Jantu chun calau tachi ju talai ju aliꞌin lapanacni
4
Ju uxijnan na laclasayatꞌit chai na laclakꞌayatꞌit.
Para ju yuchi minacha lamiꞌalhunutꞌan junta va talaclasai ju miꞌatalacpastꞌacꞌatꞌan ju navipꞌutꞌunatꞌit.
Va talaclasai ni alin ju kꞌox chai alin vachuꞌ ju jantu kꞌox.
2 Pus alin ju tuchꞌi pꞌacxampꞌutꞌunatꞌit chai ni jantu lai amaklhtꞌayananatꞌit pus va lai alamaknitꞌit.
Chai lhacchꞌiꞌinatꞌit ju ixtaxtokni ju aliꞌin chai ni jantu lai latꞌaiꞌiniyatꞌit pus va laclakꞌayatꞌit chai lasayatꞌit.
Para va jantu pꞌacxantꞌatꞌit tuchꞌi lacꞌasqꞌuinatꞌit ni va jantu sqꞌuiniyatꞌit ju Dios.
3 Chai acsni sqꞌuiniyatꞌit ju Dios jantu amaklhtꞌayananatꞌit ni jantu kꞌox ju miꞌatalacpastꞌacꞌatꞌan.
Pus va lhu ju lacꞌasqꞌuinatꞌit ni lai alhakꞌamanantꞌit.
4 Ju uxijnan chunch untꞌatꞌit tachi ju tam chakoꞌulh ju lactuꞌui ju ixpapa.
Ju uxijnan lactꞌuꞌuyatꞌit ju Dios ni va kꞌachꞌaniyatꞌit ju xataxtokni ju ani lacamunutpaꞌ.
Tachi ju va jantu cꞌatsꞌayatꞌit ni ixtꞌalaxcai Dios junita va tichi chavaich ju na kꞌachani tachi ju talai ju jantucaꞌ talhilacaꞌanta ju Jesús.
Pus va tichi chavaich ju najun ni yuchach ju kꞌachani tachi ju takꞌachani ju yuꞌunch ju jantucaꞌ talhilacaꞌanta ju Jesús pus ju yuchi ixtꞌalaxcai Dios junita.
5 Jantu va anaꞌuntꞌit ni va kꞌaya najun ixchivinti Dios ju tsꞌokꞌulacanta junta ma chani najun:
“Ju iSpiritu Santu Dios ju tꞌajun laquiꞌalhunutꞌan ma na lacasqꞌuin ni ixꞌanuꞌ cajonkꞌo chux ju quiꞌatsucuntiꞌan”.
6 Para mas aktamixnin jantu xtaknikꞌoyau chux ju quiꞌatsucuntiꞌan para ju Dios kꞌai lamapainin quintanaviniyan ni laich xtaknikꞌoyau ju quiꞌatsucuntiꞌan.
Yuchi lhinajun ju Dios laꞌixchivinti ju tsꞌokꞌulacanta ni ma va alacmajkꞌan ju va talhitakꞌayai ju tuꞌuꞌ.
Para ma anavini lamapainin ju jantu tuꞌuꞌ talhitakꞌayai.
7 Pus yuchi alhilakꞌaꞌitꞌit ni calhinonkꞌoyaꞌ ju Dios chux ju miꞌatsucuntiꞌan.
Asamakꞌantꞌit ju tuchi tamapastꞌacꞌaniyan ju lhacaticuru chai ju yuchi catalackꞌosan.
8 Ixlhichux miꞌalhunutꞌan va tachi apꞌastꞌactꞌit ju Dios chai ju yuchi va tachi cataꞌaktaijuyan.
Ji alactuꞌunin amacꞌaꞌuntꞌit ju alactuꞌunti ju va tsa tsa naviyatꞌit.
Pus uxijnan ju mapꞌainipꞌutꞌunatꞌit ju Dios chai vana navipꞌutꞌunatꞌit ju xataxtokni ju ani lacamunutpaꞌ salaka anavitꞌit ju miꞌalhunutꞌan laꞌixmacni Dios.
9 Chach taxcanin ju miꞌalhunutꞌan ixlacata ju tuchi amacxcai ju navitꞌatꞌit.
Amakꞌaninintꞌit chai alackꞌalhuntꞌitch.
Jantuch vana alactsꞌiꞌintꞌit.
Para alackꞌalhuntꞌit.
Jantu vana alackꞌachꞌantꞌit.
Para amakꞌaninintꞌitch ixlacata ju tuchi amacxcai ju navitꞌatꞌit.
10 Atꞌalacꞌatꞌicstꞌitꞌit laꞌixmacni ju quiꞌucxtinꞌan Dios chai ju yuchi catalakꞌayayan ju lactꞌiyan.
Jantu macxcai alalhichꞌivinintꞌit
11 Quiꞌalakꞌavin jantu macxcai alhichꞌivinintꞌit ju apumatam.
Pus va tichi chavaich ju macxcai lhichivinin ju tam ixlhilakꞌau laꞌixmacni Cristo chai najun ni talakꞌalhin tuchi ju xanavi ju yuchi pus va samakꞌan ju ixlhamapꞌaksin ju Dios junta najun ni calamapainiu ju quijnanꞌan.
Tachi ju va canaulh ni jantu chun najun laꞌixlhamapꞌaksin Dios.
Chai ni chunch ju navi ju anuꞌ lapanac pus tachi ju va najun ni palai machakxai ju tuꞌuꞌ kꞌox ju canavilh xamatiꞌ.
Tachi ju va palai jantu vas najun ju tuꞌuꞌ lhamapꞌaksin.
12 Para va pumatam ju xtaklh ju lhamapꞌaksin.
Yuchi ju Dios.
Chai va yuchi ju lai mucꞌani ixtalakꞌalhin tam xamatiꞌ.
Va yuchi ju lai makꞌalhtaxtui xamatiꞌ u mamakꞌalhkꞌajni.
Pus ju uxintꞌi tis chavaichꞌat ni naꞌun ni vachuꞌ lai mucꞌani ixtalakꞌalhin ju mintꞌalapanac.
Jantu vas anaꞌuntꞌit ju tuchꞌi anaviyaꞌitꞌit lhi tꞌuxam
13 Pus apꞌacxantꞌitcaꞌ lacatsꞌunin ju uxijnan ju chani nonatꞌit:
“Ju chavai u lhi acꞌanauch ju anuꞌ lakꞌachakꞌan.
Chai anchach ju actolhtachau tachi tam cꞌata.
Chai acmalakxtutachauch ju lhistꞌat chai lhu aclhajayau”.
14 Para ju uxijnan jantu cꞌatsꞌayatꞌit tuchi catapasayaꞌ ju alhi.
Ju quiꞌatsucuntiꞌan chunch junita tachi ju ixpuquilhau ju tuꞌuꞌ ju tasui pantsꞌiquis chai vatsꞌalhti lakmixchokoi.
15 Palai kꞌox cava ni chanich anaꞌuntꞌit:
“Ni calacasqꞌuinach ju quiꞌucxtinꞌan Dios pus catsucuyauch chai chani chani canaviyau”.
16 Para ju uxijnan alai va lhitꞌakꞌayayatꞌit ju tuchi vas nonatꞌit ni anaviyaꞌitꞌit.
Para ju chunch na talakꞌalhin.
17 Pus mas acmispa ju kꞌox para ni jantu icnavi pus alactuꞌunti ju icnavi.