Amapꞌaksican ju talhilacaꞌanta ju Jesús
5
Ju quitꞌin icmaklhinajun lacatalhavat ju talhilacaꞌanta ju Jesús.
Chai iclaktsꞌilh ju ixmakꞌalhkꞌajnat ju Cristo chai acmaklakꞌayacanaꞌ ju Cristo acsni calaktsꞌinau ni calakꞌayacanaꞌ ju yuchi.
Pus iclamapꞌaksiputunau ju uxijnan ju vachuꞌ lhinonatꞌit lacatalhavat ju talhilacaꞌanta ju Jesús.
2 Kꞌoxich alhistꞌactꞌitch ju lapanacni junta chꞌalhcꞌatnanatꞌit ju uxijnan.
Ju yuꞌunch mas talhilacaꞌanta ju Dios para chunch tajunita tachi ju tuꞌuꞌ borregojni.
Na tamaktasqꞌuini ju ixꞌalhistꞌacꞌaꞌan.
Chai ju uxijnan chunch untꞌatꞌit tachi ju xaꞌalhistacnin.
Pus alhistꞌactꞌit lacakꞌachatch.
Chai ni va nonatꞌitch ni va lacatapꞌastu ju amanavinicꞌantꞌit pus jantu anavitꞌit.
Chai jantiyuꞌ alhiꞌamaklhtꞌayanantꞌit ju ixlhichꞌalhcat Dios ni va apꞌulhaꞌapꞌutꞌuntꞌit.
Va ixlhichux miꞌalhunutꞌan ju anavitꞌit ju ixlhichꞌalhcat.
3 Jantu atꞌalacꞌasutꞌit tachi ju tam xakꞌai ju va kꞌai junita.
Jantu atꞌalacꞌasutꞌit chun laꞌixꞌucxlacapuꞌan ju lapanacni ju taxtaknitan ju Dios ni alhistꞌacꞌaꞌitꞌit.
Alai va atsꞌucꞌutꞌit tachi lakatam lhilaktsꞌintaiti ixlacataꞌan ju yuꞌunch ju alhistꞌacꞌatꞌit.
4 Chai acsni catalacasuchokoyach ju Cristo ju tucan xakꞌai alhistacnaꞌ pus ju uxijnan ju alhistꞌacꞌatꞌit ju lapanacni ju tachi borregojni tajunita pus axtꞌaknicꞌanaꞌitꞌit ju mintalhajaꞌan.
Yuchi ni alakꞌayakꞌalhicꞌanaꞌitꞌit.
5 Vachuꞌ ju uxijnan ji tsꞌalan.
Aqꞌuiclacꞌaꞌitꞌit ju talhinajun lacatalhavat ju talhilacaꞌanta ju Cristo.
Chux ju uxijnan alaqꞌuiclacꞌaꞌitꞌit chai jantu kꞌai alhicꞌatsꞌatꞌit tuꞌuꞌ.
Chunch alatꞌit ni chani ju tsꞌokcanta:
Ju Dios ma na xcaji ju va talhitakꞌayai tuꞌuꞌ.
Para ma aꞌaktaijui lacaꞌamapaininti ju jantu tuꞌuꞌ talhitakꞌayai.
6 Pus jantu tuꞌuꞌ alhitꞌakꞌayatꞌit ni cꞌatsꞌayatꞌit ni na tachapun ju Dios.
Chai ni jantu tuꞌuꞌ alhitꞌakꞌayayaꞌitꞌit pus ju yuchi catalakꞌayayan acsni cachinaꞌ ju avilhchan ju lhcata ju yuchi.
7 Aꞌunitꞌit ju Dios tachi chun ju lhamakꞌanininatꞌit ni aktsꞌiya tuꞌuꞌ talhiulayan.
8 Acꞌatsꞌanantꞌit.
Chai skꞌala atsꞌucꞌutꞌit.
Chunch ju alatꞌit ni yuchi ju lhacaticuru ju mintꞌalaxcaiꞌan junita.
Chai ju yuchi chun lai tachi ju tuꞌuꞌ maktiliꞌ ju tꞌasai ni chavani.
Ju lhacaticuru va puxcolhitꞌajun tichi chavaich ju lai catꞌalalhajalh.
9 Pus asamakꞌantꞌit ju tuchi tamapastꞌacꞌaniyan ju lhacaticuru.
Slivasalh ixlhichux ju miꞌalhunutꞌan alhilacꞌapꞌitꞌit ju Cristo.
Acꞌatsꞌatꞌitch ni vana va chun tatꞌajun makꞌalhkꞌajnin ju aliꞌin milhiꞌalakꞌavinꞌan laꞌixmacni Cristo tachi ju makꞌalhkꞌajnanatꞌit ju uxijnan.
Si chun tamakꞌalhkꞌajnan mas vanta anchach cava.
10 Para Dios ju aꞌaktaijunun lacaꞌamapaininti.
Chai isꞌakstu ju cataxtakniyan ixtachaput ni chunch aꞌuntꞌit tachi ju aktsꞌiya lacasqꞌuin ju yuchi.
Chai yuchi ju cataꞌaktaijuyan ni va tachi alhilacꞌapꞌitꞌit ju yuchi mas va tuchi camilh.
Chai cataxtakniyan ixtachaput ju yuchi.
Chai cataꞌaktaijuyan ni jantu tavanan alhilacꞌapꞌinaꞌitꞌit tuꞌuꞌ atumpa.
Va yuchi ju Cristo.
Chai yuchach ju tasacxtutan ni laich atꞌanuyaꞌitꞌit ju lactꞌiyan junta alin ju stavasalanti atuncunuꞌ junta va jonkꞌalhita.
Chai lai atꞌanuyaꞌitꞌit ju anch va ixlacaꞌatalh ni lhilacꞌapꞌinatꞌit ju Jesucristo.
Anchach ju atꞌanuyaꞌitꞌit astan acsni makꞌalhkꞌajnantꞌit pantsꞌiquis ju ani lacamunutpaꞌ.
11 Yuchach ju Dios ju alin ixtachaput ju jonkꞌalhita.
Chach lakꞌayacalh ju yuchi tus va tavananch.
Chunch vasalh cava.
Ju Pitaluꞌ amacꞌami ixꞌamigojni
12 Yuchi ju Silvano ju catalhiꞌaniyan ju ani ju iclaꞌatsꞌoknuniyau ju uxijnan.
Ju quitꞌin icnajun ni yuchi ju quilakꞌauꞌan ju lai lhilaksican.
Pus va lacatsꞌunin ju iclaꞌatsꞌoknuniyau.
Iclamapꞌaksiyau.
Chai iclajunauch ni stavasalanti ju xaclajunau acsni iclajuniu ni chunch ju quintapuꞌaktaijun ju Dios laꞌixꞌamapaininti.
Pus va tachi alhilacꞌapꞌitꞌit ju yuchi.
13 Pus ju vachuꞌ talhilacaꞌanta ju Cristo ju ani tavilanalh lakꞌachakꞌan Babilonia asacxtuta vachuꞌ ju Dios tachi ju tasacxtutan ju uxijnan.
Ju yuꞌunch chai ju Marcos taꞌamacꞌaminin.
Ju Marcos tachi ju va quintsꞌalh iclaktsꞌin.
14 Alamacꞌamitꞌit ju pumatamin lacaꞌamapaininti.
Ictapainini ju Dios ni cataꞌaktaijuyan ni jantu calacꞌalh ju miꞌalhunutꞌan tachi chun ju uxijnan ju lhilacꞌapꞌinatꞌit ju Jesucristo.
Chunchach vasalh cava.