6
Pus jantu va yuchi ju chivinti ju pꞌulhnan lanican ixlacata ju Cristo ju va tsa tsa calhitamakaꞌuyau.
Alai catailhiꞌau ixlanica aliꞌ ixlacata ju Cristo ni lai camachakxayau ju palai lhixcai.
Pus jantu va yuchi ju calhitamakaꞌutsucuyau ju lanitauch tachi acsni maconcan ixnavica ju tuꞌuꞌ ju jantu lai aquintaxtakniyan ju sastꞌi quiꞌatsucuntiꞌan.
Nin yuchi ni calhitamakaꞌutsucuyau ni tasqꞌuini ni calhilaksiyau ju Jesús ni lai catakꞌalhtaxtuyau.
2 Jantu tasqꞌuini ni va yuchi calhitamakaꞌutsucuyau ixlacata tijpachux akpaxat u tachi acsni xamatiꞌ mokslani ixmacaꞌ laꞌisꞌaktsulh tam xamatiꞌ acsni cataiꞌulayach ixnavica ju ixlhichꞌalhcat ju Dios.
Jantu tasqꞌuini ni va yuchi calhitamakaꞌutsucuyau ju chivinti junta najun ni catalokꞌonchokoyaꞌ ju tanita.
Jantu tasqꞌuini ni va yuchi ju calhitamakaꞌutsucuyau ta yu pucꞌatsai ju Dios tichi chavaich ju camamakꞌalhkꞌajnikꞌalhicanaꞌ chai tichi chavaich ju jantu.
3 Pus ni calacasqꞌuinaꞌ ju Dios pus catailhiꞌau ixlanica ju palai lhixcai ixlacata ju Cristo.
4 Para alin lapanacni ju tamachakxata ixchivinti Dios ju tsꞌokcanta chai ju tamispa ju kꞌox atsucunti ju xtꞌakꞌa ju Dios chai tamispa lacatsꞌunin ju ixtachaput ju Spiritu Santu.
5 Chai tacꞌatsa ni na kꞌox ju ixchivinti Dios chai talaktsꞌinta ju tachaput ju alin ju chavai ni quilatachilh ju Cristo.
6 Pus ju yuꞌunch ni astan catamaconaꞌ ju Dios pus jantu lai xamatiꞌ alakmalakaspꞌitchokoi ni catalhilacaꞌanchokolh ju Cristo ni tachi ju va tamaquilhtachokotach aktam ju istsꞌalh Dios.
Chai tatalacasui laꞌixꞌucxlacapuꞌan ju ixtꞌalapanacꞌan tachi ju va jantu tuꞌuꞌ ixtapalhni talhiulai ju Jesús.
7 Ju quiꞌatsucuntiꞌan ju lapanacni juntau chunch junita tachi ju tuꞌuꞌ lacatꞌun junta va tsa tsa tamai ju xcan.
Pus ju anuꞌ lacatꞌun ni lhu caxtꞌakꞌaꞌ ju xatocꞌat ju laich cataꞌiyaꞌ ju tachꞌalhcatnanta ju anch pus ju Dios caꞌaktaijuyaꞌ ni palai lhu caxtꞌakꞌaꞌ.
8 Para ju anuꞌ lacatꞌun ni va si alhtucunuꞌ chai suniya achꞌitin capꞌunaꞌ pus jantu tuꞌuꞌ ixtapalhni junita.
Ju Dios canonaꞌ ni jantu kꞌox chai calakxavacanach.
Cꞌatsayau ni quintamuctaxtuniyan ju Dios ixchivinti
9 Pus mas chunchach ju iclajunau ji quiꞌalakꞌavin para iccꞌatsayau ni jantu chun layatꞌit ju uxijnan tachi ju anuꞌ lacatꞌun.
Alai tasui lamiꞌatsucuntiꞌan ni vasalh makꞌalhtꞌaxtꞌucꞌantꞌatꞌit.
10 Pus ju Dios sok navi ju tuꞌuꞌ chai ju yuchi jantu cacꞌapꞌaꞌ ju lhichꞌalhcat ju navinitꞌatꞌit.
Nin lai caticaplh ju amapaininti ju malacꞌasutꞌatꞌit ixlacata ju Dios acsni chꞌalhcꞌatnanitꞌit ju yuꞌunch ju talhilacaꞌanta ju Cristo.
