌi,
agba a̱ usu shi.
Yesu damma ta̱ ojoro a̱ yi ili i na aa yuwan
14 Na̱ a̱ca̱pa̱ a ɗa u ta̱wa̱i uba̱ta̱ wo ojoro kupa na̱ za ta̱ꞌa̱,
ele nden a alya e ilyalya.
A̱vu u yuwaan le nla̱ngi adama o okolo o ugbamu u le nu ulambu u na a cayi okolo.
Adama a na a ꞌyuwain a̱ usu ili i na aza a na e ene niyi a damma nle cina u ꞌyon.
15 A̱vu u damma le,
“ꞌYa̱wa̱i a̱tsuma̱ o uvaɗi suru i yuwaan ama alajiya a Alabari a Saꞌani.
16 Za na usuyi a̱ rumbu niyi waru,
a ta wawa yi.
Amma za na usuyi shi,
wa̱a̱ tsura̱ wuma u babu ukotu shi.
17 Aza a na a̱ usuyi a ta gura yuwan iroci yi ili ya asalama i nda:
A̱tsuma̱ a ala a̱ va̱ a̱ to uta̱a̱ otoni a̱ lima̱,
waru a ta yuwan adanshi ne elentsu o ro,
18 a ta tara yo,
agba ko no o sowo yaza,
waa yuwan ili ne ele shi ko keꞌen,
a̱ ta̱ juꞌwa̱n a̱za̱ o ubanakun a̱vu a̱ tsura̱ lafiya.”
Uka̱ru wa̱ Yesu zuva