―Lakꞌalhikꞌocalh ju kꞌai lakꞌachakꞌan Babilonia.

Valhch ixchakaꞌan ju lhacaticurulhni.

Vachuꞌ anch tatanumanalh tachi chun ju tsꞌokꞌo ju va lhitsꞌisi tavajin.

3 Chunchach ju ulhtucalh ju anuꞌ lakꞌachakꞌan ni yuꞌunch ju amachakꞌan anch ju xataꞌamalanikꞌojui tachi chun ju lapanacni ixkꞌachanica ju alactuꞌunti tachi ju ixtanavi ju yuꞌunch.

Chai ju xalackꞌajin ucxtinin ju lacamunutpaꞌ tatꞌaꞌalactuꞌunulh ju yuꞌunch.

Chai ju saꞌastꞌanin ju lacamunutpaꞌ na makꞌalinin tapujunita ni va ixtalhakꞌamanan ixtuminꞌan ju amachakꞌan ju anuꞌ lakꞌachakꞌan.

4 Pus ju acsnich ickꞌasmatlh alakatam chivinti ju mincha lactꞌiyan ju chani ixnajun:

―Atꞌaxtꞌutꞌit ju anch ji quilapanacni.

Jantu xcai ni vachuꞌ amaknavitꞌit ju alactuꞌunti.

Jantu xcai ni atꞌamakꞌalhkꞌajnantꞌit ju yuꞌunch vachuꞌ.

5 Pus ju ixꞌalactuꞌuntiꞌan ju amachakꞌan ju anuꞌ lakꞌachakꞌan chaꞌanta tus lactꞌiyan.

Chai ju Dios jantu tavanan xacꞌapꞌa ju alactuꞌunti ju xatanavi.

―Chunch ju naulh ju xachivinin.

6 Pus ni na ixtaꞌalactuꞌunun ju amachakꞌan ju anuꞌ lakꞌachakꞌan yuchi chani alhijunicalh ju anquilhnin:

―Pus chunch ju axtꞌaknitꞌit ju makꞌalhkꞌajnat tachi ju ixtaxtꞌakꞌach ju yuꞌunch.

Paktꞌui amamapꞌalanitꞌit ju makꞌalhkꞌajnat tachi ju ixtaꞌalacnavich ju aliꞌin.

Chai ju vino ju taꞌamakꞌotꞌunulh yuꞌunch pus ju chavai amakꞌotꞌutꞌit ju vino ju palai tucan sunilhcꞌacꞌa.

7 Chai tachi ju yuꞌunch ni na kꞌai ixtacꞌatsan chai na lhu ixtaꞌalactuꞌunun pus vana va chun lhu amamakꞌalhkꞌajnitꞌit chai lhu amamakꞌaninitꞌit ju yuꞌunch.

Pus ju yuꞌunch tanajun laꞌixꞌalhunutꞌan ni xalackꞌajin tajunita chai jantu va amaconcanta chai jantu tavanan cataꞌamakꞌanininaꞌ.

8 Chai ni tanajun ju chunch pus ixlhiyuchi lana va tam pantsꞌiquis caꞌalinaꞌ ju ixmakꞌalhkꞌajnatꞌan.

Cataniyaꞌ ju lapanacni.

Chai caꞌalinaꞌ ju amakꞌanit chai ju chavanti.

Chai calhcukꞌoyaꞌ ju lakꞌachakꞌan.

Chunch ju canavicanaꞌ ni na tachapun ju ucxtin Dios.

Chai yuchach ju amucꞌani ju ixtalakꞌalhinꞌan.

―Chunch ju ajunicalh ju anquilhnin.

9 Chai na catalackꞌalhunach.

Chai ai ai catanonaꞌ ju xalackꞌajin ucxtinin ju lacamunutpaꞌ ju tatꞌaꞌalactuꞌunulh ju yuꞌunch chai tatꞌanavilh ju ixkꞌachatꞌan.

