Yesu uwai Urishelima
11
Ele arawa Urishelima,
zuzu na̱ lyuci va Batafaji na̱ Batanya,
reve a rawa a Masasan ma̱ Zetun.
Reve Yesu lyungu ama e re a̱tsuma̱ o ojoro a̱ yi.
2 Reve u damma le,
“ꞌYa̱wa̱i a̱tsuma̱ a̱ ma̱lyuci ma na ma̱ ri elime a̱ ɗu,
na̱ maꞌuwaa ma̱ ɗu i te ene molloli wunlu za na koto a kumbai shi.
I ba̱ɗa̱ yi a̱ ta̱wa̱.
3 Na̱ za ro ece ɗu,
nye i zuwai yaa yuwusan ne?
I damma yi,
‘Zagbain ɗa ciga niyi,
amma wa̱a̱ la̱pa̱ ka̱mbuwa̱ yi shi.’ ”
4 A̱vu a̱ ka̱ra̱,
reve a cina molloli a̱ ngeꞌen mu ure.
5 Ele a̱ ma̱ba̱ɗa̱ ma̱ yi,
reve aza a na a̱ da̱na̱i lo mishin e ece le,
“Nye ɗa i zuwai ya̱a̱ ba̱ɗa̱sa̱ yi?”
6 A̱vu a̱ usu le ili i na Yesu damma nle.
Reve a̱ rungwa̱ le a̱ ka̱ra̱ na̱ a̱yi.
7 Reve a̱ ta̱wa̱a̱ Yesu na̱ a̱yi,
a̱vu o polo amuna e le o molloliꞌi.
A̱vu u kumba ɗe.
8 Ama na̱ a̱bunda̱ ɗa o poloi amuna e le a̱tsuma̱ o ure,
ozo o ro waru a baza a̱vuꞌun o ure,
aza a na a kuɗai a atsusa.
9 Aza a na a̱ da̱na̱i elime na aza a na a̱ da̱na̱i a̱ca̱pa̱,
reve a̱ da̱na̱ e ishipa,
“Husana!a
“Abaꞌun a̱ tyo a za na a̱ ta̱wa̱ a ala a̱ A̱sula̱! b
10 “Abaꞌun a̱ tyo o tsugono tsa dada tsu Da̱wuda tsa na tsa̱ ri lo a̱ ta̱wa̱!
“Husana a̱ tyo e ekere a̱ A̱sula̱!”
11 Reve u uwa Urishelima,
ɗaɗa u uwai a̱tsuma̱ a̱ A̱a̱ꞌisamapaɗa.
A̱vu u ka̱lyuwa̱ uba̱ta̱ suru.
Ana wo oꞌwoi ulivu u ɗa,
a̱vu wu uta̱ u ka̱mba̱ Batanya oɓolo no ojoro a̱ yi.
Yesu yuwayin ubiri una̱
12 Ana usana u tawai,
a̱vu o uta̱ Batanya.
U da̱na̱ ta̱ a uwwusa ambulu.
13 Ana we enei ubiri na̱ a̱vuꞌun a̱ a̱bunda̱,
reve u ꞌya̱wa̱ tsa̱ra̱ u tsura̱ muwun u lyuwa.
Ana u rawai,
u ka̱lyuwa̱i biti,
u cina ɗe ili shi,
adama a na a mantsa ma na ubiri u tsu matsan ɗa shi.
14 A̱vu u damma ubiriꞌi,
“She nanza da̱shi lyuwa muwun ma̱ wu wan,
diga gogo.”
Agba ojoro a̱ yi a̱ da̱na̱ ta̱ a uwwusa ili i na u dammai.
Yesu uwai a̱ A̱a̱ꞌisamapaɗa
15 Reve a rawa Urishelima.
Ana Yesu uwai a̱tsuma̱ a̱ A̱a̱ꞌisamapaɗa,
a̱vu u lo aza a na a̱ da̱na̱i atsulu na awina pe.
Waru a̱vu wu keɓe apada a aza a na a̱ da̱na̱i a kitaꞌusa ikebe,
a̱vu u baza otogu ni ili i na a̱ da̱na̱i a yuwusan ulinga,
na aza a na a̱ da̱na̱i a winasa nrukuku.
