Ju quijnanꞌan isꞌaskꞌatꞌan Dios juntau
3
Alaktsꞌintꞌit.
Slivasalh na quintamapainiyan ju quimpaiꞌan Dios.
Chai tasui ni vasalh quintamapainiyan ni lacasqꞌuinch ni calhimispacanauch ni isꞌaskꞌatꞌan juntau.
Chai ju lapanacni ju jantucaꞌ talhilacaꞌanta ju Cristo jantu tacꞌatsai ni isꞌaskꞌatꞌan Dios juntau va ixlacata ni jantu tamispai ju yuchi.
2 Ji quiꞌalakꞌavin tachi chun ju quijnanꞌan ju lhilacaꞌanauch ju Cristo isꞌaskꞌatꞌan Dios juntau ju chavai.
Chai mas tucaꞌ mavasalanicanau ta yu tucan cajunauch astan para cꞌatsayau ni chunch cajunau tachi ju Cristo acsni tavanan caminchokoyaꞌ ju yuchi.
Chai chunch cajunau ju acsnich ni calaktsꞌinauch ju yuchi ta yu junitach.
3 Chai tachi chun ju talhilaksi ju Cristo ni chunch catajunaꞌ tachi ju junita ju yuchi pus salaka tanavitꞌajun isꞌatsucuntiꞌan va ixlacata ni salaka junita ju isꞌatsucunti ju Cristo.
4 Para tachi chun ju tanavitꞌajun ju alactuꞌunti tamalaclai ju ixlhamapꞌaksin Dios.
Pus ju jantu muctaxtui tachi ju najun laꞌixlhamapꞌaksin Dios pus alactuꞌunti ju navi.
5 Chai ju uxijnan cꞌatsꞌayatꞌit ni yuchi lapanac quilhitsucuchilh ju Cristo ni laich aquintaxacanikꞌoyan ju quiꞌalactuꞌuntiꞌan.
Para ju yuchi jantu tavanan alactuꞌunulh.
6 Pus tachi chun ju kꞌox tꞌalalhiꞌanta ju Jesús jantu va tsa alactuꞌunun.
Para va tichi chavaich cava ju va tsa alactuꞌunun jantu tavanan machakxata tichi lapanac ju Jesús nin calhilacaꞌalh ju yuchi.
7 Quiꞌaskꞌatꞌan tun xamatiꞌ cataꞌokxchokꞌon.
Ju va tsa navi ju soknicꞌa yuchi lhinavi ni lasoknicꞌanitach ju ixꞌalhunut ju Dios tachi ju Cristo ni soknicꞌa ju yuchi vachuꞌ.
8 Para ju va tsa alactuꞌunun pus isꞌaskꞌatꞌa lhacaticuru junita.
Pus ju lhacaticuru va tsa alactuꞌunun tus acsni alactuꞌununtacha ju makꞌanchich.
Para vachuꞌ yuchi lhiquitsucuchilh ju ani tachi lapanac ju istsꞌalh Dios ni jantuch vana tasqꞌuini ni catanavi ju alactuꞌunti ju talhilacaꞌanta ju Cristo tachi ju amanaviniputun ju lhacaticuru.
9 Va tichi chavaich ju vasalh isꞌaskꞌatꞌa Dios junita jantu va tsa alactuꞌunun ni xtaknita ju Dios ju sastꞌi isꞌatsucunti.
Pus jantu lai va tsa alactuꞌunun ni isꞌaskꞌatꞌa Dios junita.
10 Pus chani ju apumispacanch tichi chavaꞌitnich ju isꞌaskꞌatꞌanch Dios tajunita chai tichi chavaꞌitnich ju isꞌaskꞌatꞌan ju lhacaticuru tajunita.
Pus tachi chun ju jantu tanavi ju soknicꞌa chai ju jantu tamapaini tam ixlhilakꞌauꞌan pus jantu isꞌaskꞌatꞌan Dios tajunita.
Calamapainiuch ju pumatamin ju quijnanꞌan
11 Pus tus acsni tavanan lhilacꞌapꞌitꞌit ju Cristo kꞌasmatꞌachitꞌit ju chivinti junta najun ni calamapainiuch ju pumatamin.
12 Jantu chun calau tachi ju lalh ju makꞌaniya lapanac ju Caín ixjuncan.
Ju yuchi isꞌaskꞌatꞌa lhacaticuru ixjunita chai maknilh ju ixlakꞌau.
