JU ALHIQUI JU ATSꞌOKNULH JU SANTIAGO
Ju Santiago amacꞌami ju ixtꞌaꞌamachivinti ju amakpitsicanta
1
Ju quitꞌin icSantiago.
Ixlapanac icjunita ju Dios chai ju quiꞌucxtinꞌan Jesucristo.
Va iclamacꞌamiyau ju uxijnan ju quintꞌaꞌamachivinti untꞌatꞌit ju vachuꞌ lhilacꞌapꞌintꞌatꞌit ju Cristo para va makpꞌitsꞌicꞌantꞌatꞌit ju ani lacamunutpaꞌ.
Dios ju amamachakxaninin tamalhch ju kꞌox lhiulai chai tamalhch ju jantu
2 Quiꞌalakꞌavin slivasalh alhikꞌachꞌantꞌit acsni tijlhu alin ju makꞌalhkꞌajnat ju lamiꞌatsucuntiꞌan.
3 Alhikꞌachꞌantꞌit ni cꞌatsꞌayatꞌit ni palai lai atꞌastꞌucnitꞌit va tuchi camilh lamiꞌatsucuntiꞌan acsni va tachi alhilacꞌapꞌitꞌit ju Dios mas amakꞌalhkꞌajnantꞌit.
4 Pus jantu asamakꞌantꞌit ju tuꞌuꞌ makꞌalhkꞌajnat ju taxtakniyan ju Dios.
Lhikꞌach amaklhtꞌaꞌitꞌit.
Chai acsni tavanan lai chunch alatꞌit pus tasui ni ixlhichux miꞌalhunutꞌan ju lhilacꞌapꞌintꞌatꞌit ju Cristo chai jantu tuꞌuꞌ tamakꞌancꞌacxnitan laꞌixmacni Dios.
5 Ni alin xamatiꞌ ju milhiꞌuxijnan ju tulai machakxai tamalhch ju kꞌox lhiulai ju Dios chai tamalhch ju jantu pus chach tapainini ju Dios chai ju yuchi camamachakxaniyaꞌ.
Ju Dios na lai amamachakxaninin chai ju yuchi jantu kꞌaji ju tapaininich.
6 Para acsni catapaininiyaꞌ tasqꞌuini ni calacaꞌiyach ni camamachakxaniyaꞌ ju Dios.
Jantu va tam tam canaulh.
Ju va tam tam najun chai jantu va lakatam navita ju ixꞌalhunut pus chunch junita tachi ju xcan acsni lacatam lacatam sun lhiꞌan ju un.
7 Pus ju lapanac ju chunch lai jantu canaulh ni caxtakniyaꞌ ju tuchi xasqꞌuini ju quiꞌucxtinꞌan Dios.
8 Pus ju anuꞌ lapanac ju lakatꞌui navi ixꞌatalacpastꞌacꞌat jantu lai tuꞌuꞌ vas najun.
9 Ju tam quilhilakꞌauꞌan laꞌixmacni Jesús ju va quilhpatiniꞌ chach lhikꞌachalh ni lakꞌayacanta ni navicanta isꞌaskꞌatꞌa Dios.
10 Chai ju tam quilhilakꞌauꞌan ju na makꞌaliꞌ chach lhikꞌachalh ni malacatꞌicstꞌicalh ni jantu tuꞌuꞌ lhiulacan ni lhilacaꞌanta ju Cristo.
Pus ju Dios mamachakxani ni jantu tuꞌuꞌ ixtapalh ju ixmakꞌalit.
Chai mamachakxani ni va tam pantsꞌiquis lai canilh.
Chai chunch ju catapasalh laꞌisꞌatsucunti tachi ju tuꞌuꞌ xanti ju va tsꞌalhti xixa.
11 Acsni caxajtachilh ju avilhchan ni na lhiꞌichich cajunaꞌ pus ju xaxanti capatajuniyaꞌ.
Chai jantu vana na cꞌusich tasui.
Pus vana va chun ju tam makꞌaliꞌ.
Lai canilh va tam pantsꞌiquis mas tꞌajun makꞌaixtoknuꞌ ju ixmakꞌalit.
Tasqꞌuini ni catastucnikꞌoyau ju quimakꞌalhkꞌajnatꞌan
12 Na kꞌachan ju lapanac ju lai tastucni ju ixmakꞌalhkꞌajnat.
Jantu najun ni va ixlhiyuchi camaconaꞌ ixti ju Dios.
Pus ju yuchi acsni laktsꞌintanucanta chai tasui ni lai tastucni ju makꞌalhkꞌajnat chai jantu tam najun mas mamakꞌalhkꞌajnican pus caꞌamaklhtayananach ju ixtalhaja ju akꞌalhtasunitach ju Dios tachi chun ju vasalh tamapaini.
Yuchi ni caꞌalinaꞌ ju isꞌatsucunti ju conkꞌalhiyanta ju lactꞌiyan.
13 Ni alin xamatiꞌ ju mapastꞌacꞌanican ju tuꞌuꞌ macxcai pus jantu catinaulh ni Dios ju mapastꞌacꞌani chai ixlhiyuchi lai canavilh.
