5
Pus tachi chun ju ixpalijniꞌan ju quintꞌaꞌisraelitaninꞌan asacxtucanta laꞌixtalhavat lapanacni chai alhcaꞌulacanta ni yuꞌunch ju cataxakꞌalayaꞌ ju Dios ju ixlacataꞌan.
Chai yuꞌunch ju taxtakni ju Dios ju ixlhakꞌailaktsꞌinꞌan ju lapanacni.
Chai yuꞌunch ju tamaknini ju Dios ju atapacxat ju talhimini ju lapanacni ixtapalh ixꞌalactuꞌuntiꞌan.
2 Chai ju yuꞌunch ni tacꞌatsai ni va lapanacni tajunita vachuꞌ pus yuchi jantu jeks alaclhiꞌuni ju yuꞌunch ju jantucaꞌ tamispai ju stavasalanti chai ju taꞌalactuꞌununcaꞌ.
3 Chai ju yuꞌunch ni aktamixnin taꞌalactuꞌunun vachuꞌ pus tasqꞌuini ni vachuꞌ catamaknilh ju atapacxat ixlacata ixꞌalactuꞌuntiꞌan isꞌakstuꞌan tachi ju tamakni ju ixꞌatapacxatꞌan ju aliꞌin lapanacni ixlacata ixꞌalactuꞌuntiꞌan ju yuꞌunch.
4 Chai jantu lai xamatiꞌ tanui laꞌixpupali va laꞌixkꞌachat isꞌakstu.
Va yuchi ju lai tanui ju sacxtuta ju Dios tachi ju pꞌulhnan pali ju Aarón ixjuncan.
Dios ju sacxtulh ju yuchi.
5 Pus nin yuchi ju Cristo jantu takꞌaya isꞌakstu ni laich canaulh ni catanuyaꞌ laꞌixpupali.
Alai yuchi ju Dios ju xtaknilh ju chunch lhichꞌalhcat.
Chai ma chani ju junilh ju Cristo:
Ju uxintꞌi quintsꞌalhꞌat
Chai ju chavai icmalacasuta ni mimpai icjunita.
6 Chai ju alacatam laꞌixchivinti Dios ma chani juni:
Ju uxintꞌi onkꞌalhitꞌa pali.
Chunch ju unitꞌa tachi ju anuꞌ makꞌaniya lapanac ju Melquisedec ixjuncan.
Chunch ma junicalh ju Cristo.
7 Pus ju Cristo acsni ixtꞌajuncaꞌ ju ani lacamunutpaꞌ tꞌachivinilh ju Dios chai na tapaininilh lacakꞌai tꞌasat.
Chai slivasalh na kꞌalhulh.
Tapaininilh ju Dios ju lai caꞌixmakꞌalhtaxtulh laꞌixꞌaninti.
Chai ni na ixtalhoni ju ixpai pus yuchi lhiꞌaktaiju mas maknicalh.
8 Chai ju yuchi mas istsꞌalh junita para makꞌalhkꞌajnalh.
Chai chunch ju pucꞌatsa tuchi nomputun ju alacaꞌinti ni navinilh ju ixkꞌachat ju ixpai.
9 Pus ni navikꞌolh chux tachi ju ixlacasqꞌuin ju ixpai Dios pus jantu tuꞌuꞌ cꞌacxlh.
Yuchi lai lhixtꞌakꞌa ju atsucunti jonkꞌalhita lactꞌiyan.
Chai axtakni tachi chun ju taquiclacaꞌini ju yuchi.
10 Pus yuchi ju Dios ju lhcaꞌula ni xakꞌai palich cava ju Jesús tachi ju ixjunita ju anuꞌ makꞌaniya lapanac ju Melquisedec ixjuncan.
Jantu kꞌox ni jantu vana tailhiꞌancan ixti ju Dios
11 Pus na lhu xaclajumputunau ixlacata ju Cristo chai ixlacata ju Melquisedec para na xcai iclamavasalaniyau ni lana jantu naviyatꞌit cuenta ju tuchi iclajunau.
12 Pus ju uxijnan na makꞌanchich ju xalhilacꞌapꞌinatꞌit ju Cristo chai caꞌixlhijun ni amamakaꞌunin ixꞌuntꞌit ju chavai.
Para maktꞌasqꞌuinichꞌokꞌoyatꞌit alai ni amalanichꞌokꞌocꞌantꞌit ju taxtokni ju pꞌulhnan lanitꞌatꞌit ixlacata ju Cristo.
Tachi ju va xaꞌunchꞌokꞌoyatꞌit tachi ju tam askꞌatꞌa ju tsꞌiquicaꞌ.
Tachi ju yuꞌunch ju jantucaꞌ lai tavajin.
13 Pus va tichi chavaich ju jantu lai machakxai ju xachivinti ixlacata ju soknicꞌa atsucunti chunch junita tachi ju tam askꞌatꞌa ju va tsꞌiquicaꞌ.
14 Para ju lai tasacxtui tamalhch ju kꞌox chai tamalhch ju jantu ni va tsa tsa tasacxtui ju kꞌox pus chunch tajunita tachi ju tam kꞌaya lapanac ju laich ui ju vaiti.