Pus ja cꞌatsꞌayatꞌit tuchi ju lhimaknilh ju ixlakꞌau.
Yuchi xalhimakni ni va jantu kꞌox ixjunita ju isꞌatsucunti isꞌakstu chai ju isꞌatsucunti ju ixlakꞌau na soknicꞌa ixjunita.
13 Quiꞌalakꞌavin jantu alhamakꞌaninintꞌit acsni cataxcayan ju jantucaꞌ talhilacaꞌanta ju Cristo.
14 Ju quijnanꞌan cꞌatsayau ni takꞌalhtaxtutauch junta jonkꞌalhita makꞌalhkꞌajnat chai alin sastꞌi quiꞌatsucuntiꞌan.
Chai pucꞌatsayau ju chunch ni mapainiyau ju quilhiꞌalakꞌavinꞌan.
Pus ju jantu mapaini ju tam ixlhilakꞌau pus jantucaꞌ takꞌalhtaxtui lacamakꞌalhkꞌajnat ju jonkꞌalhita.
15 Pus va tichi chavaich ju jantu catꞌalalaktsꞌimputulh ju tam ixlhilakꞌau pus va ixtꞌachunch junita tachi ju amakniniꞌ.
Chai ju uxijnan cꞌatsꞌayatꞌit ni maticaꞌ ju isꞌatsucunti ju conkꞌalhiyanta lactꞌiyan ju tam amakniniꞌ.
16 Ju Cristo quintamasunitan ju istavasalanti amapaininti acsni isꞌakstu makꞌaxtaklh ju isꞌatsucunti ju quilacataꞌan.
Pus vachuꞌ ju quijnanꞌan tasqꞌuini ni camakꞌaxtakputuch ju quiꞌatsucuntiꞌan laꞌixlacataꞌan ju aliꞌin ju vachuꞌ talhilacaꞌanta ju Cristo.
17 Para ju tam lapanac ju alin ixmakꞌalit ju ani lacamunutpaꞌ chai ni cacꞌatsa ni alin ju ixmaktasqꞌuinit ju apumatam ju vachuꞌ lhilacaꞌanta ju Cristo para ni jantu pakꞌeunicꞌa ixꞌalhunut chai ni jantu caꞌaktaijuputulh pus tas aclhinaulich ni vasalh mapaini ju Dios ju anuꞌ lapanac.
18 Quiꞌaskꞌatꞌan jantu anicꞌa va calajuniu ni lamapainiyau.
Tasqꞌuini ni calamapainiu ixlhichux quiꞌalhunutꞌan chai calapumasuniu ni lamapainiyau ni laꞌaktaijuyau.
Lhikꞌach lai xakꞌalayau ju Dios
19 Chai ni chunch calayau pus pucꞌatsayau ni lacaꞌitauch ju stavasalanti.
Yuchi ju ixchivinti Dios.
Chai jantu tuꞌuꞌ calhimakꞌantalhanayau ju laquiꞌalhunutꞌan acsni tꞌachivinau ju Dios.
20 Para mas cꞌatsayau ni aktamixnin quintacꞌacxnitan ju quiꞌamapainintiꞌan para tasqꞌuini ni calhilaksiyau ju Dios.
Ju yuchi cꞌatsai ni vasalh mapainiyau.
Ju yuchi cꞌatsakꞌojui tachi chun ju taxtokni.
21 Ji quiꞌalakꞌavin ni jantu tuꞌuꞌ navitau ju laich calhamakꞌanininau astan pus lhikꞌach lai xakꞌalayau ju Dios.
22 Chai ju chunch va tuchi ixtalakxtuch ju casqꞌuiniyau ju yuchi pus aquintaxtakniyan va ixlacaꞌatalh ni muctaxtuyau tachi ju najun laꞌixlhamapꞌaksin chai naviyauch tachi ju kꞌachani ju yuchi.
23 Chai yuchi ju ani ju quintajuntan ju Dios ni canaviu.
Quintajuntan ni calhilaksiyau ju istsꞌalh.
Yuchi ju Jesucristo.
Chai calamapainiuch ju pumatamin tachi ju quintalhimapꞌaksitan ju Cristo.
24 Pus ju navi tachi ju najun laꞌixlhamapꞌaksin ju Dios pus ixꞌamigo junita ju Dios chai ju Dios tꞌajun laꞌixꞌalhunut.
Pus ju Spiritu Santu ju quintaxtaknitan yuchi ju quintamavasalaniyan ni tꞌajun ju Dios laquiꞌalhunutꞌan.