Ja primero trato scꞌulan ja Dios soc ja maꞌ ecꞌ pax ta cujtiqui, jel jitzan ja mandar aaji yile ba oj cꞌulaxuc ja ba iglesia jau cꞌulubal yuj ja yenle ja ba luum iti. Oj bi scꞌuluque spetzanil ja mandar jumasa jahui. 2 Ja iglesia jahui, cꞌulubal ni soc cꞌuutza. Ja ba primero cuarto, ti jachan ecꞌ jun candelerio soc ay jun mesa ja ba jian ecꞌ ja pan jau acꞌubal yi ja Diosi. Ja cuarto jahui, jun lugar ba mi cualquierauc. Tzaubal ni ja maꞌ huax och ja tihui. 3 Jaxa ba yojoli, ay otro cuarto cꞌutzan, jaxa ba snalan ja chab cuarto, ti lichꞌan otro jun nihuan cꞌuutz. Ja primero cuarto jahui, eso sí, mi cualquierauca pero ja cuarto mas yojol oche, mas to jel delicado juntiro 4 Porque ja ba yojoli, ay jun mesa ba jel tzamal, puro oro. Ti aaji culan ja tzicupomi. Cho ay jun cofre ti culan ecꞌ ja tihui, jaxa ba sati, puro oro cꞌulubal, jaꞌ ni ja cofre ja ba nolan ja trato jau scꞌulan ja Dios soc ja maꞌ ecꞌ pax ta cujtiqui. Ja ba yojol ja cofre jahui, tey jun jarro cꞌulubal soc oro, jaxa ba yojol ja jarro jahui, ti nolan tꞌusan ja pan jau it co jan ja ba satqꞌuinal ja tiempo eqꞌui, maná sbiil yujile. Cho ti ni ay ba yojol ja cofre ja svara syama ja pagre Aaroni, jaꞌ ni ja vara jau xolini. Cho ti ni ay ja chab lechan ton ja ba tzꞌijbanubal can yuj ja Dios ja smandari. 5 Jaxa ba smajquil sti ja cofre jahui, ti ni stꞌolohue ja xchiqꞌuel ja chante ja nihuac pagre jumasa. Jach scꞌulane ba oj cꞌulajuc perdonar ja smul ja maꞌ ecꞌ pax ta cujtiqui. Jaxa ba sat ja cofre jahui, ti lichꞌan ecꞌ ja suechꞌ chab ángel pero mi cualquierauc. Lijpiye ni yuj ja yijlab ja Diosi. Jel tzamalic juntiro. Queribines sbiil ja ángel jumasa jahui. Pero ja jastal chꞌac ta cali, malan xa soca. 6 Spetzanil jel chapan juntiro ja ba yoj iglesia jahui, jaxa nihuac pagre jumasa, tola vida huax ochye, huax elye ja ba primero cuarto jahui, como jaꞌ ni huane scꞌulajel ja atel acꞌubal yile. 7 Pero ja ba xchabil cuarto, quechan och ja mero jepe ja ba spetzanil ja pagre jumasa, pero quechan ni jun vuelta cada jabil huax ocha. Pero ta mi cꞌa ay yioj ja chiqꞌui, entonces mi ni bob ochuca. Ja xchiqꞌuel ja chante jahui, ti stꞌolo ja ba sti sat ja Diosi ba oj cꞌulajuc perdonar ja smul ja yeni, soc jach ni ja ba spetzanil ja cristiano. 8 Spetzanil ja jastic huax cala huabyex ja jastal huax taa tiꞌ ja iglesia jau cꞌulaji soc cꞌuutzi, yuj ja maꞌ ecꞌ pax ta cujtiqui, mi lomuc huax cala huabyex ja iti. Ay jas huas sea quitic ja Espíritu Santo ja ba jbaj ja quentic chomajquili. Huax ya jcꞌultic entender soc ja jas scꞌulane soc ja primero cuarto jahui porque huax naatic que ja cristiano jastal ja quentiqui, mi ni nunca bob ochuque ja tihui, ¡pegor to ja ba cuarto jau mas to delicado ja ba mero bay ja Diosi! 9 Ja yaani huax jac jcꞌujoltic jas sbej spetzanil ja jas chꞌac scꞌuluque ja yenlei. Smilahue jitzan chante ba oj yae yi ja Diosi. Tuctuquil yaahue yi ja smajtan ja Diosi pero mi ni soc ja jahui, mi snaahue ta huax cꞌulaji perdonar ja smulei. 10 Spetzanil ja jas scꞌulan ja yenlei, seña ita pero cuando jac ja Cristo, ti xa yala jasuncꞌa mas lec oj cꞌultic ja quentiqui. Ja yenlei, jel tzatz ja smandare soc ja suaelei. Mi bi lec oj yabye ja iti, quechan bi lec ja iti, xchiye nia. Huax yalahue que jitzan bi vuelta oj sacꞌ ja scꞌabei, soc otro mas jitzan mandar yioje ajyi. 11-12 Pero yajni jac ja Cristo, yen och slocꞌol ja jnihuan pagretic jau ajyi porque ja yen chomajquili, och ja ba jun lugar ba mas to mi cualquierauqui, jaxa tihui ti ni oj ajyuc tola vidaa. Yena ni huan scꞌulajel quitic spetzanil ja ba jel tzamali. Ja iglesia ja ba huan atel ja Cajualtic ja huego, mas