Junta lakꞌayacan ju Dios ju ani. Chai junta lakꞌayacan ju Dios ju lactꞌiyan
9
Pus ju pꞌulhnan chivinti ju ixꞌalaclhitꞌatakꞌoxita ju Dios ju makꞌaniya quilacpaꞌitniꞌan vachuꞌ ixnajun ta yu catapulakꞌayalh ju Dios.
Chai ixꞌalin ju chakaꞌ ju ani lacamunutpaꞌ junta ixtalakꞌayai ju yuchi.
2 Pus ju anuꞌ chakaꞌ va lonachakaꞌ ixjunita.
Chai pulactꞌui ixjunita.
Ju pulactam junta pꞌulhnan putanucan pus ixlhimapakaꞌucan ixchakaꞌ Dios.
Chai ju anch ixya lakatam kꞌai ixputayan maclhcu chai ju mixa junta ismokslacan ju xkapavati ju ixlhikꞌailaktsꞌinican ju Dios.
3 Chai junta ixlhvakpitsicanta ju anuꞌ chakaꞌ ixmucꞌacanta lakatam kꞌai pumpuꞌ.
Chai ju apulactam anchach tucan ju ixchin ju Dios.
4 Chai ju anch ixꞌalin lakatam kꞌai pumapꞌun ju si oro ixlhinavicanta.
Para tachi tuꞌuꞌ mixa istasui.
Vachuꞌ ixꞌalin lakatam pꞌaklat ju ixlhimanicanta ju oro.
Pus ju lacapꞌaklat ixtajun lakatam xalu oro ju ixputajun lacatsꞌunin ju anuꞌ vaiti ju ixminacha lactꞌiyan ju mana ixjuncan.
Vachuꞌ ixtajun ixpalic ju Aarón ju pꞌunlh chai ju laklhtꞌakꞌalh chiux junta istsꞌokcanta ju chivinti ju alaclhitꞌatakꞌoxilh ju Dios ju makꞌaniya quilacpaꞌitniꞌan.
5 Chai laꞌixꞌucxni ju anuꞌ pꞌaklat ixꞌayocanta lakatꞌui anquilhnin ju ixꞌaxapalaxtucanta lacaꞌoro.
Chai ju yuꞌunch querubines ixꞌajuncan.
Chai anchach ju ixmalacasucan ju ixꞌamatuncunit ju Dios.
Chai ju anuꞌ querubines ixtaꞌakxtakmai laꞌixpakꞌachu ixꞌucxni ju anuꞌ pꞌaklat junta lax ixtamucꞌai lactsꞌunin acꞌalhni ixpuxacacan ixtalakꞌalhinꞌan ju lapanacni.
Para jantu lai lhu actilajuniu ixlacata ju ani taxtokni ju chavai.
6 Pus acsni talakꞌoxikꞌolh ju chakaꞌ pus ju palijni tatsuculh tanunin junta quilhpꞌulhya chakaꞌ.
Va ixtaꞌan navinin ta yu ixtapulakꞌayai ju Dios tachi ju ixꞌajuncanta.
7 Para ju ixlhipulactam va isꞌakstu ju ixꞌan ju xakꞌai pali.
Chai ju yuchi va paktam ju tamin cꞌata ju ixꞌan.
Chai aktsꞌiya ixlhiꞌan ju ixꞌacꞌalhni ju atapacxat.
Chai ju yuchi lax ixmucꞌai ju acꞌalhni laꞌixꞌucxni ju anuꞌ pꞌaklat ixlacata ixtalakꞌalhin isꞌakstu chai ixlacata ixtalakꞌalhinꞌan ju ixtꞌalapanacni.
8 Pus ju Spiritu Santu quintapumamachakxaniputunan ni tulai va kꞌaya catanu xamatiꞌ lacachakaꞌ junta ixchaꞌan ju Dios acsni vana chun ixtitalakꞌayai ju Dios tachi ju pꞌulhnan ilhcaꞌulata ju Dios.
9 Pus tachi chun ju ani alin tuchi quintamasuniputunan.
Va quintamavasalaniputunan ni jantu tavanan lai ixꞌaxacani ixꞌalhunutꞌan ju lapanacni ju lhakꞌailaktsꞌin ju ixtaxtakni ju Dios nin yuchi ju ixꞌacꞌalhni ju tuꞌuꞌ atapacxat ju ixtamaknini ju yuchi.
10 Pus ju anuꞌ lhamapꞌaksin va ixnajun tuchi ixtalakxtuch ju lai ucan chai tuchi lai kꞌotcan chai ta yu istasqꞌuini ni catamakchakꞌalh u catapaxlh.
Va si lhamapꞌaksin ixjunita ixlacata ixlacatunaꞌan.
Para va ixꞌaxtaknican ju chunch tus acsni chilh ju avilhchan acsni mapaxalh ju Dios ju lhamapꞌaksin chai alaclhitꞌatakꞌoxilh ju sastꞌi chivinti ju lapanacni.
