Ju chivinti ju atsꞌoknunilh ju amachakꞌan Sardis
3
Chai ju yuchi ju xaquimaꞌatsꞌokni ju ani chivinti vachuꞌ chani quijuni:
“Chani atsꞌoknunin ju anuꞌ ju alhistꞌacꞌa ju quintalhilaksi ju tavilanancha ju lakꞌachakꞌan Sardis.
Ma chani tajunan ju anuꞌ ju malakachai ju Spiritu Santu chai ju chꞌapata ju lakatujun stꞌacu.
Pus ju yuchi ma cꞌatsai tuchꞌi naviyatꞌit.
Chai mas noncanch ni lhilaksiyatꞌit ju Dios para jantu slivasalh.
Alai tachi ju va nitꞌatꞌit.
2 Pus ma alacpꞌucꞌuchꞌokꞌotꞌitch.
Chai ma alaꞌaktꞌaiꞌutꞌitch ni tachapun aꞌunchꞌokꞌoyaꞌitꞌit.
Chai ju chunch ma jantu acꞌapkꞌalhiyaꞌitꞌit ju Dios.
Ma chunch ju alatꞌit ni laktsꞌinta ju tuchꞌi naviyatꞌit ju xaquimaꞌatsꞌokni ju ani chivinti.
Chai ma najun ni jantu soknicꞌa lhiulai ju Dios tachi ju naviyatꞌit.
3 Pus ma apꞌastꞌactꞌit ta yu xapꞌuꞌamaklhtꞌayananatꞌit ixchivinti Dios chai ni lhikꞌach ju xakꞌasmatꞌatꞌit.
Pus ma alacꞌaꞌikꞌalhitꞌit.
Chai ma tamch apꞌastꞌactꞌit ixlacata tuchꞌi naviyatꞌit.
Chai ni jantu alacpꞌucꞌuꞌaꞌitꞌit pus ma catalakminan ju xaquimaꞌatsꞌokni ju ani chivinti.
Ma tachi tam akꞌalhonaꞌ ju catalakminan chai ma lana jantu acꞌatsꞌayaꞌitꞌit tavanan ju lai camilh.
4 Para ma alin lacatsꞌunin ju milhiꞌuxijnan ju vilatꞌit lakꞌachakꞌan Sardis ju jantu talhimalhquiliquita ixpumpuꞌan ju tuchꞌi naviyatꞌit ju uxijnan.
Chai ju yuꞌunch ma catatꞌaꞌalhtananaꞌ lactꞌiyan ju xaquimaꞌatsꞌokni ju ani chivinti.
Ma na xnapapa cajunaꞌ ju ixpumpuꞌan.
Chai ma lhijunch ni chunch caꞌamalakchꞌinincalh.
5 Pus ju casastꞌucꞌaꞌ ju macxcai ma camalakchꞌinincanaꞌ ju xnapapa pumpuꞌ.
Chai ma jantu catixacacalh ju ixtapakaꞌut lacaꞌalhiqui junta tsꞌokcanta ixtapakaꞌutꞌan tachi chun ju alin isꞌatsucuntiꞌan jonkꞌalhita.
Chai laꞌixꞌucxlacapuꞌ ju Dios chai laꞌixꞌucxlacapuꞌan ju ixꞌanquilhnin canoncanaꞌ ni talhilaksi ju xaquimaꞌatsꞌokni ju ani alhiqui.
6 Pus ju alin ju ixpakꞌasmatni ma chach kꞌasmatlh ju tuchi najun ju Spiritu Santu.
Tuchi ajuni ju talhilaksi ju xaquimaꞌatsꞌokni ju ani chivinti”.
Pus chunch ju quijuni ni acꞌajunilh ju amachakꞌan Sardis.
Ju chivinti ju atsꞌoknunilh ju amachakꞌan Filadelfia
7 Chai ju yuchi ju xaquimaꞌatsꞌokni ju ani chivinti vachuꞌ chani quijuni:
“Chani atsꞌoknunin ju anuꞌ ju alhistꞌacꞌa ju quintalhilaksi ju tavilanancha ju lakꞌachakꞌan Filadelfia.
