2
Chai ni taxtaknitan ju sastꞌi miꞌatsucuntiꞌan ju Dios pus jantuch alanavinitꞌit tuꞌuꞌ macxcai.
Jantu alaꞌokxchꞌokꞌotꞌit.
Jantuch va tam tam amalacꞌasutꞌit.
Jantu alhacchꞌipꞌitꞌit tuꞌuꞌ.
Chai jantuch vana alhichꞌivinintꞌit ju akꞌantam.
2 Aꞌuntꞌit tachi ju tam askꞌatꞌa ju va ancaꞌ lakꞌajunta.
Ju yuchi va tsa tsꞌiquiputun.
Pus vana va chun alatꞌit ju uxijnan.
Va tsa tsa alaktsꞌintꞌit ju ixchivinti Dios.
Ju yuchi jantu va aꞌokxchokꞌonti.
Chai yuchach ju cataꞌaktaijuyan ni lai palai alhilacꞌapꞌinaꞌitꞌit ju Cristo.
Chai vachuꞌ palai lai atsꞌucꞌuyaꞌitꞌit tachi ju kꞌachani ju Dios.
3 Pus chunch aꞌunaꞌitꞌit va ixlacaꞌatalh ni cꞌatsꞌayatꞌit ni na kꞌox ju miꞌucxtinꞌan Dios.
Ju Cristo chunch junita tachi ju tuꞌuꞌ chiux
4 Ju uxijnan lhilacꞌapꞌitꞌit ju Jesús.
Chai ju yuchi chunch junita tachi ju tuꞌuꞌ chiux ju lhiyocan chakaꞌ ju istasacmackꞌanta ju ixyonin chakaꞌ.
Pus vana va chunch taꞌulhtulh ju Cristo.
Ju lapanacni vachuꞌ jantu tuꞌuꞌ talhiula ju yuchi.
Para ju Dios sacxtulh chai slivasalh na tapalai ju yuchi.
5 Chai ju uxijnan vachuꞌ chunch untꞌatꞌit tachi ju tuꞌuꞌ chiux ju sacxtucan acsni yocan ju tuꞌuꞌ chakaꞌ.
Pus ju Dios tasacxtutan.
Chai tachi ju va ixchakaꞌ tanaviyan ni yuchi ju Spiritu Santu ju tꞌajun lamiꞌalhunutꞌan.
Chai vachuꞌ ixpalijni Dios untꞌatꞌit chai naviyatꞌit ixlhichꞌalhcat.
Chai ni ixpalijni untꞌatꞌit pus laich lakꞌayayatꞌit tachi ju kꞌoxich lhiulai ju yuchi va ixlacaꞌatalh ni lhilacꞌapꞌinatꞌit ju Jesucristo.
6 Vachuꞌ chani ixnajunta ju Dios laꞌixchivinti ju tsꞌokcanta:
Ju yuchi najun ni ma ulai ju lakꞌachakꞌan Sion pumatam lapanac.
Chai ju yuchi ma chunch junita tachi ju tuꞌuꞌ lhtakꞌalh chiux ju makꞌastumucꞌacanta chakaꞌ junta tsꞌokcanta tuchi cꞌata ju yocanta.
Chai yuchi ma sacxtulh ju Dios chai ma na laklhu ixtapalhni.
Pus ju calhilacaꞌanach ju yuchi ma jantu lai astan catinaulh ni jantu kꞌox tachi ju xalai.
Chunch ma najun ju Dios.
7 Pus ju uxijnan ju lhilacꞌapꞌinatꞌit ju Jesús slivasalh ni na tuꞌuꞌ lhiulayatꞌit.
Para ju jantucaꞌ talhilacaꞌan pus uctaxtui laꞌisꞌatsucuntiꞌan tachi ju tsꞌokcanta laꞌixchivinti Dios junta ma chani najun:
Ju anuꞌ chiux ju tasacmackꞌalh ju ixyonin chakaꞌ
astan valhch ju chiux ju makꞌastumucꞌacanta chakaꞌ junta tsꞌokcanta tuchi cꞌatach ju yocanta.
Chunch najun laꞌixchivinti Dios.
Chai ju chunch va nomputun ni vana va chun taꞌulhtui ju Cristo ju yuꞌunch ju jantu talhilacaꞌamputun.
Va talakmackꞌan.
8 Chai ju Dios vachuꞌ najun ni vachuꞌ valh ju Cristo tachi ju tuꞌuꞌ chiux ju pukꞌalhkꞌoscan chai tachi ju tuꞌuꞌ lhkajani chiux ju lai putaꞌakkꞌajucan.
