Tasu lakatꞌui maktilin
13
Pus ju quitꞌin ictachꞌantalh lacacucu laꞌixquilhtuꞌ alama.
Chai iclaktsꞌilh ni tacutlh lacaꞌalama lakatam maktiliꞌ.
Chai ixꞌalin lakacau ixꞌakalokot chai lakatujun isꞌaktsulh chai lakatamin ixcorona laꞌixꞌakalokot.
Chai ju lakatamin isꞌaktsulh ju yuchi ixmuntiꞌulacanta ju tapakaꞌut ju lana jantu kꞌox lhiulai ju Dios.
2 Pus ju anuꞌ maktiliꞌ ju iclaktsꞌilh chunch ixjunita ju ixlacatuna tachi ju tuꞌuꞌ leopardo.
Chai ju ixchꞌajaꞌ chunch ixjunita tachi ixchꞌajaꞌ ju tuꞌuꞌ oso.
Chai ju ixquilhni chunch ixjunita tachi ixquilhni ju tuꞌuꞌ león.
Chai ju kꞌai lu xtaknilh ju ani maktiliꞌ ixtachaput chai ixpuꞌucxtin.
3 Pus na iscꞌatsani ju anuꞌ maktiliꞌ ju lakatam ju isꞌaktsulh.
Chai istasui tachi ju va lai caꞌixpuni.
Para macaxnilh junta iscꞌatsani.
Chai tachi chun ju lapanacni ju tatꞌajun ju ani lacatꞌun tachꞌakꞌokꞌalh ju anuꞌ maktiliꞌ chai na talhamakꞌaninilh.
4 Pus ju lapanacni talakꞌayalh ju kꞌai lu ni ixtaknita ixtachaput ju maktiliꞌ.
Vachuꞌ talakꞌayalh ju maktiliꞌ.
Ixtanajun:
―Tis chavaich ju laich ixtꞌachunch cava ju maktiliꞌ.
Chai tis chavaich ju lai catꞌalasa ju yuchi.
5 Chai ju maktiliꞌ xtaknicalh ixtachaput ni laich na jokꞌat cachivinilh chai vachuꞌ canaulh macxcai chivinti ixlacata ju Dios.
Chai yau junicalh ni laich cachꞌalhcatnanaꞌ lakatꞌutu cꞌata a paitat.
6 Pus na macxcai chivinti ixnajun ixlacata Dios chai ixlacata ju ixpujitat Dios chai ixlacataꞌan ju tatꞌajun ju lactꞌiyan.
7 Chai yau junicalh ni laich caꞌalactꞌalasa ju talhilacaꞌanta ju Cristo chai laich caꞌalhajanalh.
Chai vachuꞌ xtaknicalh ixtachaput ni ixꞌucxtinꞌan cava tachi chun ju lapanacni ju tatꞌajun ixlhilacaputsꞌun ju lacamunutpaꞌ chai ju tachivinin tijpachux chivinti.
8 Chai tachi chun ju lapanacni ju tatꞌajun ju ani lacamunutpaꞌ catalakꞌayayaꞌ ju anuꞌ maktiliꞌ.
Para alin ju lapanacni ju atsꞌokꞌulacanta laꞌixꞌalhiqui ju Askꞌatꞌa Borrego ju ixmaknicanta.
Chai anch ju najun tichi chavaich ju alin isꞌatsucunti jonkꞌalhita.
Chai ixtapakaꞌut ju kꞌantam kꞌantam anch ju istsꞌokꞌulacanta tus acsni tucaꞌ ixnavicantacha ju lacamunutpaꞌ.
Pus ju yuꞌunch ju anch atsꞌokꞌulacanta jantu catitalakꞌaya ju anuꞌ maktiliꞌ.
9 Pus ni xamatiꞌ alin ixpakꞌasmatni chach kꞌasmatlh.
10 Ju talhiꞌan lacapulachꞌin ixtꞌalapanac pus vana va chunch ju canavicanaꞌ.
Chai ju lacamachita amakninin pus lacamachita capumaknichokocanaꞌ.