11 Pus ju Cristo quilatachilh chai xakꞌai quimpaliꞌan junita ixlacata ju sastꞌi lhamapꞌaksin ju palai kꞌox junita.
Chai astan ju yuchi anchokolh ju lactꞌiyan.
Chai junta chꞌalhcatnan ju yuchi laꞌixpupali palai kꞌox chai chunchach junita tachi ju aktsꞌiya ispastacta ju Dios.
Palai jantu chun ixjunita junta ixtalakꞌayai ju Dios ju makꞌaniya quintꞌaꞌisraelitaninꞌan ju ani lacatꞌun.
Chai junta chꞌalhcatnan ju Cristo pus jantu va ixtanavin lapanacni junita nin xachakaꞌ ju ani lacamunutpaꞌ cava.
12 Ju Cristo ni tanulh laꞌixpupali va paktam ju tanulh junta vi ju Dios chai anchach ju vilhkꞌalhi.
Para jantiyuꞌ ju lai xaputanui ni ixmaknita ju tuꞌuꞌ chivo u tuꞌuꞌ askꞌatꞌa vacax tachi ju ixtalai ju aliꞌin palijni.
Alai tanu ni taxtulh ixꞌacꞌalhni isꞌakstu.
Chai ju chunch lai caꞌalinaꞌ ju quiꞌatsucuntiꞌan jonkꞌalhita lactꞌiyan.
13 Ju laꞌixlhamapꞌaksin ju Moisés ixꞌalin ju atsꞌoknut junta ixnajun ni tachi ju va lhquiliqui cajunlh ju ixlacatunaꞌan laꞌixmacni Dios ni jantu catamuctaxtulh tachi ju najun lacalhamapꞌaksin.
Para lai salaka cajunchokolh ixlacatunaꞌan ni va calacamucꞌacalh ixꞌacꞌalhni ju xapai vacax u ixꞌacꞌalhni chivo u va calaxꞌalacpulacꞌakꞌavalh ju lacaxcan ju lhiya ju xalhcꞌacꞌa ju saꞌatsiꞌ vacax.
14 Pus ni lai ixacai ju ixlacatunaꞌan ju lapanacni ju ixꞌacꞌalhni ju va tuꞌuꞌ atapacxat ja va a ti yuchach jantu lai aquintaxacaniyan ju quiꞌalhunutꞌan ixꞌacꞌalhni ju Cristo.
Pus ju Spiritu Santu jonkꞌalhita.
Chai yuchi ju aktaijulh ju Cristo ni lai xamakꞌaxtaknichokoi isꞌatsucunti ju Dios.
Chai ju Cristo matiꞌ lana junita ju ixtalakꞌalhin.
Chai ni taxtulh ixꞌacꞌalhni ju quilacataꞌan pus jantu tasqꞌuini ni calhamakꞌaninitsucu ju ixnavica ju jantu lai xapulhitajuyau ju quiꞌatsucuntiꞌan ju jonkꞌalhita.
Alai calakꞌayayau ju Dios ju lakꞌajunta.
15 Pus ni nilh ju Cristo ixtapalh ju alactuꞌunti pus pumavasala ni aquintamuctaxtuniyan ju Dios ju sastꞌi chivinti ju quintalhitꞌatakꞌoxitan ixlacata ju quiꞌatsucuntiꞌan jonkꞌalhita.
Pus ju Cristo vachuꞌ mapalalh ixtapalh ixꞌalactuꞌuntiꞌan ju makꞌaniya quintꞌaꞌisraelitaninꞌan ju ixtanavita acsni jantu lai ixtamuctaxtui tachi ju ixnajun lacapꞌulhnan chivinti ju alaclhitꞌatakꞌoxilh ju Dios.
Chai ju chavai tachi chun ju asacxtulh ju Dios cataꞌamaklhtayananaꞌ ju sastꞌi isꞌatsucuntiꞌan ju conkꞌalhiyanta ju lactꞌiyan tachi ju quintakꞌalhtasunitan.
16 Pus tam xamatiꞌ laquilhiquijnanꞌan ju israelitanin juntau laich catsꞌokꞌulayaꞌ ta yu capulhvakpitsicanaꞌ ju ixꞌalinta acsni caniyaꞌ ju yuchi.
Para va acsnich ju lai lhvakpitsican acsni mavasalacanta ni nilh ju ixnonaꞌ ju chivinti.
17 Pus ju anuꞌ chivinti junta najunta ta yu capulhvakpitsicanach ju ixꞌalinta tam xamatiꞌ va acsnich ju tachapun acsni caniyaꞌ ju ixnonaꞌ ju chivinti.
Para acsni tꞌajuncaꞌ ju amanavin pus jantucaꞌ lhitapalai ju chivinti.
Acsni caniyaꞌ acsnich ju lhitapalai ju anuꞌ atsꞌoknut.
