9
Pus ju ixlhipumaquis anquilh sunulh ju iskꞌolh chai iclaktsꞌilh ni patajulh lakatam stꞌacu.
Tamacha ju lacatꞌun.
Chai xtaknicalh ju anuꞌ stꞌacu ju xallave junta na makat lhokꞌonkꞌoꞌanta.
Lana jantu lai cꞌatsacan tas tus anch ju chaꞌan.
2 Pus ju yuchi malhtekꞌa junta na makat lhokꞌonkꞌoꞌanta.
Chai lana na lhu xajchilh ju jin.
Chunch tachi ju tuꞌuꞌ jin ju taxtui lacahorno.
Pus lana lakapuchꞌapakꞌo ju avilhchan.
Chai tachi ju va paitat tsꞌis va va ixlacaꞌatalh ju xajin ju taxtulh junta na makat lhokꞌonkꞌoꞌanta.
3 Chai lacajin taxtulh ju silek.
Chai taꞌakpitsilh ju lacatꞌun.
Chai axtaknicalh ju yuꞌunch ixtachaputꞌan tachi ixtachaput ju tuꞌuꞌ statsucu ju alin ju lacamunutpaꞌ.
4 Chai ajunicalh ni ma jantu catalakꞌalhi ju atsꞌin ju alin ju lacamunutpaꞌ nin ju tuꞌuꞌ ju stakꞌau cava nin tuꞌuꞌ qꞌuiu.
Ma va yuꞌunch ju lai catamamakꞌalhkꞌajni ju lapanacni ju jantu amichita ju Dios laꞌismuntsanꞌan.
5 Chai ajunicalh ni ma laich cataꞌamamakꞌalhkꞌajni ju lapanacni lakaquis malhquiyuꞌ.
Para ma jantu lai catiꞌamakni.
Pus ju ixmakꞌalhkꞌajnatꞌan chunch ixjunita tachi ju tuꞌuꞌ statsucu acsni atsꞌacꞌanan.
6 Chai ju acsni avilhchan ju lapanacni na cataniputunach para jantu lai catitani.
7 Pus ju anuꞌ silek ixtꞌachunch ixtatasui tachi ju tuꞌuꞌ caballo ju mucꞌanicanta ju tsasnat pumpuꞌ acsni an lacalhilucut.
Chai laꞌisꞌaktsulhꞌan ixmucꞌacanta ju tuꞌuꞌ tachi ixcoronaꞌan ju si oro.
Chai ju ixꞌucxpuꞌan tachi ixꞌucxpuꞌ lapanac ixtajunita.
8 Chai ixꞌaiꞌan chun ixjunita tachi ixꞌai tam chakoꞌulh.
Chai istatsalatꞌan chun ixtajunita tachi istatsalat ju tuꞌuꞌ león.
9 Chai laꞌixtanquilhakni ixjucꞌanilh ju tuꞌuꞌ tachi tsasnat.
Chai ju ixpakꞌachu ixmacatꞌajun tachi istꞌasat lhu carro ju taxakꞌamai ju caballo acsni taꞌan lacalhilucut.
10 Chai ixꞌalin isꞌistaꞌan tachi isꞌista ju statsucu chai ixꞌalin ixpatsꞌacꞌanꞌan.
Chai laꞌisꞌistaꞌan anchach ju ixꞌalin ju ixtachaputꞌan ni lai cataꞌamamakꞌalhkꞌajniyaꞌ ju lapanacni.
Para ajunicalh ni va lakaquis malhquiyuꞌ lai cataꞌamamakꞌalhkꞌajniyaꞌ ju lapanacni.
11 Chai alin ixꞌucxtinꞌan ju anuꞌ silek.
Yuchi ju xaꞌanquilh junta na makat lhokꞌonkꞌoꞌanta.
Junta jantu lai cꞌatsacan tas tus anch ju chaꞌan.
Ju ixtapakaꞌut ju anuꞌ anquilh lacalhihebreo Abadón juncan.
Chai lacalhigriego ma Apolión juncan.
Ju chunch va nomputun ni amakniniꞌ junita.
