Pꞌas calhilacaꞌau ju Jesús
12
Pus laktsꞌintauch ni slivasalh na lhu alin ju lapanacni ju talacaꞌinilh ixchivinti Dios mas va tuchi ixtapasai laꞌisꞌatsucuntiꞌan.
Chai ixlhiyuchi cꞌatsayau ni lai lhilaksican ju Dios.
Pus yuchi calhimacajuch ju tuꞌuꞌ ju quintamamaktilayan laquiꞌatsucuntiꞌan chai ju alactuꞌunti ju quintamakꞌalhkꞌosuputunan.
Chai catailhiꞌauch ju quiꞌatsucuntiꞌan tachi ju quintalhilhcatan ju Dios.
Chai jantu jeks caꞌu.
2 Pus pꞌas calhilacaꞌau ju Jesús.
Yuchi ju quintamasunin ta yu lacaꞌinican ixchivinti Dios ni laich cachaꞌanau ju lactꞌiyan.
Chai yuchach ju quintaꞌaktaijuyan ni calacaꞌinikꞌalhiyau.
Pus ju yuchi ni iscꞌatsai ni slivasalh cakꞌachanaꞌ astan pus yuchi lhimakꞌalhkꞌajnalh ju lacacurus.
Chai vachuꞌ yuchi jantu tuꞌuꞌ xalhilhiulai ni tamamaxanilh ju lapanacni.
Chai ju chavai vanin tꞌavi ju Dios ju lactꞌiyan.
3 Apꞌastꞌactꞌit ta yu lalh ju Jesús ni chꞌixkꞌolh tachi chun ju macxcai ju tanavi ju alactuꞌuni lapanacni.
Chai ni pꞌastꞌacꞌatꞌit ju yuchi pus jantu alhokꞌonaꞌitꞌit ju mimakꞌalhkꞌajnatꞌan nin yuchi ni lai acꞌappꞌutꞌutꞌit ju Dios.
4 Pus ju uxijnan jantucaꞌ maknicꞌantꞌatꞌit mas na tamamakꞌalhkꞌajniyan ju alactuꞌuni lapanacni.
5 Ja va cꞌapkꞌotꞌatꞌit ju chivinti ju tsꞌokcanta junta mapꞌaksicanauch.
Ju anch ju Dios quintalhixakꞌalayan isꞌaskꞌatꞌan.
Chai chani ma quintajunan:
Quiꞌaskꞌatꞌan jantu anaꞌuntꞌit ni jantu tuꞌuꞌ nomputun ju makꞌalhkꞌajnat ju iclaxtakniyau.
Chai jantu va acꞌappꞌutꞌutꞌit acsni iclakꞌayau.
6 Ju quitꞌin ni icmapaini tam xamatiꞌ pus yuchi iclhikꞌaji acsni alactuꞌunun.
Chai yuchi icꞌalhimamakꞌalhkꞌajni tachi chun ju icꞌalhimispaich ni quiꞌaskꞌatꞌan tajunita acsni va jantu quintaquiclacaꞌi.
Chunch ma quintajunan ju Dios.
7 Pus achꞌixtꞌitch ju mimakꞌalhkꞌajnatꞌan ni tachi isꞌaskꞌatꞌan taꞌulhtuyan ju Dios chai va lacasqꞌuin ni aqꞌuiclacꞌaꞌitꞌit.
Chai matiꞌ xamatiꞌ askꞌatꞌa ju jantu cakꞌailh ju ixpai acsni alactuꞌunun.
8 Pus ju Dios amamakꞌalhkꞌajni tachi chunch ju isꞌaskꞌatꞌan acsni jantu talacaꞌi.
Para ju uxijnan ni jantu mamakꞌalhkꞌajnicꞌanatꞌit pus jantu isꞌaskꞌatꞌan untꞌatꞌit.
9 Pus ju quilacpaꞌitniꞌan ju ani lacamunutpaꞌ xaquintakꞌayan acsni jantu ixꞌaquiclacaꞌiyau chai ni jantu ixꞌatalhoniyau.
Pus ja va a ti yuchach jantu caquiclacaꞌiyau ju quimpaiꞌan ju vilhcha lactꞌiyan ni laich caꞌalinaꞌ ju quiꞌatsucuntiꞌan ju conkꞌalhiyaꞌ.
