Alin ju aꞌokxchokꞌoni amamakaꞌunin
2
Para ju makꞌanchich ixtaꞌalin vachuꞌ ju sia yuꞌunch ju quintꞌaꞌisraelitanin ju va ixtatalacasui tachi ju yuꞌunch ju ixtanajun ixchivinti Dios mas jantu.
Pus vana va chun ju lamilhiꞌuxijnan.
Caꞌalinaꞌ ju aꞌokxchokꞌoni amamakaꞌunin.
Ju yuꞌunch va catanonaꞌ tuꞌuꞌ tachi ju va stavasalanti para va aꞌokxchokꞌonti chivinti junita.
Ju yuꞌunch jantu vas tachivinin acsni tanajun ixlacata ixꞌucxtinꞌan Jesús ju amakꞌalhtaxtunulh.
Pus ju chunch isꞌakstuꞌan tapuxcolakxtui ju ixmakꞌalhkꞌajnatꞌan ju vatsꞌalhti cachinaꞌ.
2 Chai na pumalhu vachuꞌ va lhilakachapui catatsucuyaꞌ tachi ju talai ju aꞌokxchokꞌoni amamakaꞌunin.
Chai yuchi macxcai chivinti calhichivincanaꞌ ju ixti Dios mas stavasalanti ju yuchi.
3 Chai ni na talhacchaꞌaniyan pus cataꞌaꞌokxchokꞌomaxtuniyan ju mintuminꞌan laꞌixchivintiꞌan.
Pus ni akꞌasmatnitꞌit tachi ju va stavasalanti alhiulatꞌit.
Para makꞌanchich ixꞌamucꞌanicanta ixtalakꞌalhinꞌan chai aktsꞌiya caꞌalinaꞌ ju ixmakꞌalhkꞌajnatꞌan ju jonkꞌalhita.
4 Pus ju Dios jantu amacꞌacxanilh ju anquilhnin ju na taꞌalactuꞌunulh.
Para amacaꞌancalh ju lacajipi.
Alacchꞌimacaꞌalh lacaꞌatatsꞌisni.
Anchach alacmakꞌacanta tus acsni camakꞌosaspitcanach.
5 Chai jantu amacꞌacxanilh ju makꞌaniya lapanacni.
Va yuchi ju makꞌalhtaxtulh ju Noé ju ajuni ju lapanacni ixlacata ju soknicꞌa atsucunti.
Vachuꞌ amakꞌalhtaxtulh ju aliꞌin ixpumatujunꞌan lapanacni.
Tatakꞌalhtaxtulh acsni milh ju akmuxtut ju ixlhilacaputsꞌun ju lacamunutpaꞌ.
Tatsꞌankꞌakꞌo ju jantu ixtatalhoni ju Dios.
6 Vachuꞌ ju Dios amucꞌanilh ixtalakꞌalhinꞌan ju amachakꞌan lakꞌachakꞌan Sodoma chai Gomorra acsni amaclalh.
Va lhcꞌacꞌa va ju anuch lakꞌachakꞌanixni.
Chunch ju navilh ju Dios ni va capuꞌamalacpastacniyaꞌ ju catatsucuyaꞌ astan ju jantuch catatalhoniyaꞌ ju Dios.
7 Para ju Dios amakꞌalhtaxtulh pumatam lapanac ju Lot ixjuncan.
Ju yuchi ixchaꞌanta ju lakꞌachakꞌan Sodoma chai na soknicꞌa ixjunita ju isꞌatsucunti ju yuchi laꞌixmacni Dios.
Ju yuchi na jeks ixtamavatach va ixlacaꞌatalh ju macxcai alactuꞌunti ju ixtanavi ju yuꞌunch ju jantu tuꞌuꞌ ixtalhiulai ju lhamapꞌaksin.
