Alin ju anuꞌ ju va lakꞌalhiputun tuchi navita ju Jesús
4
Ji quiꞌalakꞌavin jantu alacꞌaꞌikꞌotꞌit ixchivintiꞌan tachi chun ju lapanacni ju tanajun ni tachivinin ixchivinti Dios.
Pꞌulhnan kꞌox alaktsꞌintꞌit junta tsꞌokꞌulacanta ixchivinti Dios ni vasalh chunch tachi ju taꞌamasuninin ju yuꞌunch u jantu.
Chunch anavitꞌit va ixlacata ni na lhu ju tatalacasui ju ani lacamunutpaꞌ tachi ju yuꞌunch ju tanajun ixchivinti Dios mas jantu vasalh ni ixchivinti Dios ju tanajun ju yuꞌunch.
2 Pus chani ju apꞌumispꞌayaꞌitꞌit ni vasalh ixchivinti ju Spiritu Santu ju tꞌajun nonaꞌ ju anuꞌ lapanac u jantu.
Pus tachi chun ju lapanacni ju talhilaksi ju Jesús ni yuchach ju Cristo ju ixnoncan camalakachatachilh ju Dios chai talacaꞌi ni quitsucuchilh ju yuchi tachi tam lapanac ju ani lacamunutpaꞌ chai ni chunch ju tajuni ju lapanacni pus putasui ni tꞌajun ju Spiritu Santu laꞌixꞌalhunutꞌan.
3 Para tachi chun ju lapanacni ju jantu talhilaksi ju Jesús chai chunch ju taꞌamalaninin pus ju Spiritu Santu jantu tꞌajun laꞌixꞌalhunutꞌan ju yuꞌunch.
Chai ju yuꞌunch va tachivinin tachi ju chivinin ju anuꞌ lapanac ju talacasui tachi ju Cristo para alai va lakꞌalhiputun tuchi navita ju yuchi.
Chai ju uxijnan kꞌasmatꞌatꞌit ni noncan ni caminaꞌ ju yuchi.
Chai mas chavai tatꞌajun ju lapanacni ju ani lacamunutpaꞌ ju taꞌamalaninin tachi ju caꞌamalaniyaꞌ ju anuꞌ lapanac ju catalacasuyaꞌ tachi ju Cristo para alai va calakꞌalhiputunaꞌ tuchi navita ju yuchi.
4 Quiꞌaskꞌatꞌan ju uxijnan isꞌaskꞌatꞌan Dios untꞌatꞌit.
Chai jantu taꞌokxchokꞌotan ju yuꞌunch ju jantu vasalh ixchivinti Dios tanajun.
Pus palai tachapun ju Dios ju tꞌajun lamiꞌalhunutꞌan.
Palai jantu ju lhacaticuru ju tꞌajun ju ani lacamunutpaꞌ.
Yuchi jantu talhiꞌokxchokꞌoyan.
5 Pus ju yuꞌunch ju jantu vasalh ixchivinti Dios ju taꞌamalaninin pus va taꞌalacpastacnan tachi ju taꞌalacpastacnan ju jantucaꞌ talhilacaꞌanta ju Cristo.
Chai yuchi talhichivinin ju xataxtokni ju ani lacamunutpaꞌ.
Chai ixlhiyuchi takꞌasmatni ju aliꞌin lapanacni ju vachuꞌ jantucaꞌ talhilacaꞌanta ju Cristo.
6 Para ju quijnan isꞌaskꞌatꞌan Dios icjuntau.
Chai ju lapanacni ju tamispai ju Dios pus quintakꞌasmatniyanch.
Para ju jantu isꞌaskꞌatꞌan Dios jantu quintakꞌasmatniyan.
Yuchi alhimispayauch tichi chavaꞌitnich ju taꞌamalaninin tachi ju ajuni ju Spiritu Santu chai tichi chavaꞌitnich ju va taꞌaꞌokxchokꞌonun.
Ju Dios na amapaininin
7 Ji quiꞌalakꞌavin calamapainiu ni Dios ju xtꞌakꞌa ju chun atalacpastꞌacꞌat.
Chai va tichi chavaich ju tꞌalamapaini ju ixtꞌalapanac pus isꞌaskꞌatꞌa Dios junita chai mispai ju Dios.
