19
Chai acsni tapasakꞌolh ju ani taxtokni pus ickꞌasmatlh lhu chivinti tachi ju na va lhu lapanacni ixtachivinin ju lactꞌiyan.
Ixtanajun:
Calakꞌayauch ju Dios.
Yuchach ju xaquintamakꞌalhtaxtuyan.
Chai yuchach ju calakꞌayacalh.
Chai yuchach ju alin ixtachaput.
2 Yuchi calhiꞌulhtucanaꞌ chunch ni aktsꞌiya muctaxtui ju ixchivinti chai sok navi acsni xtꞌakꞌa ju tuꞌuꞌ makꞌalhkꞌajnat.
Pus xtaknilh ju ixmakꞌalhkꞌajnat ju kꞌai alactuꞌunu chakoꞌulh ju lakꞌalhita ju lacamunutpaꞌ laꞌixꞌalactuꞌunti.
Chai ju quiDiosꞌan vachuꞌ amamapalhni ixꞌacꞌalhniꞌan ju ixlapanacni.
3 Chai aktam tanonchokopa ju ixtalhavatꞌan:
―Calakꞌayau ju Dios ni jantu tavanan lakmixa ju xajin junta tꞌajun lhcunuꞌ ju anuꞌ lakꞌachakꞌan.
4 Pus ju ixpumapꞌuxamtꞌatꞌiꞌan papanin chai ju ixpumatꞌatꞌiꞌan atapacxat tataꞌaktsokotanilh chai talakꞌayalh ju Dios ju vi lacakꞌai ixputolan.
Ixtajuni:
―Vachuꞌ iclacasqꞌuinau ni chunch ju caꞌulhtucalh ju Dios.
Vachuꞌ calakꞌayayau.
5 Chai vachuꞌ ju lacakꞌai putolan mincha lakatam chivinti junta naulh:
Alakꞌayatꞌit ju quiDiosꞌan tachi chun ju uxijnan ju ixlapanacni untꞌatꞌit.
Chux ju uxijnan ju tꞌalhoniyatꞌit mas xalactꞌicstꞌin untꞌatꞌit chai vachuꞌ ju uxijnan ju xalackꞌajin untꞌatꞌit.
Macꞌatanicalh ju Askꞌatꞌa Borrego
6 Pus ju acsnich ickꞌasmatlh ju chivinti tachi ju na va lhu ixlacchivincanch.
Chai ju iskꞌasmatca chunch ixjunita tachi ju tuꞌuꞌ atalhavana xcan.
Tachi acsni na tꞌasai ju tꞌajin.
Pus ju yuꞌunch chani ixtanajun:
Calakꞌayau ni yuchi ju lhinajun.
Yuchi ju quiꞌucxtinꞌan Dios ju lai navikꞌojui tachi chun ju taxtokni.
7 Cakꞌachanauch chai calakꞌayauch ju yuchi ni chilh ju ixputamakꞌaxtokni ju Askꞌatꞌa Borrego chai malakchꞌininkꞌotach ju isꞌasqꞌuininti.
8 Chai xtaknicalh ju yuchi ju kꞌoxi pumpuꞌ ju lino juncan.
Chai ju yuchi na xlipnicꞌa junita chai na snakꞌankꞌa.
Pus ju anuꞌ na kꞌoxi pumpuꞌ laktsipaxcavacan ju tuꞌuꞌ kꞌox ju tanavita ju talhilacaꞌanta ju Jesús.
9 Chai ju anquilh quijuni:
―Atsꞌokꞌulatꞌich ju acjunan:
“Ma na takꞌachan ju caꞌatꞌasanicanach lacalacvaiti acsni catamakꞌaxtꞌokꞌaꞌ ju Askꞌatꞌa Borrego”.
Vachuꞌ chani quijuni:
―Ju ani chivinti slivasalh ni yuchi ju Dios ju chunch xanajun.
10 Pus ju acsnich ictaꞌaktsokotanilh vanin laꞌixchꞌajaꞌ ju anuꞌ anquilh ni va xaclakꞌayaputun.
Para ju yuchi quijuni:
―Jantu chun aqꞌuiꞌulhtꞌu ni va mintꞌaxalapanac icjunita chai ixtꞌaxalapanac ju miꞌalakꞌavin ju tajuni ju lapanacni ixlacata ju Jesús.
Alai yuchi ju Dios ju alakꞌayatꞌi.
―Chunch ju xaquijuni ju anquilh.
Pus ju ixlapanac Dios junita yuchi ju vas najun ju chivinti ixlacata ju Jesús.
