Maknicalh ixtꞌiyunꞌan lapanacni
11
Pus acsnich icxtaknicalh kꞌantam actiyac ju pulhcacan tuꞌuꞌ.
Chai icjunicalh:
―Akꞌostꞌaꞌulh chai alhcꞌatꞌich ju ixpujitat Dios chai junta xavanican ju pum ju Dios.
Vachuꞌ apꞌutꞌekꞌe ju anch taꞌan lakꞌayanin ju Dios.
2 Para jantu alhcꞌayapꞌi ju laꞌismakspaꞌ ju pujitat.
Ju anch axtaknican ju yuꞌunch ju jantu talakꞌayai ju Dios.
Chai lakatꞌutu cꞌata a paitat catalhinonaꞌ ju yuꞌunch ju lakꞌachakꞌan junta lakꞌayacan ju Dios.
3 Chai acꞌaxtakniyaꞌ ixtachaputꞌan ixtꞌiyunꞌan quilapanacni.
Ju chunch laich catanonaꞌ ju quinchivinti tam milh a lakatꞌui cientos a sesenta avilhchan.
Chai catalakchꞌiyaꞌ ju pumpuꞌ tachi ju talakchꞌi ju na taꞌamakꞌaninin.
4 Yuꞌunch ju tachi akꞌatꞌui xaqꞌuiu olivo tajunita.
Chai tachi ju lakatꞌui ixputayan cantila ju ya laꞌixꞌucxlacapuꞌ ju Dios ju amanavin ju lacamunutpaꞌ junita.
5 Chai ni xamatiꞌ calactuꞌuputunaꞌ pus lana taxtui ju alapnaꞌ laꞌixquilhniꞌan ju ixtꞌiyunꞌan lapanacni.
Chai lana amakni ju ixtꞌalaxcaiꞌan.
Pus ni xamatiꞌ calactuꞌuputunaꞌ chunchach ju capuniyaꞌ.
6 Chai ju yuꞌunch ixtꞌiyunꞌan lapanacni axtaknicanta ju ixtachaputꞌan ni laich catanonaꞌ ni jantu caminaꞌ ju xcan tachi chun ju avilhchan ju catatsucuyaꞌ nonin ixchivinti Dios.
Chai vachuꞌ alin ixtachaputꞌan ni lai catalapalakꞌo acꞌalhni ju xcan.
Chai lai caꞌamamakꞌalhkꞌajni ju lapanacni tijpachux ju makꞌalhkꞌajnat va tapakchux ju catanaviputunaꞌ.
7 Chai acsni catanavikꞌoyaꞌ ixlhichꞌalhcatꞌan ixnajunca ixchivinti Dios pus ju maktiliꞌ ju cataxtuyaꞌ junta na makat lhokꞌonkꞌoꞌanta caꞌalactꞌalasayaꞌ ju yuꞌunch.
Chai calhajananaꞌ ju yuchi.
Chai caꞌamakniyach ju ixtꞌiyunꞌan lapanacni.
8 Chai ixlacatunaꞌan catamayaꞌ lacati ju lakꞌachakꞌan junta maknicalh lacacurus ju Jesús.
Pus ju Dios najun ni chunch junita ju anuꞌ lakꞌachakꞌan tachi ju lakꞌachakꞌan Sodoma chai tachi ju lacatꞌun Egipto.
9 Pus ju lapanacni ju tatꞌajun ixlhilacaputsꞌun ju lacamunutpaꞌ chai ju tachivinin tijpachux chivinti catalaktsꞌiniyach ju ixlacatunaꞌan lakatꞌutu avilhchan a paitat.
Ju anuꞌ ixtꞌiyunꞌan ju xaꞌamaknican.
Chai jantu calacasqꞌuincanaꞌ ni lai caꞌancalh amacnuca.
10 Chai ju lapanacni ju tatꞌajun ju ani lacatꞌun catalhikꞌachanach ixlacataꞌan ju yuꞌunch.
Chai catalhicꞌataniyaꞌ chai catalapuxtakniyaꞌ lhakꞌailaktsꞌin.
Chunch ju catanaviyaꞌ ni na ixtaꞌamamakꞌalhkꞌajni ju lapanacni ju ixtatꞌajun ju ani lacamunutpaꞌ ju anuꞌ ixtꞌiyunꞌan ixlapanacni Dios.
11 Para acsni tapasalh ju anuꞌ lakatꞌutu avilhchan a paitat pus ju Dios axtaknichokolh isꞌatsucuntiꞌan chai lana takꞌostavi junta ixtamanalh.
Chai na kꞌox tatalhanalh ju talaktsꞌilh.
12 Pus ju acsnich ixtꞌiyunꞌan takꞌasmatlh lakatam chivinti ju minchalh lactꞌiyan.
Na pꞌas ju chivinilh ni laich catakꞌasmatꞌaꞌ.
Chanich ju ajuni:
―Atꞌatꞌitch ju ani.
Chai lana tapuꞌalh ju ataputsꞌi ju lactꞌiyan.
Chai na kꞌoxich talaktsꞌilh ju ixtꞌalaxcaiꞌan.
13 Chai ju anuꞌ pantsꞌiquis lana na pꞌas tataclh ju lacatꞌun.
Chai ju tamin cientos chakaꞌ ju ixyanalh ju anuꞌ lakꞌachakꞌan lakacavin chakaꞌ takꞌalhikꞌo junta lai.
Chai acsni tataclh ju lacatꞌun pus tani lakatujun milh lapanacni.
Chai ju aliꞌin na tatalhanalh chai talakꞌaya ju Dios ju vilhcha lactꞌiyan.
14 Pus chunch ju tapasalh ju ixlhilakatꞌui makꞌalhkꞌajnat chai vatsꞌalhti caꞌalinaꞌ ju ixlhilakatꞌutu.
Ju ixlhipumatujun anquilh sunulh ju iskꞌolh
15 Pus ju acsnich sunulh ju iskꞌolh ju ixlhipumatujun anquilh.
Chai lana na pumalhu ju na pꞌas ixtachivinacha ju lactꞌiyan ni laich cakꞌasmatkꞌocalh.
Ixtanajun:
Ju chavai quiDiosꞌan chai ju Cristo catamalacasuyaꞌ ixtachaputꞌan.
Chai catalhinonkꞌalhiyaꞌ ixlhilacaputsꞌun ju lacamunutpaꞌ.
16 Pus ju ixpumapꞌuxamtꞌatꞌi papanin ixtavilanalh lacakꞌai ixputolanꞌan laꞌixꞌucxlacapuꞌ Dios.
Pus ju yuꞌunch lana tataquilhputanilh ju Dios chai talakꞌayalh.
17 Ixtajuni:
Ji quiꞌucxtin Dios ju lai navikꞌoꞌui tachi chun ju taxtokni uxintꞌi ju ixtꞌaꞌun tus acsni maticaꞌ tuꞌuꞌ ixjunita chai atsꞌucꞌukꞌalhiyaꞌ tus mas va tavananch.
Pus iclaxtakniyau lakꞌailaktsꞌiuch ni chꞌapꞌatꞌa ju mimpokꞌai chai lhinaꞌunch ju chavai.
18 Pus ju lapanacni ju tatꞌajun ixlhilacaputsꞌun ju lacamunutpaꞌ tatalhkꞌamalh.
Para vachuꞌ tꞌalhkꞌamch ju uxintꞌi.
Chai chilh ju chavai ju avilhchan acsni calaktsꞌintanucanach ju tanitach.
Vachuꞌ chilh ju avilhchan acsni axtꞌakniyaꞌ ixtalhajaꞌan ju milapanacni chai ju ixtanajun ju minchivinti chai ju salaka alaktsꞌin chai ju na tatalhoniyan.
Axtꞌaknikꞌoyaꞌ chux.
Mas yuꞌunch ju jantu tuꞌuꞌ ixtapalhniꞌan chai vachuꞌ yuꞌunch ju xalackꞌajin tajunita.
Chai chilh ju chavai ju avilhchan acsni amamakꞌalhkꞌajniyaꞌ ju na ixtaꞌamamakꞌalhkꞌajninin ju lacamunutpaꞌ.
19 Pus ju acsnich ju lactꞌiyan lana malhtekꞌacalh ju laꞌixpujitat Dios chai istasui laꞌixpulacni ju kꞌai pꞌaklat junta ixmakꞌacanta ju chivinti ju ixꞌalaclhitꞌatakꞌoxita ju Dios ju israelitanin.
Chai lana makꞌalipnilh.
Chai na pꞌas lacchivinincalh.
Chai tꞌasalh ju tꞌajin.
Chai tataclh ju lacatꞌun.
Chai tamachilh ju chajꞌit.