―Asokꞌoch.

Chai acmasuniyanch ju ixmakꞌalhkꞌajnat ju anuꞌ alactuꞌunu chakoꞌulh ju na lhu puvi ju xcan.

2 Yuchach ju tatꞌaꞌalactuꞌununta ju xalackꞌajin ucxtinin ju lacamunutpaꞌ.

Chai tachi chun ju lapanacni ju tatꞌajun ju ani lacamunutpaꞌ tachi ju va talhitꞌakꞌapꞌatach ju va ixkꞌachanicach ju ixꞌalactuꞌuntiꞌan ju xaꞌamasuni ju anuꞌ chakoꞌulh.

3 Chai ju Spiritu Santu xaquimapaxanita ju quiꞌalacꞌavanti chai iclaktsꞌilh ju ani tachi ju va laquiꞌaklakꞌavanti.

Pus tachi ju va quilhiꞌalh ju anuꞌ anquilh junta na aseknicꞌa ixjunita.

Chai iclaktsꞌilh pumatam chakoꞌulh ju ixpujucꞌalh lakatam maktiliꞌ ju na slapulh ixjunita.

Chai laꞌixlacatuna ju anuꞌ maktiliꞌ si lana istsꞌokꞌulacanta macxcai tapakaꞌut.

Chai ixꞌalin lakatujun isꞌaktsulh chai lakacau ixꞌakalokot.

4 Chai ju chakoꞌulh ixlhimalakchꞌininta morado chai slapulh pumpuꞌ.

Chai ixlhimaxantilacanta ju oro chai aliꞌ lactꞌicstꞌi chiux ju na laklhu ixtapalh chai ju perlas.

Chai ixchꞌapata lakatam tasa si oro.

Ju yuchi na ixꞌaktsamanta ju tuchi na tsꞌisi ju Dios chai ju tuchi na lhquiliqui ju navi laꞌixꞌalactuꞌunti.

5 Chai ixmuntitsꞌokcanta lakatam tapakaꞌut ju jantu lai machakxacan.

Chai ixnajun:

“Xakꞌai Babilonia.

Ixnatiꞌan ju lakachapu tꞌacunin chai ju taxtokni ju na lhitsꞌisit ju alin ju ani lacamunutpaꞌ”.

6 Chai iclaktsꞌilh ju anuꞌ chakoꞌulh ni na ixlhitꞌakꞌapꞌatach ju ixꞌacꞌalhniꞌan ju lapanacni ju ixtalhilacaꞌanta ju Jesús ni ixlhinajuntach ixꞌamaknica.

Chai acsni iclaktsꞌilh slivasalh iclhamakꞌaninilh ju tuchi xacmasunicanta.

7 Para ju anquilh quijuni:

―Tajuch ni va lhamakꞌanininch ju anuꞌ chakoꞌulh.

Quitꞌin ju acmavasalaniyan ju ixlacata ju anuꞌ chakoꞌulh chai ixlacata ju anuꞌ maktiliꞌ ju pujucꞌalh.

Yuchi ju alin lakatujun isꞌaktsulh chai lakacau ixꞌakalokot.

8 Pus ju anuꞌ slapulh maktiliꞌ ju xalaktsꞌin ixtꞌajun para ju chavai nitach.

Para cataꞌacxtuchokotachilh junta na makat lhokꞌonkꞌoꞌanta.

Para aktsꞌiya camaclacanaꞌ.

Chai na catalhamakꞌanininaꞌ ju maktꞌiliꞌ ju lapanacni ju tatꞌajun ju lacamunutpaꞌ acsni catalaktsꞌinchokoyaꞌ ju anuꞌ maktiliꞌ.

Para ju chunch catalayaꞌ jantu atsꞌokꞌulacanta lacaꞌalhiqui junta najun tichi chavaꞌitnich ju alin ju isꞌatsucuntiꞌan ju jonkꞌalhita.

Pus ixtapakaꞌutꞌan ju kꞌantam kꞌantam ju alin isꞌatsucunti jonkꞌalhita istsꞌokꞌulacantacha tus acsni tucaꞌ ixnavicanta ju lacamunutpaꞌ.

Para ju aliꞌin lapanacni catalhamakꞌanininaꞌ ju maktiliꞌ ni talaktsꞌinchokoi ju yuchi.