18 Pus vana va chun ixlacata ju pꞌulhnan chivinti ju alaclhitꞌatakꞌoxichalh ju Dios ju makꞌaniya quilacpaꞌitniꞌan.
Tus acs ixlhitapalai acsni tavananch ixtamakni ju tuꞌuꞌ atapacxat chai ixtaxtunilh ixꞌacꞌalhni.
19 Pus ju Moisés acsni ajunkꞌo ju lapanacni tachi chun ju chivinti ju istsꞌokcanta lacalhamapꞌaksin pus chꞌapalh lacatsꞌunin ju ixꞌacꞌalhni ju askꞌatꞌa vacax chai ixꞌacꞌalhni ju satsꞌalan chivo chai lhiyocalh lacatsꞌunin xcan.
Chai chꞌapalh ju achꞌitin ju hisopo juncan chai tꞌachꞌapalh ju ixꞌapamat borrego ju ixlhimanicanta slapulh.
Chai tꞌokꞌo mataju lacaꞌacꞌalhni.
Chai lax alacpukꞌava ju alhiqui junta istsꞌokꞌulacanta ixlhamapꞌaksin Dios.
Vachuꞌ lax alaclacamucꞌalh ju lapanacni.
20 Chai alacjuni:
“Ju ani acꞌalhni mavasalai ju chivinti ju talhitꞌatakꞌoxitan ju Dios.
Yuchi ju chivinti ju iclajunau ju chavai”.
Chunch ma naulh ju Moisés.
21 Chai vana va chun ju lacamucꞌalh ju acꞌalhni ju chakaꞌ junta ixtalakꞌayai ju Dios chai chux ju ixtapuchꞌalhcatnan ju palijni.
22 Pus ju lacalhamapꞌaksin na lacatsꞌunin taxtokni ju jantu lhixacacan ju acꞌalhni.
Chai jantu lai macꞌacxanican ju alactuꞌunti ni jantu taxtui ju acꞌalhni.
Va ixlacata ixꞌaninti ju Cristo lai xacacan ju alactuꞌunti
23 Junta ixtalakꞌayai ju Dios ju quintꞌaꞌisraelitaninꞌan ju ani lacamunutpaꞌ lana chunch ixnavicanta tachi ju xalhilaktsꞌintaiti ju vilhcha lactꞌiyan junta lakꞌayacan ju Dios.
Pus lacachakaꞌ junta ixtalakꞌayai ju Dios ju ani lacamunutpaꞌ pus aktsꞌiya istasqꞌuini ni camaknicalh ju atapacxat ni lai calhixacacalh ixꞌacꞌalhni ju taxtokni ju anch.
Para tasqꞌuini ni caꞌalilh ju acꞌalhni ju palai laklhu ixtapalh cava ni laich capuxacacalh ju quiꞌalhunutꞌan ju quijnanꞌan ju caꞌanau ju lactꞌiyan.
24 Pus ju anuꞌ chakaꞌ ju ixtayajuta ju ani va chunch ju navicalh tachi ju alinacha ju lactꞌiyan junta lakꞌayacan ju Dios.
Pus ju Cristo acsni tavanan amaklhtayanalh ixpupali jantu tanu ju lacachakaꞌ junta lakꞌayacan Dios ju va ixtanavin lapanacni junita.
Para ju Cristo alai tanu ju lactꞌiyan.
Chai anch ju vilhcha ju chavai laꞌixꞌucxlacapuꞌ Dios ju quilacataꞌan.
25 Pus ju xakꞌai ixpalijniꞌan ju quintꞌaꞌisraelitanin paktamin ju tamin cꞌata tatanu junta ixchin ju Dios.
Chai ixtalhiꞌan ixꞌacꞌalhni ju atapacxat.
Para ju Cristo jantu paklhu ju nilh ni laich paklhu caxtaklh ju ixꞌacꞌalhni.
26 Ni chunch ixlalh pus caꞌistasqꞌuini ni na paklhu ixnilh ju Cristo tus acsni tavanan navicantacha ju lacamunutpaꞌ.
Para alai va paktam ju quitalacasuchilh ju Cristo acsni aclalh ju cꞌata ju ilhcaꞌulata ju Dios.
Chai quilhitapꞌuxchilh ju isꞌatsucunti ju quilacataꞌan ni lai aquintaxacaniyan ju quintalakꞌalhinꞌan.
27 Pus ju Dios lhcaꞌulata ni va paktamch ju tani ju lapanacni chai astan caꞌamakꞌosaspitcanach.
28 Pus vana va chun ju Cristo.
Ju yuchi va paktam ju nilh acsni mapalalh ixtapalh ju ixꞌalactuꞌuntiꞌan na lhu lapanacni.
Para ju yuchi catalacasuchokoyaꞌ ju ani lacamunutpaꞌ.
Para ju acsnich jantiyuꞌ ju quiꞌalactuꞌuntiꞌan ju calhiminaꞌ mapalhnaꞌ.
Alai va aquintaminan makꞌalhtaxtunun ju quijnanꞌan ju pacxanauch ju yuchi.