Chai tus chavai vana va chunch ju tꞌailhipꞌinatꞌit.
11 Chai tachi ju lamapꞌainiyatꞌit ixlhichux miꞌalhunutꞌan pus iclacasqꞌuin ni vana va chun ju anavitꞌit cuenta tachi chun ju taxtokni ju quintajuntan ju Dios ni aquintaxtakniyan.
Chai iclacasqꞌuin ni chunch ju atꞌailhipꞌinaꞌitꞌit tus laꞌixꞌaclanti ju miꞌatsucuntiꞌan.
12 Iclacasqꞌuin ni ixlhichux miꞌalhunutꞌan atsꞌucꞌutꞌit tachi ju lhijunch ni alinch ju sastꞌi miꞌatsucuntiꞌan.
Chunch ju atsꞌucꞌutꞌit tachi ju talai ju lapanacni ju taꞌamaklhtayanan tachi chun ju ixꞌakꞌalhtasunita ju Dios.
Pus ju yuꞌunch taꞌamaklhtayanan ju yuchi ni talhilaksi ju Dios chai jantu tavanan jeks taꞌui.
13 Tachi ju lalh ju Abraham acsni kꞌalhtasunilh ju Dios ni lhu caꞌalinaꞌ ju ixꞌapapanatnich.
Pus ju Dios lhipastacchokocalh isꞌakstu ni ixmavasalaputun ixchivinti.
Chunch ju lalh ni matiꞌ apumatam ju palai kꞌai cava ju lai calhipastaccalh.
14 Chai ma chani ju juni ju Abraham:
“Slivasalh kꞌox atsucunti ju acxtakniyan chai slivasalh lhu caꞌalinaꞌ ju miꞌapapanatnich”.
Ma chunch ju junilh ju Dios ju Abraham.
15 Pus ju Abraham jantu jeks ulh.
Alai va tachi lhilaksilh ju ixchivinti Dios chai astan vasalh uctaxtulh tachi ju ixkꞌalhtasunita ju Dios.
16 Pus ju quintꞌaꞌisraelitaninꞌan acsni tamavasalaputun tuꞌuꞌ ixchivintiꞌan talhipastꞌacꞌa Dios ni yuchi ju palai xakꞌai.
Palai jantu ju yuꞌunch.
Chai acsni alin tuꞌuꞌ lakꞌaiti chai xamatiꞌ lhipastꞌacꞌa ju Dios ixpumavasalaca ju ixchivinti pus ju akꞌantam jantu lai tuꞌuꞌ aliꞌ najun.
17 Pus ni chunch ju talai ju va lapanacni pus vana va chun lalh ju Dios ni lai catamachakxayaꞌ ju lapanacni ju cataꞌamaklhtayananaꞌ ju kꞌox isꞌatsucuntiꞌan ni vasalh caꞌamuctaxtuniyaꞌ ju ixchivinti.
Pus yuchi lhilhipastacchokocalh isꞌakstu ixpumavasalaca ju ixchivinti acsni junilh ju chunch ju Abraham.
18 Ni cꞌatsayau ni jantu lai najun taꞌaklhtamat ju Dios yuchi lhicꞌatsayau ni aquintamuctaxtunikꞌoyan tachi chun ju quintajuntan ju quijnanꞌan ju lhilacaꞌantauch ju Cristo ni aquintamakꞌalhtaxtuyan.
Pus lhikꞌach lai lhilaksiyau ixchivinti Dios ni vasalh aquintalhiꞌanan ju lactꞌiyan.
19 Chai ni vasalh lacaꞌiyau ni aquintalhiꞌanan ju lactꞌiyan ju Dios pus jantu va tam tam nonau mas va tuchi min laquiꞌatsucuntiꞌan.
Jantu lai tam tam nonau ni yuchi ju Dios ju vilhcha lactꞌiyan ju lhilaksiyau.
20 Chai anchach vachuꞌ vilhcha ju Jesús ju pꞌulhnan chaꞌalh.
Astan ju quijnanꞌan cachaꞌanau.
Chai ju yuchi jonkꞌalhita xakꞌai quimpaliꞌan chai yuchi ju tapainini ju Dios ju quilacataꞌan.
Lana chunch ju junita tachi ju anuꞌ makꞌaniya pali ju Melquisedec ixjuncan.