Ju Dios quintaxtaknitan kꞌox quintacꞌatsanꞌan
4
Ju Cristo makꞌalhkꞌajnalh ju quilacataꞌan acsni quitsuouchilh ju ani lacamunutpaꞌ.
Pus vana alhilakꞌaꞌitꞌit ju uxijnan acsni tamamakꞌalhkꞌajniyan ju lapanacni mas navitꞌatꞌit ju kꞌox.
Pus ju chunch mamakꞌalhkꞌajnican tasui ni vasalhch macajunta ju macxcai.
2 Chai ju yuchi mas tꞌajuncaꞌ ju ani lacamunutpaꞌ para jantuch vana yuꞌ ju navi ju macxcai ixꞌatalacpastꞌacꞌat.
Alai yuchi ju canaviyaꞌ ju kꞌachani ju Dios.
3 Pus acsni tucaꞌ ixlhilacꞌapꞌinatꞌit ju Cristo pus ixnaviyatꞌit va tuchi ixtalakxtuch tachi ju talai ju jantucaꞌ talhilacaꞌanta ju yuchi.
Pus ixnaviyatꞌit tachi chun ju alactuꞌunti ju ispꞌastꞌacꞌatꞌit.
Chai ixnaviyatꞌit ju macxcai ixkꞌachat ju milacatunaꞌan.
Chai ixtꞌakꞌapꞌayatꞌit.
Chai ixpꞌinatꞌit junta lai cꞌatan junta va kꞌaya ixlayatꞌit.
Chai va tachi ixꞌalactꞌatꞌakꞌapꞌatꞌonatꞌit ju aliꞌin.
Chai ixlakꞌayayatꞌit ju misantoꞌan tachi ju jantu lhijun laꞌixlhamapꞌaksin Dios.
Para kꞌoxich ju chavai.
Jantu lhijun ni vana va chunch ju alatꞌit.
4 Pus ju chavai ju yuꞌunch ju jantucaꞌ talhilacaꞌanta ju Cristo na va talhamakꞌaninin ni jantu vanach alactꞌanaviyatꞌit ju alactuꞌunti tachi ju ixtꞌanaviyatꞌit pꞌulhnan.
Chai na macxcai chivinti ju talhichivinan.
5 Para ju yuꞌunch catajunach ju Jesucristo tajuch ni va chunch ju xataꞌulhtuyan.
Chai ju yuchi lakasivi ni caꞌamucꞌanikꞌalhiyaꞌ ixꞌalactuꞌuntiꞌan ju lapanacni ju tatꞌajuncaꞌ chai ju tanitach.
6 Yuchi alhijunicalh ixlacata ju Cristo ju lapanacni ju tanitach ju chavai ni laich catatsucuyanta ju ixtacuvinꞌan ju lactꞌiyan.
Chai mas caniyaꞌ ju ixlacatunaꞌan tachi ju nican ju ani lacamunutpaꞌ para catatsucukꞌalhiyanta lactꞌiyan tachi ju Dios ni jonkꞌalhita.
7 Vaninch minta ju ixꞌaclanti ju lacamunutpaꞌ.
Pus ixlhiyuchi chunch ju atsꞌucꞌutꞌitch ta yu apꞌutꞌalacꞌasutꞌit ni acꞌatsꞌanantꞌatꞌit.
Akꞌaichꞌokꞌocꞌantꞌit miꞌakstuꞌan.
Chai atꞌachꞌivinintꞌit ju Dios.
8 Chai ju tucan tasqꞌuini yuchi ni alamapꞌainitꞌit ixlhichux miꞌalhunutꞌan.
Ju vasalh amapaininin na lhu macꞌacxai ixtalakꞌalhin ju akꞌantam.
9 Alamalakꞌavitꞌit ju milhiꞌalakꞌavinꞌan laꞌixmacni Cristo ju tachin laminchakaꞌan.
Chai jantu lacatalhkꞌamti ju anavitꞌit ju chunch.
10 Ju Dios taxtaknitan pumatamin ju uxijnan lakatamin lhakꞌailaktsꞌin.
Pus apꞌuꞌaktꞌaiꞌutꞌit ju aliꞌin tachi ju lhijunch ni canavilh tam lapanac ju lai lhistꞌacꞌa ju lhakꞌailaktsꞌin ju xtaknita ju Dios ni jantu va camakꞌatsꞌankꞌa.
Chai ju Dios tijtam tijtam ju xtꞌakꞌa ju lhakꞌailaktsꞌin.
11 Tachi ju tam lapanac ju xtaknican ju lhakꞌailaktsꞌin ni lai amalaninin ixchivinti Dios.
Pus ni xtaknicanta ju chunch lhakꞌailaktsꞌin chach naulh tachi ju va junch Dios ju chivinin.
