Chani junita ju atsucunti ju kꞌachani ju Dios
13
Va tachi alamapꞌaininitꞌit tachi ju lhiꞌalakꞌavin laꞌixmacni Cristo.
2 Alakꞌaꞌitꞌit ni catalakacujtilalh laminchakaꞌ ju tatapaininiyan.
Chunch ju alatꞌit mas jantu amispꞌatꞌit.
Pus ju aliꞌin ju makꞌaniya quilacpaꞌitniꞌan chunch talalh chai taꞌamaklhtayanalh laꞌixchakaꞌan ju anquilhnin mas jantu ixtamispai ni anquilhnin ixtajunita.
3 Aꞌaktꞌaiꞌutꞌit ju atꞌalhnucanta tachi ju va tachꞌin tꞌaꞌuntꞌatꞌit ju uxijnan.
Vachuꞌ aꞌaktꞌaiꞌutꞌit ju alhimakchapucan ni vachuꞌ tꞌonatꞌitcaꞌ lamilacatunaꞌan ju lai makꞌalhkꞌajnan.
4 Tachi minchuxꞌan jantu va alhakꞌamanantꞌit ju mintamakꞌaxtokꞌatꞌan.
Jantu va kꞌaya atꞌatsꞌucꞌutꞌit ju va akꞌantam.
Pus Dios ju camucꞌaniyaꞌ ixtalakꞌalhin ju alin ixnavin chai ju tꞌatsucui ju akꞌantam ju jantu ixpapa u ju jantu ixꞌamachakaꞌ junita.
5 Jantu na tuꞌuꞌ alhiulatꞌit ju tumin.
Alai alhikꞌachꞌantꞌit tuchꞌi pꞌacxantꞌatꞌit.
Chunch ju alatꞌit ni isꞌakstu Dios ju najunta ni jantu tavanan aquintacꞌapꞌan nin lai aquintamacoꞌulan.
6 Chai vachuꞌ yuchi lai lhinonauch ixlhichux quiꞌalhunutꞌan:
Yuchi ju Dios ju quiꞌaktaijui.
Jantu actitalhanalh.
Pus tijuch ju lai aquinavilh ju va lapanac.
Chunch ju lai nonau.
7 Apꞌastꞌactꞌit ju xalackꞌajin lamilhiꞌuxijnan ju ixtamalaniyan ixchivinti Dios.
Apꞌastꞌactꞌit ta yu ixjunita isꞌatsucuntiꞌan ju yuꞌunch ni talhilaksilh ju Dios chux laꞌisꞌatsucuntiꞌan tus ni tani.
Chai chunch ju alhilaksitꞌit ju Dios tachi ju ixtalhilaksi ju yuꞌunch.
8 Ju Jesucristo va tachi ju junitach tus makꞌanchich.
Mas chavai.
Mas va tavananch cava.
9 Jantu alakꞌaꞌitꞌit ni xamatiꞌ cataꞌokxchokꞌoyan chai na tijlhu atalaninti catajunan ju jantu ixtꞌachunch junita tachi ju lanitꞌatꞌit.
Pus ju tuꞌuꞌ lhamapꞌaksin ixlacata ju tuꞌuꞌ vaiti jantu tavanan aktaijuta tam xamatiꞌ ni lai salaka cava laꞌixmacni Dios.
Alai va yuchi ju Dios ju aquintaꞌaktaijuyan laꞌixꞌamapaininti ni lai va tachi calhilaksiyau ju yuchi.
10 Pus ju quijnanꞌan alin ju xamaknican ixtapalh quiꞌalactuꞌuntiꞌan.
Yuchi ju Jesús.
Para ju vanach talhilaksi ju lhamapꞌaksin ju tsꞌokꞌula ju Moisés chai tanajun ni anch ju catalhitajuyaꞌ ju soknicꞌa isꞌatsucuntiꞌan jantu lai catiꞌaꞌaktaijucalh laꞌixꞌaninti ju Jesús.
11 Pus ju xakꞌai ixpaliꞌan ju quintꞌaꞌisraelitaninꞌan ixlhiꞌan ju ixꞌacꞌalhni ju atapacxat tus laꞌixpulacni ju chakaꞌ junta ixlakꞌayacan ju Dios.
Va ixtapalh ixjunita ixꞌalactuꞌuntiꞌan ju lapanacni.
Para ju ixlacatunaꞌan ju anuꞌ atapacxat lacamacni ixꞌancan lakxavaca.
12 Pus vana va chunch ju Jesús.
Ju yuchi mamaxanicalh ni lacamacni ju maknicalh.
Pus nilh ni laich caxacanilh ixtalakꞌalhinꞌan ju lapanacni laꞌixꞌacꞌalhni.
