Tasulh pumatam chakoꞌulh chai lakatam kꞌai lu
12
Chai alilh ju lactꞌiyan lakatam kꞌai lhamakꞌan.
Yuchi ni tasu pumatam chakoꞌulh ju ixlakchꞌita ju avilhchan.
Chai ixpuchꞌantai ju malhquiyuꞌ.
Chai laꞌisꞌaktsulh ixꞌalin ixcorona junta ixmucꞌacanta lakacautꞌui stꞌacu.
2 Chai ixpacxanta isꞌaskꞌatꞌa.
Chai ni na ixtꞌajun makꞌalhkꞌajnaꞌ pus na pꞌas istꞌasai ni va laich sokꞌon camaklakꞌavanalh.
3 Chai tasuchokopa alakatam lhamakꞌan ju lactꞌiyan.
Yuchi ni tasu lakatam makakꞌai lu ju na slapulh ixjunita.
Chai ju yuchi ixpacxanta lakatujun isꞌaktsulh chai lakacau ixꞌakalokot chai lakatamin ixcorona laꞌixlacꞌaktsulh.
4 Chai ju anuꞌ kꞌai lu laꞌisꞌista amapatajuni ju stꞌacu.
Tatamachilh tus lacatꞌun.
Para jantu ixchaꞌanta paitat ju stꞌacu ju patajulh.
Chai ju anuꞌ kꞌai lu taya laꞌixꞌucxlacapuꞌ ju anuꞌ chakoꞌulh ju na ixlokꞌomputunch ni va caꞌixꞌunilh ju isꞌaskꞌatꞌa ju ixmaklakꞌaulich.
5 Pus ju chakoꞌulh maklakꞌaulh pumatam tsꞌalh.
Yuchach ju kꞌai ucxtin catalhimispayaꞌ tachi chun ju lapanacni.
Chai ju tuchi canonaꞌ ju yuchi yuchach ju cataquiclacaꞌiyaꞌ ju lapanacni.
Para ju isꞌaskꞌatꞌa ju anuꞌ chakoꞌulh lhiꞌancalh junta vilhcha ju Dios tus lacakꞌai ixputolan.
6 Chai ju anuꞌ chakoꞌulh atsꞌalaꞌalh junta va aseknicꞌa junta ixlakꞌoxinita ju Dios.
Anchach junta lai camavacalh tam milh a lakatꞌui cientos a sesenta avilhchan.
7 Chai alilh ju kꞌai lasat ju lactꞌiyan.
Pus ju Miqui yuchi ju lhinajun laꞌixtalhavatꞌan ixꞌanquilhnin Dios.
Pus ju yuchi chai ju ixꞌanquilhnin tatꞌalasalh ju makakꞌai lu chai ju ixꞌanquilhnin ju makakꞌai lu.
8 Para tatsꞌankꞌa ju makakꞌai lu chai ixꞌanquilhnin.
Chai jantu lai tatsuculh ju lactꞌiyan.
9 Pus lana tixcoxtucalh ju lactꞌiyan ju kꞌai lu.
Yuchach ju anuꞌ lu ju makꞌaniya ixtꞌajunch.
Yuchach ju lhacaticuru chai Satanás juncan.
Yuchach ju aꞌokxchokꞌoi tachi chun ju lapanacni.
Pus acsni lhajacalh ju makakꞌai lu acsnich ju tin macamincalh tus ani lacatꞌun.
Chai ju ixꞌanquilhnin alactꞌamacamincalh.
10 Chai ickꞌasmatlh ni na pꞌas ixchivincan ju lactꞌiyan ni laich cakꞌasmatkꞌocalh.
Ixnajun:
―Ju chavai chilh ju avilhchan acsni caꞌamakꞌalhtaxtuyaꞌ ixlapanacni ju Dios.
Catasuyaꞌ ni vasalh alin ju ixtachaputꞌan ju Dios chai ju Cristo.
Pus putasui ni alin ixtachaputꞌan ni tixcauxtucalh ju ixꞌachivixtꞌakꞌa ju quiꞌalakꞌavinꞌan.
Tontacuj chai tontatsꞌis ixꞌan achivixtaknaꞌ laꞌixmacni Dios.
11 Para ju quiꞌalakꞌavinꞌan tatꞌalalhajalh ju anuꞌ kꞌai lu.
Tapulhajalh ixꞌacꞌalhni ju anuꞌ Askꞌatꞌa Borrego chai laꞌixchivintiꞌan junta ixtanajun ni laꞌixlhichux ixꞌalhunutꞌan ixtalhilaksi ju Jesucristo.
Chai ju yuꞌunch jantu tuꞌuꞌ ixtalhiulai ju isꞌatsucuntiꞌan mas catanilhch.
12 Pus ni alhajanalh ju Cristo pus yuchi calhiꞌalinaꞌ ju kꞌachat ju lactꞌiyan.
Na catakꞌachanach tachi chun ju tatꞌajun ju anch.
Para painiꞌitnich ju uxijnan ju tꞌonatꞌit ju lacatꞌun chai ju lacaꞌalama.
Painiꞌitnich untꞌatꞌit ni taquilakquilatachin ju uxijnan ju lhacaticuru.
Chai slivasalh talhkꞌaman ju yuchi ni cꞌatsai ni jantu makꞌan catichꞌalhcatnalh.
―Chunch ju naulh ju anuꞌ ju ixchivinin.
13 Chai ju kꞌai lu acsni tixcolhimincalh tus lacatꞌun pus lana chꞌakꞌokꞌaxma ju anuꞌ chakoꞌulh ju ixmaklakꞌajunta istsꞌalh.
14 Para lana xtaknicalh lakatꞌui ixpakꞌachu ju anuꞌ chakoꞌulh.
Chunch ixjunita ju ixpakꞌachu tachi ixpakꞌachu ju kꞌai kꞌatsꞌokꞌo.
Ju chunch ni lai capulackꞌosmakꞌanaꞌ ju kꞌai lu.
Laich caꞌalhtꞌilitniꞌalh junta aseknicꞌa junta ixlakꞌoxinita ju Dios.
Anchach junta lai camavacalh lakatꞌutu cꞌata a paitat.
15 Chai ju anuꞌ kꞌai lu tsuculh quilhtaxtunuꞌ ju xcan tachi ju tuꞌuꞌ kꞌai xcan.
Chai ju xcan taima ju anuꞌ chakoꞌulh ni va ixlacasqꞌuin ju kꞌai lu ni camuxtulh ju anuꞌ chakoꞌulh.
16 Para ju lacatꞌun aktaijulh ju chakoꞌulh.
Pus lana lakchꞌuchꞌuꞌokꞌo ju xcan.
Chai maxixilh ju kꞌai xcan ju ixquilhtaxtuta ju kꞌai lu.
17 Pus ju acsnich ju kꞌai lu slivasalh tꞌalaxcailich ju anuꞌ chakoꞌulh.
Pus alh alactꞌalasanaꞌ ju aliꞌin isꞌaskꞌatꞌan ju anuꞌ chakoꞌulh.
Yuꞌunch ju tamuctaxtui tachi ju najun laꞌixlhamapꞌaksin ju Dios chai va tachi talhilacaꞌanta ju Jesucristo.