U ni xamatiꞌ xtaknicanta ju lhakꞌailaktsꞌin ni lai aꞌaktaijunun chach cꞌatsa ni Dios ju xaxtakni ju ixtachaput ni laich caꞌaꞌaktaijunulh.
Ju chunch mas va tuchi ju canaviyau ju quijnanꞌan ju lhilacaꞌanauch ju Jesús capulakꞌayacanaꞌ ju Dios.
Ju yuchi alin ixtachaput ju va jonkꞌalhita chai aktsꞌiya tasqꞌuini ni calakꞌayacalh ju yuchi tus va tavananch.
Chanich ju anaviyaꞌitꞌit acsni amamakꞌalhkꞌajnicꞌanaꞌitꞌit
12 Ji quiꞌalakꞌavin jantu alhamakꞌaninintꞌit acsni makꞌalhkꞌajnanatꞌit laca tuꞌuꞌ tsꞌinqꞌui makꞌalhkꞌajnat.
Jantu anaꞌuntꞌit ni jantu chun tapasacan laquiꞌatsucuntiꞌan ju chꞌakꞌokꞌayau ju Jesús.
13 Alai va alhikꞌachꞌantꞌit acsni mamakꞌalhkꞌajnicꞌanatꞌit.
Acꞌatsꞌatꞌit ni vana va chun tamamakꞌalhkꞌajnilh ju Cristo.
Chai ni mamakꞌalhkꞌajnicꞌanatꞌit ju chavai pus vachuꞌ slivasalh akꞌachꞌanaꞌitꞌit acsni tavanan catasuyach ni yuchach ju Cristo ju tucan xakꞌai.
14 Ni macxcai lhichꞌivincꞌanatꞌit va ixlacata ni lhilacꞌapꞌinatꞌit ju Cristo va alhikꞌachꞌantꞌitch.
Yuchi lai alhikꞌachꞌantꞌit ni tꞌajun lamiꞌalhunutꞌan ju iSpiritu Santu ju Dios.
Yuchach ju minchalh ju lactꞌiyan.
Chai yuchach ju taxtakniyan ju mintachaputꞌan ni lai alhikꞌachꞌanaꞌitꞌit.
Pus ju aliꞌin lapanacni macxcai chivinti talhichivinin ju Dios para ju uxijnan lakꞌayayatꞌit.
15 Para tun xamatiꞌ ju milhiꞌuxijnan amamakꞌalhkꞌajnicꞌantꞌit va ixlacata ju amakninti u ixlacata ju akꞌalhaꞌunti nin ixlhiyuchi ni va navitꞌach ju tuꞌuꞌ ju jantu kꞌox u nin ixlhiyuchi ni va kꞌaya atꞌanutꞌich junta jantu mincuenta.
16 Para acsni xamatiꞌ camamakꞌalhkꞌajnicanaꞌ ju va ixlacata ni maklacaꞌanitach ju Cristo pus jantu camaxanalh.
Alai va caxtaknilh lakꞌailaktsꞌiuch ju Dios ni laich makꞌalhkꞌajnan va ixlacata ni lhilacaꞌanta ju Cristo.
17 Ju chavai chilh ju avilhchan acsni cataiꞌulayaꞌ ju ixlaktsꞌintanuca ju isꞌaskꞌatꞌan Dios.
Chai ni pꞌulhnan calaktsꞌintanucanau ju quijnanꞌan ju lhilacaꞌanauch ju Cristo pus painiꞌitnich ju yuꞌunch ju jantu talacaꞌita ju ixchivinti Dios ixlacata ju Cristo.
18 Pus ju quijnanꞌan ju soknicꞌa junita ju quiꞌatsucuntiꞌan mas makꞌalhkꞌajnanau ju ani para aktsꞌiya catakꞌalhtaxtukꞌalhiyau.
Pus ni chunch tapasai laquiꞌatsucuntiꞌan ju quijnanꞌan pus tas va catijunach ju isꞌatsucuntiꞌan ju jantu talhilacaꞌanta ju Cristo chai ju va taꞌalactuꞌununch.
19 Pus ju na tamakꞌalhkꞌajnan va ixlacaꞌatalh ni chunch ju lhilhcata ju Dios ju ixlacataꞌan pus chach va tachi tanavilh ju kꞌox chai chach tamakꞌaxtaknikꞌo isꞌatsucuntiꞌan ju Dios.
Chach talhilaksilh ju Dios ni yuchi ju axtaknilh ju isꞌatsucuntiꞌan chai ju yuchi aktsꞌiya muctaxtui ju ixchivinti.