I dilae
3
Do dumo gu,
fiyo ké énda médoo gom waléy témoro.
Non i begeye do témoro,
toow na fo méégét i kéfénginsaay Tuluse begey dob gaiwe kémukum moso.
2 I kéluhana tome do kéilawan,
énda démoyun katabuwan i de rigoné tom.
Amuk wén i étéw gébéréh katabuwan sénga tékélid,
énda i gétébo de.
Fakay géféguléwo noy lowoh ne non falan fiyoy de kébéréhén.
3 Ufama,
i gefee bé kudae,
amuk rigono no kakang i ba i kuda ne,
gébalengo no fiyon udenén féayo no de.
4 Loo so bé niy dakéle barko féagéwéy émbagére réfuruh.
I suwil i barkowe toow fo kloh,
éndob been i niy usaréy kafitane bé barkowe fégéfanangguwitén de dob kétaya nuwe ayo no.
5 Atin ségiléw so bé niy dilae.
Non fiyon fo ké toow fo kloh,
géusaran fégéfébantug-bantug.
Ufama,
i bukae talun métuwég bé klohe saén aféy ké mélégéb.
6 Atin i dilae,
mésut i médoowe gékélasi do tete,
funay de itunga tom brab de fédéw tom waléy so tete.
I dila i étéwe gétuwégo noy fédéw ne,
non i aféy i dilae tidéw dob uleone emferno.
7 I kéilawane,
géféguléwo noy kéluhanay de binatang,
do kloh manok,
do sédo,
brab do ulé.
Non gélayamay kéilawaney de ni.
8 Endob énda i étéw gélayama noy dila ne.
I de dila tom toow fo gérigono roy tetee brab énda méféguléwo no.
Ségiléw bé bisawe non mékébinasa.
9 Usaré tom fégéfésalamat dob Kadna tome brab dob Abaye Tulus.
Endob usaré tom so fégéfémula bé de dumo tom étéw,
sani de lénimbag miring bé Tuluse.
10 I fiyowe kéfésalamat brab i tetee kéfémula,
ségiléw ro tidéw dob ba i étéwe.
Do dumo gu,
énda fatut mérigoy ni.
11 Enda i fiyo wayég brab féla wayég ké sébaan saén i séfute ésuto ro.
12 Atin do dumo gu,
i sébaane kayéw énda géfégonokén saliyu saén bé kaane onok.
Enda géfégonokén ruwo gékélasi onok,
i sébaane de fiyo brab i sébaane de tete.
Atin i séfute miray bé métimuse wayég énda géirayén bé fiyowe wayég énda métimusén.
13 Amuk wén i ségétéw begom toow fo gétigan brab dakél i kégésobut ne fatut fégito no dob de fiyo rigoné no ula-ula.
Atin fatut térifantad bé lala ne rémigo fiyo inok féténgténgén i kégétiga nuwe.
14 Endob amuk médaléw,
taloo no méitung énda fatutén félangka-langka taloo no béréhé noy tugie fantag bé toowe kétoro.
15 I kégétigane loo bé nan békén tidéw dob lawayo.
Yamula tidéw saén dob duniyae ni.
Békén tidéw dob Rémogor i Tuluse,
yamula tidéw dob Satanase.
16 Non i étéwe médaléw brab méitung rigoné no soy médoowe gékélasi do tete brab fébukué noy de étéw.
17 Endob i étéwe wén i kégétiga no tidéw dob Tuluse,
toow fo fiyoy adat ne.
Atin mika sétiboh.
Brab mégédaw bé de dumo no,
énda kérito no bero.
Tintu fo méuray i na nuwe bé de dumo no brab rigoné noy fiyowe dob berowe.
Atin énda i isu ramigo no bé de étéw brab énda ubo-ubo saén i de rigoné no.
18 I étéwe kédané noy késétibohe,
uwité noy de fiyo rigonén.