8 Para ju jantu amapaininin pus jantucaꞌ mispai ju Dios.
Ju Dios ni na amapaininin.
9 Chani ju pumasunicau ju ixꞌamapaininti Dios ju quilacataꞌan ni malakachachilh ju Dios ju lakatami istsꞌalh ju ani lacamunutpaꞌ ni laich caꞌalilh ju quiꞌatsucuntiꞌan ju conkꞌalhiyanta lactꞌiyan va laꞌixꞌaninti ju Jesús.
10 Ju Dios quintamasunitan ni slivasalh quintamapainin mas tucaꞌ ixmapainiyau ju yuchi.
Ju yuchi quintamapainiyan chai macamilh ju lakatami istsꞌalh ju matanꞌula ixꞌalhunut ju Dios ixlacata ju quiꞌalactuꞌuntiꞌan acsni tavanan nilh.
Ju chunch ju yuchi mapalalh ixtapalh ju quiꞌalactuꞌuntiꞌan.
11 Ji quiꞌalakꞌavin ni chunch ju quintapumapainitan ju Dios pus tasqꞌuini ni vachuch calamapainiu ju quijnanꞌan.
12 Jantu xamatiꞌ laktsꞌinta ju Dios.
Para ni calamapainiu ju quijnanꞌan pus Dios ju tꞌajun laquiꞌalhunutꞌan chai tasui ni slivasalh mapainiyau ju Dios.
13 Ju Dios quintaxtaknitan ju iSpiritu Santu.
Chai yuchi lai lhicꞌatsayau ni ixꞌamigojni juntau ju Dios chai ni tꞌajunch ju yuchi laquiꞌalhunutꞌan.
14 Chai ju quijnan iclaktsꞌintauch ju istsꞌalh Dios chai icꞌajuniuch ju lapanacni ni macaminta ju quimpaiꞌan Dios ju istsꞌalh.
Chai yuchi lhimilh ni laich caꞌalacmakꞌalhtaxtulh tachi chun ju lapanacni ju catamaklacaꞌaniyach ju yuchi.
15 Pus va tichi chavaich ju najun ni yuchi ju istsꞌalh Dios ju Jesús pus ju Dios tꞌajun laꞌixꞌalhunut chai ju yuchi ixꞌamigo Dios junita.
16 Chai ju quijnanꞌan cꞌatsayauch chai lacaꞌiyauch ni quintamapainiyan ju Dios.
Pus Dios ju na amapaininin.
Chai ju amapaininin pus ixꞌamigo Dios junita chai ju Dios tꞌajun laꞌixꞌalhunut.
17 Chai acsni vasalh mapainiyau ju Dios pus jantu catalhoniyau ju anuꞌ avilhchan acsni caꞌamakꞌosaspitcanach tachi chun ju lapanacni.
Jantu catalhoniyau ni vachuꞌ chunch quintamapainiyan ju quijnanꞌan mas vilaucaꞌ ju ani lacamunutpaꞌ tachi ju mapaini ju Jesucristo.
18 Chai ni vasalh cꞌatsayau ni quintamapainiyan ju Dios pus jantu catalhananau.
Ni va talhananau pus va nonau ni aquintamamakꞌalhkꞌajniyan ixlacata ju tuchi navitauch.
Para ni slivasalh lacaꞌiyau ni quintamapainiyan ju Dios pus jantu talhoniyau ju tuchi aquintanaviyan.
Pus ni va talhananau va nomputun ni jantu vasalh mapainiyau ju Dios.
19 Pus ju quijnanꞌan yuchi lhimapainiyau ju Dios ni pꞌulhnan quintamapainin ju yuchi.
20 Para ni xamatiꞌ najun ni mapaini ju Dios para ni va xcaji ju tam ixlhilakꞌau pus va taꞌaklhtaman.
Pus ju jantu mapaini ju tam ixlhilakꞌau ju tꞌalalaktsꞌin ja va a ti yuchach lai catimapaini ju Dios ni jantu tavanan laktsꞌinta.
21 Chai ju quijnanꞌan mispayauch ju ixlhamapꞌaksin Dios junta ma chani najun:
“Ju vasalh mapaini ju Dios pus ma vachuꞌ camapaini ju ixlhilakꞌau”.