4
Pus tus chavai quintajunan ju Dios ni lai caꞌastacnanau laꞌixmacni.
Para ni chunch ju tapasalh laꞌisꞌatsucuntiꞌan ju makꞌaniya quintꞌaꞌisraelitaninꞌan pus tasqꞌuini ni catalhananauch.
Jantu xcai ni caꞌalilh pumatam milhiꞌuxijnan ju catasu ni tachi ju va jantu catitanu ju anch.
2 Pus ju quijnanꞌan vachuꞌ juncantauch ni quintamakꞌalhtaxtuputunan ju Dios.
Vana va chunch juncantauch tachi ju ixꞌajuncanta ju makꞌaniya quintꞌaꞌisraelitaninꞌan.
Para ju anuꞌ chivinti ju takꞌasmatlh ju yuꞌunch jantu tuꞌuꞌ lhitapalalh mas ixtakꞌasmatꞌach ni lana jantu ixtalacaꞌi.
3 Pus va quijnanꞌan ju lacaꞌinitauch ixchivinti Dios ju caꞌastacnanau laꞌixmacni yuchi ni chani ma naulh ju yuchi:
Ni na xactalhkꞌamanta pus iclhipastacchokocalh quiꞌakstu ixpumavasalaca ju quinchivinti chai icnaulh
ni jantu tavanan lai catitatanu junta caꞌixtaꞌastacnalh ju laquimacni.
Chunch ju ma naulh ju Dios.
Pus acsni navikꞌolh ju lacamunutpaꞌ ju Dios chai astacnalh acsnich ju alilh junta lai astacnancan laꞌixmacni.
4 Chai cꞌatsacan ni lai astacnancan laꞌixmacni ni vachuꞌ astacnalh ju Dios laꞌixlhichꞌalhcat.
Pus chani ju najun laꞌixchivinti ju tsꞌokcanta ixlacata ju ixlhilakatujun avilhchan:
Ju ixlhilakatujun avilhchan astacnalh ju Dios laꞌixlhichꞌalhcat tachi chun ju ixnavita.
5 Para vana chani najun ju alacatam:
Ju yuꞌunch ma jantu tavanan lai catitatanu junta caꞌixtaꞌastacnalh ju laꞌixmacni.
Chunch ma naulh ju Dios.
6 Para aktsꞌiya cataꞌalinaꞌ ju aliꞌin ju catatanuyaꞌ junta cataꞌastacnanaꞌ laꞌixmacni Dios mas jantu lai xatatanui ju yuꞌunch ju pꞌulhnan ajunicalh ni ixꞌamakꞌalhtaxtuputun ju Dios.
Pus ju yuꞌunch jantu lai xatatanui ni jantu ixtalacaꞌi.
7 Pus ni aktsꞌiya caꞌalinaꞌ ju catatanuyaꞌ pus yuchi lhilhcaꞌulachokolh ju Dios alakatam avilhchan acsni lai tanucan junta caꞌastacnancanaꞌ laꞌixmacni yuchi.
Ju yuchi najun ni chavai acsni tꞌonaucaꞌ acsnich ju lai catanuyau.
Chunch ju naulh laꞌixchivinti ju David ju ixtꞌajun acsni makꞌanchich ixtanikꞌota ju yuꞌunch ju jantu ixtalacaꞌi.
Pus chani ju naulh tachi ju iclajuntau:
Ni ma kꞌasmatꞌatꞌit ni taxakꞌalayan ju chavai ju Dios
pus ma jantu pꞌas anavitꞌit ju miꞌalhunutꞌan.
Chunch ju ma naulh ju Dios laꞌixchivinti ju David.
8 Pus acsni alhiꞌalh ju Josué ju makꞌaniya quilacpaꞌitniꞌan ju xalacatꞌun Canaán jantiyuꞌ ixjunita junta astacnancan laꞌixmacni Dios.
Pus ni anchach caꞌixva pus jantu tuꞌuꞌ ixlhichivinchokolh astan ju Dios ju alakatam avilhchan acsni lai tanucan junta astacnancan laꞌixmacni yuchi.
9 Pus ju chunch putasui ni aktsꞌiya alin junta lai cataꞌastacnanaꞌ ju ixlapanacni Dios.
10 Pus ju tanunch junta lai astacnancan laꞌixmacni Dios vachuꞌ astacnanta laꞌixlhichꞌalhcat tachi ju Dios ni astacnalh laꞌixꞌanuꞌ.
11 Chai ni alin junta lai astacnancan laꞌixmacni Dios pus yuchi calhilhistacchokocau quiꞌakstuꞌan ni laich catanu.
Jantu xcai ni xamatiꞌ catsꞌankꞌa ni va jantu calacaꞌi tachi ju talalh ju yuꞌunch ju jantu ixtalacaꞌi.
12 Tasqꞌuini ni caquiclacaꞌiniyau ju ixchivinti Dios ni na tachapun junita ju yuchi chai laꞌixmacni yuchi lhitajuyau quiꞌatsucuntiꞌan ju conkꞌalhiyaꞌ.
Ju ixchivinti Dios quintamavasalaniyan ta yu tucan junita ju quiꞌatsucuntiꞌan u kꞌox u jantu.
Chai quintamavasalaniyan ta yu junita ju quiꞌatalacpastꞌacꞌatꞌan ju alin laquiꞌalhunutꞌan u kꞌox u jantu.
Laꞌixchivinti Dios pucꞌatsacan u kꞌox u jantu ju tuchi lacasqꞌuinau.
Chunch junita tachi ju tuꞌuꞌ machita ju acxputꞌui quicxtui.
Ni acpuchꞌucꞌulh ju tuꞌuꞌ pus lana tasukꞌojui ju ixpulacni ta junitach.
13 Jantu tuꞌuꞌ ju navita ju Dios ju lai catatankꞌanunilh ju yuchi.
Alai Dios alaktsꞌinkꞌojui chux chai laktsꞌin ta yu vasalh junita.
Chai yuchach ju cajunkꞌoju chux tuchi navitau ju quijnanꞌan acsni camakꞌosaspitcanaꞌ ju lapanacni.
Jesús ju xakꞌai quimpaliꞌan
14 Pus alin ju xakꞌai quimpaliꞌan ju tanu ju lactꞌiyan junta vilhcha ju Dios.
Yuchi ju Jesús istsꞌalh Dios.
Pus ixlhiyuchi tasqꞌuini ni va tachi calhilacaꞌanau ju yuchi.
15 Pus ju anuꞌ ju xakꞌai quimpaliꞌan junita lai machakxai ta yu cꞌatsancan ju va lhilapanac.
Chai machakxai acsni na xcai sastꞌucꞌau ju tuꞌuꞌ macxai ju mapastꞌacꞌanicanau ni vachuꞌ mapastꞌacꞌanicalh lhichux ju amacxcai tachi ju mapastꞌacꞌanicanau ju quijnanꞌan.
Va yuchi ni jantu tavanan alactuꞌunulh ju yuchi.
16 Chai ni machakxai ju Jesús ta yu cꞌatsancan pus cajunkꞌoju chux ju yuchi chai jantu catalhananau.
Caxakꞌalayau ju yuchi ju na lai navi lamapainin.
Ju chunch lai caꞌaktaijucanau lacaꞌamapaininti chai lai canavinicanau lamapainin acsni maktasqꞌuiniyau.