Chunch ju catanaviyaꞌ acsni catalaktsꞌinaꞌ ju xajin ni catsucuyaꞌ lhcunuꞌ ju lakꞌachakꞌan.

10 Na makat catatayayaꞌ ni va tatalhonich ju ixmakꞌalhkꞌajnatꞌan ju amachakꞌan ju anuꞌ lakꞌachakꞌan.

Chai chanich ju catanonaꞌ:

―Painich ju xakꞌai lakꞌachakꞌan Babilonia.

Na tachapun ixjunita.

Para va tam pantsꞌiquis xamin ju ixmakꞌalhkꞌajnat.

11 Chai tachi chun ju saꞌastꞌanin ju ixlhilacaputsꞌun ju lacamunutpaꞌ na catalhikꞌalhunach ju yuchi.

Chai ai ai catanonaꞌ.

Chunch ju catanaviyaꞌ ni matich ju ixꞌatamonaꞌan.

12 Na istastꞌai ju oro chai plata chai chiux ju na laklhu ixtapalh ixjunita chai ju perlas chai ju kꞌoxiya pumpuꞌ ju lino juncan chai ju morado pumpuꞌ chai ju pumpuꞌ ju seda juncan chai ju lakslapulh pumpuꞌ chai tachi chun ju qꞌuiu ju na kꞌox acamin chai tachi chun ju taxtokni ju navicanta lacakꞌai istatsalat ju elefante chai tachi chun ju taxtokni ju lhinavicanta qꞌuiu ju na laklhu ixtapalh chai ju cobre chai ju tsasnat hierro chai ju chiux ju marmol juncan.

13 Vachuꞌ istastꞌai ju canela chai ju aliꞌ xalhalakꞌoxin vaiti chai ju pum chai ju perfume chai ju vino chai ju aceite chai ju harina chai ju trigo chai ju vacax chai borrego chai caballo chai carro chai xalapanacni.

Va istastꞌai ixtꞌalapanacniꞌan.

Chai ju isꞌastꞌacan mas ixtachꞌalhcatnan para jantu tuꞌuꞌ ixtalhajai ni va ixꞌatamocanta.

14 Pus ju anuꞌ astꞌanin chani catajunach ju amachakꞌan ju anuꞌ kꞌai lakꞌachakꞌan:

―Tachi chun ju lhiꞌut ju na ixꞌupꞌutꞌunatꞌit cꞌacxtach ju chavai.

Chai tachi chun ju taxtokni ju na lackꞌox ixjunita chai ju na cꞌus istasui tacꞌacxkꞌolh.

Chai jantu tavanan atꞌalaktsꞌinchꞌokꞌotꞌit.

―Chunch ju catanonaꞌ ju astꞌanin.

15 Chai ju istastꞌai ju anch ju lakꞌachakꞌan ju ani taxtokni chai ju na makꞌalinin xatapujun na makat catatayayaꞌ ni na catatalhoniyaꞌ ju ixmakꞌalhkꞌajnatꞌan ju amachakꞌan ju anuꞌ lakꞌachakꞌan.

Na catakꞌalhunaꞌ.

Chai ai ai catanonaꞌ.

16 Vachuꞌ chani catanonach:

―Painiꞌitnich ju amachakꞌan ju anuꞌ kꞌai lakꞌachakꞌan ju na ixꞌalin ju lackꞌoxi ixpumpuꞌan ju lino juncan chai ju lacmoradonicꞌa ixpumpuꞌan chai lacslapulh ixpumpuꞌan.

Chai na ixtalhachꞌachꞌinincanta ju oro chai ju lacatꞌicstꞌi chiux ju na laklhu ixtapalh chai ju perlas.

17 Para va tam pantsꞌiquis tsꞌankꞌakꞌolh tachi chun ju ani ixmakꞌalitꞌan.

Chai vachuꞌ na makat catatayayaꞌ tachi chun ju amanavin barco chai ju tapuꞌalhtananch ju barco chai ju tachꞌalhcatnan lacabarco chai tachi chun ju tachꞌalhcatnan lacaꞌalama.

