3 Pus ju quijnanꞌan lacaꞌiniyau ixchivinti Dios acsni naulh ni navicalh chux ju lacamunutpaꞌ va laꞌixchivinti.

Pus ju taxtokni ju laktsꞌinau ju chavai punavicalh ju taxtokni ju jantu istasui.

4 Ju Abel lacaꞌinilh ixchivinti Dios chai ixlhiyuchi makninilh ju atapacxat.

Pus yuchi palai kꞌox xalhilaktsꞌin ju Dios ju yuchi.

Palai jantu ju tuchi xaxtakni ju Caín.

Pus putasulh ni salaka xalaktsꞌin ju Dios ju Abel ni amaklhtayanalh ju tuchi ixtakni.

Chai ju chavai mas nitach ju Abel para aktsꞌiya lai pulaniyau ju isꞌatsucunti.

5 Ju Enoc lacaꞌinilh ixchivinti Dios chai yuchi lhilhiꞌancalh ju lactꞌiyan.

Jantu tavanan nilh.

Jantu tavanan lhitajucalh ju ixlacatuna ni Dios ju lhiꞌalh.

Chai najun laꞌixchivinti Dios ni na kꞌox xalhiulai ju Dios isꞌatsucunti ju Enoc mas tucaꞌ ixlhiꞌancanta.

6 Pus jantu lai tavanan navican ju tuꞌuꞌ ju kꞌox calhiulayaꞌ ju Dios acsni jantu lacaꞌinican ju yuchi.

Pus va tichi chavaich ju lakꞌayaputun ju Dios tasqꞌuini ni calacaꞌiyaꞌ ni tꞌajun ju yuchi chai ni amamispani ju yuchi va tichi chavaich ju slivasalh capuxcaulh.

7 Ju Noé lacaꞌinilh ixchivinti Dios chai acsni tavanan junilh ju Dios ni caꞌalinaꞌ ju akmuxtut pus ju yuchi lacaꞌi mas jantucaꞌ istasui ni lai camilh ju xcan.

Pus navilh lakatam barco junta taputakꞌalhtaxtulh chux ju ixtatanumanalh ixchakaꞌ.

Pus ni navilh ju barco ju Noé pus putasu ni lacaꞌinilh ixchivinti Dios.

Chai ni takꞌalhtaxtulh ju Noé ni xalacaꞌini ju Dios pus putasui ni talakꞌalhin ju xatanavi ju ixtalhavatꞌan lapanacni ni jantu xatalacaꞌini ju Noé mas ixꞌalacjuni ni catalacaꞌinilh ju Dios.

Vachuꞌ va ixlacata ni lacaꞌinilh ixchivinti Dios ju Noé yuchi lhilaktsꞌincalh ni soknicꞌa ixjunita ju isꞌatsucunti.

8 Ju Abraham lacaꞌinilh ixchivinti Dios chai acsni junicalh ni cataxtulh laꞌixtꞌun chai caꞌalh alacatam junta ixꞌanuꞌ cajunaꞌ astan pus quiclacaꞌi chai alh mas jantu iscꞌatsai ta anchach tucan ju cachaꞌananta.

9 Chai ni lacaꞌinilh ixchivinti Dios ju Abraham pus tsucucha ju anuꞌ lacatꞌun junta ixjuncanch ni caxtaknicanach.

Para tsucucha lacalonachakaꞌ.

Tachi ju va jantu makꞌan catolhcha.

Chai astan vana va chun lalh ju istsꞌalh ju Isaac ixjuncan chai ju ixpapanti ju Jacob ixjuncan.

Vana va chun ajunicalh ju yuꞌunch ni caꞌaxtaknicanach ju anuꞌ lacatꞌun.

10 Chai yuchi lhitsucucha lacalonachakaꞌ ju Abraham ni ixpacxan tus acsni cachaꞌanaꞌ ju xalakꞌachakꞌan lactꞌiyan ju jonkꞌalhita.

Yuchi ju isꞌakstu Dios ju pastaclh ta yu cajunach chai yuchach ju navilh ju anuꞌ lakꞌachakꞌan lactꞌiyan.

11 Vachuꞌ lacaꞌinilh ixchivinti Dios ju Sara ju ixꞌamachakaꞌ Abraham ixjunita.

Chai amaklhtayanalh ju tachaput ni laich caꞌalilh isꞌaskꞌatꞌa mas na ixtapasatach ju ixtakꞌayanti.

