Ju chivinti ju ajuni ju amachakꞌan Efeso
2
Ju xaqꞌuitꞌachivinin vachuꞌ chani ju quijuni:
―Chanich atsꞌoknunin ju alhistꞌacꞌa ju quintalhilaksi ju tavilanancha ju lakꞌachakꞌan Efeso:
“Ma chanich tajunan ju yuchi ju chꞌapata ju lakatujun stꞌacu laꞌixlhicana chai ju alhtanatꞌajun laꞌixlacaitat junta lacya ju lakatujun ixputayan cantila ju si oro tajunita.
2 Ma cꞌatsai ju yuchi tuchꞌi naviyatꞌit.
Ma cꞌatsai ta yu chꞌalhcꞌatnanatꞌit ju ixlacata chai ni chꞌixkꞌoyatꞌit ju macxcai.
Chai ma cꞌatsai ni lana jantu laktsꞌimpꞌutꞌunatꞌit ju na kꞌai tajunita.
Chai ma alaktsꞌintꞌanutꞌatꞌit ju tanajunch ni ixtamalakachan tajunita mas jantu chai alhitꞌaꞌutꞌatꞌit ni va aꞌokxchokꞌonin.
3 Chai ma cꞌatsai ni chꞌixkꞌoyatꞌit va tuchi makꞌalhkꞌajnat.
Chai ma chꞌalhcꞌatnanatꞌit ju ixlacata.
Chai ma jantu tavanan xkꞌopꞌatꞌit.
4 Para ma alin ju tuchi jantu kꞌox tapulhiulayan.
Ma yuchi ni jantuch vana amapꞌainininatꞌit tachi ju ixlayatꞌit ju pꞌulhnan.
5 Pus ma apꞌastꞌactꞌit ta yu ixlayatꞌit ju makꞌanchich acsni na ixmapꞌainiyatꞌit ju yuchi.
Chai ma tamch apꞌastꞌactꞌit.
Chai ma chunchach ju alachꞌokꞌotꞌit tachi ju ixlayatꞌit acsni ixlhilacꞌapꞌintꞌatꞌitcaꞌ ju yuchi.
Chai ni jantu tamch apꞌastꞌacꞌaꞌitꞌit pus ma va tam pantsꞌiquis catalakminan ju yuchi chai ma catamakꞌosuniyan ju ixputayan ju mincantilaꞌan.
6 Para ju tuchꞌi naviyatꞌit ma alin lacatsꞌunin ju kꞌachani ju yuchi.
Ma yuchi ni lana jantu kꞌox lhiulayatꞌit tuchi tanavi ju nicolaítanin.
Chai ju yuchi ma vachuꞌ jantu kꞌox lhiulai tuchi tanavi ju yuꞌunch.
7 Pus ju alin ixpakꞌasmatni ma chach kꞌasmatlh ju tuchi najun ju Spiritu Santu.
Tuchi ajuni ju talhilaksi ju yuchi ju xaquimaꞌatsꞌokni ju ani chivinti.
Pus ju casastꞌucꞌaꞌ ju macxcai ma caxtaknicanaꞌ ju xatocꞌat ju qꞌuiu ju xtꞌakꞌa ju atsucunti ju conkꞌalhiyanta ju lactꞌiyan junta vilhcha ju Dios.
Ma yuchi ju caxtakniyaꞌ ju xaquimaꞌatsꞌokni ju ani chivinti”.
Chunch ju quijuni ni acꞌajunilh ju amachakꞌan Efeso.
Ju chivinti ju atsꞌoknunilh ju amachakꞌan Esmirna
8 Chai ju yuchi ju xaquimaꞌatsꞌokni ju ani chivinti vachuꞌ chani quijuni:
“Chani atsꞌoknunin ju anuꞌ ju alhistꞌacꞌa ju quintalhilaksi ju tavilanancha ju lakꞌachakꞌan Esmirna.
Ma chani tajunan ju ixtꞌajun tus acsni maticaꞌ tuꞌuꞌ ixjunita chai catsucukꞌalhiyaꞌ tus mas va tavananch.
Yuchi ju ixnita para lokꞌonchokolh.
9 Ju yuchi ma cꞌatsakꞌojui tuchꞌi naviyatꞌit chai tuchꞌi lhimakꞌalhkꞌajnanatꞌit.
Chai ma cꞌatsai ni nonatꞌit ni na quilhpatinin untꞌatꞌit mas jantu vasalh quilhpatinin untꞌatꞌit.
Alai ma na makꞌalinin untꞌatꞌit.
Chai ju yuchi ma cꞌatsai tuchi macxcai chivinti tajunan ju talhitapakaꞌuchokoi isꞌakstuꞌan ni israelitanin mas jantu vasalh israelitanin tajunita.
Alai ma va Satanás ju tachꞌakꞌokꞌai.
10 Pus ma jantu atꞌalhonitꞌit ju alhimakꞌalhkꞌajnanaꞌitꞌit.
Pus ju lhacaticuru ma caꞌamapastꞌacꞌaniyaꞌ ju lapanacni ni catalhinonaꞌ ixtꞌalhnuca ju aliꞌin lamilhiꞌuxijnan.
