JU PꞌULHNAN ALHIQUI JU ATSꞌOKNULH JU PITALUꞌ
Ju Pitaluꞌ amacꞌami ju lapanacni ju talhilacaꞌanta ju Jesús
1
Ju quitꞌin icPitaluꞌ.
Ixtamalakachan ju Jesucristo icjunita.
Chai va iclamacꞌamiyau ju uxijnan ju vachuꞌ lhilacꞌapꞌinatꞌit ju Jesús.
Ju uxijnan amachakꞌan makat untꞌatꞌit para makpꞌitsꞌicꞌantꞌatꞌitcaꞌ ju xalacatꞌun Ponto chai ju xalacatꞌun Galacia chai Capadocia chai Asia chai Bitinia.
2 Ju quimpaiꞌan Dios cꞌatsai tuchi catapasayaꞌ mas tucaꞌ tapasai.
Pus yuchi ju makꞌanch tasacxtutan ni ixꞌanuꞌ anavicꞌanaꞌitꞌit laꞌixtachaput ju Spiritu Santu.
Ju chunch lai aqꞌuiclacꞌaꞌiyaꞌitꞌit ju Dios chai laich cataxacaniyan mintalakꞌalhinꞌan ni lhilacꞌapꞌinatꞌit ju Jesucristo ni nilh ju milacataꞌan.
Pus ictapainini ju Dios ni palai catanaviniyan lamapainin chai cataꞌaktaijuyan ni jantu calacꞌalh ju miꞌalhunutꞌan ju uxijnan.
Lai lhilaksiyau ju Dios
3 Chach kꞌox lhichivinincalh ju isDios chai ixpai ju quiꞌucxtinꞌan Jesucristo.
Slivasalh na kꞌai ju ixꞌamapaininti ni lai xaquintaꞌaktaijuyan.
Pus quintaxtaknitan sastꞌi quiꞌatsucuntiꞌan chai ixlhiyuchi lai lhilaksiyau ju Dios ni aktsꞌiya aquintaxtakniyanch chux tuchi quintakꞌalhtasunitan ni aquintaxtakniyan.
Chai cꞌatsayau ni chunch ju aquintaꞌulhtuyan va ixlacaꞌatalh ni taꞌacxtuchokolh ju Jesucristo junta ixmacnucanta.
4 Chai tachi chun ju kꞌox ju pastacta ju Dios ju quilacataꞌan aquintaxtaknitachan ju lactꞌiyan.
Chai ju yuchi conkꞌalhiyanta.
Chai jantu lai lhquiliquin chai na kꞌox conkꞌalhiyaꞌ.
5 Chai ju quijnan ni lhilaksiyau ju Dios pus ju yuchi aquintalhistꞌacꞌan laꞌixtachaput.
Chai aquintalhistackꞌalhiyan tus acsni aquintaxtakniyan ju ixtaꞌaktsanti ju sastꞌi quiꞌatsucuntiꞌan ju lactꞌiyan.
Chai ju anuꞌ sastꞌi quiꞌatsucuntiꞌan lakasivi chai aquintamasuniyan ju Dios acsni cachinaꞌ ixꞌaclanti ju lacamunutpaꞌ.
6 Chai yuchi alhikꞌachꞌantꞌit mas jantu xcai ni tasqꞌuini ni amakꞌaninintꞌit pantsꞌiquis ju chavai.
Amakꞌaninintꞌit ni na tijlhu macxcai ju pꞌulaktsꞌintꞌanucꞌanatꞌit.
7 Va laktsꞌintꞌanucꞌanatꞌit ni caputasuyach ni vasalh lhilacꞌapꞌinatꞌit ju Cristo.
Pus palai lhitapalai ni catasu ni vasalh lhilacꞌapꞌinatꞌit ju Cristo.
Palai jantu ju va tuꞌuꞌ oro ni catasu ni vasalh oro.
Ju yuchi mas jantu tsucukꞌalhi para mapasacan ju lacajipi acsni laktsꞌintanucan.
Ja va a ti quijnanꞌan jantu calaktsꞌintanucanau laca tuꞌuꞌ macxcai.
Chai ni tasui ni stavasalanti lhilacꞌapꞌinatꞌit ju Cristo pus ju Dios catajunan ni na kꞌox ju navitꞌatꞌit chai catalakꞌayayan chai kꞌoxich catalhiulayan acsni tavanan catalacasuchokoyach ju Jesucristo.
