10
Pus ju ixlhamapꞌaksin Moisés chunch ixjunita tachi ju tuꞌuꞌ makꞌantsꞌastꞌilit.
Va ixpumamachakxani ju quilacpaꞌitniꞌan ni caꞌalinaꞌ astan ju taxtokni ju palai kꞌox.
Pus yuchi jantu lai xalhilasoknicꞌai isꞌatsucuntiꞌan ju lapanacni ju ixtalakꞌayaputun ju Dios tachi ju ixnajun ju anch.
Jantu lai ixꞌalasoknicꞌai isꞌatsucuntiꞌan ju lapanacni mas tamin cꞌata tamin cꞌata vana yuꞌ ju atapacxat ju ixꞌamakninican ju Dios.
2 Pus ni laich cava islasoknicꞌai isꞌatsucuntiꞌan ju lapanacni acsni ixtamaknini ju Dios ju atapacxat pus jantu istasqꞌuini ni va tsa tsa ixtamakni.
Pus ju chunch ixtalakꞌayai ju Dios ni caꞌixꞌaxacanikꞌalhicalh ixtalakꞌalhinꞌan pus jantu vana ixtapastactsuculh ju ixꞌalactuꞌuntiꞌan.
3 Para alai acsni ixmaknican ju atapacxat chux cꞌata pus ixpumapastꞌacꞌanicanch va ni alactuꞌunin ixtajunita.
4 Pus ju va ixꞌacꞌalhni ju tuꞌuꞌ vacax u tuꞌuꞌ chivo jantu lai xacai ju talakꞌalhin.
5 Yuchi chani lhijunilh ju Cristo ju ixpai acsni tavanan quilachilh ju ani lacamunutpaꞌ:
Jantu tucan ju lhakꞌailaktsꞌin ju lacꞌasqꞌuin ju uxintꞌi.
Jantiyuꞌ ju lacasqꞌuin ni catamakninin ju lapanacni ju tuꞌuꞌ atapacxat.
Yuchi qꞌuilhixtꞌaknitꞌa ju quilacatuna ni acmakꞌaxtꞌakꞌaꞌ quiꞌakstu.
6 Ju uxintꞌi jantu kꞌachꞌani acsni lacxavanicꞌan ju tuꞌuꞌ atapacxat.
Nin acsni makninicꞌan ju tuꞌuꞌ atapacxat ixtapalh ju alactuꞌunti.
7 Pus acsnich ju icjunin ni acnaviniyan ju minkꞌachat.
Yuchi iclhimilh ju ani.
Acnaviyaꞌ tachi ju tsꞌokcanta laminchivinti ju quilacata.
Chunch ma naulh ju Cristo.
8 Pus ju Cristo naulh ni jantu kꞌachani ju Dios chai jantu lacasqꞌuin ju yuchi ni catamakninilh ju atapacxcat ju lapanacni nin tuꞌuꞌ catalhikꞌailaktsꞌinilh nin yuchi ni cataxavanilh ju tuꞌuꞌ atapacxat nin tuꞌuꞌ cataxtaknilh ixlacata ixꞌalactuꞌuntiꞌan.
Chunch ju naulh mas chunch ju ixlhamapꞌaksinincanta laꞌixlhamapꞌaksin ju Moisés.
9 Chai astan naulh ni yuchi ju lhimilh ni canaviniyach ju ixkꞌachat ju ixpai Dios.
Pus acsni naulh ju chunch va nomputun ni makꞌosulh ju xapꞌulhnan lhamapꞌaksin chai taiꞌula ju sastꞌi.
10 Pus va ixlacaꞌatalh ni navinilh ixkꞌachat ju Dios ju Jesús chai makꞌaxtaklh laꞌixꞌaninti ixlacatuna pus lai salaka cajunau laꞌixmacni Dios.
Pus ju yuchi navinikꞌolh ixkꞌachat ju Dios acsni paktam xtaklh ju ixlacatuna chai jantu tasqꞌuini ni caxtakchokolh aktam.
11 Pus tachi chun ju ixpalijniꞌan ju quintꞌaꞌisraelitaninꞌan chux avilhchan tachꞌalhcatnan chai na paklhu tamaknini ju Dios ju atapacxat.
Chai jantu tavanan tamapaxai ju tuchi tamaknini ju Dios.
Para ju anuꞌ atapacxat jantu tavanan lai xacai ju alactuꞌunti.