Pus tachi ju va tapukꞌalhkꞌos ju Jesús ni jantu taquiclacaꞌiputun ju ixchivinti Dios.
Chai ju Dios alhcata ni catakꞌalhkꞌosaꞌ ju chunch talai.
Ju aliꞌin lapanacni isꞌaskꞌatꞌan Dios tajunita
9 Para ju uxijnan Dios ju tasacxtutan ni isꞌaskꞌatꞌan aꞌunaꞌitꞌit.
Chai ixpalijni ju kꞌai ucxtin Dios aꞌunaꞌitꞌit.
Chai aꞌunaꞌitꞌit lapanacni ju salaka ixꞌalhunutꞌan chai ixlapanacni Dios aꞌunaꞌitꞌit.
Chunch ju taꞌulhtutan ju Dios ni laich alakꞌayayaꞌitꞌit ju yuchi laꞌixꞌucxlacapuꞌan ju mintꞌalapanacniꞌan acsni aꞌunaꞌitꞌit tachi chun ju kꞌox ju navita ju yuchi.
Alakꞌayayaꞌitꞌit ju Dios ju tamapaxanitanch ju makꞌaniya miꞌatsucuntiꞌan ju na ixkꞌachani ju alactuꞌunti.
Chai taxtaknitan ju sastꞌi miꞌatsucuntiꞌan ju slivasalh na kꞌox.
10 Pus ju makꞌanchich jantu uxijnan ju tasacxtun ju Dios.
Alai aliꞌin ju asacxtucalh.
Para ju chavai ixlapanacni Dios untꞌatꞌit.
Ju makꞌanch jantu ixꞌaktꞌaiꞌucꞌantꞌatꞌit lacaꞌamapaininti.
Para ju chavai ju Dios taꞌaktaijutan laꞌixꞌamapaininti.
Anavinitꞌit ju ixkꞌachat ju Dios
11 Ju uxijnan ji quiꞌalakꞌavin va iclajumputunau ju ani.
Pus ni ixlapanacni Dios untꞌatꞌit pus amachakꞌan lactꞌiyan untꞌatꞌit.
Tachi ju va tꞌonatꞌit tapasatilanin ju ani lacamunutpaꞌ.
Pus ixlhiyuchi iclatapaininiyau ni amacꞌaꞌuntꞌit ju macxcai ixkꞌachat ju milacatunaꞌan.
Ju yuchi va tꞌalasai ju sastꞌi quiꞌatsucuntiꞌan ju quintaxtaknitan ju Dios.
12 Va tachi kꞌox atsꞌucꞌutꞌit laꞌixꞌucxlacapuꞌan ju jantucaꞌ talhilacaꞌanta ju Cristo.
Ju chunch mas catalacnonach ju chavai ni va alactuꞌunin untꞌatꞌit para astanch catalakꞌayayach ju Dios ni catalaktsꞌinach ju kꞌox miꞌatsucuntiꞌan.
Chai vachuꞌ catalakꞌayayach ju Dios acsni caꞌalacxtakniyaꞌ ju kꞌox ixtacꞌatsanꞌan ju Dios chai catalhilacaꞌanach ju Cristo.
13 Chai ni cꞌatsacan ni lhilacꞌapꞌintꞌatꞌit ju Cristo pus aqꞌuiclacꞌaꞌitꞌitch tachi chun ju xalackꞌajin ju ani lacamunutpaꞌ.
Aqꞌuiclacꞌaꞌitꞌit ju xakꞌai tucan ju ani lacamunutpaꞌ.
14 Vachuꞌ aqꞌuiclacꞌaꞌitꞌit ju gobernadornin ju amalakachai ju xakꞌai tucan.
Pus yuchi alhimalakachacanta ni cataꞌulaniyach ixtalakꞌalhinꞌan ju alactuꞌunin chai catalakꞌayayach ju tanavich ju kꞌox.
15 Pus ju Dios lacasqꞌuin ni apꞌukꞌelhchꞌapꞌayaꞌitꞌit ju ixquilhniꞌan ju lapanacni ju va kꞌaya talhichivinan mas jantu tacꞌatsai tuchi tanajun.
Chunch ju lai anaviniyaꞌitꞌit acsni na kꞌox ju atsꞌucꞌuyaꞌitꞌit.
