Akꞌaican ju makꞌalinin ju talhilaksi ju ixtuminꞌan
5
Pus ju chavai ji makꞌalinin ju lhilaksiyatꞌit ju mintuminꞌan alackꞌalhuntꞌit.
Alactꞌasatꞌit ixlacata ju mimakꞌalhkꞌajnatꞌan ju caminaꞌ astan.
2 Ju mimakꞌalitꞌan chunch junita tachi ju tuꞌuꞌ ju na puchꞌitach.
Ju mimpumpuꞌan chunch junita tachi ju tuꞌuꞌ pumpuꞌ ju na pacxanta ju xaꞌatsꞌacanaꞌ.
3 Ju miꞌoroꞌan chai ju mimplataꞌan na lacjokstach.
Chai ni na jokstach pus anchach caputasuyach ju mintalakꞌalhinꞌan ni na lhu xamakꞌayatꞌit ju mimakꞌalitꞌan.
Chai tachi ju tuꞌuꞌ jipi ni na lai lakꞌalhi ju tuꞌuꞌ pus vana va chun ju mimakꞌalitꞌan.
Ni va yuchi ju alhilaksitꞌit pus catalakꞌalhiniyan ju miꞌatsucuntiꞌan.
Na lhu xamakꞌaixtꞌokꞌatꞌit ju mimakꞌalitꞌan ju chavai avilhchan mas vanin ixꞌaclanti ju lacamunutpaꞌ.
4 Pus ju chꞌalhcatnin ju chakxꞌi ju micebadaꞌan va aꞌokxchꞌokꞌotꞌit ju uxijnan.
Jantu aktsai ju xaꞌamapꞌalatꞌit.
Chai ju ixtalhajaꞌan ju makꞌatꞌatꞌit cataꞌulaniyan ju mintalakꞌalhinꞌan laꞌixmacni Dios.
Chai ju chꞌalhcatnin na talactꞌasai.
Chai ju Dios akꞌasmatnilh ju istꞌasatꞌan.
Chai ju yuchi xaꞌucxtin junita ixtalhavat taropajni ju si anquilhnin tajunita.
5 Pus ju uxijnan jantu tuꞌuꞌ ixtacꞌacxnitan ju ani lacamunutpaꞌ.
Na ixnaviyatꞌit tachi ju ixkꞌachꞌaniyatꞌit.
Chunchach junita ju miꞌalhunutꞌan ju chavai tachi ju tuꞌuꞌ atapacxat ju lakꞌonuncantach ni camaknicanach.
Ju uxijnan vachuꞌ amamakꞌalhkꞌajnicꞌanaꞌitꞌit.
6 Ju uxijnan mucꞌanitꞌatꞌit ixtalakꞌalhinꞌan ju lapanacni ju soknicꞌa junita isꞌatsucuntiꞌan.
Chai lhinaꞌuntꞌit ixmaknicaꞌan.
Chai ju yuꞌunch jantu tasastucnitan.
Jantu jeks aꞌutꞌit. Atꞌachꞌivinintꞌit ju Dios
7 Pus ji quiꞌalakꞌavin jantu jeks aꞌutꞌit mas chunch taꞌulhtuyan.
Cꞌatsꞌayatꞌit ni aktsꞌiya caminchokoyaꞌ ju quiꞌucxtinꞌan Jesucristo.
Alaktsꞌintꞌit tachi ju lai ju tam cuxtu lapanac.
Ju yuchi jantu jeks ui mas jantu sai amaklhtayanan ju xatocꞌat ju ixꞌachꞌananti.
Ju yuchi va pacxan tus calayaꞌ ju xcan ju min acsni va ancaꞌ chꞌanlh chai ju xcan ju astan min ni laich catakꞌayayaꞌ ju ixꞌachꞌananti.
8 Pus vachuꞌ chunch atsꞌucꞌutꞌit ju uxijnan.
Jantu jeks aꞌutꞌit chai ixlhichux miꞌalhunutꞌan alhilaksitꞌit ju Jesucristo.
Cꞌatsꞌatꞌit ni vaninch minta ju avilhchan acsni caminchokoyaꞌ ju yuchi.
9 Jantu alasamucꞌanitꞌit ixlacata ju mimakꞌalhkꞌajnatꞌan.
Jantu xcai ni caꞌalilh ju mintalakꞌalhinꞌan ju chunch.
Chai ju Jesús yuchi ju tucan kꞌai ucxtin chai ju yuchi vatsꞌalhti caminaꞌ.
10 Quiꞌalakꞌavin alaktsꞌintꞌit ju makꞌaniya ixlapanacni Dios ju ixtanajun ixchivinti.
Ju yuꞌunch tajunita tachi ju tuꞌuꞌ lhilaktsꞌintaiti ixlacata quiꞌatsucuntiꞌan ju quijnanꞌan.
Ju yuꞌunch jantu jeks xataꞌui mas na lhu ixꞌamamakꞌalhkꞌajnican.