12 Para ju Cristo va paktam ju xtaklh ju isꞌatsucunti ixlacata quiꞌalactuꞌuntiꞌan.
Chai astan tavi vanin junta vi ju Dios.
13 Chai anch ju pacxanvi tus acsni calhajakꞌocanach ju ixtꞌalaxcai.
14 Pus ju Jesús va paktam ju xtaklh ju isꞌatsucunti para chunch ju soknicꞌa punavikꞌalhi yuꞌunch ju salaka tajunita laꞌixmacni Dios.
15 Chai vana va chun quintajunan ju Spiritu Santu lacaꞌatsꞌoknut.
Pus chani naulh:
16 Ma najun ju Dios ni ma yuchi ju ani ju chivinti ju caꞌalaclhitꞌatakꞌoxiyaꞌ acsni catapasayaꞌ ju anuꞌ avilhchan.
Ma caꞌaxtakniyaꞌ ju kꞌox ixꞌalhunutꞌan ni catanaviputunach ju tuchi lacasqꞌuin ni catanavi.
Chai ma caꞌaxtakniyaꞌ ju kꞌox ixtacꞌatsanꞌan ni laich catacꞌatsayaꞌ tuchi ju lacasqꞌuin ni catanaviyaꞌ.
17 Chai astan chani ma naulh:
Jantu tavanan actipastacchokolh ju alactuꞌunti ju tanavita nin yuchi ju talakꞌalhin ju tanavita.
Chunch najun laꞌixchivinti Dios.
18 Pus acsni quintaxacanitan ju quiꞌalactuꞌuntiꞌan ju Dios pus jantu vana tasqꞌuini ni camaknicalh aliꞌ atapacxat ixtapalh quiꞌalactuꞌuntiꞌan.
Tasqꞌuini ni vanin catsucuyau laꞌixmacni Dios
19 Pus ji quiꞌalakꞌavin ni quintalhixacanitan ju quiꞌalactuꞌuntiꞌan ju ixꞌacꞌalhni ju Cristo pus lai xakꞌalayau ju Dios quiꞌakstuꞌan chai jantu tasqꞌuini ni catalhananau.
20 Lai xakꞌalayau ju Dios ni lhitꞌapꞌuxlh isꞌatsucunti ju Jesús ju quilacataꞌan.
Chai acsni nilh ju yuchi pus lana kꞌexlh ju anuꞌ pumpuꞌ laquimpujitatꞌan ju israelitanin juntau ju ixpulhvakpitsican ju chakaꞌ ni jantu lai va kꞌaya ixtatanui ju palijni ju ixlhipulactam junta tucan ixchin ju Dios.
Para ju chavai va tichi chavaich lai xakꞌalai ju Dios.
21 Chai tachi chun ju quijnanꞌan ju lhilacaꞌanau ju Cristo pus ju yuchi xakꞌai quimpaliꞌan junita.
Chai ju yuchi chꞌalhcatnan ju quilacataꞌan ju isꞌaskꞌatꞌan Dios juntau.
22 Yuchi ixlhichux quiꞌalhunutꞌan vanin calhitsucu laꞌixmacni Dios.
Chai ni chꞌakꞌacanta ju quiꞌalhunutꞌan ixlacata ju quiꞌalactuꞌuntiꞌan chai ni akpaxtau pus vasalh calhilaksiyau ju yuchi.
23 Slivasalh calacaꞌiyau ni aquintamakꞌalhtaxtuyan ju Dios chai jantu va tam tam capastacvi.
Chunch ju canaviyau ni aktsꞌiya muctaxtui ju Dios tuchi najun.
24 Vachuꞌ capastacvi ta yu lai calaꞌaktaiju ni laich palai calapumapainiu chai laich palai canaviu ju kꞌox.
25 Pus jantu cacꞌapꞌau tachi ju talai ju aliꞌin ni jantu caꞌanau junta tatakꞌaixtꞌokꞌa ju talakꞌayai ju Dios.
Alai calamapꞌaksiyau ju pumatamin.
Chai palai canaviu ju chunch ni laktsꞌinauch ni vaninch minta ju avilhchan acsni caminchokoyaꞌ ju Cristo.
26 Pus ni va catailhiꞌanau ju alactuꞌunti mas mispatauch ju stavasalanti ixlacata ju Cristo pus jantu lai tuꞌuꞌ lhitaxacai ju quiꞌalactuꞌuntiꞌan.
