―Inchitꞌit.

Axtꞌekꞌemacꞌapꞌitꞌit ju lacatꞌun ju makꞌalhkꞌajnat ju xalhinajun ju Dios ixmacaꞌanca.

Yuchi ju tajun lacalakatujun mimpumapꞌunꞌan.

2 Pus alh ju xapꞌulhnan anquilh chai xtꞌekꞌemacamilh ju lacatꞌun ju tuchi ixtajun laꞌixpumapꞌun.

Chai lana alilh ju macxcai istsꞌitsꞌiꞌan ju lapanacni ju ixtapacxanta ixlhamichin ju maktiliꞌ chai tamaklacaꞌanilh ju ixlapalaxtucanta tachi ixlacatuna ju anuꞌ maktiliꞌ.

3 Pus ju ixlhipumatꞌui anquilh vachuꞌ xtꞌekꞌemacamilh ju lacaꞌalama ju tuchi ixtajun laꞌixpumapꞌun.

Chai lana tapalakꞌo acꞌalhni tachi ju tamai acꞌalhni junta lamaknican.

Pus tachi chun ju atapacxat ju ixtꞌajun lacaꞌalama tanikꞌo.

4 Chai ixlhipumatꞌutu anquilh vachuꞌ xtꞌekꞌemacamilh ju lacxcan ju tuchi ixtajun laꞌixpumapꞌun.

Vachuꞌ taju junta taꞌacxtui ju xcan.

Pus lana si acꞌalhni jonkꞌo.

5 Chai ickꞌasmatlh ni chivinilh ju anquilh ju lakꞌalhilh ju xcan.

Chani naulh:

―Aktsꞌiya soknicꞌa ju navi acsni xtꞌakꞌa ju chunch makꞌalhkꞌajnat ji uxintꞌi ju na salakaꞌat.

Ju uxintꞌi tꞌaꞌun chai tus va tavananch ixtꞌaꞌun.

6 Chunch icjunan ni yuꞌunch ju amamakꞌalhkꞌajni ju chavai ju taꞌamaxtunilh ixꞌacꞌalhniꞌan ju milapanacni chai ju ixtanajun ju minchivinti.

Chai ju chavai ju uxintꞌi amakꞌotꞌutꞌa ju xcan ju lapꞌalatꞌi acꞌalhni.

Pus ixlhijunch ni chunch ju caꞌaꞌulhtucalh.

7 Chai ickꞌasmatlh lakatam chivinti ju taxtuchalh junta ixavanican ju Dios ju pum.

Chai chani naulh:

―Ji ucxtin Dios ju lai navikꞌoꞌui tachi chun ju taxtokni ju uxintꞌi aktsꞌiya muctꞌaxtꞌui ju minchivinti chai sok ju navi acsni xtꞌakꞌa ju makꞌalhkꞌajnat.

―Chunch ju naulh.

8 Pus ju ixlhipumatꞌatꞌi anquilh xtꞌekꞌemacaꞌalh ju lacaꞌavilhchan ju tuchi ixtajun laꞌixpumapꞌun.

Chai xtaknicalh ju avilhchan ixtachaput ni laich slivasalh caꞌalacamaccha ju lapanacni chai catalackꞌaimakataxtulh.

9 Pus ju lapanacni slivasalh na talaclacacha ju lacaꞌascꞌunuꞌ.

Chai na macxcai chivinti tajunilh ju Dios ju ixlhinajun ni caꞌalilh ju chunch makꞌalhkꞌajnat.

Para nin chunch jantu tavanan tam tapastaclh nin yuchi ni laich catalakꞌaya.

10 Chai ju ixlhipumaquis anquilh xtꞌekꞌemacamilh laꞌixputolan ju maktiliꞌ ju tuchi ixtajun laꞌixpumapꞌun.

Pus lana putsꞌiskꞌo junta ixlhinajun ju anuꞌ maktiliꞌ ju ixtacutcha lacaꞌalama.

Chai ju lapanacni na ixtapakꞌatsꞌi ju isimakꞌatꞌan ni na ixtamakꞌalhkꞌajnan.

11 Chai tajuni macxcai chivinti ju Dios ju vilhcha lactꞌiyan ni ixtatꞌajun makꞌalhkꞌajnin ni na lhu lana ixꞌalin ju istsꞌitsꞌiꞌan.