8 Pus ju anuꞌ lapanac ju Lot ixjuncan ni na va soknicꞌa ixjunita ju isꞌatsucunti laꞌixmacni Dios chai ni anch ju ixtꞌajun ju lakꞌachakꞌan Sodoma pus va tachi ixꞌamakꞌaninin.
Va ixlhiꞌamakꞌaninin ju tuchi islaktsꞌin chai tuchi iskꞌasmatꞌa ju ixtanavi ju amachakꞌan anch ni lana jantu tuꞌuꞌ ixtalhiulai ju ixlhamapꞌaksin Dios.
9 Pus ju Dios ni amakꞌalhtaxtulh ju Noé chai ju Lot pus tasui ni cꞌatsai ju Dios ta yu laich capumakꞌalhtaxtuyaꞌ ju tatalhoni ju yuchi acsni amapastꞌacꞌanican ju tuꞌuꞌ alactuꞌunti.
Ju Dios vachuꞌ cꞌatsai ta yu lai capumakꞌayaꞌ ju alactuꞌunin tus acsni cachinaꞌ ju avilhchan acsni camakꞌosaspitcanach ju lapanacni.
Chai mas tucaꞌ chin ju anuꞌ avilhchan amamakꞌalhkꞌajni.
10 Para palai catamakꞌalhkꞌajnanaꞌ ju yuꞌunch ju va tanavini ju macxcai ixkꞌachat ixlacatunaꞌan.
Va lhitsꞌisita tanavi.
Jantuch tuꞌuꞌ talhiulai ju lhamapꞌaksin.
Jantu xamatiꞌ tatalhoni.
Jantu lai talacaꞌi.
Jantu tatalhoni ixlhichivininca ju amacxcai ju tavilanancha ju lactꞌiyan.
11 Para ju anquilhnin jantu macxcai talhiꞌachivimakꞌan ju chunch talai.
Jantu tajuni ju quiꞌucxtinꞌan Dios.
Jantu chun talai ju anquilhnin mas palai tachapunin ju yuꞌunch chai palai xalackꞌajin.
Palai jantu ju va lapanacni.
12 Ju tuꞌuꞌ atapacxat yuchi lhiꞌalin ni laich cachꞌapacalh chai laich camaknicalh.
Chai talakꞌan ju tuꞌuꞌ skꞌapa ju aꞌulanican.
Pus vana va chun ju anuch lapanacni.
Chunch ju tatsucui tachi ju tuꞌuꞌ tonto atapacxat.
Isꞌakstuꞌan tapuxcolakxtui ixmakꞌalhkꞌajnatꞌan junta jonkꞌalhita ni na macxcai talhichivinin ju tavilanancha ju lactꞌiyan mas jantu tamachakxai ta talhijunitach.
13 Cataꞌamaklhtayananaꞌ ju ixtalhajaꞌan ixꞌalactuꞌuntiꞌan.
Ju yuꞌunch na kꞌoxich talhiulai acsni va lhilakachapuꞌ talai mas tuncuj.
Ju yuꞌunch chunch tajunita tachi ju tuꞌuꞌ lhquiliqui.
Tachi ju tuꞌuꞌ ju na takꞌalhitach.
Ju yuꞌunch va tachi taꞌalactuꞌunun chai na kꞌox talhiulai acsni taꞌokxchokꞌoyan ju uxijnan acsni va kꞌaixtam tatꞌavenan tachi ju va vasalh miꞌalakꞌavinꞌan tajunita.
14 Ju yuꞌunch acsni talaktsꞌin tam atsiꞌ va ixꞌalactuꞌuntiꞌan tapastꞌacꞌa.
Va tachi taꞌalactuꞌunun laꞌixlakchulhꞌan.
Va taꞌokxchokꞌoi ju apumatam ju jantu lai kꞌaichokocan isꞌakstu.
Na talanitach ixlhacchaꞌantiꞌan.
Pus ju yuꞌunch aktsꞌiya camamakꞌalhkꞌajnikꞌalhicanaꞌ.
