Amichikꞌocanta ixlapanacni Dios
7
Chai acsni tapasakꞌolh ju ani taxtokni pus iclaktsꞌilh pumatꞌatꞌi anquilhnin.
Chai ju yuꞌunch ixtayanalh laꞌixmakastutꞌatꞌi ju lacamunutpaꞌ chai istasastꞌucꞌach ju un ju ixajachilh ju makastutꞌatꞌi ju lacamunutpaꞌ.
Ju chunch jantu catilalh ju un ju ani lacatꞌun nin anch ju lacaꞌalama nin yuchi ni lai casunulh ju qꞌuiu.
2 Chai iclaktsꞌilh apumatam anquilh ju ixminacha junta xajachilh ju avilhchan.
Chai ju yuchi ixchꞌapata ixpamichin ju Dios ju lakꞌajunta.
Chai lana na pꞌas axakꞌala ju anuꞌ ixpumatꞌatꞌiꞌan anquilhnin ju ixꞌaxtaknicanta ju ixpokꞌaiꞌan ni laich catalakꞌalhiyaꞌ ju lacatꞌun chai ju alama.
3 Chai ju anuꞌ anquilh ajuni:
―Tucaꞌ alakꞌalhitꞌit ju lacatꞌun nin yuchi ju alama nin yuchi ju qꞌuiu.
Chach ictimichikꞌoyau ju ixlapanacni Dios laꞌismuntsanꞌan.
4 Chai ickꞌasmatlh ta pumachux ju ixꞌamichican.
Chaꞌalh tam cientos a cuarenta y cuatro milh lapanacni.
Asacxtucalh sia yuꞌunch ixꞌapapanatnich ju pumacautꞌuiꞌan istsꞌalan ju Israel.
5 Lakacautꞌui milh amichicalh ju ixꞌapapanatnich ju Judá.
Chai lakacautꞌui milh ju ixꞌapapanatnich ju Rubén.
Chai lakacautꞌui milh ju ixꞌapapanatnich ju Gad.
6 Chai lakacautꞌui milh amichicalh ju ixꞌapapanatnich ju Aser.
Chai lakacautꞌui milh ju ixꞌapapanatnich ju Neftalí.
Chai lakacautꞌui milh ju ixꞌapapanatnich ju Manasés.
7 Chai lakacautꞌui milh ju ixꞌapapanatnich ju Simeón.
Chai lakacautꞌui milh ju ixꞌapapanatnich ju Leví.
Chai lakacautꞌui milh ju ixꞌapapanatnich ju Isacar.
8 Chai lakacautꞌui milh ju ixꞌapapanatnich ju Zabulón.
Chai lakacautꞌui milh ju ixꞌapapanatnich ju José.
Chai lakacautꞌui milh ju ixꞌapapanatnich ju Benjamín.
Na lhu ju ixtalakchꞌita xnapapa ixpumpuꞌan
9 Chai acsni tapasakꞌolh ju ani taxtokni pus iclaktsꞌilh aliꞌin lhu lapanacni.
Jantu lai xamatiꞌ ixꞌaputꞌekꞌekꞌojui.
Ixtataxtutacha ixlhilacaputsꞌun ju lacamunutpaꞌ junta ixtachꞌanxtaminin chai ixtachivinin tijpachux chivinti.
Chai ju anuch lapanacni ixtayanalh laꞌixꞌucxlacapuꞌ ju Dios ju ixvi lacakꞌai putolan chai laꞌixꞌucxlacapuꞌ ju anuꞌ Askꞌatꞌa Borrego.
Chai ixtalakchꞌita xnapapa ju ixpumpuꞌan chai ixtachꞌapata ixꞌaxtacnaꞌan.
10 Chai na pꞌas ixtachivinin ni laich cakꞌasmatkꞌocalh.
Chani ixtanajun:
Ju quiDiosꞌan vi lacakꞌai putolan.
Pus ju yuchi chai ju Askꞌatꞌa Borrego yuꞌunch ju taꞌamakꞌalhtaxtunun.
11 Chai chux ju anquilhnin ixtayanankꞌo ixtalakachoko junta ixvi ju Dios lacakꞌai putolan chai junta ixtayanalh ju papanin chai ixpumatꞌatꞌiꞌan atapacxat.
Chai ju anuꞌ anquilhnin tataquilhputalh laꞌixꞌucxlacapuꞌ ju Dios junta ixvi lacakꞌai putolan chai talakꞌayalh ju yuchi.
12 Tanaulh:
Vasalh chanich canavicalh ju quiDiosꞌan.
Chach xtaknikꞌalhicalh lakꞌailaktsꞌiuch.
Chai chach lakꞌayakꞌalhicalh ni yuꞌunch ju tacꞌatsakꞌojui tachi chun ju taxtokni.
Chach talhonikꞌalhicalh yuchi ju lai navikꞌojui tachi chun ju taxtokni.
Vasalh chach navikꞌalhicalh chunch.
13 Pus ju acsnich pumatam sia yuꞌunch ju papaninch quixakꞌala.
Quisacmi:
―Tis chavaꞌitnich ju ani tayanalh ju talakchꞌita sasnapapa ixpumpuꞌan.
Tas anchach ju tamintacha.
14 Chai ju quitꞌin icjuni:
―Uxintꞌich ju cꞌatsꞌai.
Chai ju yuchi quijuni:
―Pus yuꞌunch ju ani ju tamintacha lacakꞌai makꞌalhkꞌajnat chai tamakpatach ju ixpumpuꞌan chai lhixnapapantach laꞌixꞌacꞌalhni ju Askꞌatꞌa Borrego.
15 Yuchi talhiyanalh ju laꞌixꞌucxlacapuꞌ ju kꞌai putolan junta vi ju Dios.
Chai tachꞌalhcatnanich tontacuj chai tontatsꞌis junta lakꞌayacan ju yuchi.
Chai ju Dios ju vi lacakꞌai putolan yuchi ju vanin caꞌalactꞌatolaꞌ ju tayanalh laꞌixꞌucxlacapuꞌ ni caꞌalhistꞌacꞌach.
16 Jantu tavanan catitachavanilh nin yuchi ni lai cataquicxixli.
Jantu catitalhini ju ixmacxcat ju avilhchan nin yuchi ni cataꞌucsacꞌatsa ju ixmacxcat.
17 Jantu chun catitapasalh ni isꞌakstu ju Askꞌatꞌa Borrego ju calhistꞌacꞌaꞌ.
Yuchach ju ya laꞌixꞌucxlacapuꞌ ju kꞌai putolan.
Chai yuchi ju caꞌapꞌulhniyach.
Chai caꞌalhiꞌanach junta lhu ma ju xcan ju jantu lai xixa.
Chai ju Dios yuchi ju camakꞌosuyaꞌ ju amakꞌanita chai jantu xamatiꞌ cakꞌalhununaꞌ.