Ma chani tajunan ju yuchi ju na salaka junita chai ju va tachi najun ju istavasalanti.
Yuchi ju chꞌapata ju llave ju ixtaknita ju Dios ju kꞌai ucxtin David.
Chai ju yuchi ju chꞌapata ju anuꞌ llave acsni malhtekꞌai tuꞌuꞌ malhtich pus ma jantu lai xamatiꞌ malacchauchokoi.
Chai acsni malacchajui tuꞌuꞌ malhtich ju yuchi pus ma jantu lai xamatiꞌ malhtekꞌai.
8 Pus ju yuchi ma cꞌatsai tuchꞌi naviyatꞌit.
Pus ma tamalhtekꞌanitan ju malhtich junta lai chꞌalhcꞌatnanatꞌit chai ma jantu lai xamatiꞌ catamalacchoniyan.
Chai ma cꞌatsai ju yuchi ni tachapun untꞌatꞌit lacatsꞌunin.
Chai mas va chunch untꞌatꞌit para lacꞌaꞌitꞌatꞌit ju ixchivinti chai jantu tavanan nontꞌatꞌit ni jantu ixlapanacni untꞌatꞌit.
9 Pus ma alin ju talakꞌayai ju Satanás chai tanajun ni israelitanin tajunita mas jantu.
Va tanajun taꞌaklhtamat chivinti.
Pus ju xaquimaꞌatsꞌokni ju ani chivinti ma catamalakachanitachan ju yuꞌunch chai ma catataquilhputaniyan ju uxijnan.
Chai ma catanonaꞌ ni na tamapainiyan ju Dios.
10 Pus ni ma xalacꞌaꞌiyatꞌit ju ixchivinti ju xaquimaꞌatsꞌokni ju ani chivinti chai xachꞌixkꞌoyatꞌit ju macxcai pus ju yuchi ma vachuꞌ catalhistꞌacꞌan acsni caꞌalinaꞌ ju makꞌalhkꞌajnat ixlhilacaputsꞌun ju lacamunutpaꞌ.
Ma yuchi calhiꞌalinaꞌ ju makꞌalhkꞌajnat ni ma calaktsꞌintanucanach ju lapanacni ju tatꞌajun ju ani lacamunutpaꞌ.
11 Pus ma jantu makꞌan cajunaꞌ tus caminchokoyaꞌ ju yuchi.
Pus ma alacꞌaꞌikꞌalhitꞌit tuchꞌi xtꞌaknicꞌantꞌatꞌit.
Ju chunch ma lai amakꞌalhtꞌayananaꞌitꞌit ju mintalhajaꞌan miꞌakstuꞌan.
Jantu va akꞌantam caxtaknicalh.
12 Pus ju casastꞌucꞌaꞌ ju macxcai ma tachi ju tuꞌuꞌ xatantun ixpujitat Dios canavicanaꞌ.
Ma lana jantu tavanan catitaxtulh ju anch.
Chai ma calhimichicanaꞌ laꞌixkꞌaimacan ixtapakaꞌut ju Dios chai ixtapakaꞌut ju ixlakꞌachakꞌan ju Dios.
Ma yuchi ju sastꞌi lakꞌachakꞌan Jerusalén ju caminanta ju lactꞌiyan junta vilhcha ju Dios.
Chai vachuꞌ ma catsꞌokꞌulaniyach ju sastꞌi ixtapakaꞌut ju xaquimaꞌatsꞌokni ju ani chivinti.
13 Pus ju alin ixpakꞌasmatni ma chach kꞌasmatlh ju tuchi najun ju Spiritu Santu.
Tuchi ajuni ju talhilaksi ju xaquimaꞌatsꞌokni ju ani chivinti”.
Pus chunch ju quijuni ni acꞌajunilh ju amachakꞌan Filadelfia.
Ju chivinti ju atsꞌoknunilh ju amachakꞌan Laodicea
14 Chai ju xaquimaꞌatsꞌokni ju ani alhiqui vachuꞌ chani quijuni:
“Chani atsꞌoknunin ju anuꞌ ju alhistꞌacꞌa ju quintalhilaksi ju tavilanancha ju lakꞌachakꞌan Laodicea.