15 Ju yuꞌunch tamacajuntach ju ti ju soknicꞌa.
Tatsꞌankꞌatach.
Chunch ju talai tachi ju lalh ju makꞌaniya lapanac ju Balaam ixjuncan.
Istsꞌalh ju Beor.
Ju yuchi kꞌox ixlhiulata ju tumin ju ixlhajalh ni laich cava ixnavilh ju macxai.
16 Para ju yuchi kꞌajicalh ixlacata ixꞌalactuꞌunti.
Pus ju puru ju ixpuꞌanta xakꞌala.
Chivinilh tachi ju tam lapanac.
Manunilh ixtalhanti laꞌixꞌalhunut ju anuꞌ lapanac ju ixnajun ixchivinti Dios ni jantu catailhiꞌalh ju ixlhilakachapuꞌ.
17 Pus ju anuch alactuꞌunin lapanacni chunch tajunita tachi ju tuꞌuꞌ pos ju lhilaksican ni laich caꞌicalh ju xcan.
Para va puxixta.
Pus vana va chun ju yuꞌunch.
Jantu lai alhilaksican ni tuꞌuꞌ kꞌox chivinti aquijunilh.
Chai chunch tajunita tachi ju tuꞌuꞌ ataputsꞌi ju vaklhun alacmatsꞌalatꞌoncan lacaꞌun.
Jantu tavanan lhimin ju xcan.
Pus ju yuꞌunch vachuꞌ va taꞌaꞌokxchokꞌonun.
Para makꞌacanta ixlacataꞌan junta jonkꞌalhitach atatsꞌisni.
18 Slivasalh na cꞌus tachivinin ju yuꞌunch mas jantu tuꞌuꞌ nomputun ju ixchivintiꞌan.
Tapuꞌokxchokꞌoi ju ixtꞌalapanacniꞌan ju va ancaꞌ tamacaulh ju aliꞌin ixtꞌalapanacniꞌan ju pꞌulhnan na ixtatꞌaꞌalactuꞌunun.
Tanajun ni laich navican ju macxcai ixkꞌachat ju quilacatunaꞌan.
19 Ju yuꞌunch taꞌajuni ju lapanacni ni laich catanavi va tuchi tanaviputun.
Para isꞌakstuꞌan jantu lai chunch tanavipalai.
Jantu lai tanavi ju kꞌox.
Va yuchi ju alactuꞌunti ju tanavi ni va yuchi ju alin laꞌixꞌalhunutꞌan.
Pus ju tuchi alin laquiꞌalhunutꞌan yuchi ju va tsa tsa naviputunau laquiꞌatsucuntiꞌan.
20 Ni xamatiꞌ camacaulh ju alactuꞌunti ju alin ju lacamunutpaꞌ va ixlacaꞌatalh ni mispaich ju quiꞌucxtinꞌan chai quiꞌamakꞌalhtaxtunuꞌan Jesucristo para ni aktam catanuchokopa lacaꞌalactuꞌunti chai calhinonchokopa laꞌisꞌatsucunti ju macxcai ju alin laꞌixꞌalhunut pus palai takꞌalhi ju isꞌatsucunti.
Palai jantu chun ixjunita acsni tucaꞌ ismispai ju Jesús.
21 Palai kꞌox ixva ni jantu tavanan ismispa ju xati ju kꞌox atsucunti.
Palai macxcai ni mispaich chai astan va macajun ju ixlhamapꞌaksin Dios ju ixtaknicanta.
22 Pus ni va astaniya macajun ju ixlhamapꞌaksin Dios pus vasalh chunch xajcha laꞌisꞌatsucunti tachi ju noncan junta chani najun:
“Ju xkꞌoi laich uchokoi ixpꞌatꞌat.
Chai ju pꞌaxni mas acpaxa catatꞌaspitchokoyaꞌ lacapulhkꞌom”.