Ju Jesús xakꞌai pali junita tachi ju Melquisedec
7
Pus ju anuꞌ Melquisedec xakꞌai ucxtin ixjunita ju lakꞌachakꞌan Salem.
Pus Dios ju lhinonkꞌojui tachi chun ju taxtokni.
Chai yuchi ju xtaknilh ju lhichꞌalhcat ni kꞌai pali cava vachuꞌ.
Pus ju yuchi quipakxtoklh ju Abraham acsni taspꞌitcha ju yuchi junta alactꞌalalhajalh ilhuꞌan ju xalackꞌajin ucxtinin.
Chai ju Melquisedec sqꞌuinilh ju Dios kꞌox isꞌatsucunti ju Abraham.
2 Pus lakacavin taxtokni ju ixlhiminta ju Abraham ju ixlhajata lacalasat pus xtaknilh lakatamin ju Melquisedec.
Pus ixtapakaꞌut ju Melquisedec nomputun ni yuchi ju kꞌai ucxtin ju navi ju soknicꞌa.
Chai ju lakꞌachakꞌan junta kꞌai ucxtin ixjunita Salem ixjuncan.
Chai ju yuchi nomputun ni matiꞌ ju lasat ju anch.
Pus ju chunch va nomputun ni jantu lasani lapanac ixjunita vachuꞌ.
3 Pus jantu tsꞌokcanta tichi chavaich ju ixpai ixjunita ju Melquisedec nin yuchi ju ixnati nin ixtapakaꞌutꞌan ju makꞌaniya ixlacpai.
Jantu cꞌatsacan tavanan ju lakꞌaulh nin tavanan ju nilh.
Pus ni chunch ju lhitsꞌokcanta ju isꞌatsucunti pus tachi ju va chunch ixjunita isꞌatsucunti tachi ju isꞌatsucunti ju istsꞌalh Dios.
Tachi ju vachuꞌ ixjonkꞌalhita kꞌai pali.
4 Pus alaktsꞌintꞌit ni vasalh xakꞌai ixjunita ju Melquisedec.
Mas yuchi ju Abraham xtaknilh tijtamin ju lakacavin taxtokni ju ixlhajata lacalasat.
Chai ju Abraham jantu va xamatiꞌ ixjunita.
Ju yuchi xapai lhitalacxtuta tachi chun ju quijnanꞌan ju israelitanin juntau.
5 Ju laꞌixlhamapꞌaksin ju Moisés ixnajun ni tachi chun ju isꞌaskꞌatꞌan ju Leví ju palijni ixtajunita caꞌaxtaknicalh lakatamin ju lakacavin ixtaxtokni ju istꞌaꞌisraelitanin.
Pus va sia lhiꞌalakꞌavin talaxtaknilh ni si ixꞌapapanatnich ju Abraham ixtajunita.
6 Para ju Melquisedec jantu isꞌaskꞌatꞌa ixjunita ju Leví.
Para ixlaquilhtu xtaknicalh lakatamin ju lakacavin taxtokni ju ixlhiminta ju Abraham.
Chai ju Melquisedec sqꞌuinilh ju Dios kꞌox isꞌatsucunti ju Abraham mas jantu va xamatiꞌ ixjunita ju Abraham ni Dios ju ixkꞌalhtasunita ni lhu caꞌalinaꞌ ju ixꞌapapanatnich.
7 Chai ju quijnanꞌan ju israelitanin juntau cꞌatsayau ni yuchi ju palai xakꞌai ju lai sqꞌuin ju kꞌox isꞌatsucunti tam xamatiꞌ.
Palai jantu ju tichi ixlacata ju sqꞌuinican.
8 Pus ju Melquisedec chai tachi chun ju isꞌaskꞌatꞌan ju Leví ju palijni ixtajunita si taꞌamaklhtayanalh ju lhakꞌailaktsꞌin.
Pus ju isꞌaskꞌatꞌan ju Leví si tani ni va lapanacni ixtajunita.
Para laꞌixchivinti Dios lhichivinin ju Melquisedec tachi ju va jantu tavanan xani.
