Ju alin ixlakꞌauꞌan tasqꞌuini ni chani catatsuculh
3
Vachuꞌ chun ju uxijnan ji chakolun ju icꞌantꞌatꞌit.
Aqꞌuiclacꞌaꞌitꞌit ju mimpapaꞌan.
Pus ju chunch mas tucaꞌ talacaꞌita ju ixchivinti Dios ju mimpapaꞌan para catalhilacaꞌanaꞌ ju Cristo acsni catalaktsꞌinaꞌ ju kꞌox miꞌatsucuntiꞌan mas jantu tuꞌuꞌ aꞌunitꞌit.
2 Ju yuꞌunch catalhilacaꞌanaꞌ ju Cristo acsni catalaktsꞌinaꞌ ni salaka ju miꞌatsucuntiꞌan chai ni tꞌalhoniyatꞌit ju Dios.
3 Jantu va yuchi ju anavitꞌit cuenta ju milacatunaꞌan.
Ju tam xamatiꞌ jantu acsnich ju na cꞌus tasui acsni maxantilai ju ixꞌai u lhu calacatocꞌalh ju tuꞌuꞌ oro u na kꞌox camalakchꞌini.
4 Alai yuchi ju na cꞌus putalacasui ju tam lapanac acsni na kꞌox ju minacha laꞌixpulacni ixꞌalhunut.
Yuchi ni va seknicꞌa lapanac cava.
Yuchi ju ani ju ixmaxantilaca ju quiꞌatsucuntiꞌan chai ju yuchi jantu lai takꞌalhi.
Chai yuchi ju slivasalh kꞌox lhiulai ju Dios.
5 Ju makꞌanch chunchach ju ixtalhimaxantilai isꞌatsucuntiꞌan ju chakolun ju ixtalhilacaꞌanta ju Dios.
Ju yuꞌunch ixtalhilaksi ju Dios chai ixtaquiclacaꞌi ju ixpapaꞌan.
6 Tachi ju Sara.
Ju yuchi ixꞌamachakaꞌ ixjunita ju makꞌaniya ixlapanac Dios ju Abraham ixjuncan.
Ju yuchi quiclacaꞌilh ju ixpapa chai lhixakꞌalalh ucxtin.
Pus ju chavai tachi ju va isꞌatsiꞌin untꞌatꞌit ni vachuꞌ anaviyaꞌitꞌit ju kꞌox chai jantu tuꞌuꞌ atꞌalhoniyaꞌitꞌit.
7 Vachuꞌ ju uxijnan xapapaninch ju alin ju miꞌamachakaꞌan.
Kꞌox atꞌatsꞌucꞌutꞌit ju miꞌamachakaꞌan chai alakꞌayatꞌitch.
Acꞌatsꞌatꞌitch ni na tachapun untꞌatꞌit ju uxijnan para ju tam chakoꞌulh jantu na chun tachapun ju ixlacatuna.
Chunchach ju alatꞌit ni mintꞌiyunꞌan ju amaklhtꞌayanantꞌatꞌit ju lamapainin ju tanavinitan ju Dios acsni taxtaknitan ju miꞌatsucuntiꞌan ju conkꞌalhiyanta ju lactꞌiyan.
Pus ni chunch ju atꞌatsꞌucꞌutꞌit ju miꞌamachakaꞌan pus jantu xtuꞌuꞌ catasastucniyan acsni atꞌachꞌivinaꞌitꞌit ju Dios.
Aktamixnin mamakꞌalhkꞌajnican mas navican ju kꞌox
8 Pus vachuch iclajumputunau ju ani.
Va lakatamch anavitꞌit ju miꞌalhunutꞌan.
Chach taxcaniyan vachuꞌ ju miꞌalhunutꞌan acsni apumatam tꞌajun makꞌalhkꞌajnaꞌ.
Alamapꞌainitꞌit tachi ju lhiꞌalakꞌavinch.
Chach na tꞌayeka va ju miꞌalhunutꞌan.
Jantu alhitꞌakꞌayatꞌit ju tuꞌuꞌ.
9 Jantu alamapꞌuspꞌitnitꞌit ju macxcai acsni tuꞌuꞌ macxcai ju anavicꞌanaꞌitꞌit.
Nin yuchi ni lai aꞌunitꞌit macxcai chivinti ju tajunan macxcai chivinti.
Alai va asqꞌuinitꞌit ju Dios ni caꞌaxtakniyaꞌ kꞌox isꞌatsucuntiꞌan.
Asqꞌuintꞌit ju kꞌox ixlacataꞌan ni cꞌatsꞌayatꞌit ni Dios tasacxtutan ni vachuꞌ axtꞌaknicꞌanaꞌitꞌit ju kꞌox miꞌatsucuntiꞌan.
10 Pus chani najun laꞌixchivinti Dios ju tsꞌokcanta:
Ma va tichi chavaich ju lacasqꞌuin ni lhikꞌach chai kꞌox cava ju isꞌatsucunti
pus ma calhistaclh ju isimakꞌat.
Ma jantu canaulh ju macxcai nin taꞌaklhtamat chivinti.
11 Ma jantu canavi tuꞌuꞌ macxcai.
Ma va yuchi ju canavi ju kꞌox.
