Yuchi ju Cristo ju quintaꞌaktaijuyan
2
Ju uxijnan tachi ju va quiꞌaskꞌatꞌan untꞌatꞌit.
Chai jantu iclacasqꞌuin ni alactꞌuꞌununtꞌit.
Yuchi iclalhiꞌatsꞌoknuniyau ju ani.
Para ni caꞌalactuꞌunulh tam xamatiꞌ pus alin ju quintaꞌaktaijuyan laꞌixmacni quimpaiꞌan Dios.
Yuchi ju Jesucristo ju na soknicꞌa ju isꞌatsucunti.
2 Chai ju yuchi acsni tavanan nilh pus matanꞌula ixꞌalhunut ju Dios ixlacata ju quiꞌalactuꞌuntiꞌan acsni mapalalh ju quiꞌalactuꞌuntiꞌan.
Chai jantu va quilacata quiꞌakstuꞌan ju nilh para vachuꞌ ixlacata tachi chun ju lapanacni ju ani lacamunutpaꞌ.
3 Chai cꞌatsayau ni mispayauch ju Dios acsni quiclacaꞌiyau ju ixlhamapꞌaksin ju yuchi.
4 Para ni xamatiꞌ canonaꞌ ni mispai ju Dios para ni jantu quiclacaꞌi ju ixlhamapꞌaksin pus ju yuchi va taꞌaklhtamai.
Jantu najun ju stavasalanti.
5 Para va tichi chavaich ju quiclacaꞌi ju ixchivinti Dios putasui ni ixlhichux ixꞌalhunut ju mapaini ju Dios.
Chai chani ju lhicꞌatsayau ni vasalh va lakatam tꞌajuntau ju Cristo.
6 Va tichi chavaich ju najun ni va lakatam tꞌajunita ju Cristo tasqꞌuini ni catsuculh tachi ju ixtꞌajun ju yuchi acsni ixtꞌajun ju ani lacamunutpaꞌ.
Ju sastꞌi lhamapꞌaksin
7 Quiꞌalakꞌavin jantu iclaꞌatsꞌoknuniyau tuꞌuꞌ sastꞌi lhamapꞌaksin acsni iclajunau ni alamapꞌainitꞌit.
Alai yuchi ju aktsꞌiya mispꞌayatꞌit tus acsni tavanan lhilacꞌapꞌitꞌit ju Cristo.
Chai yuchi ju chavai ju iclajunchokopalau.
Pus ju anuꞌ lhamapꞌaksin ju aktsꞌiya mispꞌayatꞌit yuchach ju chivinti ju iskꞌasmatꞌatꞌit tus acsni tavanan lhilacꞌapꞌitꞌit ju Cristo.
8 Para mas chunch ca aktsꞌiya laich acnaulh ni sastꞌi junima lhamapꞌaksin ju iclajunau.
Tachi ju va sastꞌi ixjunita acsni quintaxtaknitan ju Jesús.
Chai ju uxijnan amaklhtꞌayanantꞌatꞌit ju anuꞌ lhamapꞌaksin tachi ju va sastꞌi.
Chai vasalh sastꞌi junita ni tam xajun ju quiꞌatsucuntiꞌan ni mispayau ju Dios ju vasalh quintamalacpucujunitan quintacꞌatsanꞌan.
Tꞌajun tapasanaꞌ ju anuꞌ avilhchan acsni na tsꞌista ixjunita laquintacꞌatsanꞌan ni na ixꞌalactuꞌununau.
9 Para ju najun ni vasalh lhilacaꞌanta ju Cristo para ni va xcaji ju tam ixlhilakꞌau laꞌixmacni Cristo pus ju yuchi aktsꞌiya tsꞌistacaꞌ laꞌixtacꞌatsan ni vanach navi ju macxcai.
10 Para ju tꞌalamapaini tam ixlakꞌau pus ju yuchi alhtanan lacaꞌatuncunuꞌ ni navi ju kꞌox chai jantu tuꞌuꞌ alin ju laꞌisꞌatsucunti ju lai capukꞌalhkꞌoslh apumatam.
11 Va tichi chavaich ju xcaji ju tam ixlakꞌau pus aktsꞌiya na tsꞌistacaꞌ ju laꞌixtacꞌatsan ni va axcayanan.
Lana lacaꞌatatsꞌisni ju tꞌajun chai jantu cꞌatsai taꞌanchach ju cachaꞌanaꞌ ju laꞌisꞌatsucunti.