8 Chai ju chavai mas jantucaꞌ laktsꞌinatꞌit ju Jesús para mapꞌainiyatꞌit.
Chai ju chavai mas jantucaꞌ laktsꞌinatꞌit para lhilacꞌapꞌinatꞌit chai alin ju minkꞌachatꞌan ju matiꞌ ixtꞌachunch ju ani lacamunutpaꞌ.
Va anch ju lactꞌiyan ju minacha ju chunch.
9 Chai ni lhilacꞌapꞌinatꞌit ju Cristo pus atꞌakꞌalhtꞌaxtꞌuyaꞌitꞌit chai jantu apꞌinaꞌitꞌit ju lacamakꞌalhkꞌajnat ju jonkꞌalhitach.
10 Ju makꞌanch ju Dios amaꞌatsꞌoknunilh ixlapanacni ju ixchivinti.
Ju yuꞌunch ixtachivinin ixlacata ju lamapainin ju quintanavinitan ju Dios.
Para jantu kꞌox ixtamachakxai tuchi ixtanajun.
Pus na talhasacminilh chai ixlhichux ixꞌalhunutꞌan tapuxcaulhch lacaꞌalhiqui ta yu laich takꞌalhtaxtucan lacamakꞌalhkꞌajnat junta jonkꞌalhita.
11 Pus yuchi ju iSpiritu Santu ju Cristo ju alacmaꞌatsꞌokꞌulani lacaꞌalhiqui ju ixlapanacni.
Chai ixꞌajuni ni catanaulh ni Dios camalakachayaꞌ pumatam ju camamakꞌalhkꞌajnicanaꞌ chai astan calakꞌayacanach.
Para ju yuꞌunch jantu tamachakxa ni yuchi ju Jesús ju ixtalhichivinin.
Pus va tapuxcaulh lacaꞌalhiqui ni va ixtacꞌatsaputun tis chavaich ju ixlhichivincan chai tavananch ju catapasayaꞌ ju chunch.
12 Pus ju anuch makꞌaniya lapanacni ju ixtanajun ixchivinti Dios ixꞌamavasalanican ni jantu lana acsni ju catapasayaꞌ ju tuchi ixtanajun.
Para chavai acsni tꞌonau ju quijnanꞌan.
Chai tachi ju yuꞌunch ni laꞌixtachaput ju Spiritu Santu ju tachivinilh pus vana va chun ju yuꞌunch ju tajuntan ju chavai ju chivinti ixlacata ju Cristo.
Vachuꞌ tachivinin laꞌixtachaput ju Spiritu Santu ju malakachacantachilh.
Ju minchalh ju lactꞌiyan.
Chai ni na kꞌai lhamakꞌan ju ani chivinti ixlacata ju Cristo pus mas yuꞌunch ju anquilhnin na tamachakxaputun ixlacata ixmakꞌalhkꞌajnat ju Cristo chai acsni calakꞌayacanaꞌ.
Ju Dios lacasqꞌuin ni salaka cava ju quiꞌatsucuntiꞌan
13 Chai ni slivasalh na kꞌai lamapainin ju quintanavinitan ju Dios pus ixlhichux miꞌalhunutꞌan alacꞌaꞌitꞌit ni catalaktsꞌaniyan ju anuꞌ lamapainin ju Dios.
Pus acsnich ju cataꞌaktsayach acsni catalacasuchokoyach ju Jesucristo.
Chai ni caminchokoyaꞌ ju yuchi pus lhitasqꞌuini ni skꞌala atsꞌucꞌutꞌit chai alaccꞌatsꞌanantꞌit.
14 Chai ni isꞌaskꞌatꞌan Dios untꞌatꞌit pus aqꞌuiclacꞌaꞌitꞌit.
Jantu anavichꞌokꞌotꞌit ju macxcai tachi ju ixkꞌachꞌaniyatꞌit makꞌanchich acsni tucaꞌ ixmachꞌakxayatꞌit ju ixchivinti Dios.
15 Pus yuchi ju Dios ju tasacxtutan ni isꞌaskꞌatꞌan aꞌunaꞌitꞌit.
Chai tachi ju yuchi ni salaka isꞌatsucunti pus vachuꞌ chunch atsꞌucꞌutꞌit ju uxijnan mas va tuchi ju naviyatꞌit.
16 Chunchach ju atsꞌucꞌutꞌit ni chunchach ju tsꞌokcanta laꞌixchivinti Dios junta chani najun ju yuchi:
“Ma salaka atsꞌucꞌutꞌit ni salaka junita ju isꞌatsucunti ju yuchi”.
Ma chunch ju najun ju Dios.