13 Pus na lhimaxan tamapasa ju Jesús ni lacamacni ju tamakni.
Pus mas aquintamamaxanin vachuꞌ ju lapanacni ni jantu vana chun ju naviyau ju chavai tachi ju ixlayau ju pꞌulhnan para cachꞌakꞌokꞌauch ju yuchi.
14 Pus chunch ju calau ni cꞌatsayau ni jantu amachakꞌan lacamunutpaꞌ juntau.
Alai cꞌatsayau ni amachakꞌan lactꞌiyan juntau chai anchach ju cachaꞌanau.
15 Pus yuchi lhitasqꞌuini ni va tachi cajunau lakꞌailaktsꞌiuch ju Dios laꞌixlacata ju Jesús.
Chai ni chunch ju calau pus tachi ju va jun tuꞌuꞌ lhakꞌailaktsꞌin ju xtakniyau ju yuchi chai pulakꞌayayau ju yuchi.
16 Para jantu acꞌaptꞌit ju ixnavica ju kꞌox chai aꞌaktꞌaiꞌutꞌit ju quilhpatinin lamiꞌalintaꞌan.
Chai acsni naviyau ju chunch pus jun tachi ju lakatam lhakꞌailaktsꞌin ju xtakniyau ju Dios chai ju yuchi na kꞌoxich lhiulai.
17 Aqꞌuiclacꞌaꞌitꞌit ju yuꞌunch ju talhinajun lamilhiꞌuxijnan.
Anavitꞌit tachi ju tajunan.
Pus chunch ju aꞌulhtꞌutꞌit ni yuꞌunch ju talhistacniyan ju miꞌatsucuntiꞌan ni laich sokch apꞌinaꞌitꞌit laꞌixti ju Dios.
Chai ju yuꞌunch casacmikꞌocanaꞌ ni kꞌox talhistactan u jantu.
Pus aqꞌuiclacꞌaꞌinitꞌit ni laich lhikꞌach catanaviyaꞌ ju ixlhichꞌalhcat.
Jantu va catalhamakꞌanininan tachi ju layatꞌit.
Pus ni va catalhamakꞌanininan pus ju chunch jantu kꞌox cava ju milacataꞌan.
18 Atꞌapꞌaininitꞌit ju Dios ju quilacata quijnan.
Pus iccꞌatsayau ni jantu tuꞌuꞌ quintaxcaniyan ju quiꞌalhunut quincꞌan ni kꞌox naviputunau mas va tuchi cava.
19 Pus iclatapaininiyau ni asqꞌuinitꞌit ju Dios ju quilacata ni laich vatsꞌalhti aclalakꞌanchokotachau.
Amacꞌamican ju talhilacaꞌanta ju Cristo
20 Pus Dios ju quintalhistacniyan ju quiꞌalhunutꞌan ni jantu calacꞌalh.
Chai yuchach ju malokꞌonichokolh laꞌixꞌaninti ju Jesucristo ju quintalhistꞌacꞌan ju quijnanꞌan tachi tam lapanac ju lhistꞌacꞌa ju ixborregojni.
Chai ni lokꞌonchokolh ju Jesús laꞌixꞌaninti pus quintamamachakxanin ni laꞌixꞌacꞌalhni ju xapumavasalai ju chivinti ju quintalhitꞌatakꞌoxitan ju Dios.
Chai ju anuꞌ chivinti jonkꞌalhita.
21 Pus ictapainini ju yuchi ju Dios ni cataxtakniyan tachi chun ju kꞌox atalacpastꞌacꞌat ni laich anaviyaꞌitꞌit ju ixkꞌachat ju yuchi.
Chai ictapainini ni cataꞌaktaijuyan ni laꞌixtachaput ju Jesucristo laich anaviyaꞌitꞌit tachi chun ju kꞌachani ju yuchi.
Pus chach lakꞌayacalh ju Jesucristo tus va tavananch.
Chunchach vasalh canavicalh.
22 Pus iclatapaininiyau ji quiꞌalakꞌavin ni anavitꞌit cuenta ju tuchi iclalhimapꞌaksitauch.
Pus jantu lhu chivinti ju iclaꞌatsꞌoknunitau.
23 Acꞌatsꞌatꞌit ni maxtucanta lacapulachꞌin ju quilakꞌauꞌan Timoteo.
Pus ni vatsꞌalhti camilh pus yuchi ju actꞌaꞌananta acsni acꞌantachau lalaktsꞌinin.
24 Amacꞌamitꞌit ixchuxꞌan ju talhinajun lamilhiꞌuxijnanꞌan.
Vachuꞌ amacꞌamitꞌit ixchuxꞌan ju aliꞌin ju vachuꞌ talhilacaꞌanta ju Jesucristo.
Pus ju amachakꞌan Italia taꞌamacꞌaminin.
Tamacꞌamiyan.
25 Pus ictapainini ju Dios ni catanaviniyan lamapainin minchuxꞌan ju uxijnan.
Vasalh chunch iclacasqꞌuin ni catanaviyan.