lec juntiro que soc ja iglesia ja ba atjiye ja nihuan pagre ja najatei, como jaꞌ ni mero ba sti sat ja Diosi. Mi scꞌulunejuc ja cristiano ja lugar jau ja bay ja yeni. Pilan ay juntiro soc ja jas huax cꞌulaji ja ba mundo. Cuando yora och ja ba sti sat ja Dios ja yeni, mi yiaj ja xchiqꞌuel ja chibo soc mi ni ja xchiqꞌuel ja becerro. Jaꞌ ni mero huaj scꞌul presentar ja mero xchiqꞌuel ja yeni cuando chami, jayuj ja Diosi ya elcotic libre ja quentic chomajquili. Ti bi oj ajyucotic soc tola vida ja yeni. 13 Pero ja jastal ja jviejo modotic ajyi, ta ay cꞌa jas huax cꞌulantic, mi ni ja ba spatioil ja quiglesiatiqui, mi ni bob ochcotica. Jayuj ja jnihuan pagretiqui ti stzijunotic ja xchiqꞌuel ja toro soc ja xchiqꞌuel ja yal chibo, jaxa mas tzaani, ti yiaje ja staanil ja becerro stzicahuei, ti cho sticahue jbajtica, ti alji cabtica: ―Ja huego oj xa bob ochanic ja ba sti sat ja Diosi, la utjitic. 14 Pero ja huego, ja Cristo ja maꞌ mi ni slea ja smuli, yen specꞌa xchiqꞌuel ba oj huaj see ja ba sti sat ja Diosi. Jach scꞌulan yuj ja yip ja Espíritu Santo, ja yen ja maꞌ sacꞌan ni tola vida. Jayuj mas ni lec xa ayotic juntiro ja jastal ayotic ja huego tac. Huan xax bob jnaatic que ja Diosi scꞌulanotic ta perdonar spetzanil ja jas malo huax cꞌulantic ajyi. Jaꞌ ni mero ja mulal jau huax ya jlee ja jchameltica. Huax yaa quitic ja sperdoni ba oj bob cateltatic ja jDiostic jel sacꞌani. 15 Yuj ja cham ja Cajualtic Jesucristo, jayuj acꞌubal xa quitic ja yajcꞌachil trato. Ja trato jahui, jaꞌ ni huax yala que perdonado xa bi ay ja jmultic huax leatic ajyi, hasta spetzanil ja maꞌ ecꞌ pax ta cujtiqui ja janecꞌ scꞌocohue ni ja mandari, pero como huan ni scꞌuane ja Diosa. Tzaubalotic xa bi ba oj ajyucotic culan tola vida ja ba satqꞌuinali. Ja iti, jaꞌ ni mero yala ja Diosi. 16 Porque la jnaatic jastal ja jcostumbretiqui cuando ay tꞌun sastic sbaj ja jnan jtatiqui. Cuando sacꞌane to, huax ya cꞌulajuc jun juun, ti huax yala jastal oj pil jbajtic ja sastic sbajei. Pero ja juun jahui, ta mi to cꞌa xchamye, mi to nix bob oj pil jbajtic ja sastic sbaj ja jnan jtatica. 17 Pero cuando huax chamyei, ay xa ni modo oj bob jpil jbajtic soc ja cosa jumasa jahua. 18 Ja jcostumbretic iti, jaꞌ ni mero smoj ja jastal scꞌulan ja trato ja najate ja Diosi. Ja trato jahui, ja lec moc to chamuc ja chante jumasa, entonces lom ni qꞌuiqꞌuinal juntiro. 19 Cho qꞌuelahuilex ja Moisés ja yora chꞌac yal yab ja cristiano spetzanil ja smandar ja Dios tac. Ti syama ja stzootzil ja cheji bonobal soc orchila chac. Ti cho sotzo jun bome yal cꞌula, hisopo sbiil. Ja tzootz jahui soc ja jun yal bome cꞌul jahui, ti smulu co ba yojol ja ba pachan ja xchiqꞌuel ja yal becerro soc ja yal chibo. Ja chicꞌ jahui, socan ni soc jaa. Yajni chꞌac smuli, ti stzijun ja ba tzꞌijbanubal ja smandar ja Diosi. Jach ni ja cristiano, cho chꞌac tzijujuc sbaj chicꞌ ja yenle chomajquili. 20 Ti yala ja Moisesi: ―A jac acꞌujolex soc ja trato it scꞌulan ahuilex ja Diosi. Ja chicꞌ iti, mi ni lomuca. Jaꞌ ni huax yala jastal oj cꞌul seguir jbajtic soc ja trato yaunej quitic ja Diosi. Sbej ni oj ni jcꞌuuctica. 21 Jach ni cho scꞌulan ja Moisés soc ja chicꞌ ja ba yojol ja yiglesiaei soc ja cosa jumasa huax maconi yujile ja ba sti sat ja Diosi. Chꞌac stzijuc ecꞌ chicꞌ spetzanil. 22 Y jach ni ja jcostumbretic ja tiempo jau jel nihuan quiojtic ja smandar ja Diosi. Jel tꞌilan huax pecxi sbaj chicꞌ spetzanil ja cosa ‑ jel tꞌusan ja jas mix pecxi sbaj ja chiqꞌui porque ta mi cꞌa, lajan soc ay mulal ja ba yoj iglesia. Y jach ni ja jmultiqui. Moc to pecꞌuc ja chiqꞌui, mi ni oj bob cꞌulajuc perdonar ja jmultica.