Alilh isꞌaskꞌatꞌa ni lacaꞌilh ni camuctaxtuniyaꞌ ju chivinti ju ixjunita ju Dios.

12 Pus chunch ju puꞌokxpakꞌalh ju isꞌaskꞌatꞌan ju Abraham mas tachi ju va ixnitach ixlacatuna va ixlacaꞌatalh ni jantu lai ixꞌalin ju isꞌaskꞌatꞌanꞌan ju yuꞌunch.

Para astan slivasalh na talhava ju ixꞌapapanatnich chai lana jantu lai aputekꞌekꞌocalh.

Tantsꞌuntsꞌa tajunita tachi ju stꞌacu chai tachi ju cucu ju alin laꞌixquilhtuꞌ ju alama.

13 Pus tachi chun ju pꞌulhnan icꞌamapakaꞌuta acsni tavanan tani tucaꞌ ixtaꞌamaklhtayananta ju tuchi ixꞌakꞌalhtasunita ju Dios.

Para ni vasalh talacaꞌinilh ixchivinti Dios pus tacꞌatsa ni vasalh cataꞌamaklhtayananaꞌ chai talhikꞌachalh.

Tanaulh ni jantu ixtꞌunꞌan junita ju ani lacamunutpaꞌ.

Para tachi ju va ixtatꞌajun tapasatilanin ju ani.

14 Pus ju lapanacni ju chunch tachivinin vas taꞌamamachakxaninin ni na taꞌamputun ju lactꞌiyan junta vasalh ixtꞌunꞌan junita.

15 Para ni caꞌixtapastaclh ju ixlacatꞌunꞌan junta ixtamintacha pus ixꞌalincaꞌ ju avilhchan ni laich caꞌixtaꞌanchokolh.

16 Para jantu chun ixtanaviputun.

Alai va ixtalacasqꞌuin ju lacatꞌun ju palai kꞌox.

Ju chunch va nomputun ni ixtaꞌamputun ju lactꞌiyan ni anchach ju ixtꞌunꞌan.

Chai ni chunch ju talalh pus ixlhiyuchi ju Dios jantu lhimaxanalh ni cajuncalh isDiosꞌan ju yuꞌunch.

Alai alakꞌoxinilh lakatam lakꞌachakꞌan ju lactꞌiyan.

Chai ju chunch putalacasu ni na kꞌoxich alhiula ju Dios.

17 Ju Abraham lacaꞌinilh ixchivinti Dios chai acsni laktsꞌintanu ju Dios pus quiclacaꞌi ju Abraham chai makꞌaxtaknilh ju Dios ju istsꞌalh ju Isaac ixjuncan.

Lana ixmakniputun ju lakatami istsꞌalh mas ixjuncanta ni laꞌixmacni yuchi lhikꞌach catatsucuyaꞌ ju lapanacni.

18 Tucan ixmakniputun mas ixnajunta ju Dios ni laꞌixmacni yuchi ju caꞌalinaꞌ lhu ixꞌapapanatnich.

19 Para ju Abraham cꞌatsalh ni laich camalokꞌonichokoyaꞌ ju Dios ju istsꞌalh mas caꞌixmakni.

Chai ca laich acnaulh ni tachi ju va lokꞌonchokolh ni va lacatsꞌuninch ixmakniputun ju Abraham ju istsꞌalh.

20 Ju Isaac lacaꞌinilh ixchivinti Dios chai ajunilh ju istsꞌalan ni kꞌox caꞌalinaꞌ ju isꞌatsucuntiꞌan.

Ju istsꞌalan Jacob chai Esaú ixꞌajuncan.

21 Ju Jacob lacaꞌinilh ixchivinti Dios chai acsni ixtꞌajun niniꞌ ajunilh ju ixtꞌiyunꞌan isꞌaskꞌatꞌan ju José ni na kꞌox cajunaꞌ isꞌatsucuntiꞌan.

Astan putakꞌampalhutaya laꞌixquincatiꞌ ixpalic chai lakꞌaya ju Dios.

22 Ju José lacaꞌinilh ixchivinti Dios chai acsni ixniputun pus naulh ni aktsꞌiya caꞌalacmaxtuyaꞌ ju Dios ju istꞌaꞌisraelitanin ju xalacatꞌun Egipto.

Chai ni slivasalh lacaꞌilh pus xtaklh ju lhamapꞌaksin ni calhiꞌancalh vachuꞌ ju ixꞌalucutni ju acsnich.