Tacꞌatsai ni ixtꞌajun para nilh chai ju chavai tꞌonchokoi.

9 Pus ju ani na tasqꞌuini ju kꞌox acꞌatsanti ni acmachakxa.

Pus ju anuꞌ lakatujun isꞌaktsulh ju maktiliꞌ yuchi ju laktsꞌipaxcavacan ju anuꞌ lakatujun talhpa junta vi ju chakoꞌulh.

10 Vachuꞌ laktsꞌipaxcavacan ixpumatujunꞌan kꞌai ucxtinin.

Pus ju ixpumaquisiꞌan alhajacalh.

Ju pumatam tꞌajuncaꞌ.

Ju pumatam tucaꞌ tasui.

Para acsni caminach jantu makꞌan catolaꞌ laꞌixpuꞌucxtin.

11 Chai ju anuꞌ maktiliꞌ ju ixtꞌajun chai nitach ju chavai yuchach ju ixlhipumatsajin ucxtin cajunaꞌ.

Ixtꞌalapanac cajunaꞌ ju ixlhipumatujunꞌan ju pꞌulhnan ixtatꞌajun.

Para vachuꞌ camaclacanaꞌ.

12 Chai ju anuꞌ lakacau ixꞌakalokot ju anuꞌ slapulh maktiliꞌ ju laktsꞌintꞌa yuchi laktsꞌipaxcavacan ju ixpumacauꞌan ucxtinin.

Ju yuꞌunch tucaꞌ axtaknican ixpuꞌucxtinꞌan.

Para catꞌaꞌaxtaknicanaꞌ ju maktiliꞌ ixpokꞌaiꞌan chai va tam hora ju lai catalhinonaꞌ.

13 Ju yuꞌunch va lakatam junita ixꞌatalacpastꞌacꞌatꞌan.

Chai taxtakni ixpokꞌaiꞌan ju anuꞌ maktiliꞌ.

14 Chai ju yuꞌunch catatꞌalasayaꞌ ju Askꞌatꞌa Borrego.

Para ju Askꞌatꞌa Borrego calhajananaꞌ ni yuchi ju tucan ucxtin tachi chun ju ucxtinin.

Chai yuchi ju tucan xakꞌai tachi chun ju xalackꞌajin.

Chai ju alactꞌavi atꞌasanicanta chai asacxtucanta chai na tamuctaxtui ju ixchivinti ju yuchi.

15 Chai vachuꞌ chani quijunilh ju anquilh:

―Ju anuꞌ xcan ju laktsꞌintꞌa junta ixvi ju anuꞌ alactuꞌunu chakoꞌulh yuchi laktsꞌipaxcavacan tachi chun ju lapanacni ju tatꞌajun ixlhilacaputsꞌun ju lacamunutpaꞌ chai tachivinin tijpachux chivinti.

16 Chai ju anuꞌ lakacau akalokot ju laktsꞌintꞌa ju ixlaccꞌatujucalh ju anuꞌ maktiliꞌ cataxcayach ju chakoꞌulh.

Chai ixlacataꞌan ju yuꞌunch camaconicanaꞌ ju anuꞌ chakoꞌulh.

Chai ju yuchi va kꞌai tsasau camaconicanaꞌ.

Chai ju lakacau akalokot chai ju maktiliꞌ tachi ju va catakꞌaiꞌuyach ixꞌacanit chai catalacxavayach ju caxajanta.

17 Chunch ju catanaviyaꞌ ni Dios ju xaꞌamapastꞌacꞌani ni chunch ju catalalh tachi ju lhilhcata ju yuchi.

Pus ju anuꞌ lakacau akalokot catanaviyaꞌ tachi ju lhilhcata ju Dios acsni va lakatam cajunaꞌ ixꞌatalacpastꞌacꞌatꞌan chai acsni cataxtakniyaꞌ ixpuꞌucxtinꞌan ju maktiliꞌ tus acsni caꞌuctaxtuyanta ju ixchivinti Dios.

18 Chai ju anuꞌ chakoꞌulh ju laktsꞌintꞌa laktsꞌipaxcavacan ju kꞌai lakꞌachakꞌan ju alhijuni tachi chun ju xalackꞌajin ucxtinin ju ani lacamunutpaꞌ.

―Chunch ju xaquijuni ju anquilh.