Tasu lakatam caballo ju na xnapapa
11 Chai iclaktsꞌilh ju tꞌiyan ni ilhtekꞌai chai ixya lakatam caballo ju na xnapapa.
Chai ju ixpujucꞌalh yuchi ju lai lhilaksican chai najun ju stavasalanti.
Chai ju yuchi acsni lakꞌoxi tuꞌuꞌ lhamakꞌan chai acsni lasai pus sok ju navi.
12 Chai ju yuchi kꞌai lam lam ixtalakpuyajui tachi ju tuꞌuꞌ xaꞌalapnaꞌ jipi.
Chai na lhu ixꞌalin ju ixcorona.
Chai ju anuꞌ tapakaꞌut ju ixvilhnilh jantu xamatiꞌ ixmachakxai.
Va isꞌakstu ixmachakxai.
13 Chai ixlakchꞌita lakatam ixpumpuꞌ ju lana istsꞌamkꞌota acꞌalhni.
Chai ju ixpujucꞌalh ju caballo lhimapakaꞌucanta ixchivinti Dios.
14 Chai tachi chun ju xataropajni lactꞌiyan si lacxnapapa caballo ixtapuchꞌakꞌokꞌata chai ixtalakchꞌita lackꞌoxi pumpuꞌ ju lino juncan.
Chai na xnapapa chai na salaka ixjunita.
15 Chai ju xaꞌapꞌulanaꞌ ixquilhtaxtuta lakatam espada ju na quicxtui.
Yuchi ju caꞌaputꞌalasayaꞌ ju lapanacni ju tatꞌajun ixlhilacaputsꞌun ju lacamunutpaꞌ.
Chai ju tuchi canonaꞌ ju yuchi pus yuchach ju cataquiclacaꞌiyaꞌ ju lapanacni.
Pus yuchach ju caꞌamamakꞌalhkꞌajniyaꞌ ju lapanacni laꞌixtalhkꞌamti ju Dios.
16 Chai laꞌixpumpuꞌ chai laꞌixkꞌatuꞌ lacvilhnilh ixtapakaꞌut.
Chani najun:
“Yuchi ju ani ju palai xakꞌai tachi chun ju xalackꞌajin.
Chai yuchi ju palai xakꞌai ucxtin tachi chun ju ucxtinin”.
17 Pus ju acsnich iclaktsꞌilh pumatam anquilh ju ixya lacaꞌavilhchan.
Chai na pꞌas axakꞌala tachi chun ju tsꞌokꞌo.
Ajuni:
―Atꞌatꞌit.
Atꞌakꞌaixtꞌoktꞌit ni canaviyaꞌ lakatam kꞌai lacvaiti ju Dios.
18 Laich aꞌuniyaꞌitꞌit ju ixꞌacanitꞌan ju xalackꞌajin chai ju xaꞌucxtinin taropajni chai ixꞌacanitꞌan ju lactachapunin lapanacni chai ixꞌacanitꞌan ju caballo chai ju ixtapujucꞌanalh chai ixꞌacanitꞌan va tichi chavaich.
Yuꞌunch ju matiꞌ ixꞌucxtinꞌan chai yuꞌunch ju va xalapanacni tajunita.
Yuꞌunch ju salactꞌicstꞌin chai ju xalackꞌajin.
19 Chai iclaktsꞌilh ni ixtatakꞌaixtokta ju maktiliꞌ ju ixtacuttacha lacaꞌalama chai ju xalackꞌajin ucxtinin ju ani lacamunutpaꞌ chai chux ju ixtaropajniꞌan.
Va catatꞌalasayaꞌ ju pujucꞌalh ju xnapapa caballo chai ixtaropajni ju yuchi.
20 Pus tachꞌinin tava ju maktiliꞌ chai ju lapanac ju istasui tachi ixlapanac Dios mas jantu.
Yuchi ju ixnavich ju tuꞌuꞌ lhamakꞌan laꞌixꞌucxlacapuꞌ ju maktiliꞌ chai ixꞌalacpuꞌokxchokꞌota ju lapanacni ju ixꞌalhimichicanta ixtapakaꞌut ju maktiliꞌ chai yuꞌunch ju ixtalakꞌayai ju ixlapalaxtuta tachi ixlacatuna ju anuꞌ maktiliꞌ.
Pus ju maktiliꞌ chai ju anuꞌ aꞌokxchokꞌonu lapanac vaklhtam amacaꞌancalh xalakꞌajun junta maktajita jipi lacaꞌazufre.
21 Chai ju aliꞌin tapuni ju espada ju taxtui laꞌixquilhni ju ixpujucꞌalh ju xnapapa caballo.
Pus tachi chun ju tsꞌokꞌo na talhilalh ju anuꞌ acanit.