Laquinquilhniꞌan nonau ju macxcai
3
Quiꞌalakꞌavin palai kꞌox cava ni jantu lhu milhiꞌuxijnan ju aꞌuntꞌit amamakaꞌunin.
Cꞌatsꞌayatꞌit ni palai aquintamamakꞌalhkꞌajniyan ju Dios ju quijnan ju amamakaꞌunin icjuntau ni jantu sok acꞌamalanininau.
Palai jantu ju va lapanacni.
2 Quinchuxꞌan quijnanꞌan na paklhu ju kꞌalhkꞌosau ju laquiꞌatsucuntiꞌan.
Ni alin cava xamatiꞌ ju jantu cakꞌalhkꞌoslh laꞌixchivinti pus ju yuchi vasalh salakach cava ju isꞌatsucunti.
Chai laich calhistackꞌo tachi chun ju ixlacatuna.
3 Ju quijnanꞌan maquilhtanuyau ixfreno ju caballo ni laich camalacaꞌiniuch.
Chai mas va lacatꞌicstꞌi ju freno para lai lhinonkꞌojui chux ixlacatuna.
4 Vachuꞌ chunch ju barco.
Mas na kꞌai chai na lai sun lhiꞌan ju kꞌai un chai mas va lacatꞌicstꞌi ju qꞌuiu ju pulacnavilhiꞌancan para lai pulhiꞌan ju amanavin vanta anchach ju pulhiꞌamputun.
5 Pus vachuꞌ na lacatꞌicstꞌi ju quisimakꞌatꞌan para na lai alakꞌalhinin.
Alaktsꞌintꞌit ju jipi.
Mas va lacatꞌicstꞌi ju acmama ju lacaqꞌuivin na kꞌai ju calhcuyaꞌ.
6 Pus ju quisimakꞌatꞌan tachi ju tuꞌuꞌ jipi junita.
Pus ju macxcai chivinti ju nonau anchach ju minacha junta alin ju jipi junta jonkꞌalhita makꞌalhkꞌajnat.
Va ixlacata quisimakꞌatꞌan na lhu pꞌun ju amacxcai.
Ju yuchi tanun laquilacatunaꞌan chai lai lakꞌalhikꞌojui chux ju quilacatunaꞌan.
Chai vachuꞌ lai lakꞌalhini isꞌatsucunti ju aliꞌin lapanacni.
7 Tachi chun ju atapacxat chai ju tuꞌuꞌ tsꞌokꞌo chai ju tuꞌuꞌ tsapu chai ju tuꞌuꞌ atumpa atapacxat ju alin ju lacaꞌalama lai mamansulacan chai tamamansulata ju lapanacni.
8 Para jantu xamatiꞌ lai mamansulai ju quisimakꞌatꞌan ju va laꞌisꞌakstu.
Ju quisimakꞌatꞌan na kꞌai junita.
Chai jantu lai malacaꞌinican tuꞌuꞌ.
Ju laquisimakꞌatꞌan lai lakꞌalhiniyau isꞌatsucunti apumatam.
9 Laquisimakꞌatꞌan nonau ni na kꞌox ju quimpaiꞌan Dios.
Chai vana yuꞌ ju pujunchokoyau macxcai ju tam quintꞌalapanacꞌan ju ixtꞌachunch navicanta tachi ju Dios.
Lai acnaulh ni ixtꞌachunch Dios ju navicantauch ni alacpastꞌacꞌau chai amapainiyau chai lhitsꞌisiyau ju tuꞌuꞌ macxcai tachi ju lai ju Dios.
10 Pus laquinquilhniꞌan lai nonau ju kꞌox chai lai nonau ju macxcai chivinti.
Pus ji quiꞌalakꞌavin jantu kꞌox ni chunch ju layau.
11 Junta taxtui ju xcan jantu lai tijtꞌui ixtacanit cava.
Jantu lai na canch cava chai vana na xkꞌejni cava.
12 Quiꞌalakꞌavin ju tuꞌuꞌ xaqꞌuiu higo jantu lai catixtaklh ju xatocꞌat ju olivos.
Chai ju xaqꞌuiu uvas jantu lai catixtaklh ju xalhiꞌut ju higo.
Pus chunchach vachuꞌ junta taxtui ju xcan.
Jantu lai skꞌokꞌo cava chai vana na canch.
Pus vana va chun ju quinquilhniꞌan.
Jantu lai chꞌatꞌui atinaulh.
Ju kꞌox tacꞌatsan lactꞌiyan ju minacha
13 Ju lamilhiꞌuxijnan ja alin lapanacni ju na taꞌacꞌatsananta chai taꞌamachakxanan.
Ni alin pus catasuyaꞌ ni vasalh taꞌacꞌatsananta ni na kꞌox ju isꞌatsucuntiꞌan.
Chai caputasuyaꞌ acsni jantu talhitakꞌayai ju tuꞌuꞌ kꞌox ju tanavita.
14 Para ni na axcꞌayananatꞌit chai va navipꞌutꞌunatꞌit minkꞌachatꞌan miꞌakstuꞌan pus jantu anaꞌuntꞌit ni na acꞌatsꞌanantꞌatꞌit.
Pus ni nonatꞌit ni acꞌatsꞌanantꞌatꞌit mas alin ju chunch atalacpastꞌacꞌat lamiꞌalhunutꞌan pus va tꞌaꞌaklhtꞌamayatꞌit.
15 Ju lapanac ju chunch lai jantu lai catinaulh ni yuchi ju Dios ju xtaknilh ju istacꞌatsan.
Ju chun tacꞌatsan va xaꞌatalacpastꞌacꞌat ju ani lacamunutpaꞌ.
Va laꞌixꞌalhunut isꞌakstu ju minacha.
Chai yuchi ju lhacaticuru ju mapastꞌacꞌani ju chunch.
16 Pus junta taꞌalin ju lapanacni ju taꞌaxcayanan chai va ixkꞌachatꞌan isꞌakstuꞌan ju tanaviputun pus vachuꞌ alin ju lasat chai tachi chun ju amacxcai.
17 Para ju Dios vilhcha lactꞌiyan chai yuchach ju xtꞌakꞌa ju kꞌox tacꞌatsan.
Chai ju xtaknican ju chunch tacꞌatsan na salaka ju ixꞌatalacpastꞌacꞌat.
Chai ju yuchi jantu kꞌachani ju lasat.
Na cꞌus lapanac junita.
Chai lai malacaꞌinican tuꞌuꞌ.
Na aꞌaktaijunun lacaꞌamapaininti.
Chai va tachi navich ju kꞌox.
Ju yuchi vaklhtam chun alaktsꞌin ju ixtꞌalapanacni chai jantu acxputꞌiyunun.
18 Chai ju anuꞌ lapanacni ju jantu takꞌachani ju lasat para kꞌox alactꞌalalhiꞌan ju aliꞌin lapanacni pus soknicꞌa jun ju isꞌatsucuntiꞌan isꞌakstuꞌan.