23 Ju ixnati chai ixpai ju Moisés talacaꞌinilh ixchivinti Dios chai acsni tavanan lakꞌaulh ju Moisés pus tamatankꞌanu ju ixpai chai ixnati lakatꞌutu malhquiyuꞌ.

Chunch ju talalh ni talaktsꞌilh ni jantu va xamatiꞌ askꞌatꞌa ixjunita chai ixlhiyuchi jantu tatalhonilh ju ixlhamapꞌaksin ju kꞌai ucxtin acsni lhinaulh ixmaknica tachi chun ju lactꞌicstꞌi tsꞌalan.

24 Chai isꞌakstu ju Moisés lacaꞌinilh ixchivinti Dios chai acsni kꞌaya lapanac va jantu lacasqꞌuilh ni calhimapakaꞌucalh ni isꞌaskꞌatꞌa cava istsiꞌ ju kꞌai ucxtin xalacatꞌun Egipto.

25 Palai kꞌox xalhiulai ni caꞌalactꞌamakꞌalhkꞌajnalh ju ixlapanacni Dios.

Palai jantu ni cakꞌachanilh pantsꞌiquis tachi chun ju alin laꞌixchakaꞌ ju kꞌai ucxtin.

Iscꞌatsai ni alactuꞌunti cava ni jantu caꞌaꞌaktaiju ju istꞌaꞌisraelitanin.

26 Palai lhitapalai ixlhiulai mas camakꞌalhkꞌajnalh va ixlacaꞌatalh ni ixlapanac Dios ixjunita.

Palai jantu mas ixꞌanuꞌ cajunkꞌo chux ixmakꞌaliꞌ ju xalacatꞌun Egipto.

Chunch ju naulh ni na ixnavi cuenta ju ixtalhaja ju caxtakniyaꞌ ju Dios astan.

27 Chai ni lacaꞌinilh ixchivinti Dios ju Moisés pus jantu talhonilh ju ixtalhkꞌamti ju kꞌai ucxtin acsni amaxtulh ju istꞌaꞌisraelitanin ju xalacatꞌun Egipto.

Chai jantu tavanan caplh tuchi ixnaviputun ni tachi ju vasalh ixlaktsꞌin ju Dios.

28 Chai va ixlacata ni lacaꞌinilh ixchivinti Dios ju Moisés yuchi lhinaulh ixmaknica ju askꞌatꞌa borregojni chai ixmucꞌaca ju ixꞌacꞌalhni laxamalhtich ju lakatamin chakaꞌ.

Ju chunch mas catapasayaꞌ ju anquilh ju malakachalh ju Dios para jantu caꞌamakniyaꞌ ju xalackꞌajin istsꞌalan ju quintꞌaꞌisraelitaninꞌan.

29 Chai ju quintꞌaꞌisraelitaninꞌan talacaꞌinilh ixchivinti Dios chai tatapasalh laꞌixlacaitat lacatꞌicstꞌi alama junta saslapulh juncan.

Chai junta tatapasalh pus Dios maxixi ju xcan chai va axixnita ixjunita ju lacatꞌun.

Para acsni vana va chun ixtapuꞌamputun ju amachakꞌan Egipto pus lana amalacꞌacnukꞌo ju xcan.

30 Ju quintꞌaꞌisraelitaninꞌan talacaꞌinilh ixchivinti Dios chai ju Dios maktalh ju xakꞌex ju ixya ixtalakꞌachoko ju lakꞌachakꞌan Jericó acsni tatalakꞌachokolh ju yuꞌunch lakatujun avilhchan.

31 Ju Rahab alactuꞌunuꞌ chakoꞌulh ixjunita para ju yuchi lacaꞌinilh ixchivinti Dios chai yuchi jantu alhitꞌanilh ju ixtꞌaꞌamachakꞌan ju jantu ixtatalhoni ju Dios.

Pus tasu ni lacaꞌinilh ixchivinti Dios ni kꞌox amaklhtayanalh ju quintꞌaꞌisraelitaninꞌan ju taquitankꞌajlaktsꞌilh ju ixlakꞌachakꞌan.

32 Pus ca jantu lai actilajuniu ju aliꞌ ni na kꞌox panicni acchivinilh ni aclajunau tuchi tanavilh ju Gedeón chai ju Barac chai ju Sansón chai ju Jefté chai ju David chai ju Samuel chai ju makꞌaniya lapanacni ju ixtanajun ixchivinti Dios.

