Lakꞌayacan ju Dios ju lactꞌiyan
4
Acsni quintꞌachivinkꞌolh ju xaquimaꞌatsꞌokni ju ani alhiqui pus astan iclaktsꞌilh ni ilhtekꞌai lakatam malhtich ju lactꞌiyan.
Chai ickꞌasmatnichokolh ixchivinti ju xaquimaꞌatsꞌokni ju ani chivinti.
Chai ju iskꞌasmatca ju anuꞌ chivinti chunch ixjunita tachi ju istꞌasat ju tuꞌuꞌ skꞌolh.
Chai chani quijuni:
―Asokꞌoch ani chai acmasuniyan ju tuchi vasalh catapasayaꞌ astan.
―Chunch ju xaquijuni.
2 Pus icꞌalh chai ju Spiritu Santu tachapun xaquinavi ni lai xaclaktsꞌin ju lactꞌiyan ixputolan ju kꞌai ucxtin.
Chai anch ixvi ju Dios.
3 Chai ju yuchi chun slamnicꞌa istasui tachi ju tuꞌuꞌ chiux ju jaspe juncan.
Chai vachuꞌ slapulh istasui tachi ju tuꞌuꞌ chiux ju sardis juncan.
Vachuꞌ ixtalakachoko ju putolan istasui lakatam quilhmacchat.
Chai ju yuchi stakꞌau istasui tachi ju tuꞌuꞌ chiux ju esmeralda juncan.
4 Chai ixtalakachoko ju anuꞌ xakꞌai putolan ixꞌalin alakapꞌuxamtꞌatꞌi putolan.
Chai ixtapuvilanalh pumapꞌuxamtꞌatꞌi lackꞌajin papaninch.
Sich ixtalakchꞌita ju na xnapapa ixpumpuꞌan.
Chai ixtalacpatanumanalh ixcoronaꞌan ju si oro ixjunita.
5 Chai ju lacakꞌai putolan ixtaxtui ju makꞌalipniꞌ.
Vachuꞌ ixtaxtui ixchivintiꞌan ju anuꞌ ju ixtachivinin.
Chai na pꞌas istꞌasai ju tꞌajin.
Chai laꞌixꞌucxlacapuꞌ ju kꞌai putolan ixmaktajita lakatujun maclhcu.
Yuchach ju ixpupastaccan ju Spiritu Santu.
6 Chai laꞌixꞌucxlacapuꞌ ju anuꞌ kꞌai putolan ixma ju tuꞌuꞌ tachi lakatam kꞌai atantsꞌin.
Para na kꞌox stalankꞌa ixjunita.
Chai laꞌixtalakachoko ju anuꞌ kꞌai putolan ixꞌalin lakatꞌatꞌi atapacxat.
Pumatam laꞌixꞌucxlacapuꞌ.
Pumatam laꞌixpulacan.
Pumatam laꞌixlhicana.
Chai pumatam laꞌixlhimacx.
Chai ju anuꞌ lakatꞌatꞌi atapacxat si lana lakchulh ixtajunita laꞌixꞌucxlacapuꞌan chai laꞌixpulacanꞌan.
7 Pus ju xapꞌulhnan atapacxat chunch istasui tachi ju tuꞌuꞌ león.
Chai ju ixlhilakatꞌui atapacxat chunch istasui tachi ju satsꞌalh vacax.
Ju ixlhilakatꞌutu atapacxat ixpacxanta ixꞌucxpuꞌ tachi ixꞌucxpuꞌ lapanac.
Chai ju ixlhilakatꞌatꞌi atapacxat chunch istasui tachi ju tuꞌuꞌ kꞌatsꞌokꞌo ju alhtꞌilitnin.
8 Chai ju pumatamin ju anuꞌ lakatꞌatꞌi atapacxat ixpacxanta lakachaxan ixpakꞌachuꞌan.
Chai laꞌixkꞌelhtankꞌajpuꞌ ju ixpakꞌachuꞌan chai laꞌixꞌucxni va si lakchulh ixjunita.
Chai tontacuj chai tontatsꞌis va tachi ixtamilhpai.
Lana jantu tavanan ju jantu tamilhpa.
Ixtanajun:
Salaka.
Salaka.
Salaka ju kꞌai ucxtin Dios ju lai navikꞌojui tachi chun ju taxtokni.
Yuchi ju ixtꞌajun tus acsni maticaꞌ tuꞌuꞌ ixjunita chai yuchi ju catsucukꞌalhiyaꞌ tus mas va tavananch.
9 Pus ju anuꞌ atapacxat ixtalakꞌayai chai ixtajunich lakꞌailaktsꞌiuch ju Dios ju ixvi lacakꞌai putolan.
Yuchach ju tꞌonkꞌalhi.
10 Pus va ta pakchux ju chunch ixtalai ju anuꞌ atapacxat pus ju pumapꞌuxamtꞌatꞌi papanin ixtataꞌaktsokotaich laꞌixꞌucxlacapuꞌ ju Dios ju ixvi lacakꞌai putolan.
Yuchi ju jonkꞌalhita.
Chai ixtalakꞌayai.
Chai ixtalakamamai ixcoronaꞌan laꞌixꞌucxlacapuꞌ ju Dios chai ixtamilhpani.
Chani ixtajuni:
11 Ji quiꞌucxtin chai quiDios aktsꞌiya lhijunch ni alakꞌayacꞌanaꞌ chai ni atꞌalhonicꞌanaꞌ.
Chai ni alinch ju mintachaput pus lhijunch ni chunch ju aꞌulhtꞌucꞌanaꞌ ni uxintꞌi ju navikꞌotꞌa tachi chun ju taxtokni chai laminkꞌachat ju alinkꞌo.