Para mas chunch ju ixtamakꞌalhkꞌajnan jantu tavanan tam tapastaclh ixlacata ju tuchi ixtanavi.

12 Pus ju ixlhipumachaxan anquilh xtꞌekꞌemacamilh laxakꞌai xcan Eufrates ju tuchi ixtajun laꞌixpumapꞌun.

Pus lana xixkꞌo ju xcan.

Ju chunch ni jantu xcai catatapasayaꞌ ju xaꞌucxtinin ju cataminanta ju lhichꞌatoꞌanta ni va cataminaꞌ lasanin.

13 Chai iclaktsꞌilh pumatꞌutu lhacaticurulhni.

Ju pumatam taxtulh laꞌixquilhni ju kꞌai lu.

Chai pumatam taxtulh laꞌixquilhni ju maktiliꞌ.

Chai apumatam taxtulh laꞌixquilhni ju anuꞌ lapanac ju istasui tachi ixlapanac Dios mas jantu.

Chai ju anuꞌ ixpumatꞌutuꞌan chunch istasui tachi ju tuꞌuꞌ venkꞌen.

14 Pus ju yuꞌunch lhacaticurulhni tajunita.

Chai lai tanavi ju tuꞌuꞌ lhamakꞌan.

Pus talakꞌan ju xalackꞌajin ucxtinin ixlhilacaputsꞌun ju lacamunutpaꞌ ni va tamakꞌaixtokputun ni laich catalasayaꞌ acsni cachinaꞌ ju kꞌai avilhchan.

Ju acsnich catatꞌalasayaꞌ ju Dios ju lai navikꞌojui tachi chun ju taxtokni.

15 Acsnich ju caminaꞌ ju Jesús tachi ju naulh.

Chunch tachi tam akꞌalhonaꞌ ni chin acsni jantu cꞌatsacan ni laich cachilh ju acs pantsꞌiquis.

Pus na kꞌachanch ju skꞌala tsucui chai lhistꞌacꞌa ju snapapa ixpumpuꞌ ni jantu va kꞌai tsasau cajunlh chai camaxanalh ni matiꞌ ju xnapapa ju ixpumpuꞌ.

16 Pus amakꞌaixtokcalh ju xalackꞌajin ucxtinin junta Armagedón juncan lacalhihebreo.

17 Chai ju ixlhipumatujun anquilh xtꞌekꞌemacaꞌalh ju lacaꞌun ju tuchi ixtajun laꞌixpumapꞌun.

Chai lana taxtulh lakatam chivinti lacpujitat.

Anchach junta ixya ju kꞌai putolan.

Chai ixnajun:

―Va yuchach ju ani ju makꞌalhkꞌajnat.

18 Chai lana makꞌalipnilh.

Chai na pꞌas lacchivincalh.

Chai na pꞌas tꞌasalh ju tꞌajin.

Chai na pꞌas tataclh ju lacatꞌun.

Pus tus acsni tavanan alilh ju lapanacni ju ani lacamunutpaꞌ jantu tavanan ixlaktsꞌincanta ni catataclh ju lacatꞌun tachi ju lalh ju acsni.

19 Pus ju anuꞌ kꞌai lakꞌachakꞌan ju Babilonia ixjuncan pumakatꞌutu pupaklh chai takꞌalhikꞌo.

Chai tachi chun ju kꞌai lakꞌachakꞌanixni ixlhilacaputsꞌun ju lacamunutpaꞌ lana takꞌalhikꞌo.

Chai ju Dios pastaclh ju talakꞌalhin ju ixtanavita ju amachakꞌan ju anuꞌ kꞌai lakꞌachakꞌan.

Chai naulh ni vasalh camispayaꞌ ixtatsꞌinqꞌuit ju ixtalhkꞌamti.

20 Pus tachi chun ju lactꞌicstꞌi lacatꞌun ju ixvi lacaꞌalama tatsꞌankꞌakꞌo.

Chai matiꞌ va ju talhpa.

21 Chai lackꞌai chajꞌit ju minchalh lactꞌiyan.

Ixtatsꞌinqꞌui tachi tꞌupꞌuxam kilo ju lakatamin.

Chai ju lapanacni tajuni macxcai chivinti ju Dios ixlacata ju makꞌalhkꞌajnat ju alilh ni tamachilh ju chajꞌit.

Slivasalh na kꞌai lhitalhan va.