12 Pus tapasalh ju xapꞌulhnan makꞌalhkꞌajnat.
Chai timinta alakatꞌui makꞌalhkꞌajnat.
13 Pus ju acsnich ju ixlhipumachaxan anquilh sunulh ju iskꞌolh chai ickꞌasmatlh lakatam chivinti ju taxtucha ju laxmakꞌastunuxni mixa ju tsupilin makꞌastuya.
Yuchach ju mixa junta xavanican ju Dios ju pum.
Chai ju anuꞌ tachi mixa ixjunita oro ixlhimanicanta chai ixvi laꞌixꞌucxlacapuꞌ ju Dios.
14 Pus ju anuꞌ ju ixchivinin xakꞌalalh ixlhipumachaxan anquilh ju ixchꞌapata ju iskꞌolh.
Junich:
―Axkꞌotꞌich ju ixpumatꞌatꞌiꞌan anquilhnin ju alacchꞌiyocanta laꞌixquilhtuꞌ kꞌai xcan ju Eufrates juncan.
15 Pus lana axkꞌotlh ju ixpumatꞌatꞌiꞌan anquilhnin.
Pus yuꞌunch ju ixꞌalaclhcaꞌulacanta ixlacata ju anuꞌ pantsꞌiquis chai ju anuꞌ avilhchan chai ju anuꞌ malhquiyuꞌ chai ju anuꞌ cꞌata ni laich catamakni lhu lana ju lapanacni.
Para jantu ixchaꞌanta nin paitat tachi chun ju lapanacni ju tatꞌajun ju ixlhilacaputsꞌun ju lacamunutpaꞌ ju camaknicanaꞌ.
16 Pus ju anuꞌ anquilhnin tapꞌulhnilh ju taropajni ju ixtapuꞌanta ixcaballoꞌan.
Chai ju anuꞌ taropajni ixtachaꞌanta lakatꞌui cientos millón.
Pus ickꞌasmatlh ni chunch aputekꞌecalh.
17 Pus chani istasui ju caballojni ju iclaktsꞌilh tachi ju va laquinꞌaklakꞌavanti.
Pus ju ixtajucꞌanalh lacacaballo ixtalactanquilhakvilanalh ju tsasnat ju slapulh ixjunita.
Chai azul chai xkavau ixjunita.
Chai ju isꞌaktsulhꞌan ju caballojni chunch istasui tachi isꞌaktsulh león.
Chai laꞌixquilhniꞌan ixtapuquilhtaxtui ju jipi chai jin chai azufre.
18 Chai ju ani lakatꞌutu makꞌalhkꞌajnat tapunilh lhu ju lapanacni.
Para jantu chaꞌalh nin paitat tachi chun ju lapanacni ju tatꞌajun ixlhilacaputsꞌun ju lacamunutpaꞌ.
Yuchi ju amaknilh ju jipi chai ju jin chai ju azufre ju ixtaquilhtaxtui ju caballojni.
19 Pus alin ixtachaputꞌan ju caballojni laꞌixquilhniꞌan chai laꞌisꞌistaꞌan.
Pus ju isꞌistaꞌan chunch ixtajunita tachi ju tuꞌuꞌ lu ju alin isꞌaktsulh chai yuchi ju taputacꞌatsani ju lapanacni.
20 Pus ju aliꞌin lapanacni ju jantu xatalhini ju ani makꞌalhkꞌajnat jantu tavanan tam ixtapastꞌacꞌa ixlacata tuchi ixtanavi.
Va tachi ixtalhilacaꞌan ju macxcai un chai ju santo ju lhinavicanta oro chai plata chai ju atumpa tsasnat chai ju va chiux chai ju va qꞌuiu.
Chunch ixtalai mas jantu lai taꞌalacꞌavanan ju isantoꞌan nin lai catakꞌasmatnalh nin yuchi ni lai cataꞌalhtanalh.
21 Chai jantu tavanan tam xatapastꞌacꞌa ixlacata ju ixꞌamaknintiꞌan nin yuchi ni ixꞌalhicujnutꞌan nin yuchi ni va ixtatꞌatꞌajun va tichi chavaich nin yuchi ni ixtaꞌakꞌalhonan.