Ju Dios jantu lai mapastꞌacꞌanican ju tuꞌuꞌ macxcai nin camapastꞌacꞌani tuꞌuꞌ macxcai ju akꞌantam.
14 Para ni na lhu tanun ju macxcai ju laquiꞌalhunutꞌan ju naviputunau pus yuchi va tsa lhipastꞌacꞌau ju macxcai.
Chai ni na kꞌox ju lhiulayau ju pastꞌacꞌau pus putaꞌokxchokꞌoyau.
15 Chai acsni kꞌachaniyau ju tuꞌuꞌ macxcai pus alactuꞌununau acsni naviyauch.
Chai acsni va tsa caꞌalactuꞌunulh tam xamatiꞌ pus yuchi lhimacaꞌancan junta jonkꞌalhita makꞌalhkꞌajnat.
16 Ji quiꞌalakꞌavin jantu atꞌaꞌokxchꞌokꞌotꞌit.
Ju Dios jantu xtꞌakꞌa ju tuꞌuꞌ macxcai.
17 Para tachi chun ju xtaknicantau ju kꞌox chai tachi chun ju xtaknicantau ju aktsai talaclhman ju minacha.
Yuchi ju Dios ju macamin.
Yuchi ju navikꞌolh tachi chun ju tamapulhcui.
Pus ju anuꞌ ju mapulhcui aktamixnin kꞌox mapulhcui chai aktamixnin jantu kꞌox lai tasui.
Para ju Dios jantu va tam tam junita.
Nin lacatsꞌunin ju va astan tam canaulh.
18 Ju yuchi laꞌixkꞌachat isꞌakstu quintanavitan isꞌaskꞌatꞌan acsni lacaꞌiniuch ju ixchivinti.
Chai ju yuchi stavasalanti.
Chai ni quintanavitan isꞌaskꞌatꞌan pus alin tuꞌuꞌ ju palai kꞌox ju aquintaxtakniyan ju quijnanꞌan.
Palai jantu na chun catiꞌaxtaknilh tachi chun ju aliꞌ taxtokni ju navita ju Dios ju ani lacatꞌun.
Tasqꞌuini ni chani cava ju quiꞌatsucuntiꞌan ni vasalh talhoniyau ju Dios
19 Ji quiꞌalakꞌavin tasqꞌuini ni tachi chun ju quijnanꞌan va lhikꞌach cakꞌasmatꞌauch ju ixchivinti Dios.
Para jantu vatsꞌalhti canonau ju tuꞌuꞌ chai jantu vatsꞌalhti catalhkꞌamnau.
20 Pus ni va catalhkꞌamnau jantu lai aquintajunan ju Dios ni sok ju naviyau.
21 Pus ixlhiyuchi amacꞌaꞌuntꞌit tachi chun ju macxcai chai tachi chun ju tamalhquiliquiniyan ju miꞌatsucuntiꞌan.
Chai alacꞌaꞌikꞌotꞌit chux ixchivinti Dios ju kꞌasmatꞌatꞌit chai jantu asamakꞌantꞌit.
Pus ni alacꞌaꞌikꞌoyaꞌitꞌit pus atꞌakꞌalhtꞌaxtꞌuyaꞌitꞌit.
22 Para amuctꞌaxtꞌutꞌit tachi ju najun laꞌixchivinti Dios.
Tun va anaꞌuntꞌit ni va yuchi ju tasqꞌuini ni akꞌasmatꞌit.
Ni va chunch ju anaꞌuntꞌit pus va okxchꞌokꞌocꞌanatꞌit miꞌakstuꞌan.
23 Ni alin xamatiꞌ ju va kꞌasmatꞌa ju ixchivinti Dios para ni jantu muctaxtui tachi ju najun pus ju yuchi chunch junita tachi tam lapanac ju laktsꞌin ixmakꞌantsastꞌilit laca tuꞌuꞌ speo.
24 Ju yuchi laktsꞌinchokocan isꞌakstu chai an alacatam chai lana cꞌapꞌa ta yu junitach ju ixꞌucxpuꞌ.
25 Pus lhikꞌach catsucuyaꞌ ju lapanac ju kꞌasmatꞌa ixchivinti Dios chai va tachi navi cuenta chai muctaxtui chai jantu va cꞌapꞌa ju tuchi kꞌasmatꞌa.
Pus ixchivinti Dios sok najun chai acsni lacaꞌinican ju yuchi pus palai jantu na tachapun jun ju alactuꞌunti laquiꞌatsucuntiꞌan.
26 Ni xamatiꞌ najun ni lakꞌayai ju Dios para ni jantu lhistꞌacꞌa ju isimakꞌat pus va okxchokꞌocan isꞌakstu.
Jantu lhitapalai mas najun ni lakꞌayai ju Dios.
27 Pus ju quimpaiꞌan Dios najun ni xamatiꞌ talhoni laꞌixlhichux ixꞌalhunut chai tachi ju kꞌachani ju yuchi pus chach alh aꞌaktaijunuꞌ ju quilhpatinin askꞌatꞌan ju alin ixmaktasqꞌuinitꞌan chai ju chakolun ju animacontilacanta.
Vachuꞌ calhistaccalh ni jantu vana va chun calalh tachi ju talai ju jantucaꞌ talhilacaꞌanta ju Cristo.