Alin ju sastꞌi chivinti ju alactꞌatakꞌoxita ju Dios ju lapanacni
8
Pus ju tucan iclajumputunau yuchi ni alin pumatam xakꞌai quimpaliꞌan ju chunch junita tachi ju iclajuntau.
Chai ju yuchi vilhcha lactꞌiyan vanin junta vi ju Dios.
2 Chai ju yuchi navi ixlhichꞌalhcat ju ixpupali ju lactꞌiyan junta vasalh lakꞌayacan ju Dios.
Chai ju anch jantu va tam xamatiꞌ lapanac ju navita.
Para isꞌakstu ju Dios ju navilh.
3 Pus tachi chun ju ixpalijniꞌan ju quintꞌaꞌisraelitaninꞌan alhilhcaꞌulacanta ni cataxtakniyaꞌ ju tuꞌuꞌ lhakꞌailaktsꞌin ju Dios chai catamakniniyaꞌ ju atapacxat.
Pus aktsꞌiya istasqꞌuini ni vachuꞌ caꞌalilh tuchi caxtakniyaꞌ ju Dios ju Jesucristo ni vachuꞌ pali junita.
4 Pus ju Jesús ni vanach tꞌajuncaꞌ cava ju ani lacamunutpaꞌ pus jantu lai ixtitanu laca sastꞌi ixpupali va ixlacaꞌatalh ni ixtaxtꞌakꞌacaꞌ ixlhakꞌailaktsꞌinꞌan ju ixpalijniꞌan ju quintꞌaꞌisraelitaninꞌan tachi ju najun laꞌixlhamapꞌaksin ju Moisés.
5 Chai ixlhichꞌalhcatꞌan ju ixpalijniꞌan ju quintꞌaꞌisraelitaninꞌan chunch ju jumputun tachi ju navicantacha ju lactꞌiyan.
Chai ju yuꞌunch anch ju tachꞌalhcatnan junta navicanta tachi ju junita ju xalhilaktsꞌintaiti ju lactꞌiyan.
Chai cꞌatsayau ni chunch junita ni chani junilh ju Moisés ju Dios acsni ixnaviputun ju anuꞌ lonachakaꞌ ju ixpujitatꞌan cajunaꞌ pantsꞌiquis.
Juni:
“Alaktsꞌich.
Lana chunch ju anavitꞌi chux tachi ju junita ju lhilaktsꞌintaiti ju icmasunin acsni xaquintꞌavilhtꞌi ju anuꞌ akstijun”.
Chunch ma junilh ju Dios.
6 Para palai kꞌox ju lhichꞌalhcat ju xtaknicanta ju Cristo.
Palai jantu tachi ju ixtachꞌalhcatnan ju ixpalijniꞌan ju quintꞌaꞌisraelitaninꞌan.
Chai palai kꞌox ju chivinti ju quintalhitꞌatakꞌoxitan ju Dios ni palai kꞌox ju chivinti ju quintakꞌalhtasunitan.
Jantu chun ixjunita ju pꞌulhnan chivinti ju alaclhitꞌatakꞌoxilh ju makꞌaniya quilacpaꞌitniꞌan.
7 Pus ju makꞌaniya quintꞌaꞌisraelitaninꞌan jantu lai xatatakꞌalhtaxtui mas ixtalhilaksi ju anuꞌ pꞌulhnan chivinti ju alaclhitꞌatakꞌoxilh ju Dios ni jantu lai ixtamuctaxtui.
Pus ni laich cava ixtatakꞌalhtaxtulh ju lapanacni ju chunch pus jantu caꞌixꞌalaclhitꞌatakꞌoxilh ju Dios alakatam chivinti astan.
8 Pus isꞌakstu Dios ju jantu kꞌox xalhiulai tachi ju ixtalai ju makꞌaniya quintꞌaꞌisraelitaninꞌan.
Chai chani ma naulh:
Ju quitꞌin icnajun ni cachinaꞌ ju avilhchan acsni acꞌalaclhitꞌatakꞌoxiyaꞌ ju sastꞌi chivinti ju amachakꞌan ju xaꞌestado Israel chai ju amachakꞌan ju xaꞌestado Judea.
9 Jantu chun cajunaꞌ tachi ju icꞌalaclhitꞌatakꞌoxilh ju makꞌaniya ixlacpaiꞌan
acsni quiꞌakstu icꞌamaxtulh ju xalacatꞌun Egipto.
Pus ju yuꞌunch jantu tamuctaxtulh tachi ju xacꞌalaclhitꞌatakꞌoxita.
Pus yuchi icꞌalaclhimacaulh.
10 Para icnajun ni chani cajunaꞌ ju chivinti ju acꞌalaclhitꞌatakꞌoxiyaꞌ ju amachakꞌan Israel acsni catapasayaꞌ ju anuꞌ avilhchan.
Acꞌaxtakniyaꞌ ju kꞌox ixtacꞌatsanꞌan ni laich catacꞌatsayaꞌ tuchi iclacasqꞌuin ni catanaviyaꞌ.
Chai acꞌaxtakniyaꞌ ju kꞌox ixꞌalhunutꞌan ni catanaviputunach.
Chai isDiosꞌan acjunaꞌ.
Chai ju yuꞌunch quilapanacni catajunaꞌ.
11 Chai ju acsnich jantu tasqꞌuini ni xamatiꞌ camasunilh tam ixtꞌalapanac nin tam ixlakꞌau ni laich aquintamispa ju quitꞌin.
Jantu tasqꞌuini ni chunch catalalh ni si aquintamispakꞌoyaꞌ.
Mas yuꞌunch ju palai lactꞌicstꞌin cava u mas yuꞌunch ju palai lackꞌajinch cava.
12 Chai acꞌamacꞌacxaniyaꞌ ixtalakꞌalhinꞌan.
Chai jantu tavanan actipastacchokolh ju alactuꞌunti ju tanavita.