22
Pus ju acsnich quimasunilh ju kꞌai xcan ju xtꞌakꞌa ju atsucunti jonkꞌalhita.
Chai ju anuꞌ xcan na stalankꞌa ixjunita tachi ju tuꞌuꞌ vaso.
Chai anch ju ixtaxtui laꞌixputolanꞌan ju kꞌai ucxtin Dios chai ju Askꞌatꞌa Borrego.
2 Chai ju anuꞌ xcan va sok ixchꞌakꞌokꞌai ju xati ju anuch lakꞌachakꞌan.
Chai ju quilhtumacatam ju anuꞌ kꞌai xcan lacya ju xaqꞌuiu ju xtꞌakꞌa ju atsucunti jonkꞌalhita.
Chai ju aquilhtumacatutam xcan vana.
Chai ju anuꞌ qꞌuiu pakcautꞌui ixtꞌakꞌa ju xatocꞌat ju tamin cꞌata.
Paktamin ju tamin malhquiyuꞌ.
Chai tachi chun ju lapanacni ju tatꞌajun ixlhilacaputsꞌun ju lacamunutpaꞌ ixtalhitacꞌuchꞌui ju xaxkꞌoi ju anuꞌ qꞌuiu.
3 Chai ju anch jantu catiꞌalilh tuꞌuꞌ ju alactuꞌunti.
Jantu lai catiꞌalilh tuꞌuꞌ ju chunch ni anch vi ju ixputolanꞌan ju kꞌai ucxtin Dios chai ju Askꞌatꞌa Borrego.
Chai ju ixlapanacni catalakꞌayayaꞌ.
4 Chai catalaktsꞌinaꞌ ju ixꞌucxpuꞌ ju Dios.
Chai ju ixtapakaꞌut caꞌalhimichicanaꞌ ju ixlapanacni laꞌismuntsanꞌan.
5 Chai ju anch matich cajunaꞌ ju atatsꞌisni.
Chai jantu catamaktasqꞌuiniyaꞌ ju tuꞌuꞌ maclhcu nin avilhchan ni yuchi ju kꞌai ucxtin Dios ju amapulhcuni.
Chai ju ixlapanacni Dios catatꞌataꞌucxtinikꞌalhiyaꞌ ju yuchi.
Vaninch minta ju avilhchan acsni caminchokoyaꞌ ju Cristo
6 Chai ju anuꞌ anquilh chani ju quijuni:
―Tachi chun ju ani chivinti lai lhilaksican chai stavasalanti junita.
Pus ju makꞌanchich ju Dios amapastꞌacꞌani ju ixlapanacni ju tuchi catanaulh.
Chai ju chavai ju yuchi amalakachalh ju ixꞌanquilh ni laich catacꞌatsayaꞌ ju ixlapanacni ju tuchi vasalh catapasayaꞌ.
Chai jantu makꞌan cativa tus catapasayaꞌ ju anuꞌ taxtokni.
7 Chai jantu makꞌan cativa tus acsni caminaꞌ ju Jesús.
Chai na kꞌachan ju yuchi ju caquiclacaꞌiyaꞌ ju ixchivinti Dios ju tsꞌokcanta ju ani.
―Chunch xaquijuni ju anquilh.
8 Pus ju quitꞌin icXivan chai quitꞌin ju ickꞌasmatlh chai iclaktsꞌilh tachi chun ju ani taxtokni.
Chai acsni ickꞌasmatlh chai iclaktsꞌilh ju ani taxtokni pus lana ictaꞌaktsokotalh laꞌixchꞌanchꞌajaꞌ ju anuꞌ anquilh.
Va xaclakꞌayaputun ju yuchi ju xaquimasunikꞌojui ju ani taxtokni.
9 Para ju yuchi chani quijuni:
―Jantu chun aqꞌuiꞌulhtꞌu.
Ju quitꞌin va mintꞌaxalapanac icjunita.
Chai ixtꞌachunchꞌan icjunita tachi ju milhiꞌalakꞌavin ju tanajun ixchivinti Dios chai ju taquiclacaꞌi tachi chun ju chivinti ju tsꞌokcanta ju ani.
Yuchach ju Dios ju alakꞌayatꞌi.
10 Chai quijumpa:
―Tun va atꞌilaclamtꞌi junima alhiqui junta tsꞌokcanta ixchivinti Dios.