10 Pus ju quilacpaꞌitniꞌan slivasalh na lacatsꞌunin cꞌata ju xaquintalacakꞌaimayan tachi ju kꞌox ixtalhiulai.
Para ju quimpaiꞌan Dios quintamamakꞌalhkꞌajniyan acsni quintalaktsꞌinan ni vasalh navitau tuꞌuꞌ.
Ju yuchi va lacasqꞌuin ni soknicꞌa capuva lacamakꞌalhkꞌajnat ju quiꞌatsucuntiꞌan tachi ju yuchi ni soknicꞌa junita.
Chai yuchi quintalhimamakꞌalhkꞌajniyan.
11 Lana jantu kꞌox lhiulayau acsni kꞌaicanau.
Alai va lhiꞌamakꞌanininau.
Para ju tam xamatiꞌ ju lai puꞌalacpastacnan acsni mamakꞌalhkꞌajnican pus soknicꞌa jun ju isꞌatsucunti chai tayakꞌach jun ju ixꞌalhunut.
Aqꞌuiclacꞌaꞌinitꞌit ixchivinti Dios
12 Chai ni chunch ju iclajuntau pus yuchi jantu jeks alhiꞌunitꞌit ju mimakꞌalhkꞌajnatꞌan.
Alai atꞌachꞌapꞌuchꞌokꞌotꞌitch lamintacꞌatsanꞌan.
13 Chai sok atsꞌucꞌutꞌit tachi ju kꞌachani ju Dios.
Ju chunch ju na xcai tatailhiꞌan laꞌixti Dios jantu catacꞌapꞌaꞌ para alai pꞌas catalhilacaꞌanchokoyaꞌ ju Dios.
14 Laꞌixlhichux miꞌalhunutꞌan anavitꞌit talakmaskꞌatꞌin ni jantu atꞌalasatꞌit xamatiꞌ.
Chai salaka atsꞌucꞌutꞌit.
Pus ni jantu salaka ju miꞌatsucuntiꞌan jantu lai atꞌilaktsꞌintꞌit ju Dios.
15 Alhistꞌaccꞌantꞌit miꞌakstuꞌan.
Jantu xcai ni xamatiꞌ lamilhiꞌuxijnan cacapputulh ju lamapainin ju tanaviniputunan ju Dios.
Alhistꞌaccꞌantꞌit miꞌakstuꞌan.
Jantu xcai ni caꞌalilh tam xamatiꞌ ju lamilhiꞌuxijnan ju calhitalhkꞌamalh tuꞌuꞌ chai ju yuchi caꞌamapastꞌacꞌani ju amacxcai ju aliꞌin chai na lhu caputakꞌalhi ju isꞌatsucuntiꞌan.
16 Alhistꞌaccꞌantꞌit miꞌakstuꞌan.
Jantu xcai ni caꞌalilh lamilhiꞌuxijnan tam xamatiꞌ ju catꞌatsuculh apumatam ju jantu ixꞌamachakaꞌ u ju jantu ixpapa.
Chai jantu xcai ni caꞌalilh tam xamatiꞌ ju jantu tuꞌuꞌ calhiula ju ixtaxtokni Dios tachi ju lalh ju anuꞌ makꞌaniya lapanac ju Esaú ixjuncan.
Ju yuchi jantu tuꞌuꞌ xalhiulai ju kꞌox atsucunti ju caꞌixpacxalh ni xakꞌai istsꞌalh ixjunita ju ixpai.
Alai laich tucan lhistꞌa ju isꞌatsucunti lakatam vaiti.
17 Chai ju uxijnan cꞌatsꞌayatꞌit ni astan ixlacasqꞌuin ni ixtaknicalh ju kꞌox atsucunti ju ixꞌanuꞌ caꞌixva para jantu xtaknicalh.
Chai mas na ixkꞌalhun jantu lai xalhitajui ta yu laich camapaxachokolh ju tuchi ixnavita.
18 Pus ju laquiꞌatsucuntiꞌan ju quijnanꞌan jantu chun xatapasai tachi ju tapasalh laꞌisꞌatsucuntiꞌan ju makꞌaniya quintꞌaꞌisraelitaninꞌan acsni axtaknicalh ju ixlhamapꞌaksin ju Dios.
Pus ju anuꞌ kꞌai talhpa ju Sinaí juncan junta quilachilh ju Dios na ixmaktajita chai na istsꞌista ju anch chai na lhu ixjucꞌalh ju ataputsꞌi chai na pꞌas lalh ju kꞌai un.