17 Chai ni lhixakꞌalayatꞌit ju Dios tachi ju mimpaiꞌan pus alhitꞌalacꞌasutꞌitch ni tꞌalhoniyatꞌit chux tuncujun acsni makvilatꞌitcaꞌ ju ani lacamunutpaꞌ.
Chunch ju alatꞌit ni vaklhtam chun alaktsꞌintanui ju yuchi ju lapanacni tuchi ju navich ju pumatamin.
18 Chai cꞌatsꞌayatꞌit ni Dios ju tamalakxtutan ni jantu tasqꞌuini ni vana anavitꞌit ju mincostumbreꞌan ju jantu lhitapalai.
Ju anuꞌ costumbre ju ixtamacontilanitan ju milacpaiꞌan.
Chai cꞌatsꞌayatꞌit ni jantu lhimalakxtꞌucꞌantꞌatꞌit ju va laca tuꞌuꞌ oro u laca tuꞌuꞌ plata ju lai takꞌalhi.
19 Para lhimalakxtꞌucꞌantꞌatꞌit ju ixꞌacꞌalhni ju Cristo.
Chai ju ixꞌacꞌalhni ju yuchi na laklhu ixtapalh.
Pus ju aliꞌin quintꞌaꞌisraelitaninꞌan tamakninicaꞌ ju Dios ixborregoꞌan ju jantu xatakꞌalhin tajunita nin capacxalh ju tuꞌuꞌ istsꞌitsꞌi.
Chai ju anuꞌ borrego ixtapalh va ixꞌalactuꞌuntiꞌan ju anuch lapanacni.
Pus vana va chun ju Cristo.
Ju yuchi na salaka junita chai ju yuchi nilh ixtapalh ju quiꞌalactuꞌuntiꞌan.
20 Ju Cristo ilhcaꞌulacantacha ni caniyaꞌ acsni tucaꞌ ixnavicanacha ju lacamunutpaꞌ.
Para va chavaicaꞌ laꞌixlhiꞌaclanti ju lacamunutpaꞌ malacasucalh ju milacataꞌan.
21 Chai ni quinichilh ju Cristo pus ju uxijnan lhilacꞌapꞌinatꞌit ju Dios.
Yuchi ju Dios ju macxtuchokolh ju Jesús laꞌixꞌaninti chai lakꞌayalh.
Chai ni chunch ju lalh ju Dios pus ixlhichux miꞌalhunutꞌan laich lhilacꞌapꞌinatꞌit ju yuchi chai laich acꞌatsꞌayaꞌitꞌit ni aktsꞌiya cataxtakniyan tachi chun ju takꞌalhtasunitan.
22 Ixchivinti Dios stavasalanti.
Chai ju chavai ni qꞌuiclacꞌaꞌitꞌatꞌit pus chꞌakꞌanicꞌantꞌatꞌit ju miꞌalhunutꞌan chai lai lamapꞌainiyatꞌit islivasalh ju milhiꞌalakꞌavinꞌan.
Pus alamapꞌainitꞌitch minchuxꞌan ju laꞌistavasalanti ixlhichux miꞌalhunutꞌan.
23 Ju xapꞌulasastꞌinicꞌanatꞌit ju miꞌatsucuntiꞌan jantu va ixlacata tam mintꞌalapanacꞌan ju va caniyaꞌ.
Para tasastꞌichokolh ju miꞌatsucuntiꞌan acsni qꞌuiclacꞌaꞌitꞌatꞌit ju ixchivinti Dios.
Chai ju anuꞌ chivinti conkꞌalhiyach.
Chai acsni quiclacaꞌiniyau pus alin ju quiꞌatsucuntiꞌan ju jonkꞌalhita.
24 Ju ixchivinti Dios chani najun:
Tachi chun ju lapanacni ma tachi ju tuꞌuꞌ achꞌitin tajunita.
Chai tachi chun ju alin laꞌisꞌatsucuntiꞌan ju na talhitakꞌayai ma chunch junita tachi ju tuꞌuꞌ ixꞌaxanat achꞌitin.
Acsni xixach ju xaꞌachꞌitin pus minacha ju ixꞌaxanat.
25 Para ixchivinti ju quiꞌucxtinꞌan Dios ma jonkꞌalhita.
Ma chunch najun laꞌixchivinti Dios.
Pus vasalh chunch junita laquiꞌatsucuntiꞌan.
Acsni niyau jantu tuꞌuꞌ ixtapalh jun ju tuchi ixlhitakꞌayayau.
Para ju chivinti ixlacata ju Cristo ju uncꞌantꞌatꞌit jonkꞌalhita.