Ju Askꞌatꞌa Borrego chꞌapalh ju alhiqui
5
Chai iclaktsꞌilh ju anuꞌ ju ixvi lacakꞌai putolan ni ixchꞌapata laꞌixlhicana lakatam alhiqui ju ispasmilhcanta.
Chai ju anuꞌ alhiqui istsꞌokcanta laꞌixpulacni chai laꞌixmacan.
Chai lacatujun ixlakalamcanta.
2 Chai iclaktsꞌilh pumatam anquilh ju na tachapun ixjunita.
Chai ju yuchi na pꞌas ixtꞌajun chiviniꞌ ni laich cakꞌasmatkꞌocalh.
Chani ixtꞌajun nonaꞌ:
―Tis chavaich ju lhijunch ni laich camalamaconi junta lam lakxtokcanta junima alhiqui chai laich capuxkꞌotlh.
3 Para jantu lai xamatiꞌ ixpuxkꞌotꞌa ju anuꞌ alhiqui.
Nin anch ju lactꞌiyan nin anch ju lacatꞌun nin anch laxtankꞌajni ju lacatꞌun.
Nin caꞌalilh xamatiꞌ ju lai catꞌachivinilh.
4 Chai ju quitꞌin slivasalh xackꞌalhun ni jantu ixlhitajucanta xamatiꞌ ju ixlhijun ni laich capuxkꞌotli ju anuꞌ alhiqui nin yuchi ni lai catꞌachivinilh.
5 Pus ju acsnich pumatam sia yuꞌunch ju papanin ju ixtavilanancha anch chani quijuni:
―Jantu akꞌalh.
Ju Jesús sastuclich ju macxcai.
Chai ju yuchi xaleón junita sia yuꞌunch ju makꞌaniya ixtamaskꞌatꞌanti ju Judá chai ju kꞌai ucxtin David.
Chai ni sastuclich ju macxcai ju yuchi pus laich calamamaconiyaꞌ junta lacatujun lakalamcanta chai lai capuxkꞌotꞌaꞌ ju alhiqui.
6 Chai iclaktsꞌilh lakatam Askꞌatꞌa Borrego.
Anch ixya laꞌixlacaitat junta ixvi ju kꞌai putolan chai junta ixtayanancha ju lakatꞌatꞌi atapacxat chai junta ixtavilanancha ju papaninch.
Chai ju anuꞌ Askꞌatꞌa Borrego chunch istasui tachi ju va ixmaknicanta.
Chai ju yuchi ixꞌalin lakatujun ixꞌakalokot chai lakatujun ixlakchulh.
Pus ju anuꞌ lakchulh yuchi ju Spiritu Santu ju malakachai ju Dios ixlhilacaputsꞌun ju lacamunutpaꞌ.
7 Pus ju anuꞌ Askꞌatꞌa Borrego alh.
Chai amaklhtayanalh ju alhiqui ju ixchꞌapata laꞌixlhicana ju anuch ju ixvi lacakꞌai putolan.
8 Chai acsni amaklhtayanalh ju alhiqui ju Askꞌatꞌa Borrego pus ju anuꞌ ixpumatꞌatꞌiꞌan atapacxat chai ixpumapꞌuxamtꞌatꞌiꞌan papanin tataꞌaktsokotanilh laꞌixꞌucxlacapuꞌ ju anuꞌ Borrego.
Chai pumatamin ju yuꞌunch ixtachꞌapata ixlhisanꞌan ju arpa juncan chai ixpumapꞌunꞌan ju si oro ixjunita.
Chai anchach ju ixtaxavai ixpumꞌan.
Chai ju pum yuchach ixchivintiꞌan ju ixlapanacni Dios ju ani lacamunutpaꞌ ju tuchi tapuxakꞌalai ju Dios.
9 Chai ju anuꞌ atapacxat chai ju papaninch tamilhpa lakatam sastꞌi milhpat.
Chani ixtanajun:
Lhijunch ni uxintꞌi ju achꞌapꞌa ju alhiqui chai alamamacꞌonitꞌi junta lakalamcanta.
Lhijunch ni chunch ju alatꞌi ni ixmaknicꞌantꞌa ju uxintꞌi.
Chai laminꞌacꞌalhni alhimalakxtꞌutꞌa ju lapanacni ju talhilaksich ju Dios.
Amalakxtꞌutꞌa sia yuꞌunch ju tachivinin tijpachux chivinti
chai sia yuꞌunch ju tatꞌajun ixlhilacaputsꞌun ju lacamunutpaꞌ.
10 Chai ju uxintꞌi aꞌulatꞌa kꞌai ucxtinin.
Chai vachuꞌ aꞌulatꞌa ju palijni ni catalakꞌayayach ju quiDiosꞌan.
Chai ju yuꞌunch catalhinonaꞌ ju lacamunutpaꞌ.
11 Pus ju acsnich iclaktsꞌilh lhu lana ju anquilhnin.
Jantu lai ixputekꞌekꞌocan ni lana na lhu istasui.
Pus ju yuꞌunch anch ixtayanancha laꞌixlacaitat junta ixvi ju kꞌai putolan chai junta ixtayanancha ju atapacxat chai ju papanin.
Chai ickꞌasmatlh ni ixtachivinin ju anquilhnin.
12 Pꞌas ixtachivinin ni laich cakꞌasmatkꞌocalh.
Chai chani ixtanajun:
Ixmaknicanta ju Askꞌatꞌa Borrego.
Chai lhijunch ni calakꞌayacalh.
Catanonach ni yuchi ju alin ixmakꞌalit chai na kꞌox ixtacꞌatsan chai na alin ixtachaput.
Pus yuchi lhijunch ni calakꞌayacalh chai catalhonicalh.
13 Chai ickꞌasmatlh ni ixtachivinin tachi chun ju taxtokni ju navita ju Dios ju tatꞌajun ju lactꞌiyan chai ju lacatꞌun chai ju laxtankꞌajni ju lacatꞌun chai ju lacaꞌalama.
Ixchuxꞌan chani ixtanajun:
Ju vi lacakꞌai putolan chai ju Askꞌatꞌa Borrego yuꞌunchach ju tucan xalackꞌajin.
Chach atalhonikꞌalhicalh.
Chai chach alakꞌayakꞌalhicalh.
Chach noncalh ni na alin ixtachaputꞌan.
Chunch ju tanaulh.
14 Chai ju ixpumatꞌatꞌiꞌan atapacxat ixtanajun ni chunch vasalh caꞌanavicalh.
Chai ju papanin lana tataꞌaktsokotanilh.
Chai talakꞌaya.