Pumatam anquilh ixchꞌapata lakatam alhiqui
10
Pus ju acsnich iclaktsꞌilh apumatam anquilh ju na tachapun ixjunita.
Chai ju yuchi mincha lactꞌiyan.
Va milh lacaꞌataputsꞌi.
Chai lakatam quilhmacchat ixlacpajucalh.
Chai ju ixꞌucxpuꞌ chunch istasui tachi ju avilhchan.
Chai ju ixchꞌajaꞌ chunch ixtajunita tachi ju tuꞌuꞌ makꞌakꞌai tantun ju na maktajita.
2 Chai ixchꞌapata lakatam lacatꞌicstꞌi alhiqui ju ixtapuxkꞌota.
Chai laꞌixlhichꞌancana putachꞌanju lacaꞌalama.
Chai laꞌixlhichꞌanmacx putachꞌantalh lacatꞌun.
3 Chai lana kꞌox pꞌas ju chivinilh tachi acsni na pꞌas tꞌasai ju tuꞌuꞌ kꞌai león.
Chunchach ju chivinilh ni laich cakꞌasmatkꞌocalh ixlhilacaputsꞌun ju lacamunutpaꞌ.
Chai acsni tꞌasalh ju anuꞌ anquilh pus paktujun tꞌasalh ju tꞌajin.
4 Chai acsni istꞌasakꞌolhch paktujun ju tꞌajin pus ju quitꞌin xactsꞌokꞌulaputun tuchi naulh.
Para ickꞌasmatlh lakatam chivinti ju mincha lactꞌiyan ju chani xaquijuni:
―Jantu atsꞌokꞌulatꞌi.
Va amakꞌatꞌich lamiꞌalhunut ju tuchi xanajun ju tꞌajin acsni xatꞌasai paktujun.
5 Chai ju anuꞌ anquilh ju iclaktsꞌilh ni ixya lacaꞌalama chai lacatꞌun macꞌalh ju lactꞌiyan laꞌixlhicana.
6 Chai lhipastacli ju Dios ixpumavasalaca ixchivinti.
Lhipastaclh ju Dios ju tꞌonkꞌalhi.
Yuchi ju navilh ju tꞌiyan chai tachi chun ju taxtokni ju alin ju anch.
Chai yuchi ju navilh ju lacatꞌun chai tachi chun ju taxtokni ju alin ju ani.
Chai yuchi ju navilh ju lacatꞌun chai tachi chun ju taxtokni ju alin ju anch.
Pus lhipastacli ju Dios chai naulh ni jantuch aliꞌ tuꞌuꞌ cꞌacx.
Va yuchi ni caꞌuctaxtukꞌoyach tachi chun ju ispastacta ju Dios.
7 Para acsni cachinaꞌ ju avilhchan acsni casunaꞌ ju iskꞌolh ju ixlhipumatujun anquilh acsnich ju cacꞌatsacanaꞌ ju tuchi ixꞌajuni ju Dios ju ixlapanacni para jantu tavanan lai tamachakxa.
8 Pus ju acsnich ju anuꞌ chivinti ju ickꞌasmatlh ju minchalh lactꞌiyan aktam quixakꞌalachokopa.
Quijuni:
―Inchich iniꞌ ju alhiqui ju tapuxkꞌota laꞌixmacaꞌ ju anuꞌ anquilh ju chꞌanjui ixtachꞌantam lacaꞌalama chai ju ixtachꞌantam lacatꞌunch.
9 Pus iclakꞌalh ju anquilh chai icjunilh ni aquixtaknilh ju lacatꞌicstꞌi alhiqui.
Chai ju yuchi quijuni:
―Nich.
Aꞌutꞌich.
Na sun cajunaꞌ lamimpajan para ju laminquilhni slivasalh na saksi cajunaꞌ tachi ju tuꞌuꞌ tꞌaxcat.
10 Pus ju quitꞌin icꞌamaklhtayanalh ju lacatꞌicstꞌi alhiqui laꞌixmacaꞌ ju anquilh chai lana icꞌulh.
Chai vasalh na saksi iclhiula laquinquilhni.
Lana chun tachi ju tuꞌuꞌ tꞌaxcat.
Para acsni icꞌokꞌolh pus na sunch va laquimpajan.
11 Chai icjunicalh:
―Aktsꞌiya tasqꞌuini ni aꞌunchꞌokꞌoyaꞌich ju lapanacni tuchi catapasayaꞌ.
Aꞌunch ju lapanacni ju tatꞌajun ixlhilacaputsꞌun ju lacamunutpaꞌ chai ju tachivinin tijpachux chivinti chai ju kꞌai ucxtinin.