Ju Jesús palai tuꞌuꞌ. Palai jantu ju Moisés
3
Pus ju uxijnan ji quiꞌalakꞌavin isꞌaskꞌatꞌan Dios untꞌatꞌit chai lhisacxtꞌucꞌantꞌatꞌit ni amachakꞌan lactꞌiyan aꞌunaꞌitꞌit.
Pus apꞌastꞌactꞌit ta yu junita ju Jesús.
Pus ju Dios malakachatachilh ju ani.
Chai ju yuchi xakꞌai quimpaliꞌan junita tachi ju lacaꞌiyau ju quijnanꞌan.
2 Dios ju sacxtulh ni canaviyaꞌ ju ani lhichꞌalhcat.
Chai ju Jesús muctaxtulh.
Chai vana va chun ju Moisés.
Ju yuchi vachuꞌ muctaxtulh lacalhichꞌalhcat ju xtaknilh ju Dios ixlacata ixlapanacni yuchi.
3 Para ju Jesús palai kꞌai lhiulacanta.
Palai jantu ju Moisés.
Chun tachi ju tam xamatiꞌ ju lai yajui chakaꞌ.
Yuchi ju palai kꞌai lhiulacan.
Palai jantu ju chakaꞌ ju xanavi.
4 Pus tachi chun ju chakaꞌ alin tichi chavaich ju xanavi.
Para yuchi ju Dios ju navikꞌolh tachi chun ju taxtokni.
5 Pus ju Moisés slivasalh ni muctaxtulh ixlacataꞌan isꞌaskꞌatꞌan Dios.
Para tachi ju va xalapanac ixjunita.
Chai va ixnajun ju chivinti ju ixmavasalani ju Dios ixlacata ju aliꞌ chivinti ju canonaꞌ ju Dios astan.
6 Para ju Cristo ni istsꞌalh Dios junita pus muctaxtukꞌo tachi chun ju lhichꞌalhcat ju xtaknilh ju ixpai ni caꞌalhistaclh ju isꞌaskꞌatꞌan.
Chai ju quijnanꞌan isꞌaskꞌatꞌan Dios juntau ni va tachi lhilaksiyau ju yuchi chai va tachi calhikꞌachanau ni aquintalhiꞌanan ju lactꞌiyan.
Isꞌaskꞌatꞌan Dios cataꞌastacnanaꞌ laꞌixmacni yuchi
7 Pus tasqꞌuini ni va tachi calhilaksiyau ju Cristo.
Chai yuchi chani lhinaulh ju Spiritu Santu laꞌixchivinti Dios ju tsꞌokcanta:
Ni kꞌasmatꞌatꞌit ni taxakꞌalayan ju Dios
8 pus ma jantu pꞌas anavitꞌit ju miꞌalhunutꞌan tachi ju talalh ju makꞌaniya milacpaꞌitniꞌan acsni lana jantu ixtalacaꞌiputun acsni ixtatꞌajuncaꞌ junta va aseknicꞌa ixjunita.
Ju acsnich ma va ixtalaktsꞌimputun ju Dios ni vasalh catalhkꞌamalh ni jantu catanaviyaꞌ ju tuchi ixꞌajuni u jantu.
9 Pus junta va aseknicꞌa ixjunita ma anchach ju talaktsꞌintanulh ju Dios ju makꞌaniya milacpaꞌitniꞌan.
Ma chunch ju talalh mas tꞌupꞌuxam cꞌata ju talaktsꞌilh tachi chun ju anavinilh ju yuchi.
10 Pus yuchi lhitalhkꞌamalh ju Dios tachi ju ixtalai ju lapanacni ju ixtatꞌajun ju acsni.
Chai naulh ni ma aktsꞌiya tumpa tapastꞌacꞌa laꞌixꞌalhunutꞌan ju yuꞌunch.
Ma lana jantu taꞌamputun laꞌixti.
11 Pus ma yuchi lhitalhkꞌamalh ju Dios chai lhipastacchokocalh isꞌakstu ixpumavasalaca ixchivinti acsni naulh ni ma jantu tavanan catitaꞌastacnalh laꞌixmacni ju yuchi.
Chunch ju ma naulh ju Spiritu Santu.
12 Pus alaktsꞌintꞌitch ji quiꞌalakꞌavin.
Jantu xcai ni caꞌalilh pumatam ju milhiꞌuxijnan ju capacxalh ixꞌalhunut ju jantu kꞌox chai ju jantu lhilacaꞌamputun ju Dios.
Pus ju chunch junita ixꞌalhunut lana camaconach ju Dios ju lakꞌajunta.
13 Alai alamapꞌaksitꞌit ju milhiꞌuxijnan chux avilhchan acsni titaxakꞌalayan ju Dios.
Ju chunch jantu xamatiꞌ ju milhiꞌuxijnan ju caꞌokxchokꞌocalh chai na pꞌas cajunlh ixꞌalhunut va ixlacaꞌatalh ni alactuꞌunun.
14 Para ni va tachi calhilacaꞌanauch ju Cristo tus laꞌixꞌaclanti quiꞌatsucuntiꞌan tachi ju putaiꞌulatauch pus aktsꞌiya ixꞌanuch conkꞌalhiyau.
15 Pus ixchivinti Dios ju tsꞌokcanta chani najun:
Ni ma kꞌasmatꞌatꞌit ni taxakꞌalayan ju chavai ju Dios
pus jantu pꞌas anavitꞌit ju miꞌalhunutꞌan tachi ju talalh ju makꞌaniya milacpaꞌitniꞌan acsni lana jantu ixtaquiclacaꞌiniputun ju Dios.
Chunch najun laꞌixchivinti Dios ju tsꞌokcanta.
16 Pus apꞌastꞌactꞌit ni yuꞌunch ju quintꞌaꞌisraelitaninꞌan ju takꞌasmatnilh ixchivinti Dios para astan jantu talacaꞌinilh.
Ixchuxꞌan yuꞌunch ju amaxtulh ju Moisés ju xalacatꞌun Egipto.
17 Apꞌastꞌactꞌit ni yuꞌunch ju na taꞌalactuꞌunulh chai ixlhiyuchi atꞌalhkꞌamnilh ju Dios tꞌupꞌuxam cꞌata.
Chai ni na taꞌalactuꞌunulh pus yuchi lhipꞌuchꞌitama ixlacatunaꞌan junta aseknicꞌa ixjunita.
18 Apꞌastꞌactꞌit ni yuꞌunchach ju ajuni ju Dios ni jantu tavanan lai catitaꞌastacnalh laꞌixmacni va ixlacaꞌatalh ni lana jantu lai ixtalacaꞌi.
19 Pus tasui ni jantu lai ixtaꞌan laꞌixmacni Dios va ixlacaꞌatalh ni jantu talacaꞌinilh ixchivinti.