―Ju chavai ju Dios catsucuyaꞌ junta tatꞌajun ju lapanacni.

Ju Dios anch ju camaktsucuyaꞌ.

Chai ju yuꞌunch ixlapanacni catajunaꞌ.

Chai isꞌakstu ju Dios caꞌalactꞌatolhkꞌalhiyach chai isDiosꞌan cajunaꞌ.

4 Chai matich cajunaꞌ ju kꞌalhut.

Chai jantu xamatiꞌ caniyaꞌ.

Chai jantu xamatiꞌ caꞌamakꞌanininaꞌ nin yuchi ni lai cakꞌalhulh nin yuchi ni lai jintaꞌ caxcanilh.

Jantu catiꞌalilh tuꞌuꞌ ju chunch ni tapasakꞌota ju xapꞌulhnan taxtokni.

5 Chai ju yuchi ju ixvi laꞌixputolan ju xakꞌai ucxtin chani naulh:

―Quitꞌin ju iclasastꞌikꞌojui tachi chun ju taxtokni.

Vachuꞌ chani ju quijunilh:

―Atsꞌokꞌulatꞌich tachi chun ju ani taxtokni ni lai lhilaksican ju ani chivinti chai stavasalanti junita.

6 Chai vachuꞌ chani ju quijunilh:

―Icnavikꞌolhch tachi chun ju taxtokni.

Ju quitꞌin xactꞌajun tus acsni maticaꞌ tuꞌuꞌ ixjunita chai actsucukꞌalhiyaꞌ tus mas va tavananch.

Pus ni xamatiꞌ na quicxixa pus acxtakniyaꞌ ju xcan ju va aclhikꞌailaktsꞌinaꞌ.

Anchach acꞌiyaꞌ junta taxtui ju xcan ju xtꞌakꞌa ju atsucunti jonkꞌalhita.

Laich cakꞌotꞌaꞌ chai jantu catimapalalh tuꞌuꞌ.

7 Chai ju casastꞌucꞌaꞌ ju macxcai sich ixꞌanuꞌ cajunaꞌ tachi chun ju taxtokni.

Chai ju quitꞌin isDios acjunaꞌ.

Chai ju yuchi quintsꞌalh cajunaꞌ.

8 Para tachi chun ju va tatalhanan chai ixlhiyuchi jantu tachꞌakꞌokꞌakꞌalhiputun ju Jesús chai yuꞌunch ju jantu talhilaksita ju Jesús chai yuꞌunch ju na alactuꞌunun chai ju amakninin chai ju tatꞌatꞌajun va tichi chavaich chai ju alhicujnin chai ju va tamaklacaꞌani ju tuꞌuꞌ santo chai tachi chun ju tanajun taꞌaklhtamat chivinti sich camacaꞌancanaꞌ lacajipi junta na maktajita lacaꞌazufre.

Yuchach ju ixlhipaktꞌui aninti.

―Ma chunchach ju quijuni ju Dios ni actsꞌokꞌula.

9 Pus ju acsnich quilakmilh pumatam sia yuꞌunch ju ixpumatujunꞌan anquilhnin ju ixtachꞌapata ju lakatamin ixpumapꞌunꞌan ju isꞌaktsamanta lakatamin makꞌalhkꞌajnat ju va yuchach cajunaꞌ.

Chai ju anuꞌ anquilh chani quijuni:

―Asokꞌoch chai acmasuniyan ju isꞌasqꞌuininti ju ixꞌamachakaꞌ cajunaꞌ ju Askꞌatꞌa Borrego.

10 Pus ju Spiritu Santu quimapaxanilh ju quiꞌalacꞌavanti chai ju anuꞌ anquilh quilhiꞌalh junta vi ju kꞌai talhpa junta na putankꞌai ixjunita.

Chai ju anch quimasunilh ju kꞌai ixlakꞌachakꞌan Dios ju Jerusalén juncan.

Ixtꞌonachilh takꞌalhtajuchiniꞌ ju ani lacatꞌun.

Minchalh ju lactꞌiyan junta vilhcha ju Dios.

11 Chai ju anch lakꞌachakꞌan kꞌai xlapꞌapꞌa ixmaktaji ni vachuꞌ anch ju ixtꞌajun ju Dios.

Ixmaktaji tachi ju tuꞌuꞌ kꞌoxi chiux ju slivasalh laklhu ixtapalh.

Chun tachi ju tuꞌuꞌ chiux ju jaspe juncan.

Chai na stalankꞌa ixjunita tachi ju tuꞌuꞌ vaso.

12 Chai ixꞌulacanta kꞌex ju na putankꞌai ixjunita.

Chai ixꞌalin lakacautꞌui xamalhtich.

Chai ju lacalakatamin malhtich ixtayanalh pumatamin anquilh.

Chai ju lacalakatamin malhtich istsꞌokꞌulacanta ixtapakaꞌutꞌan ju ixpumacautꞌuiꞌan istsꞌalan ju makꞌaniya lapanac ju Israel ixjuncan.

13 Ju lhichꞌatoꞌanta ixꞌalin lakatꞌutu xamalhtich.

Chai ju lhinorte ixꞌalin lakatꞌutu xamalhtich.