18 Chai acsni catalaktsꞌinaꞌ ju xajin ni tꞌajun lhcunuꞌ pus na pꞌas catalacchivinaꞌ ni na cataꞌamakꞌanininaꞌ.

Catanonach:

―Matiꞌ alakatam lakꞌachakꞌan ju ixtꞌachunch cava tachi ju anuꞌ kꞌai lakꞌachakꞌan.

―Chunch ju catanonaꞌ.

19 Chai catamucꞌayaꞌ ju pokxni laꞌisꞌaktsulhꞌan ni cacꞌatsacanaꞌ ni na taꞌamakꞌaninin.

Chai na catalackꞌalhunaꞌ.

Chai ai ai catalacnonaꞌ.

Pꞌas catachivinaꞌ acsni chani catanonaꞌ:

―Painich ju kꞌai lakꞌachakꞌan.

Tachi chun ju quijnan ju amanavin barco icjuntau xacpuchꞌalhcatnanau lacaꞌalama chai na makꞌalinin xacpujuntau ju ixmakꞌalitꞌan ju amachakꞌan ju anuꞌ lakꞌachakꞌan.

Para va tam pantsꞌiquis ju takꞌalhikꞌo ju lakꞌachakꞌan.

20 Alhikꞌachꞌantꞌit ji amachakꞌan lactꞌiyan chai ju uxijnan ju lhilacꞌapꞌinatꞌit ju Jesús chai ju uxijnan ju ixtamalakachan Jesús untꞌatꞌit chai ju uxijnan ju nonatꞌit ixchivinti Dios.

Chunch ju alatꞌit ni milacataꞌan ju xamamakꞌalhkꞌajni ju Dios ju anuꞌ lakꞌachakꞌan.

21 Pus ju acsnich pumatam anquilh ju na tachapun ixjunita chꞌapalh lakatam chiux tachi ju tuꞌuꞌ kꞌai xvati.

Chai tarr macaꞌalh lacaꞌalama.

Naulh:

―Tachi ju anuꞌ chiux ni lacatachaput ju makꞌancalh chai taꞌacnukꞌalhi lacxcan pus chunch vachuꞌ canavicanaꞌ ju Babilonia ju anuꞌ kꞌai lakꞌachakꞌan.

Chai vachuꞌ jantu tavanan lai catitasuchokolh.

22 Chai jantu tavanan catikꞌasmatcalh ju anch ju isꞌasanti arpa nin yuchi ju milhpat nin yuchi ju skꞌolh.

Vana jantu tavanan calhitajucalh anch ju ixnavini tijpachux lhichꞌalhcat.

Chai jantu catikꞌasmatcalh ju anch ni calacsquiticalh.

23 Jantu tavanan catimapulhcu ju anch tuꞌuꞌ maclhcu.

Nin yuchi ni cakꞌasmatcalh ju anch ju ixchivintiꞌan ju na talackꞌachan ni va ancaꞌ tamakꞌaxtꞌokꞌa.

Chunch cajunaꞌ mas xalackꞌajin ixtajunita ju saꞌastꞌanin ju anch lakꞌachakꞌan.

Chai tachi chun ju lapanacni ju tatꞌajun ixlhilacaputsꞌun ju lacamunutpaꞌ alacpuꞌokxchokꞌolh laꞌixꞌalhicujnut.

24 Chai laꞌixpulacni ju anuꞌ lakꞌachakꞌan amaknicancha ju ixtanajun ixchivinti Dios chai ju ixtalhilacaꞌanta ju Jesús.

Chai ju amachakꞌan anch yuꞌunch ju talhinaulh ixꞌamaknicaꞌan tachi chun ju ixlapanacni Dios ju ixtatꞌajun ixlhilacaputsꞌun ju lacamunutpaꞌ.