19 Chai ju yuꞌunch takꞌasmatlh ju istꞌasat ju skꞌolh chai vachuꞌ takꞌasmatlh ixchivinti Dios.
Para acsni takꞌasmatlh ixchivinti Dios pus tatapaininilh ni jantuch aliꞌ caꞌajunilh tuꞌuꞌ.
20 Pus na ixtatalhanan ju lapanacni.
Para palai tatalhanalh acsni takꞌasmatlh ixchivinti Dios ni naulh ni catalacatꞌalhma u calhtokꞌocalh mas va tuchi atapacxat ju cachaꞌamputulh junta vi ju anuꞌ talhpa.
21 Pus aktsꞌiya kꞌai lhitalhan ixjunita chai mas yuchi ju Moisés naulh ni na ixtalhanan chai na ixꞌaxqꞌuipꞌipꞌitnin.
22 Para ju quijnanꞌan jantu chunch xatapasai laquiꞌatsucuntiꞌan.
Alai amachakꞌan Jerusalén juntau.
Ju xaJerusalén lactꞌiyan.
Chai anchach ju vi ju Dios ju lakꞌajunta.
Chai vachuꞌ anch tavilanancha ixtalhavatꞌan anquilhnin ju na talackꞌachan.
23 Ju quijnanꞌan isꞌaskꞌatꞌan Dios makjuntau.
Chai kꞌaixtam alactꞌakꞌachanau ju aliꞌin.
Chai chux ju quijnanꞌan tsꞌokꞌulacantau ju lactꞌiyan.
Chai ju Dios quintatꞌavilan.
Yuchach ju xakꞌai ucxtin junita lhichux.
Vachuꞌ makyuꞌunch juntau ju talhilaksi ju Dios.
Chai ju chavai soknicꞌa junita ju quiꞌatsucuntiꞌan vachuꞌ.
24 Vachuꞌ ixꞌanuꞌ ju Jesús makjuntau.
Chai laꞌixꞌaninti quintaꞌaktaijutan ixlacata ju sastꞌi chivinti ju xaquintalhitꞌatakꞌoxitan ju Dios.
Chai laꞌixꞌaninti mapastꞌacꞌanicanau ni quintamapainin ju yuchi.
Pus acsni tavanan maknicalh ju Abel cꞌatsayau ni mamalakchavanicalh ixꞌaninti ju maknilh.
Para acsni tavanan maknicalh ju Jesús cꞌatsayau ni jantu xamatiꞌ mamalakchavani.
25 Pus alaktsꞌintꞌit.
Jantu anaꞌuntꞌit ni jantu kꞌasmatnipꞌutꞌunatꞌit ju Dios ju taxakꞌalayan ju chavai.
Pus ju makꞌaniya quintꞌaꞌisraelitaninꞌan jantu tatakꞌalhtaxtulh ni jantu takꞌasmatnilh ixchivinti Dios acsni alacxakꞌala ju ani lacatꞌun.
Pus ja va a ti quijnanꞌan lai catitakꞌalhtaxtu ni jantu kꞌasmatniputunau ju chivinti ixlacata ju Jesús ju malakachatachilh ju Dios.
Yuchi ju minchalh lactꞌiyan.
26 Acsni axakꞌala ju Dios ju makꞌaniya quintꞌaꞌisraelitaninꞌan ju anuꞌ lactalhpa pus lana tataclh ju lacatꞌun.
Para ju chavai ju Dios najun ni apaktam ma camalucunichokoyaꞌ ju lacatꞌun.
Para ju acsnich ma vachuꞌ ju lactꞌiyan calucununach.
27 Pus acsni najun ni va apaktam camalucunichokoyaꞌ ju lacatꞌun va nomputun ni camakꞌosucanach ju taxtokni ju laktsꞌinau ju navilh ju Dios para ju jantu jonkꞌalhita.
Chai ju chunch va yuchi ju catamaconach ju taxtokni ju jonkꞌalhita chai ju jantu lai malucunican.
28 Pus yuchi calhijunau lakꞌailaktsꞌiuch ni jonkꞌalhita ju quimpuꞌucxtinꞌan.
Chai calakꞌayayau tachi ju kꞌoxich lhiulai ju quiꞌucxtinꞌan.
Chai catalhoniyau chai jantu cacꞌapꞌau tichi chavaich ju yuchi.
29 Chunch calau ni chunch junita ju Dios tachi ju tuꞌuꞌ jipi ju lacxavakꞌojui tachi chun ju jantu kꞌox.
Ju yuchi vachuꞌ amamakꞌalhkꞌajni ju taꞌalactuꞌunun.