JU AMAVASALANICALH JU XIVAN
Yuchi ju Jesús ju mavasalanilh ju Xivan ju chivinti
1
Ju quitꞌin icXivan ixlapanac ju Jesucristo.
Pus ju Dios mavasalanilh ju ani chivinti ju Jesucristo ni laich caꞌamasuniyaꞌ ju ixlapanacni tachi chun ju taxtokni ju vasalh catapasayaꞌ.
Chai jantu makꞌan cativa tus catapasayaꞌ ju ani taxtokni.
Pus ju Jesucristo quimalakachanichilh pumatam anquilh chai yuchi ju quijunilh ni actsꞌokꞌulayaꞌ tachi chun ju ani taxtokni.
2 Pus ju quitꞌin ictsokꞌulata ixchivinti Dios chai tuchi naulich ju Jesucristo chai tachi chun ju taxtokni ju iclaktsꞌilh.
3 Na kꞌachan va tichi chavaich ju najun ju ani chivinti ju ictsꞌokꞌulata junta icnaulh tuchi catapasayaꞌ.
Chai na takꞌachan tachi chun ju takꞌasmatꞌa ju ani chivinti chai talacaꞌi ju chivinti ju ictsꞌokꞌulata.
Na takꞌachan ni vanin chinta ju avilhchan acsni caꞌuctaxtuyaꞌ tachi chun ju ani taxtokni ju ictsꞌokꞌulata.
Amacꞌamican ju quilhmactujun ju talhilacaꞌanta ju Jesucristo
4 Ju quitꞌin icXivan chai iclamacꞌamiyau ju uxijnan ju lhilacꞌapꞌinatꞌit ju Jesús ju lakatujun lakꞌachakꞌanixni vilatꞌit ju laxalacatꞌun Asia.
Ju Dios tꞌajun tus va tavananch chai yuchi ju caminaꞌ astan.
Pus ju Spiritu Santu chunch junita tachi ju anuꞌ lakatujun maclhcu ju lacya laꞌixꞌucxlacapuꞌ ju kꞌai putolan junta lhinajun ju Dios.
Pus ju Spiritu Santu chai ju Dios cataꞌaktaijuyan lacaꞌamapaininti chai cataꞌaktaijuyan ni jantu calacꞌalh ju miꞌalhunutꞌan.
5 Vachuꞌ ju Jesucristo cataꞌaktaijuyan.
Pus yuchi ju lana vas najun tuchi cꞌatsai.
Chai yuchi ju pꞌulhnan lokꞌonchokolh acsni ixnita.
Chai yuchi ju alhijuni tachi chun ju ucxtinin ju ani lacamunutpaꞌ.
Chai yuchi ju quintamapainiyan chai quintachꞌakꞌanin ju quiꞌalactuꞌuntiꞌan acsni taxtunilh ju ixꞌacꞌalhni ju lacacurus.
6 Chai yuchi ju quintalhilhcaꞌulatan ni ucxtinin catꞌajumvi ju yuchi.
Chai vachuꞌ quintalhilhcaꞌulatan ni palijni cajumvi ni lai calakꞌayayau ju Dios.
Chai yuchach ju ixpai vachuꞌ ju Cristo.
Pus yuchach ju va tachi calakꞌayacalh ni alin ixtachaput jonkꞌalhita.
Vasalh chunch junita.
7 Pus yuchi ju Cristo ju caminchokoyaꞌ lacaꞌataputsꞌi chai tachi chun ju lapanacni catalaktsꞌinaꞌ.
Chux ju yuꞌunch ju talhtokꞌolh acsni ixtꞌajun ju ani lacamunutpaꞌ.
Chai tijpachux ju lapanacni ju alin ju ani lacamunutpaꞌ pꞌas catalactꞌasayaꞌ va ixlacata yuchi.
Slivasalh chunch ju catapasayaꞌ.
8 Pus ju Jesucristo chani najun:
“Ju quitꞌin xactꞌajunch tus acsni maticaꞌ tuꞌuꞌ ixjunita chai actsucukꞌalhiyaꞌ tus mas va tavananch.
Chai quitꞌin ju acminchokopalaꞌ astan.
Quitꞌin ju lai icnavikꞌojui tachi chun ju taxtokni”.
Ju Xivan laktsꞌilh ju Cristo
9 Pus ju quitꞌin ju ictꞌajun atsꞌoknuꞌ ju ani alhiqui milakꞌauꞌan Xivan icjunita.
Pus tachi ju uxijnan makꞌalhkꞌajnanatꞌit chai lhinajun ju Jesucristo lamiꞌatsucuntiꞌan chai chꞌixkꞌoyatꞌit tachi chun ju macxcai va ixlacaꞌatalh ni lhilacꞌapꞌinatꞌit ju Jesús pus vachuꞌ chunch iclai ju quitꞌin.
Pus ju quitꞌin xacvi lacalacatꞌicstꞌi lacatꞌun laꞌixtampusni alama.
Chai ju anuꞌ lacatꞌun Patmos juncan.
Pus ju quitꞌin tachꞌin xacjunita ju anch va ixlacaꞌatalh ni xacnajun ixchivinti Dios chai xacꞌajuni ju lapanacni ixlacata ju Jesús.