Jantu lai cꞌatsai ni na va tsꞌista ju laꞌixtacꞌatsan ni va axcayanan.
12 Ju uxijnan tachi ju va quiꞌaskꞌatꞌan untꞌatꞌit.
Chai ni macꞌacxanicꞌantꞌatꞌit ju miꞌalactuꞌuntiꞌan va ixlacaꞌatalh ni lhilacꞌapꞌintꞌatꞌit ju Jesús pus yuchi iclalhiꞌatsꞌoknuniyau ju uxijnan.
13 Chai ju uxijnan ji quiꞌacucun mispꞌayatꞌit ju Cristo ju tꞌajun tus acsni maticaꞌ ixjunita ju lacamunutpaꞌ.
Chai yuchi iclalhiꞌatsꞌoknuniyauch ju uxijnan.
Chai ju uxijnan ji paitat lapanacni tꞌalalhaꞌatꞌatꞌit ju lhacaticuru.
Chai yuchi iclalhiꞌatsꞌoknuniyauch ju uxijnan.
Chai ju uxijnan ji quiꞌaskꞌatꞌan mispꞌayatꞌitch ju quimpaiꞌan Dios.
Chai yuchi iclalhiꞌatsꞌoknuniyauch ju uxijnan.
14 Chai ju uxijnan ji kꞌaya lapanacni mispꞌayatꞌit ju Cristo ju tꞌajun tus acsni maticaꞌ ixjunita ju lacamunutpaꞌ.
Chai yuchi iclalhiꞌatsꞌoknuniyauch ju uxijnan.
Chai ju uxijnan ji paitat lapanacni lai sastꞌucꞌatꞌit ju macxcai chai slivasalh mispꞌayatꞌit ju ixchivinti Dios chai tꞌalalhaꞌatꞌatꞌitch ju lhacaticuru.
Chai yuchi iclalhiꞌatsꞌoknuniyauch ju uxijnan.
15 Jantu va yuꞌ ju anavitꞌit cuenta ju xataxtokni ju ani lacamunutpaꞌ.
Nin yuchi ni akꞌachꞌanitꞌit tachi ju talai ju amachakꞌan ju ani lacamunutpaꞌ ju jantucaꞌ talhilacaꞌanta ju Jesús.
Pus va tichi chavaich ju va yuchi canavi cuenta ju xataxtokni ju ani lacamunutpaꞌ pus ju chunch tasui ni jantu slivasalh ni camapaini ju Dios.
16 Tachi chun ju taxtokni ju takꞌachani ju jantucaꞌ talhilacaꞌanta ju Jesús si xanavin lacamunutpaꞌ tajunita.
Ju yuꞌunch takꞌachanicaꞌ tachi chun ju macxcai ju kꞌachani ju quilacatunaꞌan chai tachi chun ju tuꞌuꞌ ju lhacchaꞌanau acsni laktsꞌinau chai acsni va xalackꞌajin jumputunau laꞌixmacni ju aliꞌin quintꞌalapanacniꞌan.
Ju ani si xanavin lacamunutpaꞌ tajunita.
Jantiyuꞌ ju quimpaiꞌan Dios ju xtꞌakꞌa ju ani taxtokni.
17 Para ju lacamunutpaꞌ catapasayaꞌ.
Chai chux ju xataxtokni ju ani ju na tapuxcajui ju lapanacni vachuꞌ catsꞌankꞌayaꞌ.
Para va tichi chavaich ju canaviyaꞌ ju ixkꞌachat ju Dios caꞌalinaꞌ isꞌatsucunti ju conkꞌalhiyanta ju lactꞌiyan.
Alin ju tanajun ju stavasalanti chai alin ju tanajun ju taꞌaklhtamat
18 Quiꞌaskꞌatꞌan vaninch ju ixꞌaclanti ju lacamunutpaꞌ.
Chai ju uxijnan kꞌasmatꞌatꞌit ni caminaꞌ ju catalacasuyaꞌ tachi ju Cristo mas jantiyuꞌ.
Chai ju yuchi va calakꞌalhiputunaꞌ ju tuchi navita ju Cristo.
Pus mas chavai na lhu taꞌalinch ju talakꞌalhiputun ju tuchi navita ju Cristo.
Yuchi lhicꞌatsayauch ni vaninch ju ixꞌaclanti ju lacamunutpaꞌ.