Chai ju lhisur ixꞌalin lakatꞌutu xamalhtich.

Chai ju lhitsꞌastꞌai ixꞌalin vachuꞌ lakatꞌutu xamalhtich.

14 Chai ju xakꞌex ju anuꞌ lakꞌachakꞌan lakacautꞌiyun chiux ixlachꞌapata ju ixlhiputankꞌai junta putachꞌanꞌacnui.

Chai ju lakatamin ju anuꞌ chiux anch istsꞌokꞌulacanta ixtapakaꞌutꞌan ixpumacautꞌuiꞌan ju ixtamalakachan ju Askꞌatꞌa Borrego.

15 Chai ju xaquintꞌachivinin ixchꞌapata lakatam palhcan ju si oro.

Yuchi ju capulhcayaꞌ ju lakꞌachakꞌan chai ju xamalhtich chai ju xakꞌex.

16 Chai ju lakꞌachakꞌan va makꞌastutꞌatꞌi ixjunita.

Chai vaklhtam chun ixjunita ju ixlhilhman chai ixlhipokꞌai.

Pus ju anuꞌ anquilh pulhcalh ju lakꞌachakꞌan ju anuꞌ palhcan.

Pus chaꞌalh lakatꞌui milh a lakatꞌui cientos kilómetro.

Ju ixlhilhman chai ju ixlhipokꞌai chai ju ixlhiputankꞌai vaklhtam chun ju alhcanti.

17 Chai vachuꞌ lhcalh ju xakꞌex.

Chaꞌalh sesenta y cuatro metro.

Chunch ju putꞌekꞌelh ju anquilh tachi ju taꞌaputꞌekꞌenin ju lapanacni.

18 Ju ixlhinavicanta ju kꞌex si yuꞌ ju chiux ju jaspe juncan.

Chai ju lakꞌachakꞌan si oro ixjunita.

Chai slapꞌapꞌa ixmaktaji ju lacascꞌun tachi ju tuꞌuꞌ vaso.

19 Chai junta putachꞌanꞌacnui ju xakꞌex ju lakꞌachakꞌan yuchi ju putachꞌanꞌacnui tijpachux ju chiux ju na laklhu ixtapalh tajunita.

Ju pꞌulhnan ulacalh yuchi ju jaspe.

Chai ju ixꞌokslai ju anch yuchi ju zafiro.

Chai astan yuchi ju ágata ixlhiꞌulacanta.

Chai astan yuchi ju esmeralda.

20 Astan ju ónice.

Astan ju cornalina.

Astan ju crisólito.

Astan ju berilo.

Astan ju topacio.

Astan ju crisoprasa.

Astan ju jacinto.

Chai ju ixlhilakacautꞌui ju tavi laꞌixꞌucxni chux yuchi ju amatiste.

21 Chai ju lakacautꞌui xamalhtich lakatamin perla ixjunita.

Ju lakatamin malhtich lakatamin perla ixjunita.

Chai ju xati ju anuꞌ lakꞌachakꞌan si oro ixjunita.

Chai na slapꞌapꞌa ixmaktaji lacascꞌun tachi ju tuꞌuꞌ vaso.

22 Chai jantu iclaktsꞌilh tuꞌuꞌ pujitat ju anch ni vanta anchach ju anuꞌ lakꞌachakꞌan ixvi ju Dios ju lai navikꞌojui tachi chun ju taxtokni.

Vachuꞌ vanta anchach ixvi ju Askꞌatꞌa Borrego.

23 Chai ju anuꞌ lakꞌachakꞌan jantu ixmaktasqꞌuini ni camapulhcu ju tuꞌuꞌ avilhchan nin malhquiyuꞌ ni Dios ju maputuncunita ju anch.

Chai ju Askꞌatꞌa Borrego yuchi ju xamaclhcu.

24 Chai laꞌixꞌamatuncunit cataꞌalhtananaꞌ tachi chun ju amachakꞌan kꞌai lakꞌachakꞌanixni ju amakꞌalhtaxtucanta.

Chai tachi chun ju xalackꞌajin ucxtinin ju ani lacamunutpaꞌ catalhiminach ju anch ju ixmakꞌalitꞌan ni catapulakꞌayayach ju Dios.

25 Chai ju xamalhtich jantu tavanan camalacchonicanaꞌ ju tuncuj.

Chai ju anch matiꞌ cajunaꞌ ju atatsꞌisni.

26 Chai tachi chun ju lapanacni ju tatꞌajun ixlhilacaputsꞌun ju lacamunutpaꞌ catalakꞌayayach ju Dios.

27 Para jantu tavanan lai catitanu ju anch ju tuꞌuꞌ lhquiliqui nin xamatiꞌ ju navi ju tuꞌuꞌ ju na tsꞌisi ju Dios nin xamatiꞌ ju najun taꞌaklhtamat.

Va yuꞌunch ju lai tatanui anch ju atsꞌokꞌulacanta ixtapakaꞌutꞌan laꞌixꞌalhiqui ju Askꞌatꞌa Borrego.

Yuchi ju alhiqui junta najun tichi chavaich ju alin isꞌatsucunti jonkꞌalhita.