Pus yuchi lhitasqꞌuini ni catachꞌixlh ju makꞌalhkꞌajnat ju talhilacaꞌanta ju Dios chai va tachi catalhilaksilhch ju yuchi.
11 Pus ju acsnich iclaktsꞌilh alakatam maktiliꞌ ju taꞌacxtulh ju lacatꞌun.
Chai ixꞌalin lakatꞌui lactꞌicstꞌi ixꞌakalokot tachi ixꞌakalokot ju tuꞌuꞌ askꞌatꞌa borrego.
Chai chunch ju ixchivinin tachi ju ixchivinin ju anuꞌ makakꞌai lu.
12 Chai ixꞌalin ixtachaput tachi ju xapꞌulhnan maktiliꞌ.
Chai tavilh laꞌixpuꞌucxtin laꞌixꞌucxlacapuꞌ ju xapꞌulhnan maktiliꞌ chai tapꞌastu ajuni ju lapanacni ni catalakꞌayalh ju xapꞌulhnan maktiliꞌ.
Yuchi ju macaxnilh junta iscꞌatsani chai istasui tachi ju va lai caꞌixnilh.
13 Chai ju anuꞌ ixlhilakatꞌui maktiliꞌ na lai ixnavi ju tuꞌuꞌ lhamakꞌan.
Mas yuchi ju jipi lai ixmakꞌalhtajui ju lactꞌiyan.
Ixchin ju lacatꞌun laꞌixꞌalacꞌavantiꞌan ju lapanacni.
14 Chai yau junicalh ni laich canavi laꞌixꞌucxlacapuꞌ ju xapꞌulhnan maktiliꞌ ju tuꞌuꞌ lhamakꞌan.
Chai yuchi ju apuꞌokxchokꞌolh ju lapanacni ju ani lacamunutpaꞌ.
Va ajuni ni catalapalaxtulh tachi ixlacatuna ju anuꞌ maktiliꞌ ju iscꞌatsani lacamachita para jantu xani.
15 Chai ixtaknicanta ixtachaput ni laich caxtakniyaꞌ isꞌatsucunti ju anuꞌ lapalaxtucanta tachi ixlacatuna ju maktiliꞌ.
Pus ju chunch ju anuꞌ ju ixlapalaxtucanta naulh ni camaknicanaꞌ va tichi chavaich ju jantu calakꞌayayaꞌ ju yuchi.
16 Chai ju ixlhipumatꞌui maktiliꞌ lhinaulh ni camichicalh tachi chun ju lapanacni laꞌixlhicana ixlacmacaꞌan u laꞌismuntsanꞌan.
Chux ju xalactꞌicstꞌin chai ju xalackꞌajin.
Chux ju makꞌalinin chai ju quilhpatinin.
Chux ju matiꞌ ixꞌucxtinꞌan chai ju va xalapanacni ixtajunita.
17 Pus ju chunch jantu lai xamatiꞌ catitamaulh ju tuꞌuꞌ u castꞌalh ju tuꞌuꞌ ni jantu michicanta.
Pus ju ixꞌalhimichican yuchi ixtapakaꞌut ju maktiliꞌ ju istsꞌokcanta lacachivinti u lacaꞌaputekꞌenta ju alhimispacan ju anuꞌ maktiliꞌ.
18 Pus na tasqꞌuini ju kꞌox acꞌatsanti ni lai machakxacan ju ani.
Pus ju na lai amachakxanan laich camispayaꞌ ixꞌaputekꞌenti ju maktiliꞌ.
Pus ju anuꞌ aputekꞌenti nomputun ixtapakaꞌut tam xamatiꞌ.
Pus ju anuꞌ aputekꞌenti yuchi ju lakachaxan cientos a sesenta y seis.