19 Pus ju yuꞌunch ju talakꞌalhiputun ju tuchi navita ju Cristo tataxtuta laquilhiquijnanꞌan va ixlacaꞌatalh ni jantu vasalh quilakꞌauꞌan ixtajunita.
Pus ni lhiquijnanꞌan ixtava jantu ixtataxtulh.
Para yuchi talhitaxtulh ni chunch ju capucꞌatsacanach ni jantu vasalh quiꞌalakꞌavinꞌan tajunita ju anuꞌ lapanacni ju talakꞌalhiputun ju tuchi navita ju Cristo.
Nin tachi pumatam.
20 Para ju uxijnan Cristo taxtaknitan ju Spiritu Santu chai minchuxꞌan mispꞌayatꞌit ju ixchivinti Dios.
Chai ju yuchi stavasalanti.
21 Jantiyuꞌ ju iclalhiꞌatsꞌoknuniyau ni va jantu amispꞌatꞌit ju stavasalanti.
Yuchach ju ixchivinti Dios.
Para ju uxijnan mispꞌayatꞌit ju stavasalanti chai cꞌatsꞌayatꞌit ni jantu lai stavasalanti cativa ju tuꞌuꞌ taꞌaklhtamat.
Chai yuchi iclalhiꞌatsꞌoknunitau ju uxijnan.
22 Pus ju taꞌaklhtamat ju palai kꞌai cava yuchi ni canaulh tam xamatiꞌ ni Jesús jantiyuꞌ ju Cristo ju ixnoncan camalakachatachilh ju Dios.
Ju najun ni Dios jantu quimpaiꞌan chai ju Jesús jantiyuꞌ ju istsꞌalh yuchach ju va lakꞌalhiputun ju tuchi navita ju Cristo.
23 Va tichi chavaich ju najun ni jantu lhilacaꞌamputun ju istsꞌalh Dios pus jantu lai vachuꞌ ixꞌamigo cativa ju quimpaiꞌan Dios.
Para va tichi chavaich ju najun ni lhilacaꞌanta ju istsꞌalh Dios pus ju yuchi ixꞌamigo junita ju quimpaiꞌan Dios.
24 Pus ixchivinti Dios ju kꞌasmatꞌatꞌit acsni pꞌulhnan lacꞌaꞌitꞌit pus yuchach ju alacꞌaꞌikꞌalhitꞌit.
Chai ni alacꞌaꞌikꞌalhiyaꞌitꞌit ixchivinti Dios ju kꞌasmatꞌatꞌit acsni pꞌulhnan lacꞌaꞌitꞌit pus islivasalh ixꞌamigojni aꞌunaꞌitꞌit ju quimpaiꞌan Dios chai ju istsꞌalh.
25 Chai ju Jesucristo quintakꞌalhtasunitan ni aquintaxtakniyan ju quiꞌatsucuntiꞌan ju conkꞌalhiyanta ju lactꞌiyan.
26 Iclaꞌatsꞌoknunitau ju ani taxtokni ni va iclajumputunau ni alin ju taꞌaꞌokxchokꞌoputunan.
27 Para ju Cristo taxtaknitan ju uxijnan ju Spiritu Santu chai ju yuchi tꞌonkꞌalhi lamiꞌalhunutꞌan.
Chai yuchi jantu lhimaktasqꞌuiniyatꞌit ni xamatiꞌ catamasuniyan tichi chavaich ju najun ju istavasalanti chai tichi chavaich ju najun ju taꞌaklhtamat chivinti.
Isꞌakstu ju Spiritu Santu ju catamasuniyan tachi chun ju taxtokni.
Chai ju yuchi aktsꞌiya najun ju stavasalanti.
Jantu va taꞌaklhtamat chivinti ju najun ju yuchi.
Chai tachi ju tamasuniyan ju Spiritu Santu pus chunchach ju alatꞌit.
Kꞌox ixꞌamigojni aꞌuntꞌit ju Cristo.
28 Pus ji quiꞌaskꞌatꞌan kꞌoxich atꞌalalhiꞌitꞌit ju Cristo.
Ju chunch acsni tavanan caminchokoyaꞌ ju yuchi pus lhikꞌach calakꞌanau chai jantu catimaxananiu laꞌixꞌucxlacapuꞌ.
29 Ju uxijnan cꞌatsꞌayatꞌit ni si soknicꞌa navikꞌojui ju Dios.
Chai yuchi lai vachuꞌ lhicꞌatsꞌayatꞌit ni isꞌaskꞌatꞌa Dios junita va tichi chavaich ju navi ju soknicꞌa.