Lai tꞌalalhajayau ju macxcai ju alin ju ani lacamunutpaꞌ
5
Isꞌaskꞌatꞌan Dios juntau tachi chun ju lacaꞌiyauch ni yuchi ju Jesús ju ixnoncan camalakachatachilh ju Dios.
Chai tachi chun ju tamapaini ju quimpaiꞌan Dios pus vachuꞌ taꞌamapaini ju aliꞌin ju talhilacaꞌanta ju Cristo ni vachuꞌ isꞌaskꞌatꞌan Dios tajunita.
2 Pus chani ju pumispayau ni vasalh amapainiyauch ju isꞌaskꞌatꞌan Dios.
Pus ni mapainiyau ju Dios chai quiclacaꞌiyau ju ixlhamapꞌaksin pus vachuꞌ amapainiyau ju isꞌaskꞌatꞌan.
3 Chai chani ju putasui ni vasalh mapainiyau ju Dios acsni naviyau tachi ju najun laꞌixlhamapꞌaksin.
Chai jantu xcai lhiulayau ixmuctaxtuca tachi ju najun laꞌixlhamapꞌaksin ju yuchi.
4 Tachi chun ju isꞌaskꞌatꞌan Dios lai tamacajun ju macxcai atsucunti ju alin ju ani lacamunutpaꞌ.
Chai yuchi lai lhimaconau ju macxcai atsucunti va ixlacata ni lhilaksiyau ju Cristo Jesús.
5 Para jantu si lai tamacajun ju macxcai atsucunti ju alin ju ani lacamunutpaꞌ.
Va yuchi ju lai macajun ju lacaꞌich ni yuchi ju Jesús ju Cristo ju ixnoncan camalakachatachilh ju Dios chai ni yuchi istsꞌalh Dios junita.
Alin ju tamavasalai ni vasalh istsꞌalh Dios ju Jesucristo
6 Pus ju Jesucristo yuchach ju quimakpaxacalh chai quinichilh ju ani lacamunutpaꞌ.
Jantu va yuchi ni quimakpaxacalh para vachuꞌ quinichilh.
Chai yuchi ju Spiritu Santu ju quintamavasalaniyan laquiꞌalhunutꞌan ni chunch ju tapasalh laꞌisꞌatsucunti.
Chai ju Spiritu Santu yuchach ju najun ju istavasalanti.
7 Alin pumatꞌutu ju tavilanancha lactꞌiyan ju tanajun ni vasalh istsꞌalh Dios ju Jesús.
Yuchi ju quimpaiꞌan Dios chai yuchi ju Jesús ju quintaquimamachakxanichin laꞌisꞌatsucunti ta yu junita ju ixꞌalhunut ju Dios.
Chai vachuꞌ chunch najun ju Spiritu Santu.
Chai ju ani pumatꞌutu si tanajun ni vasalh istsꞌalh Dios ju Jesús.
8 Chai vachuꞌ ju ani lacamunutpaꞌ ju Spiritu Santu najun ni vasalh istsꞌalh Dios ju Jesús.
Chai vachuꞌ chunch ju nomputun acsni tavanan akpaxlh ju Jesús chai acsni tavanan nilh ju yuchi.
Pus ju Spiritu Santu chai acsni chunch ju tapasalh laꞌisꞌatsucunti ju Jesús va lakatam taxtokni ju tamavasalai.
Va tamavasalai ni vasalh istsꞌalh Dios ju Jesús.
9 Pus ju quijnanꞌan lai lacaꞌiniyau ju ixchivinti ju akꞌantam quintꞌalapanacꞌan.
Chai ni chunch ju layau pus aktsꞌiya tasqꞌuini ni calacaꞌiniyau ju ixchivinti Dios ni yuchi ju palai xakꞌai lhichux.
Chai ju Dios najunta ni yuchach ju istsꞌalh ju Jesús juncan.
10 Pus ju lhilacaꞌanta ju istsꞌalh Dios cꞌatsai laꞌixꞌalhunut ni vasalh istsꞌalh Dios ju Jesús.
Para ju jantu lacaꞌita ju ixchivinti Dios pus tachi ju va najun ni taꞌaklhtamat najun ju Dios ni jantu lacaꞌita ju ixchivinti junta najunta ni yuchach ju istsꞌalh.