27 Va yuchi ni caꞌalinaꞌ ju kꞌai quimakꞌalhkꞌajnatꞌan ju slivasalh lhitalhan cajunaꞌ.
Chai catalhkꞌamnaꞌ ju Dios chai calacxavacanaꞌ tachi chun ju ixtꞌalaxcai.
28 Ni xamatiꞌ ixpꞌakx ju ixlhamapꞌaksin ju Moisés pus ixmaknican laꞌixchivintiꞌan lhipumatꞌui u lhipumatꞌutu ju ixtalaktsꞌinta.
Chai jantu ixmapainican.
29 Pus ja jantu cꞌatsꞌayatꞌit ni lhijunch ni palai kꞌai makꞌalhkꞌajnat ju caxtaknicalh ju lapanac ju jantu tuꞌuꞌ lhiulai ju istsꞌalh Dios chai najunta ni jantu lhitapalai ju ixꞌacꞌalhni.
Tanajun ni jantu lhitapalai ju ixꞌacꞌalhni mas yuchi ju mavasalalh ju chivinti ju quintalhitꞌatakꞌoxitan ju Dios chai mas yuchi ju salaka navi quiꞌalhunutꞌan.
Vachuꞌ ju anuꞌ lapanac lana maktalhkꞌaman ju Spiritu Santu ju naviniputun lamapainin ni xakꞌalai laꞌixꞌalhunut.
30 Pus cꞌatsayau ni ma chani naulh ju Dios:
“Quitꞌin ju icꞌamamakꞌalhkꞌajniniꞌ.
Quitꞌin ju acmamapalaniyaꞌ”.
Chunch ju ma naulh ju Dios.
Chai vachuꞌ ma chani naulh:
“Quitꞌin quiꞌakstu ju acmakꞌosaspitaꞌ ju quilapanacni”.
31 Pus slivasalh kꞌai lhitalhan cava ni aquimamakꞌalhkꞌajni ju Dios ju lakꞌajunta.
32 Para apꞌastꞌactꞌit ju anuꞌ avilhchan ju tapasatach acsni tavanan mispꞌachitꞌit ju Cristo.
Pus na lhu xachꞌixatꞌit ju kꞌai makꞌalhkꞌajnat.
33 Ju aliꞌin lamilhiꞌuxijnan laꞌixtalhavat lapanacni slivasalh ixmamaxanicꞌanatꞌit chai ixmamakꞌalhkꞌajnicꞌanatꞌit.
Chai acsni ixꞌalhimakchapucan ju aliꞌin pus ju aliꞌin lamilhiꞌuxijnan jantu ixtꞌalhananatꞌit.
Alai ixlaꞌaktꞌaiꞌuyatꞌit.
34 Chai na ixꞌaꞌaktꞌaiꞌuyatꞌit ju ixꞌatꞌalhnucanta va ixlacaꞌatalh ni ixtalhilacaꞌanta ju Cristo.
Chai na ixkꞌachꞌanatꞌit mas ixꞌatꞌaiꞌinicꞌanatꞌit ju mintaxtokniꞌan.
Chunch ju navitꞌit ni cꞌatsꞌayatꞌit ni pꞌacxanatꞌit lactꞌiyan ju taxtokni ju palai kꞌox chai ju jonkꞌalhita.
35 Pus ju chavai jantu anaꞌuntꞌit ni ca palai kꞌox cava ni jantu na chun ju alhilacꞌapꞌinaꞌitꞌit ju Cristo.
Pus ni va tachi alhilacꞌapꞌinaꞌitꞌit ju yuchi pus caꞌalinaꞌ ju kꞌai mintalhajaꞌan.
36 Va tasqꞌuini ni jantu jeks aꞌutꞌit.
Va anavinitꞌit ixkꞌachat ju Dios chai ju yuchi catamuctaxtuniyan ju chivinti ju takꞌalhtasunitan.
37 Pus laꞌixchivinti Dios ju tsꞌokcanta chani najun:
Jantuch makꞌan cꞌacx tus cachinach ju yuchi ju caminaꞌ.
Jantuch catitamakꞌa.
38 Pus ju lapanac ju soknicꞌa junita isꞌatsucunti laquimacni caꞌalinaꞌ isꞌatsucunti lactꞌiyan ni quilhilaksi.
Para ju yuchi ni aquincꞌapꞌaꞌ pus ju quitꞌin jantu kꞌox actilhiulayaꞌ ju anuꞌ lapanac.