Ma capuxcaulh ixlhichux ixꞌalhunut ta yu laich kꞌox catꞌaꞌucxuntsuculh ju aliꞌin.
12 Ma chunchach ju calalh ni cꞌatsai ni quiꞌucxtinꞌan
Dios alhistactꞌajun ju soknicꞌa ixꞌalhunutꞌan laꞌixmacni yuchi.
Chai akꞌasmatni ju yuꞌunch ni tuꞌuꞌ tasqꞌuini.
Para ju quiꞌucxtinꞌan Dios ma va kꞌotꞌitꞌi alaktsꞌin tachi chun ju tanavi ju amacxcai.
Chunch ju najun laꞌixchivinti Dios.
13 Pus na lacatsꞌunin ju lai catanavinin ju amacxcai ni slivasalh anavitꞌit ju kꞌox ju laꞌixlhichux ju miꞌalhunutꞌan.
14 Para mas tuꞌuch alhimakꞌalhkꞌajnantꞌit acsni anaviyaꞌitꞌit ju kꞌox pus lana na akꞌachꞌanaꞌitꞌit.
Jantu atꞌalhonitꞌit acsni va catamakꞌesvaputunan.
Nin calacꞌalh ju miꞌalhunutꞌan.
15 Alai alakꞌayatꞌit ju quiꞌucxtinꞌan Cristo chai alacꞌaꞌinitꞌit ju yuchi.
Chai va tachi anavitꞌit cuenta ta yu laich alhikꞌalhtꞌayaꞌitꞌit ni xamatiꞌ catasacmiyan tajuch ni va lacꞌaꞌiyatꞌit ni catamakꞌalhtaxtuyan ju Dios.
Para va kꞌoxich akꞌalhtꞌayanantꞌit.
Jantu alhitꞌakꞌayatꞌit ju tuchꞌi mispꞌayatꞌit.
Atꞌalhonitꞌit ju Dios.
16 Jantu tuꞌuꞌ anavitꞌit ju va catalhixcanichokon ju miꞌalhunutꞌan.
Ju chunch mas catalhichivininan tachi ju va alactuꞌunin untꞌatꞌit para catamaxananach astan ni laich va kꞌaya xatalhichivinanch ju kꞌox miꞌatsucuntiꞌan ju uxijnan ju lhilacꞌapꞌinatꞌit ju Cristo.
17 Ni va calacasqꞌuilh ju Dios ni amamakꞌalhkꞌajnicꞌanaꞌitꞌit pus palai kꞌox ni amamakꞌalhkꞌajnicꞌanaꞌitꞌit mas navitꞌatꞌit ju kꞌox.
Palai jantu ni amamakꞌalhkꞌajnicꞌanaꞌitꞌit acsni navitꞌatꞌit ju amacxcai.
18 Pus vachuꞌ ju Cristo makꞌalhkꞌajnalh.
Ju yuchi va paktam nilh ixlacata ju quiꞌalactuꞌuntiꞌan.
Yuchi ju soknicꞌa isꞌatsucunti makꞌalhkꞌajnalh ju quilacataꞌan ju jantu soknicꞌa junita ju quiꞌatsucuntiꞌan.
Chunch ju lalh ni lai isꞌaskꞌatꞌan Dios cajumvi.
Pus ju Cristo nilh laꞌixlacatuna para acsni lokꞌonchokolh amaklhtayananchokolh ju isꞌatsucunti tachi ju aktsꞌiya ixjunita ju lactꞌiyan.
19 Para acsni tucaꞌ ixꞌamaklhtayananchokota ju isꞌatsucunti tachi ju aktsꞌiya ixjunitach ju lactꞌiyan pus ju Cristo quilalh junta ixꞌatꞌalhnucanta ju aliꞌin tacuvin.
Aquijunilh ixchivinti Dios.
20 Ixtacuvinꞌan ixtajunita ju makꞌaniya lapanacni ju ixtatꞌajun acsni ixtꞌajun naviniꞌ ju ixbarco ju Noé.
Ju yuꞌunch jantu ixtaquiclacaꞌita ju Dios mas ixꞌapacxantaji ni catalhilacaꞌalh chai jantu jeks ixꞌaꞌuni.
Pus ju acsnich na lacatsꞌunin ju tatakꞌalhtaxtulh acsni akmuxtucalh.
Va pumatsajin lapanacni.
21 Chai tachi ju yuꞌunch ni tatakꞌalhtaxtulh ju lacxcan pus vana va chun ju nomputun acsni akpaxtauch.
Acsni akpaxtauch putasui ni Dios ju quintamakꞌalhtaxtutanch va ixlacaꞌatalh ni taꞌacxtuchokolh ju Jesucristo junta ixmacnucanta.
Acsni akpaxtauch jantu va yuꞌ ni va cachꞌakꞌacalh ju quilacatunaꞌan ju laca tuꞌuꞌ xcan.
Para va nomputun ni lacasqꞌuinauch ni kꞌox cava ju quiꞌalhunutꞌan ju laꞌixmacni Dios.
22 Pus ju Jesucristo acsni taꞌacxtuchokolh junta ixmacnucanta tanulh ju lactꞌiyan chai ju chavai vanin tꞌavilhcha ju Dios.
Chai ju anquilhnin chai ju xaꞌucxtinin anch chai ju xalackꞌajinch anch taquiclacaꞌi ju yuchi.