33 Pus ni talacaꞌinilh ixchivinti Dios ju aliꞌin pus tatꞌalalhajalh aliꞌ lackꞌai lakꞌachakꞌanixni.

Alhajanalh ju yuꞌunch ju ixtalacaꞌini ju Dios.

Chai ju aliꞌin sok tanavi acsni kꞌai ucxtinin ixtajunita.

Chai ju aliꞌin taꞌamaklhtayanalh tuchi ixꞌakꞌalhtasunita ju Dios.

Chai ju aliꞌin jantu ta aꞌulhtulh ju maktilin acsni va kꞌaixtam ixꞌalactꞌatꞌalhnucanta.

34 Chai ju aliꞌin jantu tuꞌuꞌ tatapasalh mas ixꞌamacaꞌancanta junta na kꞌai ixmaktajita.

Ju aliꞌin tatakꞌalhtaxtulh junta ixꞌamakniputuncan.

Chai ju aliꞌin mas matiꞌ ixjunita ixtachaputꞌan na tachapunin tava.

Ju aliꞌin na tachapunin taxajcha lacalasat.

Chai tamakꞌantsꞌalakꞌo ixchuxꞌan ju taropajni ju makat ixtamintacha ni va ixtatꞌalasaputun ju yuꞌunch.

35 Vachuꞌ ixꞌalin ju chakolun ju talacaꞌinilh ixchivinti Dios chai mas ixma xanin istsꞌalh laꞌixchakaꞌ para taꞌamaklhtayananchokolh xalakꞌajun acsni malokꞌonichokocalh.

Chai ju aliꞌin talacaꞌinilh ixchivinti Dios para alhimakchapucalh tus tani.

Ju yuꞌunch lai caꞌixtatakꞌalhtaxtulh ni caꞌixtanaulh ni jantu vana catalhilacaꞌanaꞌ ju Dios.

Para jantu ixtanaviputun ju chunch.

Palai kꞌox talhiula mas caꞌamaknicalh ni ixtacꞌatsai ni caꞌamalokꞌonichokocanaꞌ chai caꞌaxtaknicanaꞌ ju palai kꞌox isꞌatsucuntiꞌan ju lactꞌiyan.

36 Chai ju aliꞌin na alhimakchapucalh acsni na alhitsꞌiꞌincalh chai alakanekmacalh.

Chai ju aliꞌin atꞌalhnucalh chai amakchꞌicalh chai achꞌanchꞌicalh lacacadena.

37 Ju aliꞌin alacatꞌalhmacalh.

Ju aliꞌin achꞌucꞌupaklhtꞌiyucalh.

Ju aliꞌin alaktsꞌintanucalh ni vasalh talacaꞌinilh ixchivinti Dios u jantu.

Ju aliꞌin amaknicalh lacacuchilu.

Ju aliꞌin ixꞌapuxcocan chai takꞌostsuculh.

Chai ixtalhimalakchꞌinin ixꞌaxtꞌakꞌan borregojni chai ixꞌaxtꞌakꞌan chivo.

Ju yuꞌunch na kꞌox quilhpatinin ixtajunita.

Chai na ixꞌamamakꞌalhkꞌajnican.

Chai na alhimakchapucalh.

38 Ju yuꞌunch ixtaꞌucxuntꞌajun junta va aseknicꞌa ixjunita chai lacaqꞌuivin.

Chai istatsucui junta va laclhucucu ixjunita lactalhpa chai junta laclhucucu ixjunita ju lacatꞌun.

Pus ju ani lapanacni slivasalh na lackꞌoxin lapanacni ixtajunita.

Chai jantu ixlhijun ni va amachakaꞌan lacamunutpaꞌ caꞌixꞌalhimispacalh.

39 Ju Dios na kꞌox xaꞌalhiulai ixchuxꞌan ju yuꞌunch ni ixtalacaꞌinich ju yuchi.

Para ju yuꞌunch jantu taꞌamaklhtayanalh tuchi ixꞌakꞌalhtasunita ju Dios.

40 Pus yuchi jantu tuꞌuꞌ talhiꞌamaklhtayanalh ni ispastacta ju Dios ju tuꞌuꞌ ju palai kꞌox ju quilacataꞌan quinchuxꞌan.

Yuchi ni quintapastacnin ju Dios ju quijnanꞌan chai naulh ni palai kꞌox ni va kꞌaixtam aquintaxtakniyan ju sastꞌi quiꞌatsucuntiꞌan ju lactꞌiyan.