9 Pus ju Leví makꞌaniya ixpaiꞌan ixjunita tachi chun ju ixpalijniꞌan ju quintꞌaꞌisraelitaninꞌan.
Chai ju yuꞌunch taꞌamaklhtayanalh ju lhakꞌailaktsꞌin ju taxtaklh ju quintꞌaꞌisraelitaninꞌan.
Para ca laich acnaulh ni tachi ju va junch xtaklh vachuꞌ ixlhakꞌailaktsꞌin ju Leví acsni xtaklh ju Abraham.
10 Ca laich acnaulh ju chunch mas tucaꞌ istsucuta ju Leví acsni quipakxtokchilh ju Abraham ju Melquisedec ni ixpapanti ixjunita.
11 Acsni axtaknicalh ju quintꞌaꞌisraelitanin ju lhamapꞌaksin pus laꞌixmacniꞌan ju levitanin ju xtakcalh.
Chai ju yuꞌunch ixꞌapapanatnich ixtajunita ju Aarón chai vachuꞌ palijni ixtajunita.
Para matiꞌ ixjunita ixtachaput ju ani pupali nin yuchi ju lhamapꞌaksin.
Jantu lai ixtaꞌaxtakni ju lapanacni ju soknicꞌa isꞌatsucuntiꞌan laꞌixmacni Dios.
Pus yuchi ixlhitasqꞌuini ni caꞌula ju sastꞌi pupali tachi ixꞌanuꞌ ju Melquisedec.
Jantiyuꞌ tachi ixꞌanuꞌ ju Aarón.
12 Pus acsni mapaxacan ju pupali pus tasqꞌuini ni vachuꞌ camapaxacalh ju lhamapꞌaksin.
13 Pus ju tanulh lacasastꞌi pupali lhichivinincanta laꞌixchivinti Dios.
Yuchi ju Cristo.
Chai ju yuchi jantu ixpapanti ixjunita ju Leví.
Alai ixpapanti ixjunita apumatam chai jantu xamatiꞌ pali ixjunita sia lhiyuꞌunch.
14 Pus aktsꞌiya cꞌatsacan ni ixpapanti Judá ixjunita ju Cristo.
Chai jantu tuꞌuꞌ naulh ju Moisés lacalhamapꞌaksin ni laich pali cava ju tam ixpapanti ju yuchi.
15 Pus ju Cristo ni xakꞌai pali junita tachi ju Melquisedec pus anchach ju putasui ni mapaxalh ixlhamapꞌaksin ju Dios ju tsꞌoklh ju Moisés.
16 Pus ju Cristo jantiyuꞌ ju lai putanulh laꞌixpupali ni ixpapanti ixjunita ju Leví tachi ju ixnajun lacalhamapꞌaksin.
Alai yuchi lai xaputanui laꞌixpupali ni jantu lai xatamaknikꞌalhi.
Alai tꞌonkꞌalhi.
17 Pus laꞌixchivinti Dios ma chani ju najun ixlacata yuchi:
Uxintꞌi ju paliꞌat ju onkꞌalhitꞌa.
Chunch unitꞌa ju uxintꞌi tachi ju Melquisedec.
Chunch ju najun laꞌixchivinti Dios.
18 Pus ju pꞌulhnan lhamapꞌaksin ixlacata ju palijni makꞌosucalh ni matiꞌ ixjunita ixtachaput ni laich calasoknicꞌa isꞌatsucuntiꞌan ju lapanacni.
Jantu tuꞌuꞌ ixlhitapalai ixlacata yuchi.
19 Ju laꞌixlhamapꞌaksin ju Moisés jantu tavanan lai ixlhitajucan ju soknicꞌa atsucunti laꞌixmacni Dios.
Para ju chavai alin ju palai kꞌox chivinti ju lhilaksiyau.
Yuchi ni ulata ju Dios ju sastꞌi pupali.
Chai ju Cristo tanulh ju anch chai ixlacata yuchi laich calakꞌanau ju Dios.