16 U putsa ta̱ aza a na a̱ da̱na̱i ni itana a ɓatsa pe a̱tsuma̱ a̱ A̱a̱ꞌisamapaɗa.
17 A̱vu u yuwaan le adanshi,
“Ashe Adanshi a̱ A̱sula̱,
a damma,
‘Uꞌwa u va̱ uba̱ta̱ wa avasa adama a ama suru ɗa shi?’
c Amma,
a̱ɗu i ka̱mba̱to yi ta̱ uba̱ta̱ u na ya̱a̱ da̱na̱ a yuwusan wivu.”
18 Ana nan ganu a gbagbain na̱ munlu n Wila̱ me enei ili i na i farai,
a̱vu a zami ure u na oo una yi.
Agba a uwwa ta̱ wovon,
adama a na ama suru a uwa ta̱ asalama na̱ cuꞌun vu uritosu wa̱ yi.
19 Nu ulivu,
a̱vu Yesu lyawa lyuciꞌi.
Iroci nu uɗanga wu ubiri
20 Ele a̱ ma̱ka̱mba̱a̱ nu usana,
reve e ene ubiri u na Yesu yuwayin una̱ u ꞌyewe a̱ tyo a aralu.
21 A̱vu Bituru gura cuwan na̱ cuꞌun vi ili i na i farai,
a̱vu u damma,
“Manlu,
ka̱lyuwa̱ ubiri u na vu yuwayin una̱ꞌa̱ u ꞌyewe ta̱.”
22-23 A̱vu u usu le,
“I usu A̱sula̱,
amayun a ɗa maa dansaa ɗu,
za na dammai masasan ma nda u mula̱ u riya̱ a̱tsuma̱ a mala no okolo a̱ yi a daꞌwan shi,
amma u ca ta̱ okolo e ili i na u dammai,
u to oꞌwo ne.
24 A̱yi ɗa i zuwai maa dansaa ɗu ili i na i patiyi suru a̱tsuma̱ a avasa,
ni i ca okolo i ta̱ tsura̱.
25 Ni yi isawan a mantsa ma na yaa yuwan avasa,
ni i ri o upan na̱ a̱za̱ a̱ ɗu,
i yuwan gafura,
tsa̱ra̱ Dada ɗu za na ri zuva a̱yi fo u yuwaan ɗu gafura.
26 Amma ni i yuwaan za ɗu gafura shi,
cine tsa ɗa Dada ɗu za na ri zuva waa yuwaan ɗu gafura vu unusu u ɗu?”
Yeci yu uba̱ta̱ u na Yesu tsura̱i ucira
27 Reve ana Yesu no ojoro a̱ yi a̱ ka̱mbisa̱i Urishelima a uwa ta̱ a̱ A̱a̱ꞌisamapaɗa.
A̱yi pe a̱tsuma̱ a agara a̱ A̱a̱ꞌisamapaɗaꞌa reve nan ganu a gbagbain na̱ munlu n Wila̱ na azagbain a̱ ta̱wa̱ uba̱ta̱ wa̱ yi.
28 Reve e ece yi,
“Nu ucira u ne u ɗa vaa yuwusan ulinga u nda,
waru zane ɗa ca nuwu a̱yi?”
29 Reve Yesu usu le,
“A̱mu fo n ta yuwan ɗu yeci,
i usu mu.
A̱mu waru n ta gura damma ɗu uba̱ta̱ u na cuꞌun vu ucira na maa yuwusan ulinga wu uta̱i.
30 Urumbusu u na Yahaya aa yuwusan,
te ɗa wu uta̱i,
uba̱ta̱ wa̱ A̱sula̱ ko uba̱ta̱ wu vaɗilima̱?”
31 A̱vu e reme mawasan va̱ni le,
a damma “Na̱ tsu damma zuva ɗa wu uta̱i,
u te ece tsu,
‘To nye i zuwai tsu cayi okolo shi?’
32 Na̱ waru tsu damma uba̱ta̱ wa ama ɗa wu uta̱i,
u ta̱ ta̱wa̱a̱ tsu na addama.”
A ta uwwusa wovon wa ama,
adama a na ama e reve ta̱ Yahaya vumava̱sula̱ ɗa.
33 A̱vu a̱ usu yi,
“Tsu reve shi.”
A̱vu fo u usu le,
“Maa damma ɗu uba̱ta̱ u na n tsura̱i ucira u na maa yuwusan ili i na maa yuwusan shi.”