Chai ni jantu acꞌapꞌaꞌitꞌit ju yuchi mas chunch cataꞌulhtuyan pus ma catasuyaꞌ ni vasalh lhilacꞌapꞌinatꞌit ju xaquimaꞌatsꞌokni ju ani chivinti.
Chai ma tachi lakacau avilhchan ju amamakꞌalhkꞌajnicꞌanaꞌitꞌit.
Para va tachi alhilaksitꞌit ju yuchi mas amaknicꞌanaꞌitꞌit chai ju yuchi ma cataxtakniyan ju mintalhajaꞌan.
Ma yuchi ni caꞌalinaꞌ ju miꞌatsucuntiꞌan jonkꞌalhita lactꞌiyan.
11 Pus ju alin ixpakꞌasmatni ma chach kꞌasmatlh ju tuchi najun ju Spiritu Santu.
Tuchi ajuni ju talhilaksi ju xaquimaꞌatsꞌokni ju ani chivinti.
Pus ju casastꞌucꞌaꞌ ju macxcai ma jantu catinilh ju ixlaktꞌui”.
Chunch ju quijuni ni acꞌajunilh ju amachakꞌan Esmirna.
Ju chivinti ju atsꞌoknunilh ju amachakꞌan Pérgamo
12 Chai ju xaquimaꞌatsꞌokni ju ani chivinti vachuꞌ chani quijuni:
“Atsꞌoknunin ju quintalhilaksi ju tavilanancha ju lakꞌachakꞌan Pérgamo.
Ma chani tajunan ju quilhtaxtuta lakatam espada ju acxputꞌui quicxtui.
13 Ma cꞌatsakꞌojui tuchꞌi ju naviyatꞌit.
Chai ma cꞌatsai ni anchach ju tꞌonatꞌit junta lhinajun ju Satanás.
Chai ma cꞌatsai ni mas anch ju tꞌonatꞌit para va tachi lhilaksiyatꞌit ju yuchi ju xaquimaꞌatsꞌokni ju ani alhiqui.
Chai ma jantu tavanan nontꞌatꞌit ni jantu mispꞌayatꞌit ju yuchi mas acsni maknicalh lamilhiꞌuxijnan ju Antipas ju vasalh ixlapanac ixjunita.
Ma anchach ju maknicalh junta lhinajun ju Satanás.
14 Para ma alin lacatsꞌunin ju naviyatꞌit ju jantu kꞌox lhiulai ju yuchi.
Pus ma alin ju lamilhiꞌuxijnan ju talacaꞌini ju ixlhamapꞌaksin ju makꞌaniya lapanac ju Balaam ixjuncan.
Yuchach ju junilh ju kꞌai ucxtin Balac ta yu laich caꞌapumakꞌalhkꞌosuyach ju israelitanin.
Ju Balaam va ajunilh ni laich cataꞌulh ju lhivai ju ixlhakꞌailaktsꞌincanta ju santo chai ni laich catatꞌatsuculh va tichi chavaich.
15 Pus ma vana va chunch tanavi ju aliꞌin ju lamilhiꞌuxijnan.
Chai vachuꞌ ma va talacaꞌini ju ixlhamapꞌaksinꞌan ju nicolaítanin.
Chai lana jantu kꞌox lhiulai ju yuchi ju xaquimaꞌatsꞌokni ju ani alhiqui.
16 Pus ma tamch apꞌastꞌactꞌit.
U ni jantu pus ma vatsꞌalhti catalakminan ju uxijnan ju yuchi ju xaquimaꞌatsꞌokni ju ani chivinti chai ma catatꞌalasayan.
Ma capulasayaꞌ ju espada ju taxtui laꞌixquilhni.
17 Pus ju alin ixpakꞌasmatni ma chach kꞌasmatlh ju tuchi najun ju Spiritu Santu.
Tuchi ajuni ju talhilaksi ju xaquimaꞌatsꞌokni ju ani chivinti.
Pus ju casastꞌucꞌaꞌ ju macxcai ma caxtaknicanach ju vaiti ju makꞌanicantacha ju lactꞌiyan.
Ma yuchi ju caxtakniyaꞌ ju xaquimaꞌatsꞌokni ju ani chivinti.
Chai ma vachuꞌ caxtakniyaꞌ lakatam xnapapa chiux junta tsꞌokcanta ju sastꞌi ixtapakaꞌut.
Chai ju anuꞌ tapakaꞌut ma jantu xamatiꞌ mispai.
Va yuchi ju caꞌamaklhtayananach”.
Chunch ju quijuni ni acꞌajunilh ju amachakꞌan Pérgamo.
Ju chivinti ju atsꞌoknunilh ju amachakꞌan Tiatira
18 Chai ju xaquimaꞌatsꞌokni ju ani chivinti vachuꞌ chani quijuni:
“Chani atsꞌoknunin ju alhistꞌacꞌa ju quintalhilaksi ju tavilanancha ju lakꞌachakꞌan Tiatira.
Ma chani tajunan ju istsꞌalh Dios ju kꞌai lam lam talakpuyajui tachi ju tuꞌuꞌ xaꞌalapnaꞌ jipi.