20 Pus ju Dios lhipastacchokocalh isꞌakstu ixpumavasalaca ixchivinti acsni tavanan ulalh ju Cristo laꞌixpupali.
21 Pus ju levitanin acsni tavanan tatanu laꞌixpupaliꞌan jantu lhipastaccalh ju Dios ixpumavasalaca tuꞌuꞌ chivinti.
Para acsni tavanan tanulh laꞌixpupali ju Cristo pus ju Dios lhipastacchokocalh isꞌakstu ixpumavasalaca ixchivinti.
Pus laꞌixchivinti Dios ju tsꞌokcanta chani naulh ju yuchi:
Ju quitꞌin icDios chai iclhipastacchokocalh quiꞌakstu ixpumavasalaca ju quinchivinti chai jantu tam actinaulh.
Ju uxintꞌi paliꞌat onkꞌalhitꞌa
Chai chunch unitꞌa tachi ju Melquisedec.
Chunch ma naulh ju Dios.
22 Chai ni chunch ju ulhtucalh ju Jesús pus yuchi pucꞌatsayau ni aktsꞌiya aquintamuctaxtuniyan ju sastꞌi chivinti ju alactꞌatakꞌoxita ju lapanacni ju Dios.
Chai ju yuchi palai kꞌox.
Palai jantu ju pꞌulhnan lhamapꞌaksin.
23 Pus ixꞌapapanatnich ju Leví na ilhuꞌan ixtajunita ju ixtachꞌalhcatnan lacapupali ni va ixtatꞌankꞌojui ninkꞌonin chai jantu lai ixtatailhiꞌankꞌalhi ju ixlhichꞌalhcatꞌan.
24 Para ju Jesús ni jantu ni pus jonkꞌalhita pali.
Chai jantu tasqꞌuini ni catanu astan apumatam pali.
25 Chai yuchi lai lhixtakni isꞌatsucuntiꞌan jonkꞌalhita tachi chun ju talhilacaꞌanta ju Dios laꞌixmacni ju yuchi.
Pus lai alacmakꞌalhtaxtukꞌalhi ni tꞌonkꞌalhi.
Chai tꞌonkꞌalhi ni laich va tachi tapaininich ju Dios ju quilacataꞌan ju lhilacaꞌanauch ju yuchi.
26 Ju Jesús yuchi ju xakꞌai pali ju maktasqꞌuiniyau.
Matiꞌ apumatam ju ixtꞌachunch cava.
Ju yuchi lana na salaka junita.
Chai matiꞌ lana ixtalakꞌalhin.
Chai jantu tavanan alactuꞌununta.
Chai ju chavai jantu alactꞌaꞌalhtanan ju alactuꞌuni lapanacni.
Para lakꞌayacalh chai anch ju vilhcha ju lactꞌiyan.
27 Pus ju xakꞌai ixpalijniꞌan ju quintꞌaꞌisraelitaninꞌan tuncujun tuncujun tamakni ju atapacxat ixlacata ixꞌalactuꞌuntiꞌan isꞌakstuꞌan.
Chai astan tamakni ju atapacxat ixlacata ixꞌalactuꞌuntiꞌan ju ixtꞌalapanacniꞌan.
Para ju Jesús jantu maknitꞌajun tuꞌuꞌ atapacxat ixlacata ju alactuꞌunti.
Pus mas xakꞌai pali junita para jantu tasqꞌuini ni chunch ju calalh ni mapalhkꞌalhi ixtapalh ixꞌalactuꞌuntiꞌan ju lapanacni acsni tavanan makꞌaxtakchokocalh isꞌakstu laꞌixꞌaninti.
Chai jantu tasqꞌuini ni tavanan canavichokocalh.
28 Pus laꞌixlhamapꞌaksin ju Moisés ixꞌaxtaknican ixpupali ju lapanacni ju jantu salaka ixtajunita ni va lapanacni ixtajunita.
Para acsni makꞌosucalh ju anuꞌ lhamapꞌaksin pus ju Dios lhipastacchokocalh isꞌakstu ixpumavasalaca ixchivinti chai ulalh istsꞌalh laꞌixpupali.
Chai ju yuchi jonkꞌalhita salaka.