11 Pus chani najun ju Dios:
“Ma quintaxtaknitan ju quiꞌatsucuntiꞌan ju conkꞌalhiyanta tus lactꞌiyan.
Chai ju ani atsucunti ma quintaxtaknitan acsni lhilacaꞌantauch ju istsꞌalh”.
Ma chunch najun ju Dios.
12 Pus ju ixlhichux ixꞌalhunut maklacaꞌanita ju istsꞌalh Dios alin ju isꞌatsucunti ju conkꞌalhiyanta lactꞌiyan.
Para ju jantu ixlhichux ixꞌalhunut maklacaꞌanita ju istsꞌalh Dios pus matiꞌ ju isꞌatsucunti ju caꞌixjonkꞌalhicha ju lactꞌiyan.
Ju Xivan amapꞌaksi ju lapanacni
13 Pus ju ani taxtokni iclaꞌatsꞌoknuniu ju uxijnan ju maklacꞌapꞌinitꞌatꞌit ju istsꞌalh Dios.
Chai yuchi iclalhiꞌatsꞌoknuniu ni apꞌucꞌatsꞌayaꞌitꞌit ni alin ju miꞌatsucuntiꞌan ju conkꞌalhiyanta ju lactꞌiyan.
14 Chai jantu talhananau acsni tꞌachivinau ju Dios.
Para cꞌatsayau ni quintakꞌasmatniyan ju Dios acsni tuꞌuꞌ casqꞌuiniyau tachi ju kꞌoxich lhiulai ju yuchi.
15 Chai ni vasalh cꞌatsayau ni quintakꞌasmatniyan acsni tuꞌuꞌ sqꞌuiniyau tachi ju kꞌoxich lhiulai ju yuchi pus vachuꞌ cꞌatsayau ni aquintaxtakniyan ju tuchi sqꞌuiniyauch.
16 Ni canavi tuꞌuꞌ alactuꞌunti xamatiꞌ ju anicꞌach va najun ni lhilacaꞌanta ju Cristo chai ni calaktsꞌilh apumatam ju vasalh lhilacaꞌanta ju Cristo pus ju yuchi lai casqꞌuiniyaꞌ ju Dios ixlacata ju anuꞌ alactuꞌunuꞌ ni jantu canavichokolh tuꞌuꞌ macxcai chai caꞌalilh ju isꞌatsucunti jonkꞌalhita.
Pus laich casqꞌuinilh ixlacata apumatam ni jantu navita ju alactuꞌunti ju jantu lai macꞌacxai ju Dios.
Alin ju alactuꞌunti ju jantu lai macꞌacxai ju Dios.
Ni xamatiꞌ navita ju chunch alactuꞌunti jantu iclajunau ni asqꞌuinitꞌit ju Dios ixlacata ju yuchi.
17 Tachi chun ju jantu sok navican yuchi ju alactuꞌunti.
Para va lakatam alactuꞌunti ju jantu lai macꞌacxacan.
18 Cꞌatsayau ni jantu va tsa alactuꞌunun ju isꞌaskꞌatꞌa Dios.
Para ju istsꞌalh Dios lhistꞌacꞌa ju lhilacaꞌanta yuchi chai ju lhacaticuru jantu lai ta catinavi.
19 Cꞌatsayau ni isꞌaskꞌatꞌan Dios juntau.
Para tachi chun ju jantucaꞌ talhilacaꞌanta ju Cristo tanavinitꞌajuncaꞌ ixkꞌachat ju lhacaticuru.
20 Chai cꞌatsayau ni quilatachilh ju istsꞌalh Dios chai quintaxtaknitan ju kꞌox quintacꞌatsanꞌan ni laich camispauch ju yuchi ju laꞌistavasalanti Dios junita.
Chai ju quijnanꞌan ixꞌamigojni juntau ju istavasalanti Dios ni lhilacaꞌantauch ju lakatami istsꞌalh ju Jesucristo juncan.
Yuchach ju istavasalanti Dios chai yuchi ju xtꞌakꞌa ju atsucunti ju conkꞌalhiyanta ju lactꞌiyan.
21 Quiꞌaskꞌatꞌan jantuch va kꞌaya amaklacꞌapꞌinitꞌit ju jantu vasalh Dios.
Chunch vasalh cava.