Jantu chunch alatꞌi ni vaninch chinta ju avilhchan acsni cataiꞌulacanaꞌ ju taxtokni ju tsꞌokcanta ju anch.
11 Ju na alactuꞌunun pus chach tailhiꞌalh ixnavica ju alactuꞌunti.
Chai ju na lhquiliqui ju ixꞌatalacpastꞌacꞌat chach tailhiꞌalh ju chunch.
Chai ju soknicꞌa ju isꞌatsucunti chach va tachi navi ju soknicꞌa.
Chai ju salaka ju isꞌatsucunti chach jonkꞌalhi chunch.
12 Chai ju Jesús chani quijuni:
―Vaninch chinta ju avilhchan acsni acminaꞌ chai aclhiminaꞌ ju ixtalhajaꞌan tachi chun ju lapanacni.
Acꞌalhimapalach ju tuchi navitach ju kꞌantam kꞌantam.
13 Ju quitꞌin xactꞌajun tus acsni maticaꞌ tuꞌuꞌ ixjunita chai actsucukꞌalhiyach tus mas va tavananch.
―Chunch ju quijunilh ju Jesús.
14 Na takꞌachan ju tachꞌakꞌatꞌajun ju ixpumpuꞌan ni va tachi snapapa catajunaꞌ.
Pus yuꞌunch ju laich catapꞌuxaꞌ ju xatocꞌat ju qꞌuiu ju xtꞌakꞌa ju atsucunti jonkꞌalhi.
Chai lai cataputanuyaꞌ ju xalacmalhtich ju lakꞌachakꞌan.
15 Para lacamacni tatꞌajun ju va ixtꞌachunch tajunita tachi ju tuꞌuꞌ atapacxat chai ju alhicujnin chai ju tatꞌatꞌajun va tichi chavaich chai ju amakninin chai ju tamaklacaꞌani ju tuꞌuꞌ santo chai tachi chun ju takꞌachani ixnajunca ju taꞌaklhtamat chivinti.
16 Chai ju Jesús quijunchokopa:
―Ju quitꞌin icJesús chai icmalakachanichin ju quiꞌanquilh ju caxtakniyan ju ani chivinti ixlacataꞌan ju yuꞌunch ju quintalhilaksi.
Ju quitꞌin ixtamaskꞌatꞌanti makꞌaniya kꞌai ucxtin David icjunita.
Vachuꞌ tachi ju kꞌai stꞌacu icjunita.
Yuchi ju vatsꞌisin xajachilh.
―Chunch ju xaquijuni ju Jesús.
17 Pus ju Spiritu Santu chai ju tachi isꞌasqꞌuininti Jesús junita tanajun:
―Asokꞌoch.
Chai ju kꞌasmatꞌa ju anuꞌ chivinti chach vachuꞌ chunch cajunilh ju aliꞌin.
Chai ju na quicxixta chach milh.
Chai ju kꞌotputun ju xcan ju xtꞌakꞌa ju atsucunti jonkꞌalhita pus chach kꞌotlh.
Chai ju Dios jantu tuꞌuꞌ achꞌinin.
18 Pus ju quitꞌin pꞌas icꞌajuni tachi chun ju takꞌasmatꞌa ju ixchivinti Dios ju tsꞌokcanta ju ani.
Chai slivasalh ju icꞌajuni.
Ni xamatiꞌ calalhavayaꞌ ju ani chivinti pus ju Dios calalhavaniyaꞌ ju makꞌalhkꞌajnat ju tsꞌokcanta ju ani lacaꞌalhiqui.
19 Chai ni xamatiꞌ caxacamakꞌanaꞌ ju tuꞌuꞌ ixchivinti Dios ju tsꞌokcanta ju ani lacaꞌalhiqui pus ju Dios caxacaxtuyaꞌ junta istsꞌokcanta ju ixpuꞌalilh ju isꞌatsucunti jonkꞌalhi chai jantu lai catitanu ju laꞌixlakꞌachakꞌan Dios.
20 Pus ju najun ni stavasalanti tachi chun ju ani chivinti yuchi ju chani najun:
―Jantuch makꞌan cativa tus acminach.
Chunch ju najun chai vachuꞌ iclacasqꞌuin ni vatsꞌalhti camilh.
21 Ju quiꞌucxtin Jesús caꞌanaviniyaꞌ lamapainin tachi chun ju lapanacni ju talhilaksi ju Dios.
Slivasalh chunch.