IXLHILAKATꞌUI ALHIQUI JU ATSꞌOKNULH JU PITALUꞌ
Ju Pitaluꞌ atsꞌoknuni ju aliꞌin ju vachuꞌ talhilacaꞌanta ju Jesús
1
Ju quitꞌin icSimón Pitaluꞌ.
Ju quitꞌin xalapanac icjunita laꞌixmacni ju Jesucristo.
Chai ixtamalakachan icjunita.
Va iclamacꞌamiyau ju uxijnan ju taꞌaktaijutan ju Dios ni laich vachuꞌ xalhilacꞌapꞌinatꞌit ju Jesús.
Pus ju quijnan chai vachuꞌ ju uxijnan na tuꞌuꞌ lhiulayau ni lai lhilaksiyau ju Dios.
Pus ju quiDiosꞌan chai ju quiꞌamakꞌalhtaxtunuꞌan Jesucristo sok tanavi acsni talacasqꞌuin ni takꞌalhtaxtuyau acsni lhilaksiyau ju Jesús.
2 Pus ictapainini ju Dios ni palai lhu catanavinin lamapainin chai palai cataꞌaktaijuyan ni jantu calacꞌalh ju miꞌalhunutꞌan.
Chai chunch ju catapasayaꞌ lamiꞌatsucuntiꞌan ni palai amispꞌayaꞌitꞌit ju Dios chai ju quiꞌucxtinꞌan Jesucristo.
Chanich junita isꞌatsucuntiꞌan ju talhilacaꞌanta ju Jesucristo
3 Ju Dios na tachapun.
Chai yuchach ju quintaꞌaktaijuyan laquiꞌatsucuntiꞌan ni lai tsucuyau tachi ju kꞌachani ju yuchi mas va tuchi catapasalh.
Chai quintaꞌaktaijuyan va ixlacata ni mispayauch ju Cristo.
Pus acsnich ju xalhilacaꞌanau ju yuchi acsni quintamacꞌatsanitan ni yuchach ju xakꞌai tucan chai slivasalh na kꞌox.
4 Chai ni chunch junita ju Cristo pus vachuꞌ quintaxtaknitan ju ixchivinti ju slivasalh na kꞌox chai lhitapalai.
Chai va ixlacaꞌatalh ni lacaꞌiniyau ju ixchivinti ni aquintaꞌaktaijuyan pus laich macaju ju macxcai ju alin ju ani lacamunutpaꞌ va ixlacaꞌatalh ju macxcai quiꞌatalacpastꞌacꞌatꞌan.
Vachuꞌ lai cakꞌachanikꞌoyau tachi chun ju taxtokni ju vachuꞌ kꞌachani ju Cristo.
5 Pus ni chunch aquintaꞌaktaijuyan ju Cristo ni lhilacaꞌanauch ju yuchi pus tasqꞌuini ni ixlhichux quiꞌalhunutꞌan canaviu cuenta ta yu lai soknicꞌa cava ju quiꞌatsucuntiꞌan.
Chai ni soknicꞌa ju quiꞌatsucuntiꞌan pus tasqꞌuini ni cacꞌatsau tamalhch ju kꞌox lhiulai ju Cristo chai tamalhch ju jantu.
6 Chai ni cꞌatsayauch tamalhch ju kꞌox lhiulai ju Cristo chai tamalhch ju jantu kꞌox pus tasqꞌuini ni cakꞌaichokocau quiꞌakstuꞌan.
Chai ni cakꞌaichokocau quiꞌakstuꞌan pus tasqꞌuini ni vachuꞌ catastucniyau ju quimakꞌalhkꞌajnatꞌan chai jantu jeks caꞌuniu.
Chai ni catastucniyau ju quimakꞌalhkꞌajnatꞌan chai jantu jeks caꞌuniyau pus tasqꞌuini ni vachuꞌ stunin canavinikꞌoyau ju ixkꞌachat ju Dios.
7 Chai ni stunin canavinikꞌoyau ju ixkꞌachat ju Dios pus tasqꞌuini ni vachuꞌ camapainiyau ju vachuꞌ talhilacaꞌanta ju Cristo.
Chai ni camapainiyau ju vachuꞌ talhilacaꞌanta ju Cristo pus tasqꞌuini ni vachuꞌ camapainiyau ju aliꞌin lapanacni.
8 Chai ni chunch junita ju quiꞌatsucuntiꞌan chai ni va tachi palai chunch catasuyaꞌ pus aktsꞌiya lhitapalai ju quiꞌatsucuntiꞌan.
Chai ni mispayauch ju Jesús pus ju yuchi aquintaxtakniyan ju ixtachaput ni laich canaviyau ju ixlhichꞌalhcat.