Ma chanich najun ju stavasalanti najun.
Ma yuchi ju lai lhilaksican chai yuchi ju navikꞌolh tachi chun ju taxtokni ju ixnajunta ju Dios ni caꞌalilh.
15 Ju yuchi ma cꞌatsai tuchꞌi naviyatꞌit.
Pus ju uxijnan ma jantu ixlhichux ju miꞌalhunutꞌan ju lhilacꞌapꞌimpꞌutꞌunatꞌit ju yuchi.
Nin yuchi ni ma amacꞌompꞌutꞌutꞌit ju macxcai.
Pus ma palai kꞌox caꞌixva ni lana ixlhilacꞌapꞌitꞌit ixlhichux miꞌalhunutꞌan.
U lana asamakꞌantꞌit.
16 Para ju uxijnan ni jantu ixlhichux miꞌalhunutꞌan ju lhilacꞌapꞌimpꞌutꞌunatꞌit pus ju yuchi ma vachuꞌ catasamakꞌananch.
17 Pus ju uxijnan ma nonatꞌit ni na makꞌalinin untꞌatꞌit.
Ma nonatꞌit ni na lhu ju makꞌaixtꞌoktꞌatꞌit ju mimakꞌalitꞌan.
Chai ma va nonatꞌit ni jantu tuꞌuꞌ maktasqꞌuiniyatꞌit.
Ma chunch ju nonatꞌit para ma jantu machꞌakxayatꞌit ni Dios talaktsꞌinan tachi ju lana na makꞌalhkꞌajnanatꞌit chai painiꞌitnich untꞌatꞌit chai quilhpatinin untꞌatꞌit chai alakꞌachꞌixnin untꞌatꞌit chai lana matich ju mimpumpuꞌan.
18 Para ju yuchi ma taquilhtapujuyan ni atꞌamonin ju yuchi ju oro ju lakꞌoxicanta lacajipi.
Ju chunch ma vasalh makꞌalinin aꞌunaꞌitꞌit.
Chai ma atꞌamonin ju xnapapa pumpuꞌ ni laich alakchꞌiyaꞌitꞌit.
Chai ju chunch jantu amaxananaꞌitꞌit va ixlacaꞌatalh ni va kꞌai tsasau aꞌunaꞌitꞌit.
Chai ma atꞌamonin ju cꞌuchꞌu ju laich amucꞌayaꞌitꞌit lamilakchulhꞌan ni laich vasalh alacꞌavananaꞌitꞌit.
19 Pus ju yuchi acsni vasalh mapaini tam xamatiꞌ pus ma kꞌaji acsni jantu sok an chai mamakꞌalhkꞌajni.
Pus ma yuchi talhijunan ni ixlhichux ju miꞌalhunutꞌan tamch apꞌastꞌactꞌit ixlacata tuchꞌi naviyatꞌit.
20 Pus ju yuchi ju xaquimaꞌatsꞌokni ju ani alhiqui ma ya lacamalhtich lhimakspaꞌ chai xakꞌalai ju tanun pulacni.
Chai ni xamatiꞌ cakꞌasmatniyaꞌ ju ixchivinti chai camalhtekꞌanilh pus ju yuchi ma catanuyaꞌ chai ma catꞌavenach.
21 Pus va tichi chavaich ju casastꞌucꞌaꞌ ju macxcai ma calakꞌaꞌicanaꞌ ni catꞌatolaꞌ laꞌixpuꞌucxtin ju xaquimaꞌatsꞌokni ju ani chivinti tachi ju yuchi ni sastuclh ju macxcai chai tꞌavi ju ixpai ju laꞌixpuꞌucxtin.
22 Pus ju alin ju ixpakꞌasmatni ma chach kꞌasmatlh ju tuchi najun ju Spiritu Santu.
Tuchi ajuni ju talhilaksi ju xaquimaꞌatsꞌokni ju ani chivinti”.