Chai ju ixchꞌajaꞌ ma lana kꞌox slamnicꞌa junita tachi ju tuꞌuꞌ kꞌoxi tsasnat ju va ancaꞌ camaxtucalh lacajipi.
19 Pus ju yuchi ma cꞌatsai tuchꞌi naviyatꞌit.
Chai ma cꞌatsai ni na amapꞌainininatꞌit chai vasalh lhilaksiyatꞌit ju yuchi.
Chai chꞌalhcꞌatnaniyatꞌit chai chꞌixkꞌoyatꞌit tachi chun ju macxcai.
Chai ma vachuꞌ cꞌatsai ni palai lhu ju chꞌalhcꞌatnaniyatꞌit ju chavai.
Ma palai jantu acsni pꞌulhnan xalhilacꞌapꞌinatꞌit.
20 Para ma alin lacatsꞌunin ju jantu kꞌox lhiulai ju yuchi.
Ma yuchi ni va yauch unitꞌit ju anuꞌ chakoꞌulh ju Jezabel juncan ni laich catavi lamilhiꞌuxijnan.
Chai ju yuchi va tajunan ni laich najun ixchivinti Dios mas jantu.
Chai ju yuchi amalani chai aꞌokxchokꞌoi ju ixlapanacni ju anuꞌ ju xaquimaꞌatsꞌokni ju ani chivinti.
Ma va ajuni ni laich catatꞌatsuculh va tichi chavaich chai ma lai cataꞌulh ju lhivai ju ixlhakꞌailaktsꞌincanta santo.
21 Pus ma na lakalhu avilhchan ju xapacxan ni camacaulich ju alactuꞌunti ju navi ni va tꞌatꞌajun va tichi chavaich.
Para ma lana jantu tam pastacputun.
22 Pus ju yuchi ju xaquimaꞌatsꞌokni ju ani chivinti ma caxtakniyaꞌ ju Jezabel ju na macxcai ixtakꞌankꞌat.
Chai tachi chun ju talanita ju chunch atsucunti laꞌixmacni yuchi ma caꞌaxtakniyaꞌ ju kꞌai ixmakꞌalhkꞌajnatꞌan vachuꞌ.
Ma chunch ju canaviyaꞌ ni jantu catamaconaꞌ ju tuchi tanavich.
23 Chai tachi chun ju isꞌaskꞌatꞌan ju anuꞌ chakoꞌulh ma lana caꞌamakniyach.
Pus ju chunch tachi chun ju talhilaksi ju yuchi ju xaquimaꞌatsꞌokni ju ani chivinti ma catacꞌatsayach ni ma yuchach ju alaktsꞌintanuni ju tuchi takꞌachani ju lapanacni chai tuchi tapastꞌacꞌa.
Chai ma yuchach ju cataxtakniyan ju pumatamin milhiꞌuxijnan tachi ju lhijunch ixlacata ju tuchi xanavi ju kꞌantam kꞌantam.
24 Pus ju yuchi ma taxakꞌalayan ju uxijnan ju amachakꞌan Tiatira ju jantu lacꞌaꞌinitꞌatꞌit ju ixlhamapꞌaksin ju anuꞌ chakoꞌulh ju Jezabel juncan.
Jantu ixlanipꞌutꞌunatꞌit mas ixtajunan ni yuchach ju palai kꞌox tucan lhamapꞌaksin mas va ixꞌanuch ju Satanás.
Pus uxijnan ju ma taxakꞌalayan.
Ma jantu tuꞌuꞌ atumpa tsꞌinqꞌui lhamapꞌaksin ju cataxtakniyan.
25 Ma va yuchi ni atꞌailhipꞌitꞌit tachi ju layatꞌit tus acsni caminchokoyaꞌ ju yuchi.
26 Pus ju casastꞌucꞌaꞌ ju macxcai chai ju camuctaxtuyaꞌ tachi ju najunta ju yuchi pus ma caxtakniyaꞌ ju ixtachaput ni laich calhijonkꞌoyaꞌ ixlhilacaputsꞌun ju lacamunutpaꞌ.
27 Ju ixpai ju xaquimaꞌatsꞌokni ju ani chivinti xtaknita ju ixtachaput.
Chai ju yuchi ma caxtakniyaꞌ vachuꞌ ixtachaput ju casastꞌucꞌaꞌ ju macxcai.
Chai ju yuchi ma calhinonaꞌ.
Para ju lapanacni ju jantu talacaꞌini ma chunch ju caꞌaꞌulhtuyaꞌ tachi acsni lhinekcan ju tuꞌuꞌ xalu.
28 Chai ju casastꞌucꞌaꞌ ju macxcai ma vachuꞌ caxtaknicanaꞌ ju kꞌai stꞌacu ju xajachilh vatsꞌisin.
29 Pus ju alin ixpakꞌasmatni ma chach kꞌasmatlh ju tuchi najun ju Spiritu Santu.
Tuchi ajuni ju talhilaksi ju xaquimaꞌatsꞌokni ju ani chivinti”.
Pus chunch ju quijuni ni acꞌajunilh ju amachakꞌan Tiatira.