11 Ju quijnanꞌan nonau ni na kꞌox ju isꞌatsucuntiꞌan ju lapanacni ju lai tatastucni ixmakꞌalhkꞌajnatꞌan.
Pus ju uxijnan kꞌasmatꞌatꞌit ta yu lai xatastucni ju ixmakꞌalhkꞌajnat ju anuꞌ makꞌaniya lapanac ju Job ixjuncan.
Chai vachuꞌ laktsꞌintꞌatꞌit ni na kꞌox ju isꞌatsucunti ju xaxtakni astan ju Dios.
Pus ju quiꞌucxtinꞌan Dios chunch ju navilh ni jantu kꞌai junita chai na lai amapaininin.
12 Para ji quiꞌalakꞌavin alin ju tuꞌuꞌ ju na tasqꞌuini ni anavitꞌit.
Yuchi ni acꞌaptꞌit ju ixlhipastꞌacꞌa ju Dios ju va tuꞌuch lacatsꞌunin ju naviyatꞌit.
Nin yuchi ni lai alhipꞌastꞌactꞌit ju tuꞌuꞌ ju ani lacatꞌun nin yuchi ju tuꞌuꞌ atumpa ju va ixpumavasalacan ju minchivintiꞌan.
Vas alaꞌunitꞌit mas va a u jantu.
Para ni va lhipꞌastꞌacꞌatꞌit ju Dios u tuꞌuꞌ atumpa ju va ixpumavasalacan ju minchivintiꞌan pus ju Dios catamucꞌaniyan ju mintalakꞌalhinꞌan.
13 Ni alin xamatiꞌ ju milhiꞌuxijnan ju na makꞌalhkꞌajnan chach tapaininilh ju Dios ni caꞌaktaiju.
Chai ni alin xamatiꞌ ju na kꞌachan pus chach lakꞌaya ju Dios lacamilhpat.
14 Ni alin xamatiꞌ ju milhiꞌuxijnan ju takꞌankꞌai chach tꞌasanilh ju talhinajun laꞌixtalhavat ju talhilacaꞌanta ju Jesús.
Chai anch junta ma ju takꞌankꞌan catasqꞌuiniyach ju Dios ixlacata ju anuꞌ takꞌankꞌan.
Chai catalacamucꞌayach ju aceite laꞌixtapakaꞌut ju quiꞌucxtinꞌan Jesús.
15 Chai ni ixlhichux ixꞌalhunutꞌan talacaꞌi ni akꞌasmatni ju Dios acsni tasqꞌuini lamapainin ixlacata ju anuꞌ takꞌankꞌan pus palai cajunaꞌ ju yuchi.
Isꞌakstu ju quiꞌucxtinꞌan Jesús ju camakꞌostolayaꞌ.
Chai ni alin ju alactuꞌunti ju xanavi chai yuchi lhitakꞌankꞌai pus camacꞌacxanicanach.
16 Alatꞌapꞌaininitꞌit ju milhiꞌuxijnanꞌan ixlacata tuꞌuꞌ macxcai ju lanavinitꞌatꞌit.
Chai asqꞌuinitꞌit ixꞌaꞌaktaijunti ju Dios ixlacata ju akꞌantam.
Ju chunch ni lai palaich aꞌunaꞌitꞌit acsni atakꞌankꞌayaꞌitꞌit.
Ju tam xamatiꞌ ju soknicꞌa isꞌatsucunti laꞌixmacni Dios acsni ixlhichux ixꞌalhunut casqꞌuinilh tuꞌuꞌ ju Dios pus na lhu ju canavinicanach.
17 Ju Elías vachuꞌ va lapanac ixjunita tachi ju quijnanꞌan.
Chai ju yuchi ixlhichux ixꞌalhunut ju sqꞌuinilh ju Dios ni jantu calalh ju xcan.
Chai lakatꞌutu cꞌata a lakachaxan malhquiyuꞌ jantu lalh ju xcan ju anch.
18 Chai aktam tꞌachivinchokopa ju Dios chai lachokolh ju xcan chai alilh ju xaꞌachꞌananti ju ani lacatꞌun.
19-20 Quiꞌalakꞌavin jantu xcai ni xamatiꞌ ju milhiꞌuxijnan ju va camacaulh ju ixti Dios.
Mas yuchi ju stavasalanti.
Chai ju apumatam ni caꞌaktaijulhch ni calhilaksichokolh ju Jesús pus chach cꞌatsa ju ani.
Pus ju anuꞌ ju xaꞌaktaijui ju anuꞌ alactuꞌunuꞌ acsni ixcapputun ju ixti ju Dios pus puꞌaktaiju ni lai xatakꞌalhtaxtui junta caꞌixjonkꞌalhita ixmakꞌalhkꞌajnat chai na lhu xamacꞌacxanican ju ixꞌalactuꞌunti ju anuꞌ ju xaꞌalactuꞌununta.