Lacatujun ju lakalamcalh ju alhiqui
6
Pus iclaktsꞌilh ju Askꞌatꞌa Borrego acsni malamaconi junta ixlamcanta lacatam.
Chai ickꞌasmatlh ixchivinti pumatam sia yuꞌunch ju ixpumatꞌatꞌiꞌan atapacxat.
Chai acsni chivinilh na pꞌas istꞌasai tachi acsnich tꞌasai ju tꞌajin.
Chani ju quijuni:
―Asokꞌoch.
Alaktsꞌich ju ani.
2 Pus icꞌalh.
Chai iclaktsꞌilh lakatam caballo ju na xnapapa ixjunita.
Chai ju lapanac ju ixpujucꞌalh ixchꞌapata ixꞌakxmuti chai ixtaknicanta lakatam ixcorona.
Pus taxtulh.
Chai junta alh lasanaꞌ jantu tavanan istsꞌankꞌai.
3 Chai ju Askꞌatꞌa Borrego acsni malamaconilh ju ixlhilacatꞌui junta ixlamcanta pus ickꞌasmatlh ju ixchivinti ju ixlhipumatꞌui atapacxat.
Chai ju yuchi quijuni:
―Asokꞌoch.
Alaktsꞌich ju ani.
4 Chai icꞌalh.
Chai lana taxtuchokolh alakatam caballo ju na slapulh ixjunita.
Chai ju lapanac ju ixpujucꞌalh ixtaknicanta ixpokꞌai ni laich camalasani ju lapanacni ixlhilacaputsꞌun ju lacamunutpaꞌ.
Ju chunch ju lapanacni catalamakniyach.
Chai ju anuꞌ ju ixpujucꞌalh ju caballo xtaknicalh lakatam kꞌai espada.
5 Chai ju Askꞌatꞌa Borrego acsni malamaconi ju ixlhilacatꞌutu junta ixlamcanta pus ickꞌasmatlh ixchivinti ju ixlhipumatꞌutu atapacxat.
Chai ju yuchi quijuni:
―Asokꞌoch.
Alaktsꞌich ju ani.
Pus icꞌalh.
Chai iclaktsꞌilh alakatam caballo ju na tsꞌiti ixjunita.
Chai ju lapanac ju ixpujucꞌalh ixchꞌapata lakatam pamakchꞌixni laꞌixmacaꞌ.
6 Chai ickꞌasmatlh lakatam chivinti tachi ju va anch ixminacha junta ixtayananchalh ju pumatꞌatꞌi atapacxat.
Chai chani ixnajun:
―Ju tam kilo ju trigo lhistꞌacan tachi ju lhajacan tamin avilhchan lacalhichꞌalhcat.
Chai lakatꞌutu kilo ju cebada lhistꞌacan tachi ju lhajacan tam avilhchan lacalhichꞌalhcat.
Para jantu catilhitapalalh ju aceite nin yuchi ju vino.
―Chunch ju naulh ju xachivinin.
7 Pus ju Askꞌatꞌa Borrego acsni malamaconi ju ixlhilacatꞌatꞌi junta lamcanta pus ickꞌasmatlh ixchivinti ju ixlhipumatꞌatꞌi atapacxat.
Chai ju yuchi quijuni:
―Asokꞌoch.
Alaktsꞌich ju ani.
8 Pus icꞌalh.
Chai iclaktsꞌilh alakatam caballo ju na istakta.
Chai ju lapanac ju ixpujucꞌalh ixjuncan aninti.
Chai ju alasaninin tachꞌakꞌokꞌalh.
Chai xtaknicalh ju lapanac ixpokꞌai ni laich calhinaulh ixmaknica tam cuarto tachi chun ju lapanacni ju ixtatꞌajun ixlhilacaputsꞌun ju lacamunutpaꞌ.
Laich caꞌamakni lacamachita chai lacachavanti chai lacatakꞌankꞌat chai caꞌamamakninin ju maktilin ju alin ju lacamunutpaꞌ.
9 Chai ju Askꞌatꞌa Borrego acsni malamaconilh ju ixlhilacaquis junta ixlamcanta pus icꞌalacꞌavanalh laꞌixtankꞌapuꞌ junta ixavanican ju Dios ju pum.
Chai ju anch iclaktsꞌilh ju ixtacuvinꞌan ju lapanacni ju ixꞌamaknicanta va ixlacaꞌatalh ni ixtalacaꞌita ixchivinti Dios chai ni ixtajuni ju anuꞌ chivinti ju ixtꞌalapanacni.
10 Chai ju yuꞌunch na pꞌas tachivinilh acsni chani tanaulh:
―Ji quiꞌucxtin ju uxintꞌi na salakaꞌat.
Chai aktsꞌiya muctꞌaxtꞌui ju minchivinti.
Pus tus tavananch ju alaktsꞌintꞌanuyaꞌ ju quilhamakꞌan quincꞌan chai amamalakchꞌavaniyaꞌich ixlacata ju quinꞌacꞌalhni quincꞌan ju lapanacni ju tatꞌajun ju lacamunutpaꞌ.
―Chunch tanaulh ju anuꞌ tacuvin.
11 Pus ju acsnich axtaknicalh ju yuꞌunch xnapapa ixpumpuꞌan ju pumatamin.
Chai ajunicalh ni catapacxalhcaꞌ atilacatsꞌunin tus acsni catataꞌaktsayach ixtꞌaxalapanacni chai ixlhiꞌalakꞌavinꞌan ju vachuꞌ chunch catapuniyaꞌ tachi ju yuꞌunch.
12 Chai iclaktsꞌilh ju Askꞌatꞌa Borrego acsni malamaconilh ixlhilacachaxan junta ixlamcanta chai lana na pꞌas tataclh ju lacatꞌun.
Chai ju avilhchan lana na smalaka va tachi ju tuꞌuꞌ tsꞌiti pumpuꞌ.
Chai ju malhquiyuꞌ lana na lapulh va tachi ju acꞌalhni.
13 Chai ju stꞌacu tapataju.
Tamachilh ju lacatꞌun tachi ju tuꞌuꞌ xalhiꞌut qꞌuiu ni jopꞌon patajui ni sunui ju un.
14 Chai ju lactꞌiyan lana matich va tachi acsni pasmilhcan ju tuꞌuꞌ alhiqui.
Chai tachi chun ju talhpa chai tachi chun ju lactꞌicstꞌi lacatꞌun lacaꞌalama si amakꞌosukꞌocalh.
15 Pus ju acsnich ju xaꞌucxtinin ju ani lacamunutpaꞌ chai ju xalackꞌajinch chai ju xaꞌucxtinin taropajni chai ju makꞌalinin chai ju lactachapunin chai tachi chun ju lapanacni mas xalapanacni ixtajunita chai vachuꞌ ju yuꞌunch ju matiꞌ ixjunita ixꞌucxtinꞌan sich lana tatankꞌanukꞌo junta pulhucucu talhpa ixjunita chai junta lacvi ju chiux ju lacaqꞌuivin.
16 Chai chani ixtajuni ju anuꞌ lactalhpa chai ju anuꞌ chiux: