Huililajz Saulo rextidx Jesucrist
9
1 Laḻtis cagusacsí Saulo rexpejṉ Jesucrist.
Rlajzni juꞌtni guiraareni,
niꞌc huijni lo bixhojz nani rnibee,
2 gunabni gac te guijtz chanäni lo reguidoo neṉ guedx Damasco te palga guidxälni reni najc xpejṉ Jesucrist neṉ reguidooga,
niguii sigac gunaa,
guliibnireni,
jiädnänireni guedx Jerusalén te jiäureni.
3 Laḻ sasajni lo nezyuj,
asiäddzuṉgajxhni guedx Damasco,
basaniyaꞌ te bal xhaguibaa,
basanijni guideb gabi cadro siädsaj Saulo.
4 Dxejc biajbni lo yuj,
biejn diajgni te xseꞌ bejṉ nani canii lojni:
―Saulo,
Saulo,
¿xhicuent rusacsílu narä,
näjza rexpeṉa?
5 Räjp Saulo lojni:
―¿Chuluj Dad?
Räjpni lo Saulo:
―Narä nacä Jesucrist,
nani cagusacsíduxhlu.
Niluxh lagajc luj cadejdlu trabajw siꞌc rajc te gon ni rucuaniꞌ yejc caruꞌch.
6 Bidxebduxh Saulo,
racsejsni räjpni:
―Dad,
¿xhiniꞌc rlajzlu gunä?
Dxejc räjp Jesús loj Saulo:
―Huistie,
biuꞌ guedx Damasco.
Roꞌc suluii te niguii xhiniꞌc gunlu.
7 Rebejṉ ni siädnä Saulo sugadxireni,
bidxejbreni saꞌcsi biejn diajgreni te xseꞌ bejṉ,
luxh rut lojdi bahuiireni.
8 Che huistie Saulo lo yuj,
baxhalni lojni,
niluxh di lojni jieṉ.
Dxejc gunaazreni ṉaani,
sanärenini guedx Damasco.
9 Roꞌc guyuꞌni choṉ dxej,
natiäꞌp balojni,
dini niäꞌ,
dizani niajw.
10 Guedx Damasco rbäjz te xpejṉ Jesucrist ni laa Ananías.
Baluiloj Jesucrist loj Ananías lo te bacaḻ,
räjp Jesucrist lojni:
―Ananías.
Dxejc räjp Ananías lojni:
―Anaree Dad.
11 Räjp Jesucrist lojni:
―Huistie te chäälu lo nezyuj ni laa Ladbee cad rbäjz Judas.
Roꞌc guiniabdiidxlu con te niguii ni laa Saulo,
beṉ Tarso.
Cabejdx,
canabni loä ṉaj.
12 Lo bacaḻ abahuiini siääd te niguii ni laa Ananías te gutzuubni ṉaani yejcni te fiini stehuält.
13 Dxejcti räjp Ananías lojni:
―Dad,
abiejn diagä xho basacsí niguiiga rexpejṉlu neṉ guedx Jerusalén.
14 Luxh rebixhojz ni rnibee abadeed guijtz lojni te guiniaazni ree guiraa rebejṉ nani rbedx-rniab lojlu,
chanänireni jiäureni.
15 Dxejcti räjp Jesucrist lojni:
―Huij,
narä aguleäni te gunni xtzunä.
Suluiini xtidxä loj rebeṉzijt nani digac xpeṉ Israel,
näjza loj reni rnibee renacioṉ,
näjza loj rexpejṉ Israel.
16 Narä suluiä lo Saulo trabajwduxh ni tedni te jiädnajlni narä.
17 Dxejcti sää Ananías,
bidzujṉni ro yuꞌ cadro rbäzlaa Saulo.
Batzuubni ṉaani yejc Saulo.
Dxejcti räjp Ananías loj Saulo:
―Betzä Saulo,
Jesucrist ni rnibee,
nani baluiloj lojlu lo nezyuj cheni siäädlu,
lagajc laani baxhaḻni narä te fiilu stehuält,
te jiädläjzza Sprit Dxan xten Dios neṉ lastoolu.
18 Lagajc dxejc bitejb siꞌc xmelbäjl yec baloj Saulo,
biacgajc balojni,
bahuisaꞌcni stehuält.
Dxejc huistieni,
gurobnisgajcni.
19 Dxejc gudajwni,
guc nadaanni stehuält.
Xchej guyunäj Saulo rexpejṉ Jesucrist neṉ guedx Damasco.
Gusloj basuleꞌ Saulo xtidx Dios neṉ guedx Damasco
20 Dxejcti gusloj basuleꞌ Saulo xtidx Dios neṉ reguidoo xten rexpejṉ Israel,
räjpni:
―Jesucrist najc Xiꞌn Dios nani gujc Niguii.
21 Che biejn diajgreni xtiidxni,
bidxelojreni,
räjp lo saꞌreni:
―¿La xhet laadi niguiire ni rusäu rexpejṉ Jesucrist neṉ latzguiib guedx Jerusalén,
ä?
Lagajcza dee bidzujṉ ree te guliibni rexpejṉ Jesucrist te chanänireni guedx Jerusalén lo rebixhojz.
22 Dxejcti gusutzuꞌtz Saulo guniini xtidx Dios.
Basacajṉni rexpejṉ Israel nani rbäjz Damasco saꞌcsi basuleꞌpacni Jesús najc Crist nani rnibee.
Baxuṉ Saulo guedx Damasco
23 Che gudejd xhidajl dxej,
bachagsaꞌ rexpejṉ Israel te nuguꞌtreni Saulo.