10 Pus lhitumincu ixjunita acsni lakꞌayacan ju quiꞌucxtinꞌan Jesús.
Chai ju Spiritu Santu quimakꞌasmatni lakatam chivinti ju xachivincan ju laquimpulacan.
Lana na pꞌas ju chivinilh tachi acsni na pꞌas suncan ju tuꞌuꞌ skꞌolh ni va xaquimamachakxaniputun ni jantu va xamatiꞌ ju xaquixakꞌalai.
11 Chai chani ju quijuni:
―Ju quitꞌin xactꞌajunch tus acsni maticaꞌ tuꞌuꞌ ixjunita chai actsucukꞌalhiyaꞌ tus mas va tavananch.
Atsꞌokꞌulatꞌi lacaꞌalhiqui ju tuchꞌi alaktsꞌinaꞌ.
Chai amalakꞌachꞌaninch ju quintalhilacaꞌanta ju tavilanancha ju ani lakatujun lakꞌachakꞌanixni laxalacatꞌun Asia.
Anch ju Efeso chai ju Esmirna chai ju Pérgamo chai ju Tiatira chai ju Sardis chai ju Filadelfia chai ju Laodicea.
―Chunch ju xaquijuni ju xaquixakꞌalai.
12 Pus ju quitꞌin ictalakaspꞌitlh ni va xaclaktsꞌimputun tichi chavaich ju xaquixakꞌalai.
Chai acsni ictalakaspꞌitlh pus iclaktsꞌilh lakatujun ixputayan cantila ju si oro ixtajunita.
13 Chai laꞌixlacaitat junta ixlacya ixputayan cantila ixya pumatam ju va ixtꞌachunch ixjunita tachi ju yuchi ju malakachachilh ju Dios ni lapanac catsucuyaꞌ ju ani lacamunutpaꞌ.
Chai ju yuchi ixlakchꞌita ju lhman ixpumpuꞌ ju ixꞌakxtakmanikꞌota ju ixchꞌajaꞌ.
Chai vachuꞌ ixtanquilhakchꞌimucꞌacanta ju liston ju oro ixjunita.
14 Chai ju ixꞌai slivasalh na xnapapa ixjunita.
Chun tachi ju tuꞌuꞌ apamat borrego ju na xnapapa junita u tachi ju tuꞌuꞌ miqui.
Chai kꞌai lam lam ixtalakpuyajui tachi ju tuꞌuꞌ xaꞌalapnaꞌ jipi.
15 Chai ju ixchꞌajaꞌ lana kꞌox slamnicꞌa ixjunita tachi ju tuꞌuꞌ kꞌoxi tsasnat ju va ancaꞌ camaxtucalh lacajipi.
Chai ju laꞌixchivinti lana istasui ni na alin ju ixtachaput.
Chunch tachi ju ixkꞌasmatca istꞌasat ju tuꞌuꞌ talhavanti xcan.
16 Chai ixchꞌapata laꞌixlhicana lakatujun stꞌacu.
Chai ju laꞌixquilhni ixtaxtui lakatam espada ju na lhman ixjunita chai acxputꞌui ixquicxtui.
Chai ju ixꞌucxpuꞌ na slamnicꞌa ixjunita tachi ju avilhchan acsni na pꞌas maktaji.
17 Chai ju quitꞌin acsni iclaktsꞌilh pus lana tin ictaꞌaktalh.
Chai tachi ju va xanin ictama laꞌixchꞌajaꞌ acsni ictaꞌaktalh.
Pus ju yuchi quimokslanilh ixmacaꞌ laꞌixlhicana laquilacatuna chai chani quijuni:
―Jantu atꞌalhan.
Quitꞌin ju xactꞌajun tus acsni maticaꞌ tuꞌuꞌ ixjunita chai actsucukꞌalhiyaꞌ tus mas va tavananch.
18 Chai ictꞌajun ju chavai.
Chai mas xacnita para ictꞌajun chai actsucukꞌalhiyaꞌ.
Chai quitꞌin ju icnajun tichi chavaich ju caniyaꞌ chai quitꞌin ju icchꞌapata ju xallave junta taꞌan ju tanita.
19 Pus atsꞌokꞌulatꞌich ju tuchꞌi xalaktsꞌin chai ta yu junita ju aliꞌ taxtokni ju chavai chai ju tuchi catapasayaꞌ astan.
20 Pus chanich ju nomputun ju anuꞌ ju jantu lai xamachꞌakxai ixlacata ju anuꞌ lakatujun stꞌacu ju laktsꞌintꞌa laquilhicana chai ju anuꞌ lakatujun ixputayan cantila ju si oro ixtajunita.
Pus ju anuꞌ lakatujun stꞌacu pulaktsꞌipaxcavacan ju talhistꞌacꞌa ju quintalhilaksi ju tavilanancha ju lakatujun lakꞌachakꞌanixni.
Chai ju ixputayan cantila ju laktsꞌintꞌa pulaktsꞌipaxcavacan ju quilhmaktujun ju quintalhilaksi.