16 Ju chavai jantu tasqꞌuini ni vana canaviu tachi ju najun laꞌixlhamapꞌaksin ju Moisés.
Para jantu anaꞌuntꞌit ni ixlhiyuchi laich anaviyaꞌitꞌit va tuchi alactuꞌunti ju navipꞌutꞌunatꞌit.
Alai atsꞌucꞌutꞌitch tachi ju vasalh xalapanacni untꞌatꞌit laꞌixmacni Dios.
17 Atꞌalhonitꞌit tachi chun ju lapanacni.
Amapꞌainitꞌit ju vachuꞌ talhilacaꞌanta ju Cristo.
Atꞌalhonitꞌit ju Dios.
Atꞌalhonitꞌit ju xakꞌai tucan ju ani lacamunutpaꞌ.
Alaktsꞌintꞌaꞌitꞌit ju Cristo
18 Ju uxijnan ju va xalapanacni untꞌatꞌit aqꞌuiclacꞌaꞌitꞌitch ju miꞌucxtinꞌan chai atꞌalhonitꞌit.
Para jantu va yuꞌunch ju aqꞌuiclacꞌaꞌitꞌit chai atꞌalhonitꞌit ju va lackꞌoxin lapanacni tajunita chai ju na lai taꞌamapaininin.
Para vachuꞌ atꞌalhonitꞌit chai aqꞌuiclacꞌaꞌitꞌit ju na kꞌai tajunita.
19 Pus ju Dios na kꞌoxich lhiulai acsni xamatiꞌ ju lhilacaꞌanta ju Cristo tastucni acsni mamakꞌalhkꞌajnican mas jantu slivasalh ni tuꞌuꞌ canavi.
Pus ju anuꞌ lapanac yuchi lhitastucni ni cꞌatsai ni laktsꞌinch ju Dios.
20 Para acsni lhilakꞌanekmacꞌanatꞌit ju va miꞌalactuꞌuntiꞌan chai tꞌastꞌucniyatꞌit pus tis chavaich ju lai catajunin ni kꞌoxich ju naviyatꞌit.
Para acsni lhimamakꞌalhkꞌajnicꞌanatꞌit ju va ixnavica ju tuꞌuꞌ kꞌox chai tꞌastꞌucniyatꞌit pus ju Dios na kꞌoxich lhiulai ju chunch.
21 Pus yuchi talhisacxtutan ju Dios.
Ju yuchi lacasqꞌuin ni atꞌastꞌucniyaꞌitꞌit acsni amamakꞌalhkꞌajnicꞌanaꞌitꞌit mas navitꞌatꞌit ju kꞌox ni vana va chun makꞌalhkꞌajnalh ju Cristo ju quilacataꞌan.
Ju yuchi quintamaconinch ju lhilaktsꞌintaiti ni laich canaviu tachi ju navilh ju yuchi.
22 Ju yuchi jantu tavanan alactuꞌunulh nin canaulh taꞌaklhtamat chivinti.
23 Ju yuchi acsni ixtajuni macxcai chivinti jantu ixꞌalhimapuspꞌitni tuꞌuꞌ macxcai chivinti.
Acsni ixtamamakꞌalhkꞌajni pus ju yuchi jantu ajuni ni caꞌamamapꞌalhniyach.
Alai va ixmakꞌaxtakni ju ixlhamakꞌan laꞌixmacni Dios ni yuchi ju sok lakꞌoxi ju tuꞌuꞌ lhamakꞌan.
24 Tachi chun ju quiꞌalactuꞌuntiꞌan mucꞌanikꞌocalh ju Cristo acsni xtucnicalh ju ixlacatuna ju lacacurus.
Chunch ju navinicalh ni jantu vana catailhiꞌanau ju quiꞌalactuꞌuntiꞌan para canaviu ju soknicꞌa.
Chai ni macꞌatsanicalh ju Cristo pus yuchi ju xapuꞌalinch ju sastꞌi quiꞌatsucuntiꞌan.
25 Pus ju uxijnan chunch ixꞌuntꞌatꞌit tachi ju tuꞌuꞌ borregojni ju jantu tachꞌakꞌokꞌai ju ixꞌucxtinꞌan.
Ju uxijnan vachuꞌ jantu ixchꞌakꞌokꞌatꞌit ju Cristo.
Para ju chavai ni xalhilacꞌapꞌinatꞌit ju yuchi pus tachi ju va laktꞌanchꞌokꞌotꞌit ju miꞌalhistacnaꞌan.
Chai yuchi ju talhistacniyan ju miꞌalhunutꞌan ni jantu atꞌitsꞌankꞌakꞌalhitꞌit astan.