9 Para ju tam lapanac ju jantu chun junita ju isꞌatsucunti pus na tsꞌistacaꞌ ju laꞌixꞌalhunut.
Lana jantuch pastacpalai ta yu ixjunita ju isꞌatsucunti ju makꞌanchich.
Jantu vasalh laꞌixlhichux ixꞌalhunut lhilacaꞌamputun ju Dios.
Va captach ni xacꞌanicanta ju ixꞌalactuꞌunti ju xanavi.
10 Pus ji quiꞌalakꞌavin yuchi alhitꞌalacꞌasutꞌit laꞌixlhichux miꞌalhunutꞌan ni vasalh tasacxtutan ju Dios chai talhcaꞌulatan ni isꞌaskꞌatꞌan aꞌunaꞌitꞌit.
Chai ni tasui lamiꞌatsucuntiꞌan tachi chun ju ani taxtokni pus jantu atꞌitsꞌankꞌatꞌit.
11 Chai ni chunch junita ju miꞌatsucuntiꞌan pus slivasalh lhikꞌach atꞌanuyaꞌitꞌit ju lactꞌiyan junta lhinajun ju quiꞌucxtinꞌan chai quiꞌamakꞌalhtaxtunuꞌan Jesucristo.
Chai ju yuchi jonkꞌalhita ucxtin.
12 Pus yuchi va tachi aclalhimapastꞌacꞌaniyau junima taxtokni.
Chunch aclayaꞌ mas mispꞌayatꞌitch chai ixlhichux miꞌalhunutꞌan lhilacꞌapꞌintꞌatꞌit ju stavasalanti ju masunicꞌantꞌatꞌit.
13 Chai iccꞌatsai ni lhijunch ni aclamalacpucujuchokoch ju lamintacꞌatsanꞌan acsni iclamapastꞌacꞌaniyau ju ani taxtokni.
Chai chunch aclanaviyau ni ictitꞌajuncaꞌ.
14 Pus iccꞌatsai ni jantu makꞌan actitsuculh ni chunch ju quimavasalanilh ju quiꞌucxtinꞌan Jesucristo.
15 Chai vachuꞌ ixlhichux quiꞌalhunut acpuxcoyaꞌ ta yu laich va tachi apꞌastꞌacꞌaꞌitꞌit ju ani taxtokni mas acniyach.
Ju aliꞌin talaktsꞌilh ni vasalh xakꞌai ju Jesús
16 Acsni xaclajunau ni yuchi tucan ju xakꞌai ju quiꞌucxtinꞌan Jesucristo chai ni caminchokoyaꞌ ju yuchi jantu xaclajunau ixchivinti ju tam lapanac ju va isꞌakstu calakꞌoxi ni tachi ju va stavasalanti catasu.
Ju quijnan iccꞌatsayau ni xakꞌai ju Jesucristo ni laquilakchulh quincꞌan ju iclaktsꞌiuch ni chunch junita.
17 Pus iclaktsꞌiuch ni xlapꞌapꞌapꞌa talacasu ju ixlacatuna.
Chai icpumachakxauch ni vasalh chunch junita.
Chai ickꞌasmatvich acsni chivinilh ju Dios.
Tus lactꞌiyan mincha ju ixchivinti chai naulh ni xakꞌai junita ju Jesús acsni chani naulh:
“Yuchach ju ani ju quintsꞌalh ju na icmapaini.
Na kꞌox iclhiulai ju yuchi”.
Chunch naulh ju Dios.
18 Chai ju quijnan ickꞌasmatvich ju anuꞌ chivinti ju mincha lactꞌiyan acsni kꞌaixtam xactꞌavilau ju Jesús ju anuꞌ akstijun junta isacxtuta ju Dios ni anch camavasalayanta ni vasalh xakꞌai ju istsꞌalh.
19 Ju makꞌaniya ixlapanacni Dios na lhu chivinti ixtanajun ixlacata ju tuchi catapasayaꞌ astan.
Chai ju chavai iclaktsꞌiuch ni stavasalanti ju tuchi ixtanajun.
Chai na kꞌoxich tachi ju naviyatꞌit ni na naviyatꞌit cuenta ju ani ixchivintiꞌan.
Ju yuꞌunch quintamalacpucujun junta jantucaꞌ lai ixmachakxayau.
Chai tasqꞌuini ni va tachi anavitꞌit cuenta ju ixchivintiꞌan tus acsni cachinchokoyaꞌ ju Cristo.
20 Para ju tucan tasqꞌuini yuchi ni amachꞌakxatꞌit ju ani.
Matiꞌ tuꞌuꞌ ju ixchivinti Dios ju ixtanajunch makꞌanch ju camavasala ju va isꞌakstu tam lapanac.
21 Jantu lai chunch catilalh ni matiꞌ ixchivinti Dios ju va ixtalakꞌoxinti lapanac cava.
Para ixlapanacni Dios tachivinilh tachi ju ajunilh ju Spiritu Santu.