24 Dxejcti gucbee Saulo xhi xhigab bejnreni.
Dxej,
yääl cabäjzreni Saulo roꞌ guiraa renezyuj ni rdzujṉ guejdxga te juꞌtrenini.
25 Dxejcti che gojḻ te yääl basäḻ rexpejṉ Jesucrist Saulo neṉ te dxim̲ro,
basiäjtreni dxijm̲ga nez roꞌ te padeer ni dejd gabi guejdxga.
Basiäjtrenini nez dejtz padeerga,
te siꞌc baxuṉni guejdxga.
Bidzujṉ Saulo guedx Jerusalén
26 Che bidzujṉ Saulo guedx Jerusalén,
rlajzni nuchaagni loj reni rililajz xtidx Jesucrist,
niluxh guiraareni bidxejbrenini saꞌcsi direni gan ahuililajzni xtidx Dios.
27 Dxejcti huinä Bernabéni lo reapost,
bijni diidx xcuent Saulo.
Räjp Bernabé lojreni:
―Baluiloj Jesucrist lo Saulo loj nezyuj.
Guninäj Xtioznu Saulo loj nezyuj,
niꞌcni gusutzuꞌtz Saulo basuleꞌni xtidx Jesucrist guedx Damasco.
28 Dxejc biaꞌn Saulo guedx Jerusalén,
bidxaagni lo rexpejṉ Jesucrist.
29 Dxejcti gusutzuꞌtz Saulo gusloj bijni xtidx Jesucrist lo rebejṉ.
Dxejcti gudiḻnäj Saulo rexpejṉ Israel nani rnii didx griegw.
Laareni rdxechduxhreni,
rlajzreni nuguꞌtreni Saulo saꞌcsi direni nichaglajz xtidx Jesucrist.
30 Che gucbee rexpejṉ Jesucrist siꞌc,
huinäreni Saulo guedx Cesarea,
roꞌc gulääreni Saulo,
baxhaḻrenini guedx Tarso.
31 Dxejc guredxi lajz guiraa renani huililajz xtidx Dios neṉ reguedx Judea,
neṉ reguedx Galilee,
näjza neṉ reguedx Samaria,
saꞌcsi diru Saulo nusacsí rexpejṉ Jesucrist,
luxh guc xhidajlrureni.
Basoobreni xtidx Jesucrist,
bisieedrureni rextiidxni,
gucnäjza Sprit Dxan xten Diosreni.
Biajc Eneas
32 Che gusloj sahuii Pedr guiraa renani huililajz xtidx Dios,
huihuiizani rexpejṉ Jesucrist nani yuꞌ guedx Lida.
33 Roꞌc bidxälni te niguii ni laa Eneas.
Agujc xhujṉ ijz nagaꞌ niguiiga cayacxhuuni.
Abixuꞌṉ tiejxhni,
digacdiru guiliini.
34 Dxejcti räjp Pedr lo Eneas:
―Eneas,
cagusiajc Jesucrist guejblu.
Huistie,
guläs xtaꞌlu.
Lagajc dxejc biajcni,
huistietini.
35 Guiraa rebejṉ ni rbäjz guedx Lida,
näjza rebeṉ ni rbäjz guedx Sarón,
bahuiireni abiajc niguii ni cayacxhuu.
Dxejc xhidajlreni neṉ reguejdxga huililajz xtidx Dios.
Gubaṉsac Dorcas
36 Neṉ guedx Jope yuꞌ te gunaa ni laa Tabita;
rniizarenini Dorcas con xtidx griegw.
Gunaaga huililajz xtidx Dios,
rudeedzani xhi rquiin rebeṉproob,
najczani huenduxh loj chutis bejṉ.
37 Gucxhuu gunaaga,
dxejc gujtni.
Che gulujx bahuajz rebejṉ togoolga,
huitixhrenini neṉ te yuꞌ ni najc jiaa yejc saꞌni.
38 Saꞌcsi gajxh guedx Jope treꞌ guedx Lida,
luxh biejn diajg rexpejṉ Jesucrist roꞌc yuꞌ Pedr,
baxhaḻreni tiop dadeꞌ saxii Pedr.
Räjp redadeꞌga loj Pedr:
―Bejn huen salu chonnu Jope naṉajga.
39 Dxejc sanägajc Pedr redadeꞌga.
Che bidzujṉreni,
huinäreni Pedr neṉ yuꞌ cadro nagaꞌ togunaaga.
Roꞌc cayonduxh guiraa regunabiuud,
baluiireni lo Pedr guiraa rexhajbreni nani benchee Dorcas,
ni badeed Dorcas lojreni che nabajṉni.
40 Dxejcti gunibee Pedr birii guirareni neṉ yuꞌ.
Dxejc bazuxhijbni,
guredx-gunabni loj Dios.
Dxejc gubiréni bahuiini loj togoolga,
räjpni:
―Tabita,
huistie.
Dxejcti baxhal gunaaga balojni;
che bahuiini loj Pedr,
gurejni.
41 Dxejc gunaaz Pedr ṉaani,
basuliinini,
dxejcti gurejdx Pedr regunabiuud näjza sgaii reni najc rexpejṉ Jesucrist.
Baluiini gunaaga lojreni te bahuilojreni agubaṉsacni.
42 Gucbegajc rebeṉ guedx Jope xhiniꞌc gujc,
dxejcti xhidajl rebejṉga huililajz xtidx Jesucrist.
43 Xchejza guyuꞌ Pedr roꞌc,
guläjzni rolijz dadeꞌ ni laa Simón,
nani ruscoodz guijd.