JU PꞌULHNAN ALHIQUI JU ATSꞌOKNULH JU XIVAN
Ju chivinti ixlacata ju atsucunti ju jonkꞌalhita lactꞌiyan
1
Ju Jesús ixtꞌajun acsni tucaꞌ ixꞌalin ju lacamunutpaꞌ.
Para ju quijnan ickꞌasmatꞌauch ju ixchivinti chai iclaktsꞌintauch ju yuchi laquilakchulh quincꞌan.
Va tsa tsa xaclaktsꞌinauch acsni ixvi ju ani lacamunutpaꞌ.
Chai iclakchaꞌauch ju yuchi laquimacaꞌ quincꞌan.
Ju yuchi xtꞌakꞌa ju kꞌox atsucunti.
Chai quintamamachakxanin ta yu junita ju ixꞌalhunut ju quimpaiꞌan Dios.
2 Chai ju yuchi ju lai xtꞌakꞌa ju kꞌox atsucunti quitsucuchilh ju ani.
Chai iclajunauch ni vasalh iclaktsꞌiuch ju quijnan.
Chai iclajunau ixlacata ju yuchi ju lai xtꞌakꞌa ju kꞌox atsucunti.
Ju yuchi va jonkꞌalhita.
Ju yuchi ixtꞌavilhcha ju quimpaiꞌan Dios chai lapanac quitsucuchilh ju ani lacamunutpaꞌ.
3 Chai ju tuchi iclaktsꞌintauch chai ju ickꞌasmatꞌauch pus yuchach ju iclajunau ju uxijnan.
Ju chunch ju uxijnan vachuꞌ aꞌunaꞌitꞌit ixꞌamigojni ju quimpaiꞌan Dios chai ju istsꞌalh ju Jesucristo juncan.
Tachi ju quijnan ni ixꞌamigojni icjuntau vachuꞌ.
4 Pus va iclacasqꞌuinau ni slivasalh akꞌachꞌanaꞌitꞌit.
Yuchi iclalhiꞌatsꞌoknuniyau ju ani taxtokni.
Va yuchi ju atuncunuꞌ ju alin junta vilhcha ju Dios
5 Pus ju ani chivinti ju aclajunau ju uxijnan yuchi ju quintajuntan isꞌakstu ju Jesús.
Ma va yuchi ju atuncunuꞌ ju alin junta vilhcha ju Dios.
Nin lacatsꞌunin ma matiꞌ ju atatsꞌisni.
6 Pus ju quijnanꞌan taꞌaklhtamat canaju chai jantu vasalh canaviu ju stavasalanti ni canaju ni ixꞌamigojni Dios juntau para ni va alactuꞌununau.
Ju chunch tachi ju va tsꞌistacaꞌ laquiꞌalhunutꞌan ni jantu lai sok anau.
7 Pus junta vilhcha ju Dios si atuncunuꞌ junita.
Chai ju quijnanꞌan ni naviyau ju kꞌox pus tachi ju va putuncujun junita laquiꞌalhunutꞌan.
Chai ju chunch kꞌox ixꞌamigojni juntau ju aliꞌin ju vachuꞌ talhilacaꞌanta ju Cristo.
Chai ju chunch vachuꞌ quintaxacanikꞌoyan tachi chun ju macxcai laquiꞌalhunutꞌan va ixlacaꞌatalh ni nilh ju Jesucristo istsꞌalh Dios ju quilacataꞌan.
8 Para ni va canaju ni matiꞌ ju quiꞌalactuꞌuntiꞌan pus va okxchokꞌocanau quiꞌakstuꞌan.
Jantu nonau ju stavasalanti.
9 Para ni cajunkꞌoju tachi chun ju quiꞌalactuꞌuntiꞌan ju Dios pus ju yuchi aquintamacꞌacxaniyan ju quiꞌalactuꞌuntiꞌan chai aquintaxacanikꞌoyan tachi chun ju amacxcai.
Pus ju yuchi aktsꞌiya muctaxtui tuchi najunta.
Chai soknicꞌa ju navi acsni quintamacꞌacxaniyan ju quiꞌalactuꞌuntiꞌan.
Pus lai quintamacꞌacxaniyan ju quiꞌalactuꞌuntiꞌan va ixlacaꞌatalh ni quinichilh ju Cristo ju quilacataꞌan.
10 Para ni va canaju ni jantu alactuꞌununau pus tachi ju va nonau ni taꞌaklhtamat najun ju Dios chai lana jantu lacaꞌiniyau ju ixchivinti.